Artan Kristo, “non grata” në Egjipt dhe Siri
Madhesia e germave: Decrease font Enlarge font
image
I arrestuari për nxitje të terrorizmit, Artan Kristo, ishte dëbuar nga dy vende myslimane, për arsye ende të paqarta. Prokuroria heton lidhjet e tij me disa “celula” radikale në Kosovë e Maqedoni
Leonard Bakillari
TIRANË - Artan Kristo, i arrestuar pak kohë më parë nën akuzën e nxitjes së terrorizmit, rezulton të jetë shpallur person i padëshirueshëm në dy shtete, që njihen për besimin e devotshëm ndaj Islamit. Sipas të dhënave të siguruara nga prokuroria, të cilat janë konfirmuar edhe nga autoritetet e këtyre vendeve, rezulton se Artan Kristo është shpallur person i padëshiruar në Egjipt e Siri, çka vë në dyshim veprimtarinë e tij gjatë kohës që ka qëndruar në këto vende. Sipas prokurorisë, nuk bëhen të ditura motivet zyrtare të vendimit të marrë nga këto dy vende me pjesën dërrmuese të popullsisë myslimane, por dyshohet se shpallja e tij si person i padëshiruar mund të ketë lidhje me veprimtarinë e tij të dyshimtë. Ndërkohë, hetimet në Shqipëri për Kriston kanë zbuluar të tjera lidhje të tij, të cilat pritet të përdoren në sallën e gjyqit.
Rrjeti i Kristos
Burime nga prokuroria bëjnë me dije se dyshohet që Kristo të jetë përfshirë në një rrjet celulash, që kanë shfaqur tendenca radikale në rajon. Të paktën këto janë të dhënat që tashmë ndodhen në duart e grupit hetimor, të cilat tregojnë se Kristo, i njohur ndryshe si Muhamed Abdullahi, ka mbajtur kontakte me grupe të dyshimta në Kosovë e Maqedoni. Burime pranë grupit hetimor konfirmojnë se këto të dhëna janë zbuluar jo vetëm në komunikimet elektronike, që i dyshuari për nxitje terroriste ka pasur gjatë kohës që ishte nën vëzhgim, por edhe nga një sërë materialesh të tjera kompromentuese që i janë gjetur pas kontrollit të ushtruar në banesën e tij. Pas analizimit të të dhënave, prokuroria ka ngritur dyshimet se Kristo është përpjekur të vendosë kontakte, me qëllim predikimin e radikalizmit edhe në vendet e rajonit, ku gjithashtu ka të dhëna se veprojnë celula që nën koperturën e fesë islame, kryejnë veprimtari të dyshimtë, kryesisht duke predikuar rreth Xhihadit.
Të dhënat kompromentuese
Burime pranë prokurorisë thonë se nga përgjimi i adresës së e-mailit “eddirajeh@hotmail.com”, që përdorej nga Artan Kristo rezulton se ai ka pasur kontakte të shumta me persona të dyshimtë në Kosovë e Maqedoni, që sipas akuzës dyshohet se kanë prirje radikale. Për këtë qëllim, pasi kanë verifikuar emrat që ka kontaktuar Kristo, adresat dhe numrat e tyre të kontaktit, mësohet se drejtësia shqiptare u ka kërkuar autoriteteve të këtyre vendeve verifikimin e informacioneve që ata disponojnë rreth lidhjeve që Kristo ka pasur në këto dy vende. Po ashtu, dyshimet shtohen dhe informacionet bëhen edhe më të plota për hetimin nga materialet e gjetura në banesën e Kristos, ku ndër të tjera janë kapur edhe të dhëna të plota për aktivitetin e tij në Shqipëri, Maqedoni dhe Kosovë, të cilat kryesisht kanë qenë adresa, numra telefoni, emra personash, një pjesë e të cilëve të njohur për aktivitet të dyshimta në këto vende. Prokuroria thotë se të gjithë këto materiale tashmë janë analizuar dhe është arritur të provohet se të paktën në Shqipëri, Artan Kristo ka predikuar mbi Xhihadin, duke zgjedhur grupe të vogla të rinjsh, në fshatin e tij të banimit, në Rrashbull të Durrësit dhe në Golem.
Hetimet e prokurorisë
Kristo, dyshimet për
njeriun që predikoi Xhihadin
TIRANË - Artan Kristo u arrestua pak javë më parë nën akuzën e nxitjes, thirrjes publike dhe propagandës për kryerjen e veprave me qëllime terroriste, e cila u bazua në disa materiale video, të postuara në internet. Sipas këtyre videove, Kristo propagandonte Xhihadin, por jo në formën e parashikuar nga feja islame. Duke përdorur termin “Xhihad”, ai u kërkonte grupeve të të rinjve të luftonin me të gjitha armët e mundshme për t’u kthyer myslimanëve vendet që u kanë marrë qafirët e të krishterët. Pasi janë analizuar këto të dhëna, hetuesit kanë arritur në përfundimin se Artan Kristo ka bërë thirrje për nxitje terrorizmi, akuzë e cila vazhdon të jetë ende nën hetim, së bashku me tentativat e tij për të përhapur në Kosovë e Maqedoni këtë formë predikimi, duke përdorur si mbulim librin e shenjtë të Kuranit. Vetë Kristo ka mohuar lidhjet e tij me një veprimtari të mundshme terroriste, duke akuzuar për sajesë të akuzës Shërbimin Informativ Shtetëror. Emri i Artan Kristos është bërë i njohur për policinë pas vrasjes së sekretarit të Komunitetit Mysliman, Salih Tivari. Në kuadër të hetimit për këtë çështje, policia urdhëroi bllokimin e pasaportës së tij, por pasi nuk siguroi dot prova, nuk ngriti asnjë akuzë zyrtare ndaj Artan Kristos. Disa muaj para arrestimit të tij, në mars të këtij viti, emisioni “Fiks Fare” denoncoi publikisht Artan Kriston, i cili nën petkun e hoxhës kërkonte shuma të konsiderueshme të hollash, duke pretenduar se ishte në gjendje të shëronte sëmundje për të cilat mjekësia nuk mund të bënte asgjë. Të gjitha këto të dhëna, sipas prokurorisë, edhe pse nuk kanë lidhje me hetimin që po kryhet aktualisht, tregojnë për veprimtarinë e dyshimtë që Artan Kristo ka pasur duke u hequr si hoxhë dhe predikues i fesë islame. Veprimtaria e dyshimtë e 31-vjeçarit u diktua nga Shërbimi Informativ Shtetëror në mesin e këtij viti dhe pasi u siguruan të dhënat e nevojshme, më 10 qershor iu kërkua Prokurorisë së Tiranës të nisë ndaj tij hetimin nën akuzën e “nxitjes, thirrjes publike dhe propagandës për kryerjen e veprave me qëllime terroriste”, të cilën sipas hetimit ai e predikonte prej disa kohësh me dy grupe të rinjsh, duke konceptin e Xhihadit, i cili njihet në Islam, por jo në formën që predikohej nga Artan Kristo. L. Bakillari
Përgjigju Duke Cituar
Postuar më parë nga gimche
naim%20ternava.jpg)
Krijoni Kontakt