Ky kend i Forumit Shqiptar i kushtohet artit dramatik dhe gjithe komponenteve te tij. Por duke qene se disa perfaqesues te shkolles se aktrimit shqiptar po bejne rruge edhe ne fusha te tjera sic eshte ai i modelimit, mendova se do ishte me vend qe ky shkrim te perfshihej nen artet dramatike
Çoba, modelja shqiptare në klipin njujorkez
Nuk ka pranuar kurrë të pozojë nudo për një revistë. Për të bukuria ka një koncept të veçantë. Valbona Çoba thotë se "nuk do të pozoja kurrë nudo për një agjenci fotografike, mbase për një rol kinematografik. Por ky i fundit duhet të jetë me të vërtetë i rëndësishëm". Ende e paafirmuar në botën e kinemasë, Çoba vazhdon karrierën e saj si modele në Nju-Jork. "Amerikën e kam parë gjithmonë si një mundësi të mirë për shqiptarët", do të shprehej ajo. Së fundmi, ajo është modelja e disa videoklipeve të xhiruara në Shtetet e Bashkuara të Amerikës. Këngëtari italian Daniel Groff ka zgjedhur bukuroshen shqiptare si modelen e tij në videoklipin e albumit të fundit, "Come sempre" (Si gjithmonë).
Vajza e dashuruar në videoklip
Ambientohet në Nju-Jork videoklipi i këngës "Come sempre", singëlli i ri i këngëtarit Daniel Groff. Një trup prej 25 vetash kanë realizuar këtë videoklip me producent shqiptarin Azem Elezaj e modelen Valbona Çoba në qendër. Videoja tregon historinë e një çifti, të cilët në fund të marrëdhënies së tyre rishikohen. Të dy të pavetë-dijshëm për praninë e njëri-tjetrit, Daniel së bashku me Çobën eksplorojnë qytetin, vendin përreth, të ndarë, por ende të dashuruar. Një spunto kinematografike e frymëzuar nga filmi "Lost in Traslation" (I humbur në përkthim) i regjisores Sophia Coppola. Dy të dashuruarit gjenden të huaj përballë frenezisë së paqes në Nju-Jork, por në të njëjtën kohë të rrëmbyer nga bukuria dhe energjia e këtij vendi. Në video fokusohet modelja shqiptare Valbona Çoba, e cila ecën rrugëve të qytetit.
Ndërmjet Tiranës e Nju-Jorkut
E ndërsa lidh kontrata me agjencitë më prestigjioze të modës, ajo nuk mund të harrojë Tiranën, vendin e saj të lindjes. E veshur me xhinse, me një bluzë të thjeshtë dhe e patrukuar, ajo vit për vit shëtit nëpër Tiranë. Për një moment ajo nuk është vajza që shohim nëpër kopertina revistash. Nuk është as bukuroshja shqiptare që sfidoi Greqinë teksa korr suksese të tjera në Amerikë. Tri vjet më parë ajo është shpallur si fotomodelja më e mirë e muajit qershor në revistën "Viplife", por as kjo nuk është. Kur vjen në Shqipëri ajo kërkon të shijojë një kafe me miqtë pa rënë shumë në sy. Edhe pse hiret, e mbi të gjitha vendosmëria, e kanë ndihmuar që t'i bëjë ballë konkurrencës në një vend të huaj, ajo në Tiranë është vetëm e thjeshtë. Ka prekur tashmë skenën e teatrit, ka prekur majat e agjencive më të njohura në Greqi dhe aktualisht punon si modele edhe në Amerikë. Sfida e saj e fundit duket se është kinemaja. Ëndërron Hollivudin, por kjo për vetë Çobën është një sfidë e vështirë që kërkon shumë punë. "Modelja është një profesion i rastësishëm", do të shprehej ajo në një intervistë, "ajo që preferoj më shumë është aktrimi".
Në rrugën e modeles
Një nga punët më të suksesshme të saj është kalendari "I love America". Në të pozojnë 13 modele kopertinash me rroba banjoje. Çoba në shumë pak kohë pushtoi një pjesë të mirë të kopertinave greke në Athinë dhe arriti të lidhte kontrata me agjenci të ndryshme modelesh, si "Helena Model", "ACE model" ,"Creative model" etj. Punonte me kontrata të gjata dhe të përsëritura për kompani të njohura në botë, si "L'oreal", cigaret "Rex", "Diesel", "Panten" "Rilken", teksa fytyra dhe hiret e saj shfaqeshin radhazi në katalogët e njohur "Sloge", "Luna", "Winter", "Vingo", "Lolita", "Vanesa" e shumë të tjera.
"Mis fotozhenia" që u shndërrua në aktore
Fillimet e saj kanë qenë në një spektakël bukurie. Në vitin 1991, në spektaklin e organizuar nga regjisorja Vera Grabocka, "Miss Albania", Valbona Çoba u shpall "Miss fotozhenia 1991". Ishte konkursi i parë i bukurisë femërore në Shqipëri. Përfundon studimet e larta në Akademinë e Arteve, dega aktrim, për t'u larguar më pas jashtë vendit. Zgjedh Greqinë, së bashku me nënën e saj, ndërsa kryen dhe shërbimet e para fotografike për disa agjenci modelesh. Për disa vjet punon me ngulm për të hyrë në radhët e fotomodeleve më të njohura në Athinë. Dhe në Greqi, gjithçka nis me një konkurs bukurie, ku Çoba shpallet "Miss Trupi më i Bukur '97". Në pak kohë ajo renditet në radhën e dhjetë modeleve më të njohura në Greqi, ku pati mundësinë e një karriere të shkëlqyer me disa nga fotografët më në zë të Greqisë në krah. Bëhet pjesëmarrëse në disa spektakle të ndryshme televizive organizuar nga kanali më i njohur në Greqi ANT 1. Për të vazhduar karrierën e modeles, zgjedh Nju-Jorkun, e në pak kohë ia arrin të dalë në pozicionin që dëshiron. E ndërkohë nuk është ndarë edhe nga drama, të cilën e kishte lënë në mes në Tiranë.
"Xhordan" dhe pasioni për artin dramatik
Nuk mund të harronte teatrin. "Teatri është pasioni im", është shprehur ajo. E diplomuar në Akademi në Fakultetin e Artit Dramatik, Çoba kërkon të vërë në provë aftësitë e saj në teatër. Regjisori Kiço Londo do të ishte i pari që do t'i ofronte një mundësi të tillë. Tema me të cilën ajo ka mbrojtur diplomën, vjen si një shfaqje e madhe në Teatrin Kombëtar. Shfaqja "Xhordan" do të ishte kali i saj i betejës, një sukses i dyfishtë në atë kohë për Çobën, që kishte vetëm një vit e diplomuar. Dramaturgjia angleze duket se e mrekullon Valbonën. Tragjedia e gruas së mbyllur në çmendinë e një rol i vështirë e mjaft psiko-logjik është sfida e saj e radhës. Largohet nga Nju-Jorku për të ardhur në Tiranë, ku e priste një shfaqje e vështirë. Punon përsëri me regjisorin Londo dhe rikthejnë në skenë tragjedinë. Në rolin e vetëm të kësaj drame, për dy orë rresht Valbona Çoba interpreton një grua të re, së cilës duan t'i marrin fëmijën. Vendos ta mbysë foshnjën me jastëk dhe pastaj të vrasë veten për t'u larguar që të dy përfundimisht nga kjo botë. Ndërsa mbytja e fëmijës funksionon, vetëvrasja jo. "Xhordan" mbyllet në çmendinë e më pas në burg.
Përgjigju Duke Cituar
Postuar më parë nga KoTeLja_VL
Krijoni Kontakt