Në këtë situatë të tensionuar të politikës Shqiptare, diku i fshehur, i pafokusuar, dhe i paanalizuar nga media dhe politika qëndron zv. Kryeministri dhe Ministri i Jashtëm, z. Ilir Meta.
Duket vërtet e çuditshme që e gjithë media dhe vetë opozita janë fokusuar dhe ngarkojnë me përgjegjësi për zgjidhjen e krizën vetëm Sali Berishën. Po Ilir Meta, ai që e solli dhe e mban në jetë dhe pushtet këtë qeveri dhe këtë krizë politike, përse injorohet dhe anashkalohet si nga media ashtu edhe nga opozita?
Diku në një shkrim të para disa muajsh titulluar "Berisha-Meta dhe Qeveria Badjava", kam theksuar se "koha do të tregojë se çfarë motivoi Metën për t'iu bashkuar Berishës. Nëse bashkpunimi i tyre është fryt i një pazari të ulët dhe të jashtligjshëm politik, atherë ne nuk duhet të presim asnjë ndryshim midis sjelljes së Metës dhe asaj të Berishës. Ata të dy do të jenë plotësues të njëri tjetrit, dhe derisa populli të arrijë t'i largojë nga pushteti, të dy do të jenë drejtues të një qeverisje badjava.
Nga ana tjetër, nëse bashkpunimi i Metës me Berishën është thjesht rrezultat i një hakmarrje politike e të parit ndaj Ramës, atherë egzistojnë të gjitha gjasat që Meta t'i largohet Berishës dhe populli të zgjidh krizën aktuale përmes zgjedhjeve të parakohshme. Kjo do të bëhej edhe më e besueshme dhe realiste nëse tensioni politik do të përshkallëzohej në të ardhmen."
Dhe ja ku jemi në mesin e një krize dhe kaosi politikë ku Ilir Meta nuk ka treguar dhe nuk po tregon asnjë shenjë sado të vogël pavarësie nga Sali Berisha. Bile çdo ditë që kalon e portretizon Metën si një sozi, adjutant, dhe zëdhënës i Berishës.
Dhe kjo sjellje e Metës verteton dhe na bën të besojm fuqimisht se qeveria "Berisha 2" ishte fryt i një pazari të fshehtë antikushtetues midis Sali Berishës dhe Ilir Metës. Ky pazar antiligjor konsistonte në dy pika kryesore: (1) Sali Berisha i garantonte Ilir Metës mandatin e deputetit në qarkun e Tiranës, dhe (2) Ilir Meta i garantonte Sali Berishës mbështetje për një qeveri të re me kryeministër Sali Berishën.
Për të plotësuar detyrimin e tij për Metën, për t'i dhuruar mandatin, Berisha manipuloi dhe vodhi votat në zonat periferike të qarkut Tiranë. Nga ana tjetër, Meta e plotësoi detyrimin e tij duke deklaruar menjëherë dhe vrullshëm bashkimin e tij me Berishën me qëllim që kjo lëvizje t'i jepte kurajo komisionerëve hajdutë në të gjitha instancat për të manipuluar votat në favor të Metës.
Ky bashkim i menjëhershëm nxiti gjithashtu Komisionin Qëndror të Zgjedhjeve dhe Kolegjin Zgjedhor që të ndërmerrnin vendime antiligjore dhe antikushtetuese me besimin se çdogjë do të arkivohej ashtu siç ishte bërë me zgjedhjet e mëparshme. Këtu lindi kriza që po përjeton sot politika Shqiptare.
Kjo marrveshje është virusi që ka shkaktuar këtë katrahurë dhe krizë politike të paprecedentë. Ndaj përveç Berishës, Ilir Meta duhet të mbahet përgjegjës kryesorë për situatën e krijuar. Ai është po aq fajtor sa edhe Berisha. Bile, është edhe për shkak të frikës së ç'nderimit politik të Metës, dhe rrjedhimisht të qeverisë, që Berisha nuk pranon transparencën dhe hapjen e kutive të zgjedhjeve të 28 Qershorit.
Berisha, më shumë se çfarëdo gjë tjetër, i friksohet një rinumërimi të votave në qarkun e Tiranës pasi prej aty do të dilte që Meta nuk ka të fituar mandatin. Një Ilir Meta deputet jolegjitim e bën komplet qeverinë "Berisha 2" ilegjitime në sytë e Shqiptarëve.
A iu kujtohet Ilir Meta që pretendonte se do të merrte 35 deputetë dhe do të bëhej kryeministër? A iu kujtohet Ilir Meta kur doli më 29 Qershor dhe akuzoi qeverinë dhe opozitën për manipulim të zgjedhjeve dhe vjedhje të mandateve të partisë së tij? Atherë përse nuk pranon dhe kërkon Meta që të hapen kutitë me qëllim që të gjejë ata 31 deputetë që i janë vjedhur?
Nëse kjo do të ishte e vërtetë, do të ishte idioteske dhe allogjike që Meta të refuzonte apo të ndalonte, siç po bënë aktualisht, transparencën dhe hapjen e kutive të votimit. Përmes hapjes së kutive, Meta do t'ju tregonte Shqiptarëve fuqinë reale të forcës së tij politike dhe do të rehabilitonte profilin e LSI në politikën Shqiptare.
Nisur nga ky paradoks, reagimi i Metës kundër transparencës dhe mbështetja e pakufijshme që ai po i ofron Berishës tregon dhe vërteton qartë se Metës jo vetëm që nuk i janë vjedhur mandatet, por edhe mandati qe ai mban aktualisht është mandat i vjedhur përmes manipulimit të votave.
Duke e analizuar profilin politik të Metës në konteksin e ngjarjeve politike që nga zgjedhjet e 28 Qershorit, ne arrijmë të dallojmë qartë përgjegjësinë që Meta mbanë për krijimin e këtij kaosi politik.
Si i tillë, ai duhet të konsiderohet nga ana e medias dhe opozitës Socialiste i njëjtë me Sali Berishën. Socialistët, gjithashtu, duhet ta kuptojnë qartë që sjellja e Berishës nuk përbën ndonjë çudi për politikën Shqiptare. Deklarimet e tij nuk kanë ndryshim nga deklarimet që ai bënte në vitin 1996-1997.
Sali Berisha ka dëshmuar se për pushtet është i gatshëm që të vendos Shqiptarin kundër Shqiptarit deri në fatalitet. Ishte ky Sali Berisha që betohej si president i vendit në një kohë kur Shqiptarët vriteshin me njëri tjetrin në vitin 1997. Ndaj mos prisni që po ky Berishë të bëjë transparencë apo të japë dorheqje pa sakrifica apo pa derdhur më parë gjakë Shqiptari.
As mos pyesni se që nga buron kjo dëshirë e Berishës për ta çuar Shqipërinë në këtë pikë. Ajo është po aq intriguese sa edhe vetë ngjitja e tij e rrufeshme në "parinë" e politikës Shqiptare në fillimet e demokracisë.
Por opozita duhet që kësaj radhe të mos ia japë Berishës kënaqësinë e të vënit të Shqiptarit kundër Shqiptarit. Opozita dhe media duhet të fokusohen tek Ilir Meta. Opozita duhet ta kërkojë zgjidhjen e situatës tek ai që e formuloi dhe i dha jetë kësaj katrahure politike dhe këtij përbindshi politik të quajtur Sali Berisha.
Meta është i vetmi përson përgjegjës për zgjimin e kësaj "mumje" shkatërrimtare dhe krijimin e kësaj situate kaotike. Meta gjithashtu është i vetmi aktorë politik që mund ta zgjidh krizën politike pa shkaktuar kosto të larta për vendin.
Opozita socialiste ka detyrimin politik të vërtetojë nëse Ilir Meta është i gatshëm ose jo, që ashtu si Berisha, të mbajë pushtetin me çdo mjetë, edhe nëse kjo do të kërkonte jetë dhe gjak Shqiptari. Populli, sidomos ai opozitar, ka të drejtën ta dijë këtë gjë pasi kjo do të shërbente si element vlerësimi në të ardhmen.
Në vijimësi të kësaj analize, deklarata e disa ditëve më parë e ambasadorit të OSBE Robert Bosch rreth bisedimeve të fshehta PD-PS tregon se egzistojnë përpjekjet për të arritur një marveshje, edhe pse zgjidhja duket e largët.
Një zgjidhje e tillë e ardhur përmes bisedimeve të fshehta PD-PS do të ishtë fatale për fatin politik të Ilir Metës dhe LSI. Meta do të ishte i fundit që do të pranonte një zgjidhje të krizës nga bisedimet e fshehta PD-PS. Në këtë rast, ai do të humbiste protagonizmin politik dhe do të shndërrohej në një fundërinë politike e tejpërdorur që nuk do t'i nevojitej më as Berishës dhe as Ramës.
Fundi i Metës do të ishte edhe më i turpshëm nëse kjo marveshje do të arrihej pas shumë sakrificash dhe pasi vendi të kishte paguar një kosto të lartë (siç ndodh rëndom kur qeveris Berisha). Në këtë rast, Meta do të konsiderohej jo vetëm "kadavër" politike e pavlerë por ai do të merrte me vete edhe përgjegjësitë për krijimin e kësaj katrahure dhe për papërgjegjshmërinë e tij për ta zgjidhur krizën duke evituar kostot e larta dhe sakrificat.
I ndodhur përpara kësaj situate, Meta do të konsideronte disa alternativa. Alternativa e parë do të ishte marrja e rolit të protagonistit në marveshje dhe të vendoste kushtet e tij si për Berishën ashtu edhe për Ramën me qëllim që LSI të mos dëmtohej politikisht. Kjo do të ishte e pamundur nëse njëra palë nuk do të pranonte këtë variant.
Për shembull, nëse PS nuk do të pranonte bisedime trepalëshe (që janë edhe gjasat), atherë ky variant do të bëhej i pamundur. Në vazhdim, Meta do të preferonte një marveshje me Ramën dhe do të ofronte dorheqjen e tij nga qeveria Berisha para se një marveshje PD-PS të kristalizohej dhe implementohej. Ky mund të konsiderohet si varianti më i mundshëm aktualisht.
Meta do të preferonte bashkpunim me Ramën nëse përfitimi i tij do të ishte më i madh sesa "përfitimi" që do të vinte nga marveshja PD-PS. Nga ana tjetër, Rama ka dy variante nga të cilët do të zgjidhte më të mirin.
Ai do të preferonte bashkpunimin me Metën nëse përfitimi do të ishte më i madh sesa përfitimi nga marveshja me Berishën. Alternativa e tretë për Metën do të ishte të qëndronte larg bisedimeve duke shpresuar që Berisha do ta zgjidhte situatën sipas "mënyrave të tij". Kjo, ashtu siç u shpjegua më sipër, do të ishte vetvrasje politike për Metën.
Por pavarësisht alternativës që do të zgjedhi Meta, është e padiskutueshme që ai mban mbi supet e tij përgjegjësi të madhe për kaosin politik që po përjeton Shqipëria. Përgjegjësia e tij është e njëjtë me përgjegjësinë e Berishës pasi Meta është ai që e solli dhe e mbanë në jetë këtë qeveri dhe këtë kryeministër. Mos shkoni shumë larg për të gjetur zgjidhjen.
Mos e kërkoni zgjidhjet nga Berisha i krizave dhe marrive. Zgjidhja apo përshkallëzimi i krizës qëndron në duart e Ilir Metës. Nëse Meta zgjedh t'i mbajë "ison" Berishës, atherë ai do të dëshmojë në popull që ata nuk janë të ndryshëm nga njëri-tjetri. Opozita socialiste duhet ta testojë Metën në këtë prizëm me qëllim që elektorati i pavarur dhe i majtë të mos ketë në të ardhme hamëndësi rreth profilit politik të Metës në zgjedhjet e ardhshme.
Kjo do të sillte konsolidim të elektoratit të majtë. Nëse Meta zgjedh rolin e protagonistit dhe i largohet Berishës, atherë Meta ka shanset për të përmirsuar imazhin politik të LSI dhe të ardhmen e tij(saj) politike. Nëse këto shanse nuk egzistojnë si rrjedhoj e pazareve të bëra në fshehtësi dhe rrugë antiligjore me Berishën, atherë Meta do të jetë duke pritur fundin e tij politik tamam si puna e akrepit i rrethuar nga zjarri.
Bledar H.Prifti\Shekulli
Përgjigju Duke Cituar
Postuar më parë nga DYDRINAS
Krijoni Kontakt