Shekulli
--------------
Historiografia në kërkim të objektives
Nga Prof. Dr. Muin Çami
Sapo ka dalë në qarkullim libri: “Veprimtaria e bandave dhe organizatave opozitare ilegale në Shqipëri në vitet 1944-1948” me autor Prof. As. Dr. Demir Dyrmishi. Në të shtjellohet lufta midis forcave që mbronin pushtetin e “majtë” që u vendos në Shqipëri në nëntor 1944 dhe kundërshtarëve të këtij pushteti. Dihet tashmë se pas çlirimit të vendit nga pushtuesit e huaj, në nëntor 1944 në Shqipëri u vendos pushteti i atyre forcave që u angazhuan në këtë luftë dhe fituan atë në kuadrin e fitores që korrën në rrafsh botëror fuqitë antifashiste në mbarim të Luftës së Dytë Botërore. Dihet gjithashtu se ky pushtet nuk u prit njësoj nga shtresat e ndryshme politike dhe shoqërore të popullit shqiptar. Atë e kundërshtuan sidomos ato forca që nuk ishin radhitur në Frontin Nacionalçlirimtar. Për më tepër këto forca për të ruajtur pas çlirimit pozitat e tyre politike dhe ekonomike të privilegjuara, kishin luftuar forcat partizane në bashkëpunim me pushtuesit. Kuptohet se në këto kushte mbrojtësit e pushtetit të ri u bënë në radhë të parë forcat e armatosura që kishin luftuar për çlirimin e vendit si dhe mbështetësit e tyre në qytet dhe në fshat. Kjo luftë për pushtet e nisur kështu përpara nëntorit 1944, vijoi edhe në kushtet e reja të pasçlirimit me karakteristikat dalluese sipas periudhave të zhvillimit historik, siç është edhe kjo e viteve 1944-1948. Ashtu siç pritej, pushteti i ri që në hapat e parë të vendosjes dhe të stabilizimit të tij, hasi në qëndresën e kundërshtarëve. Libri e informon lexuesin për përpjekjet për përmbysjen e këtij pushteti me dhunë apo për të organizuar opozitën legale. Njëherazi vihet në dijeni për përpjekjet e pushtetmbajtësve për t’i ruajtur dhe forcuar në çdo mënyrë pozitat e tyre. Për përmbysjen e pushtetit u vunë në lëvizje grupe të armatosura të arratisurish të mbetura në arrati nga koha e pushtimit apo të krijuar rishtazi, që kryen veprime shumë të dhunshme, duke mos kursyer as jetë njerëzish. Këto u pasuan nga organizimi i qëndresës me armë në Koplik në janar 1945, që u ndoq nga kryengritja e Postribës e shtatorit 1946. U përdorën edhe forma të tjera të kundërvënies sikurse ishte krijimi në vitet 1945-1947 i organizatave të cilësuara nga regjimi në fuqi si organizata ilegale, të cilat u shpërndanë dhe anëtarët e tyre u ndëshkuan nga regjimi në fuqi. Në këtë përplasje ka qenë përzier si emigracioni politik shqiptar i larguar nga vendi në mbarim të Luftës së Dytë Botërore, ashtu edhe misionet e huaja në Shqipëri. Të gjitha këto aspekte së bashku me mjetet e përdorura për goditjen apo fashitjen e kësaj qëndrese nga pushtetmbajtësit, kanë gjetur pasqyrim në librin që përmendëm, i cili priret nga një vështrim kritik për shkrimet e botuara deri tani mbi problemin në studim, vështrim ky që ndiqet me shumë interes për diskutimet që ka ngjallur në historiografi kjo periudhë.
Vlerësimi bardhë e zi ka qenë ai që ka mbushur faqe të tëra librash, revistash apo gazetash në periudhën e regjimit monist. Autorët e shkrimeve të botuara përpara vitit 1991 kanë dënuar ashpërsisht çfarëdo përpjekje kundër pushtetit që u vendos në vend pas 1944 duke e vlerësuar këtë si qeverisjen më popullore. Nga një kënd krejt tjetër, por përsëri bardhë e zi, i kanë gjykuar të njëjtat ngjarje autorët e emigracionit politik që kanë shkruar. Këta të nisur nga pozita politike antikomuniste, e kanë përligjur çdo veprim të kryer nga pasuesit e tyre në Shqipëri kundër pushtetit qendror apo vendor në nëntor 1944. Po këtë vlerësim përsëritën madje i theksuan ngjyrat bardhë e zi, edhe disa autorë në botimet e tyre të vëna në qarkullim këto vitet e fundit, pas vendosjes të pluralizmit në vendin tonë, kur antikomunizmi arriti majat. Me monografinë e botuar së fundmi Prof. Dyrmishi ka bërë përpjekje serioze për t’u ngritur mbi këto trajtime tejet të politizuara dhe njëherazi të ngrihet edhe mbi vetveten me synimin për t’i dhënë lexuesit një studim me përmbajtje sa më objektive. Në trajtimin më objektiv autorin e ka ndihmuar baza metodologjike mbi të cilën është mbështetur ai në vlerësimin e dukurive të kohës. Autori mban qëndrim kritik sidomos për moslejimin e ngritjes të organizatave politike opozitare dhe për ndalimin e veprimtarisë së tyre. Rrjedhimisht dënon përdorimin e “kamxhikut” njëpartiak të qeverisjes për të mposhtur kundërshtarët. Megjithatë edhe në këtë rast ka vend për reflektime e thellime të mëtejshme, përderisa sistemi njëpartiak nuk ishte vetëm dukuri shqiptare por shtrihej në të gjitha vendet ku drejtonin partitë komuniste. Për reflektime të kësaj natyre ka akoma më shumë nevojë po të mbahet parasysh atmosfera politike e brendshme dhe ndërkombëtare që ekzistonte në 3-4 vitet e parë të pas Luftës së Dytë Botërore. Në vitet 1944-1948 pozitat e partive të majta që kishin dalë nga lufta dhe që kishin drejtuar këtë luftë ishin kudo në rritje. Ato nuk pranonin ndarjen e pushtetit me forca të tjera dhe akoma më pak me ato që kishin bashkëpunuar me pushtuesit fashistë apo që akuzoheshin si bashkëpunëtorë të këtyre. Ishin vitet e fillimit të Luftës së Ftohtë midis dy sistemeve ekonomike e shoqërore që do të zgjaste për gjysmë shekulli. Përpara 50 vjetësh nuk dihej nëse këto dy sisteme, që bashkëvepruan gjatë Luftës së Dytë Botërore për të përballluar rrezikun e fuqive fashiste, do të bashkëjetonin paskëtaj paqësisht apo do të përmbysnin njëri -tjetrin siç do të ndodhte në fakt, dhe cili prej tyre do të ngadhnjente? Për të qenë, pra, më të saktë dhe më objektivë në shtjellimin dhe vlerësimin e ndodhive historike, duhet nisur në çdo rast nga pozitat e historizmit, që do të thotë nga gjykimi i ngjarjeve duke u bazuar në kushtet konkrete historike të kohës kur ato janë zhvilluar. Injorimi i tyre të shpie në subjektivizëm.
----------------------
Dy fjale..
Profesor Cami per te mbrojtur librat e tije te kohes PPSH-se te mbushur me genjeshtra merr ne mbrojtje nxenesin e tij bolshevik i cili merr ne mbrojtje Genocidin Stalinist te PPSH-se.
Profesor Cami !
Me ndihmen e KGB-se sovietike ..PPSH organizoi Lojrat e famshme ne vitet 1948-1960 ku duke shfrytezuar Terrorin detyroi disa te mjere te luajne valle nen instruksionet e Koloneleve Sovietike qe punonin ne Tirane e ftuan ne Shqiperi qindra te Arratisur kinse "eja ta rrezojme pushtetin" dhe i masakruan barbarisht.
Te marresh ne mbrojtje sot ne vitin 2003 metodat staliniste te terrorit qe PPSH zbatoi mbi popullin Shqiptar do te thote te jesh nje kriminel i lindur e cudia eshte se mbani titullin Profesor.
Tamam Profesor ne Kanibalizem.. Turp.
...
Përgjigju Duke Cituar
Krijoni Kontakt