Bie mbështetja e Ramës në elektoratin socialist
Nga L.Progni
Edi Rama humbet mbështetjen në elektoratin partisë së tij. Një sondazh i para pak ditësh dëshmon se mbështetja e Ramës dhe politikës së tij në bazën e partisë ka rënë krahasuar me vjeshtën e vitit të shkuar. Brenda PS ka grupe të posaçme pune që merren me sondimin e bazës socialiste, por jo vetëm asaj. Ajo ka realizuar një kampionim dhe një sondazh të tillë. Ndërkohë, shkak për këtë rënie mendohet të jetë bashkëpunimi me mazhorancën që kryetari i PS, Edi Rama, vendosi të ketë që në pranverën e këtij viti. Ngjarja e rëndë e Gërdecit dhe pasojat e saj nuk u shfrytëzuan nga opozita, siç pritej nga baza e PS, dhe që këtu nis edhe pezmatimi i bazës së PS me kryetarin e tyre, Edi Rama. Burime pranë PS thanë se në vjeshtën e vitit 2007, Edi Rama kishte mbërritur të siguronte një mbështetje të gjerë në bazën e partisë, por, një vit më vonë, pikërisht këto ditë, një sondazh dëshmon se kjo mbështetje ka pësuar rënie të konsiderueshme dhe në bazë të sondazhit, fenomeni ka ndodhur për shkak të Gërdecit. Socialistët e bazës kërkojnë nga lideri i partisë dhe drejtues të tjerë të saj që të zhvillojnë një luftë të fortë politike me mazhorancën, gjë e cila hedh poshtë edhe fjalinë e përsëritur nga Rama: “Njerëzit janë mërzitur me gërr-vërret e politikës”. Në të vërtetë, baza e PS duket se është mërzitur së tepërmi nga dashuria opozitë-mazhorancë në gjashtë muajt e fundit.
“Përtej së majtës dhe të djathtës”, parulla e gabuar përgjatë turit të zhvilluar në të gjithë vendin, “Dialog me Shqipërinë”
Kryetari i PS, Edi Rama, ka përsëritur disa herë parullën “Përtej së majtës dhe të djathtës”, duke pretenduar se pranë PS do të angazhohen edhe anëtarë dhe simpatizantë të partive të tjera, madje edhe të djathtë. Ky slogan i Ramës rezulton të mos jetë mirëpritur nga baza e partisë, kryesisht nga militantet. Përpjekja e Ramës për të përfshirë në PS atë që quhet elektorati gri, është vlerësuar nga njerëzit pranë Ramës si një parullë jo shumë e favorshme për socialistët. Njerëzit pranë Ramës e kanë sugjeruar të mos e përsërisë shpesh “Përtej së majtës dhe së djathtës”, pasi jo vetëm që nuk përfiton elektorat gri, por humbet edhe nga elektorati i partisë, të cilët vazhdojnë të jenë fanatikë dhe gjithnjë të gatshëm për beteja politike me të djathtët.
Lista
Një tjetër arsye që ka ndikuar në rënien e mbështetjes së Ramës në bazën e partisë është edhe lista e njerëzve që Rama ka zgjedhur të ketë pranë në të ardhmen. Në këtë listë mungojnë emra të rëndësishëm të Partisë Socialiste, të cilët kanë kontribuar qysh në fillimet e saj, të paktën që në rithemelimin e kësaj partie në qershor të viti 1991, në momentin kur u ndryshua nga Parti e Punës në Parti Socialiste. Në listën e Ramës mungojnë emra të spikatur të PS në 12 vitet e fundit, ish-ministra dhe ish-drejtues të forumeve të larta drejtuese të kësaj partie. Në listën e Ramës përfshihen kryesisht emra të rinj të promovuar pak në politikë ose tërësisht të panjohur deri më tani. Andis Harasani, Taulant Balla, Arben Ahmetaj, Besnik Dervishi, Ylli Manjani, Ervin Qafmolla, Bledi Cuci, Damian Gjiknuri, Gjergj Teneqexhiu, Rezar Kola, Ervin Bushati, Arben Molla e të tjerë, janë emrat e zgjedhur prej Ramës si të besuar për të bashkëpunuar me bordin e ekspertëve të huaj në procesin e hartimit të programit të partisë. Të ndarë në fushat përkatëse, ata po punojnë për të përshtatur draftin e paraqitur nga ekspertët e huaj, të cilët po asistojnë PS prej disa muajsh. Në bord bëjnë pjesë figura të spikatura të partive të majta evropiane.
Burimet pranë PS thanë se lista e publikuar edhe më parë në shtyp me emrat e rinj, të cilët po punojnë aktualisht me programin e partisë, do të jenë edhe stafi më i ngushtë i Ramës në të ardhmen në PS, por edhe në qeveri, në rast se PS fiton zgjedhjet e ardhshme parlamentare.
“Të përjashtuarit”
Në listën e emrave të zgjedhur për t’u angazhuar me çështje kryesore të politikës së PS, mungojnë figura të rëndësishme të kësaj partie përgjatë qeverisjes tetëvjeçare të saj. Veç Fatos Nanos e Petro Koçit, në listën e Ramës mungojnë Arben Malaj, Bashkim Fino, Ylli Bufi, Kastriot Islami, por edhe Arta Dade. Në listën e atyre që do të jenë jashtë vëmendjes së Ramës në përzgjedhjen e stafit të ri, qoftë listë kandidatësh për deputetë apo edhe qeveri, janë edhe të gjithë ata deputetë që mbështetën Nanon në lëvizjet politike kundër Ramës që prej 2005 dhe deri tani. Janë vetëm dhjetë deputetë aktualë, të cilët kanë të garantuar emrin në listën e rikandidimit dhe vendin e tyre pranë strukturave të larta drejtuese të partisë, por nuk kanë asgjë të garantuar në drejtim të posteve ministrore, në rast se PS fiton zgjedhjet, pasi kabineti qeveritar pritet të jetë i përbërë më shumë nga ekspertë të fushave përkatëse sesa deputetë.
“Pengjet” e Ramës në grupin parlamentar, strategjia e hartimit të listës
Dihet me siguri se në stafin e ngushtë të Ramës do të jetë Fatmir Xhafa, Gramoz Ruçi, por edhe Ben Blushi, megjithëse ky i fundit është parë gjithnjë si kërcënim për kryetarin Rama. Afër Ramës në PS apo qeveri do të jenë me siguri deputetët e rinj të kësaj partie, Taulant Balla, Andis Harasani, por edhe deputetët besnikë të Ramës, Marko Bello, Erion Braçe apo Alfred Dalipi. Të tjerët duhet të presin momentin kur kryetari i partisë vendos të shpallë zyrtarisht njerëzit që do të bëjnë stafin e kësaj partie në grupin e ardhshëm parlamentar, në listën e kandidatëve për deputetë. Lidhur me këtë çështje, burimet thanë se Rama ka vendosur të mbajë sekret listën e kandidatëve për deputetë deri në kufijtë e kohës kur nevojitet paraqitja e listës zyrtarisht. Kjo, për shkak se deputetët aktualë nuk do të kenë kohë të punojnë kundër Ramës gjatë fushatës dhe se mbetet vetëm një muaj kohë, kur dhe është muaji zyrtar i fushatës, për të vendosur t’i bashkohen një grupimi tjetër politik. Publikimi në këtë moment i listës së kandidatëve e bën të vështirë largimin nga PS drejt një formacioni tjetër politik, pasi duket qartë se largimi nga kjo parti bëhet vetëm për interesa personale dhe jo parimore. Për pasojë, Rama mban “të burgosur” të gjithë ata që sot dhe në vazhdim do të jenë të pasigurt për të ardhmen e tyre në PS, dhe që ende nuk besojnë se ekziston mundësia që ata të mos jenë më kandidatë për deputetë të PS në zgjedhjet e ardhshme parlamentare.
Partia e re e Petro Koçit, pasojat dhe kthimi i mundshëm i Nanos
Ata që kanë kuptuar se në PS nuk kanë më të ardhme, kanë nisur negociatat me partinë më të re, që pritet të zyrtarizohet së shpejti, dhe që do të quhet Partia e Vërtetë Socialiste dhe që do të drejtohet nga deputeti socialist Petro Koçi. Burime pranë grupit të deputetëve socialistë thanë dje se Koçi ka marrë kontakte me disa deputetë socialistë, të cilët janë të bindur se nuk janë të zgjedhurit e Ramës për të qenë në ekipin e ardhshëm të deputetëve të kësaj partie. Nuk ka ende të dhëna, nëse dikush prej këtyre deputetëve ka marrë vendim të mbetet në grupin e PS apo t’i bashkohet koalicionit të ri “E Majta për Integrim”, në të cilin është përfshirë ditët e fundit edhe Koçi, i cili së shpejti do të shpallë themelimin e partisë së re që do dalë nga PS. Nga ana tjetër, kryetari i PS, Edi Rama, ka marrë kontakte me ish-krerët e PS në të gjitha rrethet, të cilët u larguan nga detyra pas zgjedhjeve në PS sipas parimit “Një anëtar, një votë”. Këta socialistë janë parë nga Rama si kontigjent i mundshëm kundërshtarësh të Ramës në zgjedhjet e vitit 2009, dhe për këtë arsye ai i ka ftuar ata në takim për t’iu afruar mundësi të reja në radhët e PS. Me të njëjtët individë ka patur kontakte edhe Petro Koçi. Kjo kategori ish-zyrtarësh socialistë i përket pikërisht shtresës së mbështetësve të ish-kryetarit të PS, Fatos Nano, dhe duket që Rama e ka të vështirë të marrë mbështetjen e tyre.
Jemi në nisje të një viti zgjedhor, ku pritet të zhvillohet një beteje e ashpër politike jo vetëm ndërmjet mazhorancës dhe opozitës, por edhe brenda përbrenda kësaj të fundit. Marrëdhëniet ndërmjet PS dhe LSI po acarohen dita ditës, ndërsa brenda PS janë shfaqur shenjat e kthimit të luftës ndërmjet mbështetësve të Ramës dhe Nanos, luftë e cila kishte pushuar për disa muajsh, që kur Nano la në baltë lëvizjen e Petro Koçit në një miting në Fier. Në këtë situatë, kur opozita duket e shpartalluar, bashkimi i së majtës duket i pamundur dhe për rrjedhojë, rrugës së opozitës drejt fitores së zgjedhjeve të 2009 i shtohen pengesa të mëdha.
Gazeta Tema
Nese arrin ta transformoje Partine e 1942 ne nje parti tipike europiane dhe me nje program socialdemokrat, kjo ka per te qene nje arritje e te gjithe politikes shqiptare.
Sic duket kostoja e kesaj reforme do te jete e larte, por ja vlen, sepse aty ka me te vertete vend per "shock therapy".
Përgjigju Duke Cituar
Postuar më parë nga beni67
Krijoni Kontakt