Provokimi dhe incidenti me i rende me anijen greke

[Borix]

Nga K. B. (Gazeta Shekulli)

Incidenti i rëndë me grekët

Ishte vjeshtë e vitit 1980. Incidentet e provokimet, kujton M. Qorduka, ish-ushtarak drejtues në BDU (Sarandë) atë kohë ishin aq të shpeshta, saqë një urdhër i ardhur nga Ministria e Mbrojtjes, kishte bërë që në komandantët e katërsiluruesve të vinim krevatin në urën e komandimit. Ishte koha, kur në këtë rajon, fare pranë bregdetit, kujton ai, pikërisht në Palermo, kishin nisur punimet sekrete për një objekt të rëndësisë së veçantë, ndërtimi i bazës për strehimin e raketave që pritej të vinin nga Kina. Por, me gjithë fshehtësinë, provokimet dhe incidentet e anijeve luftarake greke, këtë radhë synonin dhe të dhëna të hollësishme për këtë objekt të rëndësishëm, duke ndërmarrë dhe udhëtime të rrezikshme deri në afërsi të brigjeve tona. Në një nga këto incidente, shton më tej Qorduka, ishte dhe ai i tetorit 1980. “Një anije luftarake greke, e maskuar si anije peshkimi, me mision grumbullimin e informacioneve rreth objektit strategjik që kishte filluar të ndërtohej, në gatishmëri me gjithë efektivin e arsenalin luftarak të saj, merr rrugën nga porti i Pireut, futet në ujërat tona, me synim afrimin sa më shumë bregdetit. Por sapo shkel në ujërat tona, anija e huaj diktohet nga shërbimi jonë dhe i jepet komanda të qëndrojë. Këtu, efektivit detar të komanduar nga ushtaraku A. Ylviu, ju desh që me gjakftohtësi e me rrezik në çdo sekondë, të përballojë me gjakftohtësi e profesionalizëm këtë incident të radhës!”- shton Qorduka. Ai dhe kolegë të tij kujtojnë se u desh të verifikohej maskimi i misionit (anija luftarake greke ishte maskuar si anije peshkimi), por të evitoheshin njëkohësisht dhe pasojat e një ndeshje me armë. Në këtë operacion, që nga specialistët evidentohet si nga më të vështirët mes shumë incidenteve të asaj periudhe, sipas drejtuesve të FLD-së, kanë meritë dhe kuadrot detarë, si Mystehak Balili, Ylli Molla e efektivat që ata kishin nën komandë. Në këto kushte, kujtojnë ushtarakët, anija luftarake detyrohet të dështojë në misionin e saj, duke marrë njëkohësisht dhe përgjegjësinë e shkeljes së ujërave tona territoriale.


Provat rrëzojnë alibinë e ushtarakëve grekë

Incidenti i rëndë dhe suksesi i detarëve shqiptarë në dështimin e misionit të anijes luftarake greke, kujtojnë ish-drejtuesit e flotës, qe njëkohësisht një “leksion” konkret vigjilence jo vetëm për ushtarakët fqinj, por dhe anijet të tjera të paktit perëndimor që kishin vendqëndrimet e përhershme në detin Mesdhe. Ndërsa grekët, sipas burimeve të mësipërme dhe dokumenteve të kohës, e interpretuan krejt ndryshe incidentin me anijen shqiptare. Gazeta greke “Kavallos”, mes të tjerave, rreth incidentit shkruan: “..Komandanti i katërsiluruesit shqiptar 314, ka hapur zjarr mbi anijen tonë të pa armatosur..”. Por, faktet, dokumentimet rreth incidentit, të bëra me profesionalizëm nga drejtuesit ushtarak shqiptar, treguan në vazhdim të vërtetën, duke rrëzuar alibinë e radhës të ushtarakëve grekë.. Ndërsa drejtuesit e FLD-së dhe ata të ministrisë së Mbrojtjes, përgëzuar ushtarakët që morën pjesë në këtë operacion detar në gjirin e Sarandës.