Kreu i grupit të Sukthit, i akuzuar për disa vrasje, si u lirua nga gjykata
Leonard Bakillari
Tiranë Ilir Xhakja, i dyshuar për vrasjen e komisarit të policisë, Adem Tahiraj, ishte liruar nga burgu një vit më parë në rrethana ende të paqarta. Edhe pse ndaj tij rëndojnë disa akuza të rënda, si vrasje e plagosje, Ilir Xhakja, i njohur si një nga njerëzit më të rëndësishëm të klanit “Xhakja” në Katund-Sukth, ia ka dalë të rifitojë lirinë. Sipas skedës së tij kriminale, 38-vjeçari është dënuar dhe hetuar për një sërë krimesh të rënda që dyshohet se mbajnë autorësinë e tij. Dënimi më i fundit ndaj tij është dhënë më 27 mars të vitit 2006 nga Gjykata e Krimeve të Rënda në Tiranë, që e dënoi atë në mungesë me 21 vite burg për akuzën e vrasjes. Ngjarja për të cilën Ilir Xhakja u shpall fajtor ka ndodhur më 27 korrik të vitit 1998 në Sukth të Durrësit, ku u vra me armë zjarri Qerim Maloku. Pas kësaj ngjarjeje, policia shpalli në kërkim si të dyshuarin kryesor për vrasjen shtetasin Ilir Xhakja, i cili u arrestua vetëm pas 9 vitesh, në korrik të vitit 2007, pas një operacioni të suksesshëm të forcave speciale RENEA. Por gjatë kësaj kohe policia kishte hetuar Ilir Xhakjan për një sërë krimesh të ndodhura në rrethinat e Durrësit. Sipas raporteve të kohës, Xhakja ishte në kërkim edhe për një tjetër vrasje, atë të shtetasit Rudin Shahinaj, e cila ishte pasojë e zinxhirit të hakmarrjes, ku një nga protagonistët kryesorë ishte vetë ai. Xhakja u skedua nga policia që në vitin e largët 1995. Asokohe vetëm 20 vjeç, Ilir Xhakja u dënua me një vit burg për plagosjen e shtetasit Dashamir Lame. Vetëm një vit më pas, Xhakja u akuzua për vrasjen e shtetasve Gentjan Gjoka e Petrit Lyti. Po në këtë periudhë, i dyshuari kryesor për vrasjen e komisarit të policisë, u dënua me 6 muaj burg për kanosjen serioze të shtetasit Ylli Maloku. Për më shumë se 9 vite Xhakja ka qëndruar në arrati dhe vetëm në korrik të vitit 2007 ai ka përfunduar në pranga. Këtë radhë, forcat RENEA mundën të arrestojnë të kërkuarin për një sërë krimesh, i cili sapo ishte dënuar me 21 vite burg nga Gjykata e Krimeve të Rënda. Procesi gjyqësor ndaj tij kishte nisur në mungesë në vitin 2004, kur sapo ishte krijuar gjykata speciale e Krimeve të Rënda dhe vazhdoi për dy vite me radhë. Në përfundim, trupa gjyqësore e kryesuar nga gjyqtarja Liljana Baku, shpalli fajtor të pandehurin Ilir Xhakja, duke e dënuar me 21 vite burg për akuzën e “vrasjes me paramendim” të shtetasit Qerim Maloku. Menjëherë pas arrestimit të tij një vit më pas, i pandehuri nëpërmjet avokatit të tij ka apeluar çështjen, por Gjykata e Apelit të Krimeve të Rënda më 31 dhjetor të vitit 2006 ka lënë në fuqi dënimin me 21 vjet burg për të dënuarin. Xhakja nuk ka ndalur përpjekjet e tij për të rifituar lirinë, pasi më 17 korrik të vitit 2007 ka dërguar çështjen në Gjykatën e Lartë. Pas depozitimit të rekursit nga i pandehuri, nuk ka asnjë të dhënë se cili ka qenë vendimi i Gjykatës së Lartë për të pandehurin Xhakja, i cili duhet të qëndronte 21 vite në qeli. Sipas faqes zyrtare të Gjykatës së Lartë, rezulton se Ilir Xhakja është dënuar me tre vjet burg për “mbajtje pa leje të armëve luftarake”, pasi policia e Durrësit kishte zbuluar një arsenal armësh të fshehur në një tunel pranë Sukthit.
Skeda e Ilir Xhakjes
1995
Është dënuar me 1 vit burgim për plagosjen e shtetasit Dashamir L.
1996
Është akuzuar për vrasjen e shtetasve Gentian Petrit Gjoka dhe Petrit Lyti.
1996
Është dënuar me 6 muaj burgim për kanosje serioze për jetën ndaj shtetasit Ylli M.
2002
Ka filluar procedimi për vrasje në territorin e komunës Katund i Ri Durrës
2006
U dënua me 21 vjet burg nga Gjykata e Krimeve të Rënda për vrasjen e Qerim Malokut
2007
U arrestua në një operacion të forcave speciale RENEA, por u dënua për armëmbajtje
MAPO
Përgjigju Duke Cituar
Postuar më parë nga the admiral
Krijoni Kontakt