Të shtrëngosh dhëmbët e krimbur
Nga Mero Baze
Tre- katër burra të zemëruar, kishin vënë për muri disa banderola kundër Kreshnik Spahiut dhe qëllonin mbi to me gurë, vezë, baltë. Një re pluhuri, e ngjashme me skenat e protestave të botës arabe, ku njerëz të zemëruar përplasin këmbët në tokë dhe kërkojnë shpagim për filmin kundër Muhamedit, shoqëron fotot e shpërndara nga njerëzit e Berishës në medie, rreth asaj se si e ëndërron ai hakmarrjen ndaj një partie, që e ka turpëruar duke protestuar në Romë kundër tij, para derës ku e prisnin 5 kryeministra evropianë.
Por më shumë se skena e pluhurit dhe primitivizmi i njerëzve të mobilizuar për të filluar serialin e dhunës kundër opozitës në këtë fushatë, skena e Lushnjës i ngjan një filmi pa ngjyra të një intifade, që synon të shpëtojë mitin e paprekshëm të Berishës në turmat shqiptare.
Siç kam e theksuar qysh kur Berishën e qëlluan me miell dhe vezë, ai nuk është i shqetësuar nga dhuna apo rreziku për jetën, por nga prekja e mitit të njeriut të fortë, të cilin kundërshtarët e tij po e banalizojnë. Një qese mielli apo një kokërr vezë, një domate apo qoftë dhe një copë presh e hedhur mbi kokat e politikanëve, në Perëndim është një gjest normal, biles i qytetëruar. Aftësia për të pranuar se shoqëria është e zemëruar me ty, natyrisht nuk është një veti e gjithë udhëheqësve, por është padyshim një veti e udhëheqësve pro-perëndimorë. Kurse reagimi i një tufe injorantësh duke përplasur këmbët në tokë nga zemërimi dhe duke vënë si target sulmi disa banderola si dikur në kohën e zborit foton e Reganit dhe Brezhnjevit, është një reagim tipik anti-perëndimor, që motivohet njësoj si në turmat e botës arabe nga prekja e idhullit të tyre.
Sali Berisha nuk ka fuqi ta durojë poshtërimin publik në emër të qytetarëve. Ai do të reagonte doemos kështu. Do të reagojë dhe më keq në ditët që vijnë. Do të prishë mitingje të opozitarëve, do t’i dhunojë ata, do të rrisë presionin dhe dhunën mbi median kritike, do të angazhojë falanga krimi në çdo cep të Shqipërisë për të mbajtur zonat nën kontroll, por mbi të gjitha do të kujdeset që askush të mos i afrohet për ta “zhburrëruar” siç e mendon ai protestën qytetare kundër tij.
Këtë fundjavë eskorta e tij pati një episod të frikshëm dhune ndaj një qytetari, i cili në mënyrë spontane iu bashkëngjit eskortës së tij nga Maminasi në Tiranë. I rrethuar nga një eskortë e dhunshme, ai për pak u asgjësua fizikisht tek Zogu i Zi, dhe vetëm kur panë se kishin të bënin me një episod rastësor, e lëshuan pas një dhunë 24 orëshe në polici, pa bërë asnjë kallëzim ndaj tij. E gjitha çka ndodhur është një skandal që mund të përfundonte në mënyrë tragjike, jo nga rastësia e episodit, por nga paranoja që kryeministri ka ndaj gjesteve kundër tij. Dhe kryeministri e ka fshehur ngjarjen. Sikur të ishim Koreja e Veriut, kryeministri u mjaftua vetëm me një lajm se eskorta e tij ka pasur një aksident tek Zogu i Zi, pa pasoja për jetën e askujt dhe ka mbyllur çdo burim informacioni. Qytetari që i ka hyrë në eskortë, pavarësisht se ka hyrë spontanisht, në fakt ka shkelur rregullat e sigurisë dhe meriton së paku të gjykohet, por frika se gjykimi në publik i një akti aksidental dhune do të inkurajojë reagime ndaj tij, e ka bërë Gardën të mos bëjë denoncim në polici dhe kësisoj çështja të mbyllet me një dru të mirë për qytetarin, dhe një rrezik të përhershëm për jetën e tij.
Garda e Republikës, ish- komandanti i së cilës është nën gjykim për vrasje politike, nuk sillet dot më si Gardë profesioniste ndaj tij, por si një repart taliban, që më shumë ka frikë mos i çnderojnë “Atë”, se sa të merren me sigurinë fizike të tij. Për herë të parë që prej vitit 1997, kam parë gardistë të rrethit të ngushtë të tij që të kërcënojnë kur të shikojnë rrugës si ata që qëllonin gazetarët nëpër kafene në vitin 1997. Për herë të parë prej vitit 1997 shikoj njerëz të inkriminuar të tij, që janë gati të përleshen me opozitarë rrugëve kudo që i shikojnë, nga makthi se diçka mund të ndodhë pas disa muajsh.
Klima e dhunës, hakërrimi, kundërpërgjigja, anti-mitingu, paranoja për atentate dhe poshtërime publike, janë axhenda ditore e kryeministrit, e cila po e shndërron atë pak nga pak në një njeri të veshur me këmishë të hekurt. Janë të gjitha shenjat se ai po tenton t’i tregojë dhëmbët shoqërisë, jo se është i rrezikuar fizikisht, por është i rrezikuar të poshtërohet nga qytetarët. Problemi i vetëm që ka është se ka nxjerrë dhëmbët e vjetër. Ata që ia njohim dhe që në fakt i ka shumë të krimbur për t’i mbajtur të shtrënguar.
http://www.gazetatema.net/web/2012/0...bet-e-krimbur/
Përgjigju Duke Cituar
Postuar më parë nga daniel00
Krijoni Kontakt