Postuar më parë nga
Pika-Kufi.1-31
EDHE BAR DO HAMË, EDHE GJAK DO DERDHIM
13 Janar 2012 12:03, Nga Berat Buzhala
Kur të bllokohet i gjithë brezi kufitar dhe kur të sigurohemi se tash jemi krejtësisht të izoluar dhe të lirë nga pjesa tjetër e botës, Shokut Albin nuk do t'i mbetët gjë tjetër veçse t'i nis një letër vëllazërore liderit të ri të Koresë Veriore, Kim Jong Un, ku do t'i kërkonte me mirësjellje programet për centrale bërthamore, në mënyrë që edhe ne të nisnim avash-avash një të tillë. Sido që të jetë, jam i bindur që këto projekte fije e për pe do t'i shpalosni ose ne Merdare ose tek Dheu i Bardhë.
“Dy gjëra nuk do t’i lejojmë kurrën e kurrës, e para puna e shumë partive, sepse kjo do të thoshte tradhti e atdheut, mbaroi pushteti popullor, mbaroi revolucioni, e dyta ne kurrë nuk do të pranojmë çështjen e pronës private, tregun e lirë të varur mbi pronësinë private, se po bëhet zhurmë e madhe. Kjo do të thotë likuidim i socializmit. Po të vijë puna deri këtu, ta kemi parasysh se këtu jemi në Komitetin Qendror, edhe bar do hamë, edhe gjak do derdhim. Këtu s’shkon më dhe s’do shkojë më tej, s’mund të shkojë asgjë. Këtë duhet ta kemi mirë të qartë. Presionet e armiqve do të jenë të mëdha por qëndrimi i ynë do të jetë i prerë”, kjo është një pjesë e fjalimit të Shokut Ramiz Alia të mbajtur me 16 prill të vitit 1990, në vigjilje të zhvillimeve në shtetin shqiptar për t'u shkëputur nga diktatura.
Dhe kush do të thoshte se ne shqiptarëve do të na jepej edhe një mundësi e dytë e artë që ketë porosi kaq kuptimplote të Shokut Enver Hoxha, të ripërsëritur nga Shoku Ramiz, dhe shansin e humbur ta përmirësojmë. Ta kthejmë në vend nderin e humbur, përball armiqve dhe presionit të madh të tyre.
Tashmë data është caktuar: 14 janar 2012.
Lokacioni, gjithashtu dihet: Merdare dhe Dheu i Bardhë - asnjë hap më tutje.
Jeni të ftuar në ketë datë dhe në ketë vend, të gjithë ju që i thoni vetës revolucionarë komunistë. Mos mungoni as ju që dëshironi t'i qëroni hesapet me kapitalizmin, pronën private dhe liberalizmin. Tek Dheu i Bardhë dhe në Merdare është mejdani i hapur edhe për ju që jeni të zhgënjyer nga sistemi shumë partiak në Kosovë. Pra ju që ndiheni të dëshpëruar në PDK-në, LDK-në, AAK-në, AKR-në, LB-në dhe të gjitha forcat e tjera servile karshi faktorit ndërkombëtar doemos duhet të jeni prezentë në këto dy pika. Një vend i veçantë në ulëset e para do të rezervohet sidomos për armiqtë e Shteteve të Bashkuara të Amerikës, por edhe për ata të Gjermanisë, Britanisë së Madhe, Italisë dhe Brukselit. Ka mundësi që si dëshmi për ketë nga organizatorët t'u kërkohen pasaportat. Nëse brenda saj keni rastësisht vizë të Shteteve të Bashkuara të Amerikës, atëherë mos e merrni mundin që të niseni fare. Mund të konsideroheni më të drejtë si të infiltruar nga armiqtë e jashtëm.
Pjesëmarrjen e tyre në ketë ngjarje historike deri më tash e kanë konfirmuar një numër i konsiderueshëm i qytetarëve nga të gjitha trojet. Burimet tona flasin se si rrjedhojë e një aktiviteti të dendur në Shqipëri, Shoku Albin Kurti ka arritur ta bindë që në ballë të revolucionit, krah për krah me krerët e Vetëvendosjes, të jetë edhe i pari i komunistëve të Shqipërisë, shoku Hysni Milloshi dhe partizanët e tij, që edhe më tutje i kanë disa pazare të pasqaruara me Perëndimin dhe tash ka ardhur koha që në Betejën e Kosovës, ketë herë në Merdare, të zhvillohet beteja përfundimtare.
Kjo është edhe më tutje në nivel të spekulimeve, mirëpo e sigurt është që aty do të jenë Federata shumë e respektuar e Metalurgëve të Kosovës, kurse dje e bëri publik pjesëmarrjen edhe Presidenti Historik i Bujqve të Kosovës. Këtij të fundit po ia tërheq vërejtjen nga kjo kolumne se nuk ka as gjasa teorike që të jetë pjesë e marshit historik me atë kostum borgjez që na u shfaq para kamerave teksa konfirmonte stoikisht pjesëmarrjen e tij. Burri i botës e quan vetën përfaqësues të bujqve, kurse mbante veshur kostum dhe kollare. I verbër është ai? A nuk e di ai se revolucioni e njeh vetëm një kod të veshjes? Atë të Shokut dhe mësuesit tonë historik Mao? I çmendur i duket Shoku Albin, Shokut Bujk? Përveç Federatave të Metalurgëve dhe Bujqve, edhe më tutje qëndrimet e tyre nuk i kanë bërë publike Federata masive e Astronautëve dhe ajo e Nëndetëseve Bërthamore. Pritet që edhe këto të dyja të dalin shumë shpejt me qëndrime.
Pra të nderuar qytetarë që ende nuk e keni ndarë mendjen nëse do të merrni pjesë apo jo në këtë ngjarje, mos hezitoni. Kjo mundësi nuk do t'u jepet dy herë. Pas 14 janarit civilizimi do të ndahet në dy pjesë: në ata që kanë marrë pjesë në Merdare dhe Dheu i Bardhë dhe ne ata që dështuan të merrnin pjesë. Kjo është një aso ngjarje që nipave dhe mbesave tuaja do t'u thoni plot me krenari: "Unë kam qenë aty".
E me "Unë kam qenë aty" do të thotë se ju keni qenë aty ku do t'i ngritët lart e më lart gishti kërcënues kundër Perëndimit - Brukselit dhe Washingtonit. Do ta keni mundësinë që këtyre qendrave t'ua tregoni vendin e merituar dhe në të njëjtën kohë ta forconi sovranitetin e shtetit tonë, duke e izoluar prej pjesës tjetër të botës. Nëse do të arrini me sukses t'i bllokoni Dheun e Bardhë dhe Merdarën, atëherë krejt çka do t'u mbetet për të bllokuar janë edhe dy pika me Shqipërinë dhe një tjetër me Malin e Zi, për ta konsideruar misionin e kompletuar. Fundja edhe Shqipëria e meriton një masë të tillë, pas reagimit që e bëri Qeveria Shqiptare lidhur me protestën. Kurse me Malin e Zi mund ta bllokoni pa kurrfarë preteksti. Për pikat tjera me Serbinë mos u brengosni sepse është kujdesur Zvonko me shokë shumë kohë para jush.
Kur të bllokohet i gjithë brezi kufitar, dhe kur të sigurohemi se tash jemi krejtësisht të izoluar dhe të lirë nga pjesa tjetër e botës dhe e civilizimit, Shokut Albin nuk do t'i mbetët gjë tjetër veçse t'i nis një letër vëllazërore liderit të ri të Koresë Veriore, Kim Jong Un, ku do t'i kërkonte me mirësjellje programet për centrale bërthamore, në mënyrë që edhe ne të nisnim avash-avash një të tillë. Sido që të jetë, jam i bindur që këto projekte fije e për pe do t'i shpalosni ose ne Merdare ose tek Dheu i Bardhë.
Pra të gjithë ju që me 14 janar do t'ia mësyni pikave kufitare, e keni nderin që të sakrifikoheni për Shokun Albin dhe nga Shoku Albin për interesa krejtësisht personale të tij, siç i kishte sakrifikuar para jush edhe disa të tjerë në demonstratën e shkurtit të vitit 2007.
Autori është:
Deputet i PDK’së në Parlamentin e Kosovës. Kjo kolumne është shkruar enkas për Gazetën Express.
Regullat e Postimit
Përgjigju Duke Cituar
Krijoni Kontakt