Kënga i kushtohet Luftës së Vlorës në 1920. Në vitin 1914 Italia aneksoi Vlorën me gjithë fshatrat e saj dhe vendosi baza ushtarake kudo, edhe nëpër fshatra. Në vitin 1920, paria e krahinës së Vlorës (rreth 200 burra), mbajti një kuvend në Baçardha të Dukatit dhe vendosi që Vlora të çlirohej. Peshën kryesore në këtë luftë e patën fshatrat e Vlorës, por pati ndihma edhe nga Mallakastra, Skrapari, Berati, Gjirokastra, Peqini, Çamëria, Korça, Tirana, si dhe nga shqiptarët e Amerikës.
U bë luftë e madhe. Çetat shqiptare në fillim çliruan fshatrat dhe u nisën drejt qytetit. Italia ishte një fuqi e madhe e kohës dhe ushtarët italianë ishin të armatosur mirë me topa, mitralozë, avionë dhe anije lufte, ndërsa shqiptarët ishin të armatosur keq dhe pa asnjë mbështetje nga jashtë, e megjithatë shqiptarët e fituan këtë luftë. Humbja e kësaj lufte solli tërheqjen e italianëve edhe nga Saranda, Durrësi dhe Shëngjini.
Telat po venë e vijnë - Grupi "Gurra"
Telat'ë¹ po venë e vijnë
punon Kota me Kaninë²
Punon Ko' punon Ko'
punon Kota me Kaninë
(përsëritet pas çdo vargu)
Gjenerali me zabinë³
flet Goti me Piaçetin'ë⁴
Si do bëjmë unë dhe ti'në
se shqip(ë)tarët e rrijnë⁵
Se shqip(ë)tarët e rrijnë
Gjor(ë)m⁶ janë dhe poshtë po vijnë
Gjor(ë)m janë dhe poshtë po vijnë
Osmëni⁷ me dyzet mijë
Osmëni po bie fuqinë
Vlora do fitojë lirinë
1) Telegrafi. Gjeneralët italianë të shqetësuar nga përparimi i shqiptarëve komunikojnë me njëri-tjetrin.
2) Kota dhe Kanina - dy fshatra ku italianët kishin përqëndrime ushtarake
3) Zabit – oficer (turqisht).
4) Goti dhe Piaçentini - gjeneralë italianë
5) E rrijnë - e rrahin. Ka kuptimin që janë të zotë për luftë.
6) Fshati Gjorm
7) Osman Haxhiu, komandant shqiptar.
.
Krijoni Kontakt