Shën Markela nga Hiosi - 22 korrik

[Albo]

Markela nga Hiosi (22 korrik)

Martire jo për besimin, po për moralin. Nuk disponojmë një biografi të saktë, sepse burimet e vjetra heshtin. Kështu disa pretendojnë se u martirizua në shek. III, ndërsa të tjerët në shek. IV, ose akoma më vonë!! Nuk ekziston as mendim unanim për sa i përket mënyrës së martirizimit të saj Sipas traditës së ishullit Hios (përballë bregdetit të Azisë së Vogël), ku ajo nderohet në mënyrë të veçantë, virgjëresha e kishte prejardhjen nga hiosët, të pasur dhe të shquar. Herët vdes nëna e saj shpresëtare dhe në shtëpi mbeten vetëm i ati dhe e bija. Djalli, duke pasur zili për virtytin e saj, i ndezi të atit dëshirën e shthurur! E reja i kundërvihet, por e kupton se ai do të përdorte dhunë dhe arratiset. E ndjek nëpër male; ajo futet në një shkurre; e shpojnë gjembat; tjetri i vë zjarrin; ajo vrapon drejt detit; qëllohet me shigjetë dhe plagoset; lutet që ta përpijë toka; një shkëmb në bregdet hapet; futet deri në gjoks; vjen i nxitur nga satanai; nuk arrin që ta nxjerrë; ia pret gjinjtë dhe kokën. Kokën ia hedh në det… Në atë vend, që në kohë të vjetra ndërtuan një kishë. Guri, që siç besohet fsheh deri sot lipsanin e shenjtë, buron në mënyrë paradoksale ujë - ajazmë termal dhe shërues, që sa kohë psalet shërbesa e ajazmës lëshon avull. Për më tepër guralecët janë si të galvanizuar me gjak të mpiksur. Pelegrinët që mblidhen në kujtim të saj i gërvishtin - dhe atëherë duket ngjyra natyrale e gurit - dhe pluhurin e mbajnë si shërues. Oshënarja u shfaq shumë herë në ëndrra, zakonisht e veshur me raso, që të qortojë besimin e paktë ndaj fuqisë së saj mrekullibërëse, të vërtetojë se dëgjoi lutjet dhe që të premtojë shërime, të cilat vërtet u bënë. Përveç tyre, njerëz që vuanin nga sëmundje të pashërueshme u shëruan kur u lanë me ujin - ajazmë ose e pinë atë.