Pakti i ujrave me Greqinë: Pala greke pretendon se Turqia u dha rryshfet gjykatësve

[Edvin83]

Kufiri detar, në Greqi mendohet lufta
2011-09-30
Arben Llalla

Gazeta Shqip

Mediat e vendit fqinj nisin të analizojnë potencialin ushtarak dhe aleancat e dy vendeve

Marrëveshja e kufirit detar midis Shqipërisë dhe Greqisë ende vazhdon të jetë një problem delikat i pazgjidhur në favor të Greqisë. Tashmë kjo marrëveshje i ka kaluar kufijtë e saj të diskutimeve midis Greqisë dhe Shqipërisë. Mediat e ndryshme greke po i kushtojnë vëmendje të madhe marrëveshjes në fjalë, duke arritur deri te llogaritja e fuqisë ushtarake të dy vendeve në rast lufte. Në Shqipëri kjo çështje quhet e mbyllur, pasi Gjykata Kushtetuese e rrëzoi si të pavlefshme marrëveshjen e ujërave kufitare të nënshkruar midis dy qeverive në maj të 2009-s. Por, edhe pse kanë kaluar rreth dy vite, qeveria greke ende vazhdon të kërkojë që kjo marrëveshje të funksionojë, duke parë se politikanët shqiptarë janë “dorëlëshuar”. Në takimin e ministrit të Jashtëm Edmond Haxhinasto, që u zhvillua në Nju Jork me kolegun e tij grek Stavros Lambrinidhis, për herë të parë Greqia nuk kishte më si prioritet të drejtat e minoritetit, por marrëveshjen e ujërave. Por përse kaq shqetësim dhe këmbëngulje e grekëve për kufirin detar në detin Jon? Çfarë fshihet pas firmës së kësaj marrëveshje? Mediat greke kanë publikuar këto ditë shkrime që u përgjigjen këtyre pyetjeve.
Luftë në detin Jon!

Revista greke e shtatorit 2011, “Bilanci ushtarak dhe gjeopolitika”, shkruan me shkronja të mëdha: “Luftë në Jon, operacioni ‘Skenderbeis’”. Autor i këtij shkrimi është Joani S. Theodhoratu, i cili shkruan për interesat strategjike në detin Jon dhe Adriatik, ku ka rezerva të mëdha gazi, nafte dhe kalimi i tubacioneve që do të furnizojë Europën për shumë vite. Revista i kushton 10 faqe marrëveshjes së kufirit ujor midis Shqipërisë dhe Greqisë. Autori thotë se interesat e Greqisë për këtë zonë po pengohen nga ana e turqve, që tashmë kanë një aleancë ushtarake afatgjatë me Shqipërinë.

Si pasojë e mosfunksionimit në detin Jon e marrëveshjes së Greqisë me EEZ për nxjerrjen e gazit dhe naftës mund të kalohet në një konflikt ushtarak midis Greqisë dhe Shqipërisë. Edhe pse Greqia ka potencial ushtarak të fuqishëm ndaj Shqipërisë, grekët janë të bindur se Turqia do ta sulmonte Greqinë për interesat e saj në këtë rast. Autori ndër të tjera shkruan për stërvitjet e përbashkëta ushtarake midis Shqipërisë dhe Turqisë, duke shfaqur shqetësimet e Athinës, e cila prej 20 vitesh strehon mijëra shqiptarë emigrantë ekonomikë dhe është një nga investitorët kryesorë në Shqipëri.
Rezervat e naftës dhe gazit

Në studimin e tij, gjeologu dhe ekonomisti i energjetikës greke dr. Kostandinos A. Nikolas, ka shkruar se në detin Jon, Qipro dhe Kretë gjenden rezerva nafte dhe gazi natyror. Gazeta “Avriani” shkruante se Greqia mund të përfitojë afro 700 miliardë euro me nënshkrimin e marrëveshjes me EEZ. Nikolas kërkon të bëhen hetime në këto zona detare për burimet e hidrokarbureve. Shkencëtari në fjalë bën një pasqyrë historike të problemeve të Greqisë me kufirin detar që ka ndër vite të pazgjidhur me Shqipërinë, Turqinë, Libinë, Egjiptin, ndërsa me Italinë e ka zgjidhur në vitin 1978. Sipas tij, më 1994-n Shqipëria dhe Greqia ishin shumë afër për ta zgjidhur çështjen e kufirit detar, por autoritetet shqiptare nuk lëshuan pe, ishin më të ashpra dhe Greqia nënshkroi që blloku i zonës 5 Hamilton në detin Jon t’i takojë Shqipërisë. “Pas 15 vitesh Greqia mundi të nënshkruante një marrëveshje të re me qeverinë shqiptare për zonën 5 afër ishullit të Korfuzit, por Gjykata Kushtetuese e Shqipërisë e rrëzoi këtë marrëveshje”, shkruan dr. Kostandinos sa i përket kufirit detar me Shqipërinë.

[Boy]

Me leket e kujt? Do beje lufte me leket qe po i japin Evropianet per te mbijetuar? Te bejne prova, po ua mbyllin rubinetin fare ato dhe te jetojne me qiri e feta greke pastaj.

[Hyllien]

Haxhinasto: Gati negociatat për marrëveshjen me Greqinë



TIRANE- Qeveria shqiptare është gati të nisë negociata me palën greke për zbatimin e marrëveshjes së ujërave detare. Zv/kryeministri dhe ministri i Jashtëm, Edmond Haxhinasto bëri dje të ditur se marrëveshja e ujërave me Greqinë do të realizohet bazuar në Kushtetutën e Republikës së Shqipërisë.

Haxhinasto njoftoi se për paktin detar do të ngrihet grupi i punës, i cili do të punojë paralelisht me atë grek. Sipas tij, Shqipëria nuk ka pranuar dhe nuk do të pranojë asnjë lloj presioni rreth paktit detar dhe se marrëveshja e ujërave do të përmbyllet në bazë të ligjeve dhe interesave të shqiptarëve.

“Mund të them që kemi dizenjuar komisionin përkatës, përbërjen e tij. Ky komision do të plotësohet nga përfaqësues të institucioneve respektive, të cilat do të jenë pjesë e ekipit, i cili do të shqyrtojë me palën greke të gjithë hapësirat dhe mundësitë për ta konkluduar marrëveshjen në fjalë” - deklaroi dje Haxhinasto gjatë një bashkëbisedimi me gazetarët pas kthimit nga Nju Jorku.

----------------------

Merr vesh dikush nga ligjet këtu ? Si mund të ribëhet komisioni kur Gjykata Kushtetuese u shpreh kategorikisht kundra ? Për cfarë hapësirash flasin këta ? Apo do i hedhin në erë si Konomi dhe ata, se fundia, cështje pronash kemi dhe këtu.

[Fleur Blanche]

Merr vesh dikush nga ligjet këtu ? Si mund të ribëhet komisioni kur Gjykata Kushtetuese u shpreh kategorikisht kundra ? Për cfarë hapësirash flasin këta ? Apo do i hedhin në erë si Konomi dhe ata, se fundia, cështje pronash kemi dhe këtu.

Nga ligjet besoj se marr vesh, por nga Berishlliqo-Maliqet, nuk besoj se kuptoj gjë, dhe në fakt as unë nuk po arrij të kuptoj se ç'a thotë ky Haxhiu !

Në një shtet ligjor, Kushtetuta është në hierarki dhe pas saj vijnë marrëveshjet e ratifikuara nga shteti, dhe duke qenë se interpretimi që i ka bërë GJ.K kësaj marrëveshje duke e shpallur se bie ndesh me Kushtetutën, që siç theksova është në hierarki më të lartë, ipso iure do thotë që edhe komisioni që duan këta të ngrejnë, është antikushtetues.

Veç në paçin dalë nga moda ato që kam mësu rreth Kushtetuetshmërisë, ka mundësi që këta mbase janë në rregull, dhe ligjshmëria, me siguri është streha e fundit e maskarenjve, po ashtu e dalë mode !

Kupto ti ? Qashtu, thuaj !

[brooklyn2007]

TIRANE-Marrëveshja detare me Shqipërinë, ngacmoi Turqinë” Këto fjalë janë thënë vetëm pak ditë më parë nga ish-Ministrja e Jashtme e Greqisë, Dora Bakojani në një intervistë për emisionin “Dosje të reja” që transmetohet në televizionin e shtetit fqinj, SKAI.
Në këtë emision Bakojani së bashku me personazhe të tjerë të njohur të Greqisë, hedhin dritë mbi prapaskenat e marrëveshjes së shumë përfolur, e cila për Greqinë ishte një marrëveshje e përsosur. Por, gazetari grek Stavros Lygeros arrin deri aty sa të deklarojë se Turqia ka ndërhyrë ashpër duke i dhënë ryshfete Gjykatës për të rrëzuar këtë marrëveshje.
Dora Bakojani
Ish-Ministrja e Jashtme Greke, Dora Bakojani e pyetur nga gazetarja e emisionit “Dosje të reja” shpreh në një farë mënyrë keqardhje për prishjen e kësaj marrëveshje, e cila sipas saj kishte plotësuar të gjitha qëllimet e politikës së jashtme greke. “Duhet të them se kjo marrëveshje ishte “State of the art”. Kishim arritur të plotësojmë të gjitha qëllimet e politikës së jashtme greke, por njëkohësisht të bëjmë edhe një punë ndërmarrëse që ishte tërësisht e nevojshme për marrëdhëniet ndërmjet dy vendeve. Atëherë kishte kundërshti nga Partia Socialiste që doli me argumentin se i mori të gjitha Greqia dhe se nuk duhet të ishte nënshkruar me të tilla politika”, – ka deklaruar Bakojani.
Por, pjesa më e fortë e intervistës së saj është momenti, kur ish-Ministrja e Jashtme tregon se ishte e bindur se kjo marrëveshje do të ngacmonte shumë dhe palën turke. “Nuk kisha asnjë dyshim, nuk kisha ndonjë vërtetim, por nuk kisha dyshime se kjo marrëveshje kishte ngacmuar edhe Turqinë. Më pas marrëveshja shkoi në Gjykatën Kushtetuese dhe aty u rrëzua”, – u shpreh për SKAI ish-Ministrja e Jashtme e Greqisë, e cila ishte një prej firmëtareve të kësaj marrëveshje.
Stavros Lygeros
Në emisionin “Dosje të reja”, i pranishëm ishte dhe një prej gazetarëve më të njohur të shtetit fqinj, Stavros Lygeros, i cili lëshoi akuza të rënda, sipas të cilave Turqia kishte korruptuar anëtarët e gjykatës për të rrëzuar marrëveshjen detare mes Shqipërisë dhe Greqisë. “Bëhet e njohur, dhe kur e di unë, do me thënë që e dinin edhe shërbimet e Ministrisë së Jashtme që turqit ndërhynë shumë ashpër, duke dhënë ryshfet edhe tek gjykatësit që krijoi një klimë që çoi aty ku çoi”, – u shpreh gazetari Lygeros për televizionin grek SKAI.
HISTORIA
Pakti detar më Greqinë u nënshkrua nga dy qeveritë në vitin 2009. Marrëveshja në fjalë është firmosur më datë 27.04.2009 nga pala shqiptare dhe ajo greke, pas një vizite të vetë kryeministrit grek të asaj kohe dhe ministres së Jashtme në vendin tonë. Pakti detar u kundërshtua më forcë nga një pjesë e madhe e opinionit publik, si një marrëveshje që cenonte rëndë kufijtë territorial.
Por, ishte Gjykata Kushtetuese e cila rrëzoi në datën 26 janar 2010, me votim unanim 9-0, marrëveshjen e përcaktimit të kufirit detar me Greqinë. Një ndër arsyet më të forta që detyruan gjykatën të merrte këtë vendim, ka qenë fakti se anëtarët e grupit negociator të palës shqiptare nuk e kishin marrë lejen speciale nga Presidenti i Republikës, për të negociuar me palën greke. Gjithashtu Gjykata Kushtetuese në vendimin e saj theksoi se në projekt-marrëveshjen në fjalë konstatohen shkelje procedurale dhe substanciale që bien në kundërshtim me Kushtetutën dhe Konventën e Tretë Ndërkombëtare të OKB-së për të Drejtën e Detit të vitit 1982.

(d.b/GazetaShqiptare/BalkanWeb)

http://www.balkanweb.com/kryesore/1/...sve-75973.html

[angmokio]

.....hedhin dritë mbi prapaskenat e marrëveshjes së shumë përfolur, e cila për Greqinë ishte një marrëveshje e përsosur......

..............Kishim arritur të plotësojmë të gjitha qëllimet e politikës së jashtme greke......

C'fare fshihet pas kesaj marreveshje qe qenka kaq e persosur per Greqine?

Kush ka informacion te bazuar ne fakte te na e thote se llafe kafenesh c'fare nuk kemi degjuar.

[s0ni]

Greqia doli me gisht ne goje edhe po ben gam gam kot tani. Paska qene "state of the art" sipas grekeve kjo marreveshje ncncn qe keto s'dine cfare nxjerrin nga goja.

[brooklyn2007]

Marreveshja ishte e perkryer per Greket, pasi pervec se zgjeronin territorin e tyre detar ne nje zone kyce detare sic eshte kanali i Otrantos, mund te punonin pa kokecarje ne te ardhmen ne nje zone ku eshte vertetuar tashme se ka pasuri te konsiderueshme hidrokarburesh. Pala shqiptare thjesht nuk fitonte asgje pervec mbeshtetjes politike nga Athina per qeverine e Saliut.

[bindi]

Nese per greket nje marveshje e tille ka qene "state of dhe art",kjo per opinioni e gjere Shqiptare ka qene nje akt tradhtie nga ana e Qeverise Shqiptare e cila me nje marveshje te till cenonte integritetin dhe sovranitetin territorial te Republikes se Shqiprise!!Gjykata kushtetuse do duhej te padise dhe te hedh ne gjygj te gjithe akteret e pales shqiptare te ksaj marveshje pikrisht me motivacion te aktit te tradhtise dhe cenim te sovraniteti dhe integritetit teritorial te Republikes se Shqiprise dhe shpalle fajtore te gjithe ato qe guxojne te bejne pazare me token dhe hapsiren territoriale dhe ujore te Republikes se Shqiprise...

[EDLIN]

Në emisionin “Dosje të reja”, i pranishëm ishte dhe një prej gazetarëve më të njohur të shtetit fqinj, Stavros Lygeros, i cili lëshoi akuza të rënda, sipas të cilave Turqia kishte korruptuar anëtarët e gjykatës për të rrëzuar marrëveshjen detare mes Shqipërisë dhe Greqisë. “Bëhet e njohur, dhe kur e di unë, do me thënë që e dinin edhe shërbimet e Ministrisë së Jashtme që turqit ndërhynë shumë ashpër, duke dhënë ryshfet edhe tek gjykatësit që krijoi një klimë që çoi aty ku çoi”, – u shpreh gazetari Lygeros për televizionin grek SKAI.

Kete punen e turqve e ka permendur edhe me pare dikush ketu ne forum .. me duket se ne lidhje me A.K.... si eshte kjo pune na sqaroni o njerez..