Presidenti Rugova: Imzot Mark Sopi do të mbetet një burrë i madh që gjithë jetën punoi për fe e për atdhe
--------------------------------------------------------------------------------
Prishtinë, 12 janar 2005 /TN /QIK - Presidenti i Kosovës, Dr. Ibrahim Rugova, me rastin e vdekjes së imzot Mark Sopit, ka ngushëlluar Ipeshkvinë e Kosovës, duke e cilsuar imzot Sopin si "një burrë i madh që gjithë jetën punoi për fe e për atdhe".
Më poshtë po japim tekstin e plotë të ngushëllimeve të Presidentit Rugova:
Ipeshkvi e nderuar,
Me rastin e vdekjes së Imzot Mark Sopit, Ipeshkvit të Ipeshkvisë së Kosovës, Ju lutem pranoni ngushëllimet e mia të thella dhe të popullit të Kosovës.
Në historinë më të re të Kosovës Imzot Mark Sopi do të mbetet një burrë i madh që gjithë jetën punoi për fe e për atdhe. Duke vepruar për forcimin e kishës katolike shqiptare, pra të Ipeshkvisë së Kosovës, që e drejtoi për një dekadë të tërë, u bë njeri i dashur dhe i nderuar për të gjithë popullin e Kosovës.
Imzot Mark Sopi gjithmonë ishte me popullin e Tij dhe me Zotin. Kjo i bën njerëzit të jenë të mëdhenj e të nderuar përgjithmonë.
Imzot Mark Sopi me vite të tëra u angazhua për pavarësinë e vendit tonë, Kosovës, duke na dhënë zemër e forcë se ajo do të bëhet së shpejti nga miqtë tanë.
Sot në këto momente të dhembjes, ndihem krenar që pata një mik të tillë, çfarë ishte Imzot Mark Sopi, të cilin gjithnjë e kisha krah të fortë pranë vetes në punët shtetërore në momentet më të vështira e më të mira.
I falemi kujtimit të Tij të përjetshëm.
I qoftë i lehtë dheu i Kosovës së lirë.
Zoti e bekoftë Imzot Mark Sopin, siç e ka bekuar.
Zoti e bekoftë Familjen Sopi.
Zoti e bekoftë Ipeshkvinë e Kosovës.
Zoti e bekoftë Kosovën.
Dr. Ibrahim Rugova,
President i Kosovës.
Krijoni Kontakt