Kryemyftiu i Rusise ne interviste?

[Klevis2000]

Nga një intervistë me kryemyftiun e Rusisë

Toleranca islame është suporti i vetëm për arritjen e një bashkëjetese të sigurtë mes njerëzve.
--------------------------------------------------------------------------------

Islami është mirësi hyjnore, për të cilën muslimanët obligohen ta përcjellin sa më denjësisht te të tjerët.
Dihet botërisht se Islami ka qenë dhe është i njohur për tolerancë dhe bashkëjetesë.
Intervista e kryemyftiut të Federatës Ruse Tal’at Taxhudin, dhënë për të përjavshmen “Al-Alam Al-Islami” (Bota Islame), gjatë vizitës së tij në Kajro.

…Fillimisht a mund të na bëni një panoramë të shkurtër lidhur me gjendjen e muslimanëve dhe zhvillimet islame në vendin tuaj?
Lavdi Zotit, fusha e veprimtarisë islame është në parametra optimalë, dhe nuk është se ndryshon shumë me vendet e tjera islame. Nga dita në ditë ajo po merr trajektoren e saj, me aplikimin e një sërë metodash e modelesh sistematike; kryesisht me përgatitjen e mbajtjen e kumtesave dhe ligjëratave nëpër xhami e në vende publike, apo nëpërmjet ndjekjes së arsimit të lartë teologjik dhe instituteve të specializuara të kësaj fushe.
Në funksion të thirrjes islame, japim maksimumin e mundësive tona, duke qenë të vetëdijshëm se praktika e ftesës së njerëzve në Islam, është detyra më e lartë e më fisnike për ne si besimtarë.
Për këtë Allahu thotë në librin e Tij: “Dhe kush është më fjalëmirë se sa ai që fton drejt Allahut (në Fenë e Tij, në Islam), që punon mirësi e drejtësi dhe thotë: “Unë jam nga Muslimanët”? (Fusilet: 33)
Numri aktual i muslimanëve në Rusi, është diçka më shumë se 20 milionë. Kontaktet tona me Islamin janë të hershme. Ato datojnë në vitin 310 h, kohë kur Halifi El-Muktedir Bil-lah (me rezidencë në Bagdat), nisi për tek sundimtari ynë i atëhershëm një grup njerëzish të kryesuar nga Er-Rashidi dhe Ibn Fadlan (historiani i shquar).
Historia si dëshmuesja më e mirë e asaj kohe, na përcjell se ishte pikërisht toleranca islame, shkak për përqafimin e Islamit nga të parët tanë.
Megjithëse jetojmë mes nacionaliteteve dhe kulturave të ndryshme, në përditshmërinë tonë si shoqëri mbizotëron, mirëkuptimi, dialogu konstruktiv dhe respekti i ndërsjelltë.

…Si do e vlerësoni në pikëpamjen tuaj personale pozicionin momental të muslimanëve, krahasuar me vitet e përjetuara nën qeverisjen e regjimit totalitar të ish-Bashkimit Sovjetik?

Ndryshimi mes asaj që kemi përjetuar në atë kohë dhe situatës në të cilën ndodhemi, është si qielli me tokën. Aktivitetet e shumta në fushën e veprimtarisë islame zhvillohen normalisht dhe në gjendje të lirë.
Sot disponojmë 7000 objekte kulti, ku gati për çdo muaj kësaj shifre i shtohen edhe 3-4 të reja, që në total shërbejnë për bashkërendimin dhe funksionimin e thirrjes islame në vend.
Krahas tyre, zotërojmë një universitet me 5-degë specializimi në fushën e studimeve islame. Synimi ynë mbetet, përgatitja e kuadrove fetarë të aftë institucionalisht dhe profesionalisht për t’i shërbyer thirrjes islame në formë organizative. Së fundi nga ky universitet janë diplomuar 400 studentë, ndërkaq 500 të tjerë janë në vijim të studimeve të tyre.
Jemi në kontakte intensive me universitet islame, për arritjen e një bashkëpunimi të ndërsjelltë dhe për shkëmbimin e përvojës dhe eksperiencës të fituar në këtë drejtim.
Nuk e teproj nëse them se puna serioze dhe vlerësimi me objektivitet i situatave kritike, na ka ndihmuar jashtëzakonisht, për të mos përsëritur gabimet e së kaluarës.

…Situata që ju paraqisni mund të duket disi e “ekzagjeruar” në këndvështrimin e dikujt, veçanërisht atëherë kur perëndimi e konsideron botën muslimane si një pjesë të botës ku fondamentalizmi po lulëzon. Ç’mund të na thoni për këtë?
Ato që përjetojnë në përditshmërinë e tyre muslimanët rusë, s’janë aspak deklarata apo sllogane boshe, përkundrazi fakte reale e të jetuara.
Ne rrethohemi nga shumë nacionalitete, ithtarë të religjioneve të ndryshme, me të cilat kemi marrëdhënie korrekte. Sekreti i kësaj bashkëjetese ndërfetare, mbështetet pikërisht në vlerat e tolerancës islame.
Jemi të vetëdijshëm se kjo bashkëjetesë e arritur falë universalitetit të tolerancës islame, jo vetëm që s’duhet cënuar, por mesazhet që ajo përçon duhet t’i kultivohen gjeneratave të reja.

…Si e komentoni fushatën perëndimore të kohëve të fundit? Për mendimin tuaj, si mund të shmangen situata të tilla provokuese që nxisin reaksion dhe dëmtojnë identitetin real të Islamit?

Pavarësisht gjendjes sonë, s’do të thotë se ne jetojmë larg realitetit të Botës Islame. Duke qenë pjesë e pandashme e saj ne kurrësesi s’mund të aneksojmë padrejtësitë dhe armiqësitë e kohëve të fundit që, sjellin destabilizim në marrëdhëniet ndërnjerëzore. Ne si muslimanë dënojmë çdo fushatë a përpjekje që ka për qëllim injorimin e fesë sonë dhe identifikimin e saj me akuza të paqena.
Islami përkrah dhe mbron të drejtën e individit dhe autonominë e tij, pavarësisht përkatësisë shoqërore apo religjioze. Porositë e tij të ndritura tregojnë më së miri për qëndrimin aspak tolerant karshi fenomeneve të tilla si dhuna, terrori apo pastrimi etnik.
Ne kemi të drejtë që po këto akuza t’ia faturojmë segmenteve të tjera, por feja, morali dhe parimet tona nuk na e lejojnë dëmtimin e të tjerëve dhe aq më shumë akuzimin e tyre.
Mendoj se Bota Islame tani më shumë se kurrë ka nevojë për kontributin e të gjithëve, për qartësimin e të vërtetave islame dhe qëndrimet e tij sublime ndaj ngjarjeve të kohës.
Perëndimorët me politikat e tyre të dështuara që po hasin kritika përditë e më shumë, duhet të pranojnë faktin se muslimanët nuk dëmtojnë askënd, përkundrazi ata solidarizohen në ndihmën e të tjerëve dhe s’reshtin së kontribouari për sigurimin e mirëqenies dhe begatisë mbarënjerëzore.

…A mendoni se Bashkësia Islame në këtë situatë të palakueshme e me rreziqe të shumta, është e aftë të përballojë fushata të tilla intriguese?


Më vjen keq, por dua të pranoj faktin se Bashkësia Islame po përjeton një fazë kritike e serioze. Megjithëse të tjerët na konsiderojnë të tillë, jemi ne që duhet të dëshmojmë të kundërtën. Ajo që kërkohet me tepër këmbëngulje nga ne është, nxjerrja në pah e forcës reale si dhe distancimi nga çdo çështje dytësore a sekondare, që sjell mpirjen e mendimit dhe çorientimin e masës. Në kohën që po jetojmë muslimanët duhet t’i kthehen edhe një herë parimeve të larta islame, që premtojnë garanci për zgjidhjen dhe kapërcimin e krizave momentale.

…Rusia zyrtare ka premtuar se së shpejti do të bëhet anëtare e Konferencës Islamike…, sa i vërtetë është për ju ky fakt?
Konferenca Islamike ka një jetëgjatësi 35-vjeçare. Ajo numëron në anëtarsinë e saj shumicën e vendeve islame, afërsisht 60.
Në takimin e radhës, të zhvilluar në Malajzi, asistoi me praninë e tij edhe një delegacion nga vendi ynë. Ndërkaq vetë presidenti Putin ka deklaruar se vendi i tij është drejt anëtarsimit në këtë Konferencë.
Ne si muslimanë e shohim si favor diçka të tillë, duke e konsideruar veten pjesë të kësaj bashkësie të ndritur, bashkësisë së Profetit Muhamed (a.s.).
Ky organizëm ndërkombëtar ndërmerr nisma të rëndësishme në mbrojtje dhe pro interesave të muslimanëve, dhe s’ka se si të mos vlerësohet roli që ka luajtur dhe luan ai në mbrojtje të çështjes palestineze dhe vendeve të shenjta, si dhe ndaj çështjeve të tjera me peshë e deçizive të kohës.
Shpresojmë që vendi ynë të fitojë së shpejti statusin e anëtares aktive në këtë konferencë....

[Dera]

Po duket interviste interesante, edhe pse nuk e lexova.

[Arioni]

Intervist shum interesante,

Nuk e kam dit se ka mbi 20 milion musliman në Rusi. Allahu Ekber.