Lajmet, / 31 01 2007/V.H.
"The Economist": Në Shqipëri pengohet privatizimi
Mungesa e një ligji ende të pamiratuar koncesioni si dhe vonesat e theksuara të privatizimeve lidhur me sektorët strategjikë, kanë bërë edhe njëherë që Shqipëria të renditet shumë prapa vendeve të rajonit, dhe kjo në kuadër të investimeve të huaja.
Këtë e tregon fare mirë edhe numri më i fundit i publikuar i të përjavshmes britanike "The Economist" ku në një faqe të saj bëhet thirrje për investime në Maqedoni, thirrje kjo që shoqërohet edhe me argumentet përkatëse.
Ajo çka bie në sy është edhe fakti se shteti fqinj ofron mundësinë e investimeve në Zona Industriale ku kushtet janë në nivele tepër të larta ndërkohë që për investime të huaja në këto zona krijohen edhe kushte shtesë si reduktim në 50 për qind të taksave për të ardhurat personale etj.
Madje, një ndër faktorët e tjerë me të cilin Maqedonia kërkon të tërheqë investitorë të huaj është edhe regjistrimi i biznesit brenda vetëm 3 ditëve.
Një shtet i vogël si Maqedonia dhe me një pozitë gjeografike shumë më të pafavorshme se vendi ynë, ofron lehtësira tepër më të mëdha për investitorët e huaj.
Por duket se e keqja Shqipërisë i vlen nga neglizhenca e shtetit për të ndërmarrë reforma konkrete në kuadër të nxitjes së investimeve si dhe luftës politike e cila bën që qeveritë të hartojnë projekte të ndryshme sa herë që vijnë në pushtet duke anashkaluar ato ekzistente.
Prej më shumë se një viti është folur për krijimin e zyrave One Stop Shop që do të mundësojnë kushtet për licensimin e biznesit brenda një dite ndërkohë që edhe projekti pilot nuk ka filluar të aplikohet ende.
Madje, është fakt konkret që zonat industriale në Shqipëri janë në gjendje të mjerueshme çka bën që për investitorët e huaj të mos quhen më as zona industriale.
Duke shfletuar The Economist, lind pyetja, në rast se do të shkruhej për investime edhe në Shqipëri, çfarë do të thuhej?!
Sipas statistikave të ndryshme, duket se nga vendet rajonit, në Shqipëri krahu i punës ka filluar të vlerësohet më shtrenjtë, faktor ky që kohë më parë ka qenë primar për tërheqjen e investitorëve të huaj.
Duket pra se në sytë e investitorëve të huaj, vendi ynë qendron shumë larg, edhe pse krahasuar me Maqedoninë është më pranë perëndimit.
Përgjigju Duke Cituar
Postuar më parë nga Xhuxh Xhumaku
Krijoni Kontakt