George John Tenet: Sekretet e CIA-s në librin tim

[Davius]

Si drejtor i CIA-s, George Tenet ka ruajtur sekretet më të rëndësishme të Amerikës. Dhe deri tani buzët e tij kanë qëndruar të kyçura. CIA e Tenet-it është fajësuar për mos parandalimin e sulmeve të 11 shtatorit, është lavdëruar për rënien e talebanëve dhe përgojuar për parashikimin se Iraku kishte armë kimike dhe biologjike. Tani, tre vite pasi ka lënë CIA-n, Tenet ka shkruar një libër të quajtur, "Në qendër të stuhisë". Korrespondenti i CBS, Scott Pelley, u ul dhe bisedoi me George Tenet në emisionin e këtij televizioni "60 Minutes". "60 Minutes" kërkoi të dinte se si ai "u gabua për armët e shkatërrimit në masë". A po përdorim torturën në luftën kundër terrorit? Dhe kush ishte personi në Shtëpinë e Bardhë që i nguli përfundimisht thikën pas shpine? Në "60 Minutes" Tenet u shfaq i pasionuar, luftarak, shfajësues, sfidues dhe egërsisht besnik ndaj njerëzve të CIA-s dhe luftës së tyre kundër terrorizmit.

George Tenet: Njerëzit nuk na kuptojnë ne, e di, ata mendojnë se ne jemi një turmë burokratësh të pafytyrë, pa ndjenja, pa familje. Nuk ka njeri në këtë qeveri që të ketë ndier atë që ne kemi ndier para ose pas sulmeve të 11 shtatorit. Pa dyshim, pas 11 shtatorit të gjithë kishin të njëjtën ndjesi. Askush s'është ndier si ne atë ditë. Ishte personale.

George Tenet: Unë akoma rri zgjuar natën duke menduar për gjithçka që mund të ishte bërë tjetër për të ndaluar atë që ndodhi më 11 shtator. Familjeve të prekura nga sulmet e 11 shtatorit unë u kam thënë, "ju meritoni më shumë se qeverinë që keni".

Scott Pelley: Çfarë ndodhi?

George Tenet: Njerëzit u përmbytën me të dhëna dhe operacione. Dhe ata e humbën. Ne nuk po përpiqemi të fshehim me qëllim faktin se qeniet njerëzore bëjnë gabime.

(CBS: Por Komisioni i 11 shtatorit e akuzoi CIA-n e Tenet për burokraci dhe se dështoi të njihte kërcënimin që përbënte në të vërtetë Al Kaeda.)

George Tenet: Gjithë këto komisione dhe gjithë këto raporte nuk arritën të shkojnë përtej ndjenjave të njerëzve të mi. E di, të shohësh si shkruhet për ne, sikur jemi idiotë. Ose sikur ne nuk e kuptonim kërcënimin. Sikur nuk e kuptuam se çfarë ndodhi atë ditë. Të vinin në dyshim integritetin tonë, apo aftësinë tonë operacionale. Njerëzit amerikanë duhet të dinë se gjërat nuk ishin kështu. Ne jemi ata që qëndrojmë para dhe tregojmë të vërtetën kur jemi gabim. Ka diçka fantastike në këtë qeveri. Të vetmit njerëz që dalin para dhe tregojnë të vërtetën janë kush? Oficerët e inteligjencës. Sepse kultura jonë është "mos e thyej kurrë besimin me të vërtetën". Ne ju themi vetë të vërtetën, nuk keni pse të na e nxirrni me zor atë. Unë nuk kisha nevojë për një thirrje që të më tregonte se nuk e kisha parë listën Hazmi dhe Midhar. Ne e morëm vesh menjëherë dhe u treguam të gjithëve. E vërteta është shumë e rëndësishme për ne.

(CBS: E vërteta e CIA-s dhe Al Kaedës fillon para 11 shtatorit. Dy vitet para se të ndodhnin sulmet, oficerët e CIA-s në Afganistan po bënin plane se si të shembnin regjimin taleban dhe të kapnin Bin Laden. Por Tenet thotë se as Klintoni dhe as

Presidenti Bush nuk i dhanë atij "Ok"-ein për të vazhduar. Atëherë, në verë të vitit 2001 Tenet thotë se u alarmua aq shumë nga të dhënat e inteligjencës se një sulm do të ndodhte saqë kërkoi një takim të menjërshëm me Këshilltaren për Sigurinë Kombëtare të asaj kohe, Condoleeza Rice.)

George Tenet: Raportimi përfshin në thelb faktin se kundër SHBA do të ketë sulme shumëfishe spektakolare. Ne besojmë se këto sulme do ndodhin shumë shpejt dhe ka gjasa për fatkeqësi masive.

Scott Pelley: Ti po i thua Condoleezza Rice në atë takim në Shtëpinë e Bardhë në korrik se ne duhet të ndërmarrim veprime sulmuese në Afganistan, pikërisht në këtë kohë. Para sulmeve të 11 shtatorit.

George Tenet: Ne duhet të ndërmerrnin veprime të menjëhershme në Afganistan në atë moment. Në atë moment kishim nevojë të hidheshim në sulm.

(CBC: Në librin e tij, Tenet thotë se edhe pse ai i ka thënë Rice se sulmi ndaj amerikanëve mund të ndodhte shumë shpejt ajo ua delegoi zyrtarëve të dorës së tretë kërkesën e tij për aksion të menjëhershëm në Afganistan.)

Scott Pelley: Ti takoheshe me Presidentin çdo mëngjes. Pse nuk i thoshe Presidentit, "Zoti President, kjo është e tmerrshme. Ne duhet të bëjmë këtë tani. Harroji burokracirat. Unë kam nevojë për këtë gjë që këtë pasdite"?

George Tenet: Në rregull. Sepse qeveria e Shteteve të Bashkuar atë Amerikës nuk funksionon në këtë mënyrë. Presidenti nuk është një oficer veprues. Ti e vë planin e aksionit para këshilltarit të sigurisë kombëtare dhe njerëzve, të cilët ia shtrojnë faktet presidentit për të vendosur mbi ligjet që ato do implementojnë.


(CBS: Më 11 shtator, Tenet ishte duke ngrënë mëngjes pranë Shtëpisë së Bardhë kur avioni i parë goditi kullat. Atij i shkoi mendja në çast tek armiku i tij i vjetër.)

George Tenet: E kuptova menjëherë se ishte Bin Laden. U ngrita nga mëngjesi dhe u hodha në makinë.

Scott Pelley: Ç'do të thuash me se e dije menjëherë? Dua të them, shumë njerëz në vend menduan se bëhej fjalë për një aksident të tmerrshëm.

George Tenet: Dëgjo, kur e ke ndjekur këtë gjë për aq gjatë sa e kam ndekur unë, kur ke menduar për sulmet e shumëfishta që mund të ndodhnin. Në mendjen time nuk kisha dyshime për atë që kishte ndodhur, që në moment.

Scott Pelley: Pas gjithë atyre viteve duke thurur plane dhe duke dashur të kapësh apo vrasësh Osama Bin Laden, duhet të kesh menduar, "Biri i bushtrës më kapi i pari".

George Tenet: Po. Por në kokë kisha dhe një mendim tjetër. "Do të të mund ty dhe bastardët e tu. Dhe do ta shohim. Sepse rregullat po ndryshojnë". Ja çfarë mendova.

(CBS: Menjëhrë, Tenet mori kompetencat që kishte kërkuar për në Afganistan. Dhe për herë të parë, CIA udhëhoqi një luftë amerikane. Tenet e quan atë si koha më e mirë e agjencisë, përveç mbase një fakti.

Scott Pelley: A ndodhej Osama Bin Laden në Tora Bora?

George Tenet: Ne besojmë që po.

Scott Pelley: Dhe pyetja është, "Si arriti të largohej?" Nëse ky plani juaj ishte aq i mirë...dhe çështja e Afganistani shkoi aq mirë... . Si u largua Bin Ladeni, kur ne arritëm ta vinim me shpatulla për muri në Tora Bora?

George Tenet: Epo, e ke parë ndonjëherë gjeografinë e Tora Borës?

Scott Pelley: Po.
George Tenet: Ti s'fut dot dikë në qoshe në Tora Bora.
(CBS: Tenet thotë se forcat tona ishin të pakta për të mos lënë Bin Laden që të arratisej.)

George Tenet: Ne luajtëm me atë që kishim. Sepse nuk kishim forca të mëdha në terren. Ne kapëm shumë njerëz, ne nuk kapëm atë që donim.

Scott Pelley: Çfarë tha Khalid Sheikh Mohammed kur përfundoi në duart e hetuesve të CIA-s?

George Tenet: Do flas me ju kur të më dërgoni në Nju Jork dhe kur të shoh avokatin tim.
(CBS: Por CIA kishte diçka tjetër në mendje. Khalid Sheikh Mohammed dhe të tjerë u përfshinë në programin "të arrestuar të cilësisë së lartë". Ishin ngritur burgje sekrete dhe shumë të dyshuar ishin marrë në pyetje nën të ashtuquajturat "teknika të zgjeruara pyetëse", çka thuhet se përfshijnë deprivim të gjumit, të ftohtë ekstrem dhe uji pa ndërprerje në fytyrë.)

George Tenet: Imazhi i krijuar është, ne ulemi rreth zjarrit të kampit dhe themi, "Tani të shkojmë të torturojmë njerëz". Epo, ne nuk torturojmë njerëz. Po ta them dhe njëherë. Ne nuk torturojmë njerëz. "Ok"?

Scott Pelley: Lëri këto tani George.

George Tenet: Ne nuk torturojmë njerëz.

Scott Pelley: Khalid Sheikh Mohammad?

George Tenet: Ne nuk torturojmë njerëz.

Scott Pelley: Uji i ftohtë?

George Tenet: Ne nuk torturojmë njerëz - nuk po them për teknika.

Scott Pelley: Është torturë.

George Tenet: Dhe ne nuk torturojmë njerëz. Tani më dëgjo mua. Më dëgjo mua. Dua të më dëgjosh. Konteksti është në post 11 shtatorin. Unë mora raportime për armë bërthamore në Nju Jork, apartamente të tëra që do hidheshin në erë, aeroplanë që do fluturonin nëpër aeroporte sërish si atëherë. Linja komplotesh që unë s'i njihja, unë s'e dija se ç'po ndodhte në SHBA. Dhe po përpiqesha të gjeja se cili do të ishte shkatërrimi i radhës. Të gjithë mund të harrojnë kontekstin qendror të asaj që përjetuam. Frika e prekshme që ndiem duke u bazuar në faktin se ishin aq shumë gjëra që ne s'i dinim.

George Tenet: Unë di se ky program ka shpëtuar jetë. Unë di se ne kemi hedhur në erë plane.

Scott Pelley: Por ajo çfarë po thua në thelb është se disa njerëz duhet të torturohen.

George Tenet: Jo, nuk e thashë një gjë të tillë. Nuk e thashë një gjë të tillë.

Scott Pelley: Ti po thua se marrja në pyetje me metoda të zgjeruara...

George Tenet: Nuk e thashë një gjë të tillë. Nuk e thashë një gjë të tillë. Ne nuk tor... . Më dëgjo mua. Ti, ti po bën...,

Scott Pelley: Ti e përmend në libër, "marrje në pyetje me teknika të zgjeruara".

George Tenet: ...supozime. Epo, ashtu e quajmë ne.

Scott Pelley: Dhe është një eufemizëm.

George Tenet: Unë nuk do të bëj debat kuptimor me ty. Po të them atë çfarë unë besoj.

Scott Pelley: Ke qenë ndonjëherë i pranishëm në këto lloj marrjesh në pyetje?

George Tenet: Jo.

Scott Pelley: Nuk mendoje se ishte përgjegjësia jote për të marrë vesh se ç'po ndodhte?

George Tenet: Unë e dija ç'po ndodhte. Nuk jam thjesht një soditës. E di se çfarë po firmosja gjithë kohës për jo ose po.

Scott Pelley: Po e bëj pyetjen në këtë mënyrë: Pse ishin mënyrat e zgjeruara të marrjes në pyetje të nevojshme?

George Tenet: Sepse këta janë njerëz, të cilët kurrë, kurrë nuk të tregojnë asgjë. Këta janë njerëz që e dinë kush është përgjegjës për sulmet e ardhshme terroriste. Këta janë njerëz të thekur që do të vrisnin brenda 30 sekondave, pasi të kishin dalë nga kudo po mbaheshin pa iu dridhur qerpiku. Ti mund të qëndrosh i ulur aty, ti mund të qëndrosh i ulur aty edhe pas pesë vitesh dhe të bësh këtë debat me mua, ajo çfarë të kërkoj të bësh është ecësh një kilometër në këpucët e mia ndërsa më duhet të përballem me këto realitete.

George Tenet: Hetimet zbuluan rrjete dhe prishën shumë plane në SHBA.

Scott Pelley: Al Kaeda, ndodhet në SHBA tani?

George Tenet: Supozimi im është se kanë infiltruar një valë të dyë ose një të tretë në SHBA në kohën e 11 shtatorit. A mund të ta provoj unë këtë? Jo. Kjo është intuita ime. Në vitin 2003, terroristët ishin në SHBA të përgatitur të sulmonin metrotë e Nju Jorkut, kur numri dy i Bin Ladenit i thirri të sprapseshin për një diçka më të madhe. Çfarë është kjo kauza më e madhe? Një e dhënë është se Bin Laden po përpiqet të zë në dorë materiale nukleare që në vitin 1993. Këto materiale i japin superfuqi një organizate në rrjet që nuk është shtet. Nuk e di se çfarë do të ndodhë, por jam i shqetësuar sepse kam parë mjaft për të kuptuar se çfarë qëllimi kanë. Por kur do të dalin në dritë planet e tyre? Nëse Al Kaeda do të përdorë materiale bërthamore, mijëra armët që ne kemi do të ishin të parëndësishme. Në mes të një kërcënimi nga Al Kaeda, jam i habitur që Shtëpia e Bardhë po merret kaq shumë me Irakun. Lufta në Irak është tragjedi kombëtare. Këtë e kuptova në fund të karrierës sime. Unë po fajësohesha për vendimin e luftës.

Scott Pelley: Mendoni se CIA ka gabimet e veta?

George Tenet: I pranoj gabimet e CIA-s, por edhe të miat. Ajo që më inatos më shumë është se Shtëpia e Bardhë i shpërfilli paralajmërimet e CIA-s, sajoi libra për inteligjencën dhe më fajësoi mua për këtë dështim. Pjesa më e vështirë është se e kam dëgjuar këtë për tre vite. Kam dëgjuar zëvendëspresidentin në vitin e pestë të sulmeve të ma përmendë përsëri punën e Irakut. "Shiko se çfarë na tha ai torollaku dhe ne vendosëm të hapnim luftë", thonë për mua. E vërteta e Irakut fillon ditën pas sulmeve të 11 shtatorit, kur u ndesh me këshilluesin e Pentagonit, Richard Perle, në Shtëpinë e Bardhë. Ai më tha se "Iraku do ta paguajë për atë që ndodhi dje, ata kanë përgjegjësi". Ishte 12 shtatori. Kam manifestin me vete që tregon se këtë e bëri Al Kaeda. Në kokë nuk më shkonte asnjë mendim se Iraku ishte i përfshirë në çfarëdolloj forme dhe më kujtohet të kem thënë me vete se do të shkoj t'i them Presidentit "Për çfarë po flet ky?"

Scott Pelley: Ju thatë se Iraku as që ju shkonte nëpër mend në ato momente. Por tani çfarë mendoni?

George Tenet: Në lidhje me komplotin e 11 shtatorit, asnjë. Nuk kishte kurrfarë lidhjeje. Asnjëherë nuk e verifikuam nëse kishte ndonjë autoritet, drejtim, kontroll apo bashkëpunim me Al Kaedën kudër Amerikës. Pikë.

Scott Pelley: Presidenti, në tetor të 2002-shit citon se "Mendojmë se Saddam Hussein po e përdor Al Kaedën për punët e tij të pista". Këtë po i thoshit ju Presidentit?

George Tenet: Nuk besonim se Al Kaeda do të kryente punët e pista të Saddam Hussein-it.

Scott Pelley: Në janar të vitit 2003, Presidenti citon përsëri "Imagjinojini të 19-të pengmarrësit të armatosur nga Saddam Hussein". Këtë i keni thënë Presidentit?

George Tenet: Jo. Zëvendëspresidenti pohoi se Saddam-i kishte armët bërthamore, atëherë kur CIA po thoshte se nuk kishte.

Scott Pelley: Çfarë do të thotë kjo?

George Tenet: Nuk e di se çfarë do të thotë. Gjykimi i inteligjencës ishte se "ai nuk do të ketë armë bërthamore deri në vitin 2007, 2009".

Scott Pelley: Por këto nuk janë ato që thotë zëvendëspresidenti.

George Tenet: Këtë s'e shpjegoj dot. Ndonjëherë e kam paralajmëruar Shtëpinë e Bardhë se pohimet që bënte ishin të gabuara, por kam lejuar që të bëjnë një gabim të madh, kur Presidenti tha se "Qeveria britanike mësoi se Saddam Hussein kohët e fundit ka marrë sasi të mëdha uranium nga Afrika".

Scott Pelley: CIA e kishte hedhur poshtë këtë supozim kohë më parë. Agjencia madje kërkoi që ky pohim të hiqej nga dorëshkrimi i dy fjalimeve presidenciale. Po pse nuk u hoq nga fjalimi i tretë?

George Tenet: Nuk e lexova fjalimin e tretë. Po merresha me shumë gjëra të tjera.

Scott Pelley: Prit një minutë. Ti nuk e lexove?!

George Tenet: E saktë. Nuk e lexova. Ia morra gjatë një takimi të mëparshëm dhe ia dhashë asistentit tim. I thashë: "Djema, shqyrtojeni këtë dhe ejani tek unë nëse duhet të bëj ndonjë gjë".

Scott Pelley: Pra askush nuk erdhi tek ju.

George Tenet: Për këtë arsye duhet të marr pjesën time të përgjegjësisë.

Scott Pelley: A ju kërkoi dikush nga Shtëpia e Bardhë, dikush nga departamenti i mbrojtjes nëse duhet të shkonit në Irak?

George Tenet: Në diskutimet e vitit 2002, në pranverën dhe verën e vitit 2002 shtrohej çështja "Si do ta bësh" dhe jo "A duhet ta bësh".

Scott Pelley: A s'të pyeti kush?

George Tenet: Nuk më kujtohet të jem ulur në një takim dhe dikush të më ketë thënë "Jemi të shqetësuar për Irakun. A është gjëja e duhur për t'u bërë? Cilat janë ndërlikimet?" Nuk më kujtohet të kem kaluar çaste të tilla, kur njerëzit ulen dhe flasin me sinqeritet nëse është e drejtë të bëhet diçka.
(Megjithëkëtë, në zyrat e CIA-s, ekipi i Tenet po bënte një gabim trashanik të vetin. CIA nxori vlerësimin e vet të armëve irakiane në një raport sekret të quajtur "Vlerësimi i Inteligjencës Kombëtare")

Scott Pelley: Vlerësimi kryesor i Inteligjencës Kombëtare thotë: "Bagdati ka armë kimike dhe biologjike. Pikë".

George Tenet: Gjykim besimplotë.

Scott Pelley: Si mund ta bënit një pohim kaq të guximshëm?

George Tenet: Ne besonim se ai kishte armë kimike dhe biologjike.

Scott Pelley: Por s'kishit asnjë provë të fortë!

George Tenet: Jo, jo, kishim shumë të dhëna. Kishim mjaft të dhëna teknike. Nëse i mbledhim të gjitha bashkë ato prova që kishim, në gjykatë nuk përbëjnë evidencë. Por kur bën një vlerësim, shkruan ato që di. Me ato që kishim edhe mund ta fitonim një gjyq civil, por jo gjyq kriminel për sa i përket provave.

Scott Pelley: Ne po shkojmë në luftë. Me dhjetëra mijëra njerëz po vriten. Ju po më thoni se kishit prova për të fituar një çështje civile por jo kriminale?

George Tenet: Ndonjëherë mendtë të vijnë pas Kuvendit. Publiku u përball me atë që shkruam, për armët e shkatërrimit masiv dhe për profesionistët, që mburren se kanë të drejtë. E pranoj se kjo është një eksperiencë e dhimbshme për ne.

Scott Pelley: Vlerësimi i matur thoshte 100 deri në 500 ton? Si mund të gabohet kaq keq?

George Tenet: Scott, e përmendëm një herë këtë. Kjo ishte ajo që besonim. Këtë shkruam.

Scott Pelley: E nga dolën gjithë këta numra?

George Tenet: Nga vlerësimet e inteligjencës kombëtare. Askush nuk i sajon këto gjëra.

Scott Pelley: Prit një minutë. Ju i sajuat këto gjëra?

George Tenet: Jo, nuk i sajuam ne, Scott, ne vetëm ...

Scott Pelley: Nuk është e vërtetë.

George Tenet: Scott, ti po e bën përsëri. Po vë në dyshim integritetin e njerëzve që bëjnë gjykime analitike, dhe japin gjykimet më të mira për atë që besojnë se Iraku posedon. Zbulimet, e dini vetë, puna ime nuk ka të bëjë gjithmonë me të vërtetën. Por ka të bëjë me gjykimet e njerëzve për atë që e vërteta mund të jetë. Ne e besuam atë. Ne e shkruam atë.
("Këto nuk janë supozime, po ju japim fakte dhe konkluzione të bazuara tek inteligjenca", tha Sekretari i Shtetit, Powell).

Scott Pelley: Ai nuk i tha Kombeve të Bashkuara "Dëgjoni, ne besojmë se kjo mund të jetë e vërtetë". Kjo iu pohua të gjithë botës. Mes 100 dhe 500 ...

George Tenet: Sa doja ta ktheja shiritin mbrapsht. Vërtet mendoni se shërbimi i inteligjencës amerikane do ta nxjerrë sekretarin e shtetit para të gjithë botës dhe me dashje do ta lërë të thotë gjëra të pasakta? Jo.

Scott Pelley: I keni kërkuar falje Colin Powell-it?

George Tenet: Unë dhe Colin kemi folur për këtë. Nuk do të tregoj se çfarë i thamë njëri-tjetrit, por kemi folur.

(Kur u bë e qartë se nuk kishte armë të shkatërrimit masiv, mes Shtëpisë së Bardhë dhe CIA plasi sherri. Një ish-ambasador me emrin Joe Wilson shkroi në artikull ku demaskonte supozimin e uraniumit që ishte përmendur nga Shteti në OKB. Shtëpia e Bardhë u hakmor, nxori një histori që e ekspozonte identitetin e gruas së Joe Wilson-it, Valerie Plame, duke thënë se ishte një punonjëse sekrete e CIA-s)

George Tenet: Ajo është një nga punonjëset e mia? Gabim. S'është e drejtë të thuhen emrat e punonjësve të mi.

Scott Pelley: Sa shumë dëmtoi ky fakt?

George Tenet: Nuk është kjo çështja. S'mund të themi kështu gjërash vetëm se ndodhi një sherr në Uashington dhe se burri i saj doli dhe tha atë që tha. Punonjësit e inteligjencës së vendit nuk janë dosido. Pikë. Vetëm kaq duhet të dini".

Scott Pelley: Me sa duket në Shtëpinë e Bardhë nuk e dinin këtë.

George Tenet: S'do të flas më. Ju thashë atë që mendoj.
(Ajo që Tenet nuk dinte ishte se sherri tjetër do të ishte i veti. Doli nga një tjetër burim i Shtëpisë së Bardhë, këtë radhë nga reporteri Bob Woodward. Një burim sekret ia përshkroi Woodward-it takimin para luftës në zyrën ovale. CIA po i tregonte Presidentit se si ta paraqiste çështjen e armëve publikut. Woodward shkroi: "Tenet u ngrit, hodhi duart në ajër. "Është "slam dunk").
George Tenet: Kurrë nuk u ngrita nga kolltuku. Kurrë nuk kërceva dhe nuk kishte asnjë pantomim. Nuk bëra si Michael Jordan para Presidentit atë mëngjes.

Scott Pelley: Çfarë do të thuash me "slam dunk"?

George Tenet: Doja të thosha se mund të bëjmë edhe më mirë.

Scott Pelley: Të bëni më mirë?

George Tenet: Mund të ngrinim një kauzë më të mirë për publikun. Këtë doja të thosha. Presidenti nuk ishte i kënaqur me prezantimin. Unë po i thosha zotit Bush se përmirësimi i prezantimin do të ishte "slam dunk". Vërejtja e Woodward-it bëri të duket sikur ishte një vërejtje vendimtare në lidhje me vendimin për të shkuar në luftë. Nuk e besoj se ajo që ndodhi atë ditë e informoi Presidentin edhe më shumë apo bëri që të besojë për ligjshmërinë e kësaj lufte. Përveç pesë punonjësve të CIA-s, të vetmit njerëz në dhomë ishin Presidenti, zëvendëspresidenti, Condoleezza Rice, dhe shefi i stafit, Andrew Card.

Scott Pelley: Dikush që ndodhej në zyrën ovale atë ditë, vendosi "t'ju hedhë nga treni". Mos ishte Presidenti?

George Tenet: Nuk e di.

Scott Pelley: Mos ishte zëvendëspresidenti?

George Tenet: Nuk e di.

Scott Pelley: Kush kish vendosur t'ju hiqte nga loja, George?

George Pelley: Scott, unë jam grek dhe ne jemi komplotistë nga natyra. Por kush e di? Nuk e kam çuar veten në atë pikë, por si një qenie njerëzore, nuk është ndjesi e mirë. Më kujtohet të kem ngritur telefonin dhe të kem marrë Andy Card, i cili është dikush që i kam besuar gjithmonë. Mora Andy-n dhe i thashë "E di se besoj se kishte armë të shkatërrimit masiv. Dhe pas asaj që ndodhi këtu ju dolët jashtë dhe më bëtë mua të dukem si torollak. Kjo është gjëja më përçmuese që kam dëgjuar në jetën time. Burrat e nderit nuk e bëjnë këtë. Kështu kam thënë.

Scott Pelley: Burrat e nderit nuk e bëjnë këtë?

George Tenet: Ju nuk e bëni këtë. Nuk i hidhni njerëzit nga bordi. Nuk e bëni këtë, nuk thërrisni të tjerë, nuk punoni me gjithë zemër, nuk dilni në publik çdo ditë. A do ta hidhni dikë jashtë bordit vetëm sepse është devijim? A është e ndershme kjo? Për mua nuk është. E dini se në fund të ditëve, të vetmen gjë që do të keni nga kjo botë, është nderi. Vetëm këtë ke. Ke reputacionin të ndërtuar nga besimi dhe nderi personal. Dhe kur nuk e ke këtë më, je vetëm. Besimi ishte thyer.

Scott Pelley: Mes jush dhe Shtëpisë së Bardhë?

George Tenet: Mund të vësh bast, mund të vësh bast.
(Megjithëkëtë, Presidenti i dha Tenet nderin më të lartë të kombit, "Medaljen e Lirisë")

Scott Pelley: Nuk ratë në mosmarrëveshje kur pranuat medaljen?

George Tenet: Pati konflikt.
Unë e pranova medaljen për shkak se citimi ishte "Puna e CIA-s në Afganistan", jo në Irak.

Scott Pelley: Disa njerëz kanë pyetur nëse Medalja e Lirisë ishte arsyeja pse i jepni Presidentit lejekalim.

George Tenet: Kjo është gjëja më fyese që kam dëgjuar në jetën time. Nocioni se do të vija në lojë integritetin tim është qesharak.
(Ai ishte i dyti ndër ata që e mbanin më gjatë postin, por më 11 qershor të vitit 2004, Tenet ndezi një cigare dhe eci në oborret e CIA-s për herë të fundit)

Scott Pelley: E di se ka njerëz që po e shohin këtë intervistë. Ata do t'i thonë vetes "Ky është ai tipi që s'e parashikoi 11 shtatorin. Ky është ai që mori vendimin e gabuar për Irakun". Çfarë i thoni atyre?

George Tenet: E dini, historia do ta gjykojë këtë njeri. Gjithçka që do t'u thoja atyre është se jam gjithashtu njeriu të cilit iu dha privilegji të drejtojë burra dhe gra, të cilët ngrihet çdo ditë dhe përpiqen të ruajnë sigurinë e tyre. Jam gjithashtu njeriu që di se në raportin për mua ka më shumë gjëra të mira se sa të këqija, mjaft gjëra të mira, dhe shpresoj që populli amerikan të besojë se jam njeriu që u përpoq t'i shërbejë këtij vendi sa më mirë që të ishte e mundur. Pjesa tjetër i takon të tjerëve të gjykohet.

http://en.wikipedia.org/wiki/George_Tenet

[Davius]

Kryespiuni amerikan me baba nga Qeparoi dhe nënë nga Himara

Ne vazhdojmë të mburremi se edhe Xhorxh Tened ka dalë safi shqiptar. Shefi i CIA-s për shtatë vjet nuk e ka mohuar që në SHBA ka ardhur prej një fshati nga Jugu i Shqipërisë. Madje edhe në jetëshkrimin e tij, kjo përmendet me fjalët "emigroi nga Greqia dhe u largua nga Shqipëria", porse çuditërisht, ai asnjëherë nuk ka artikuluar fjalët se "është shqiptar". Madje edhe kur disa vite më parë, ai ndaloi në Himarë dhe aty ndanë gërmadhave të shtëpive të paraardhësve të vet kaloi ca orë të mrekullueshme. Por, na pëlqen apo jo, i pëlqen atij apo jo, faktet janë kokëfortë. Të dhënat flasin se Xhorxh Tenet është djali i Janit dhe Vangjelia Kacelanos, ai nga Qeparoi dhe ajo nga Himara. I ati ishte pjesë e familjes shqiptare që në shekullin e 19-të mbante mbiemrin Koka dhe emigroi në Itali. Aty për të humbur gjurmët e një mosmarrëveshjeje, pjesëtarët e familjes së të atit ndryshojnë mbiemrin në Tenet. Pas Italisë familja Tenet u shpërngul në Korfuz dhe nga andej në Qeparo, në vendin e të parëve. Por babai i Tenet emigroi sërish në Francë dhe punoi në minierat e qymyrgurit në Sent Etjen. Kur nisi Lufta Italo-Greke familja u shpërngul sërish në Itali dhe aty babai i Tenet njihet me Vangjelinë. Prej andej ai dhe Vangjelia emigrojnë në SHBA. Madje e ëma është larguar me një nëndetëse të aleatëve. Më 5 janar të vitit 1953 çifti lind binjakët George dhe William. I ati vdes në vitin 1965, ndërkohë që e ëma është rreth 90 vjeçe. Ish-shefi i CIA-s ka një djalë dhe tri vajza.

Per origjinen e Tenetit lexoni kete teme te forumit: Prinderit e Xhorxh Tenet, votues ne Himare

SKEDA PERSONALE

EMRI: GEORGE
MBIMERI: TENET
DITELINDJA: 05.01.1953
VENDLINDJA: NEW JORK, SHBA
ORIGJINA: QEPARO, SHQIPERI
ATESIA: QIRJAKO KOKA (TENET)
AMESIA: VANGJELIA KACELANO
MARTUAR: STEFANI GLAKAS
EDUKIMI: 1976, GRADOHET NE UNIVERSITETIN "XHORXH TOWN" PER DIPLOMACI
1978, GRADOHET PER MASTER NE UNIVERSITETIN E KOLUMBIAS
KARRIERA
1978-1979, DREJTOR I INSTITUTIT GREKO-AMERIKAN I LOBIT GREK NE SHBA
1979-1982, NE SHOQATEN E INDUSTRIALISTEVE TE ENERGJISE DIELLORE
1982-1985, NDIHMES LIGJOR DHE ME PAS DREJTOR LIGJOR I SENATORIT REPUBLIKAN JOHN HEINZ NE PENSILVANI, I SPECIALIZUAR PER SIGURINE KOMBETARE DHE SIGURINE E ENERGJISE
1985-1989, NE STAFIN E SENATORI PATRIK LEAHY, VERMONT
1989-1993, NE KOMITETIN E INTELIGJENCES ME SENATORIN DEMOKRAT DAVID BOREN, OKLAHOMA
1993, PJESETAR I STAFIT PER SIGURINE KOMBETARE PER PRESIDENTIN BILL CLINTON
1993-1995, DREJTOR PER PROGRAMET E INTELIGJENCES NE STAFIN E CLINTONIT
1995-1996, ZEVENDESDREJTOR I CIA-S
1996-1997, NE STAFIN E SHEFIT TE CIA-S
11 korik 1997, BETOHET SI SHEF I CIA-S
2001, BEHET I PARI SHEF I CIA-s QE EDHE PSE NDERROHET PRESIDENTI AI VAZHDON DETYREN
3 QERSHOR 2004, JEP DOREHEQJEN NGA SHEFI I CIA-S

Pergatiti: Blendina Cara dhe Aurora Foto

[bayern]

Megjithse komplet jashte teme, ama per te gjithe ata qe e bene Shqiptar Tenet ai ne nje interviste me Larry King ka pohuar qe eshte me origjine Greke.

Per sa i perket ato qe tha kunder luftes ne Irak pak a shume diheshin prej kohesh. I vetmi stimul qe e ben ate te dale kaq hapur eshte qe te shese nje numer te kenaqshem kopjesh se librit te tij.

[Hyllien]

Ne nje lekture dhene ne University of Texas ama ka pohuar se eshte shqiptar. Un di qe eshte martuar me nje Greke(dhe nuk eshte cudi, se dhe tani ka plasur ne mode, psh. ne Astoria,NY ne Boston, ne Connecticut qe ka plot shqiptare te rinj qe po martohen me Greke.)
Megjithate, tezja e kesaj cupes e ka mbiermin Athanas, Theodora Athanas dhe jeton(jetonte se ka vdekur) ne Boston ashtu si dhe patrioti i shquar Anthony Athanas. Nuk dihet mire se c'origjine mund te kete gruaja e tij, edhe pse nga mbiemri te ben te dyshosh. Ka gjasa qe ta kete shqiptare si ka gjasa qe ta kete dhe greke(ose shqiptare te helenizuar me sa po shof une). Kam kerkuar nje here shume per ket pune por nuk kam arritur te gjej me teper.

Ja dhe gruaja :
http://www.arlingtoncemetery.net/jmspann-06.jpg
Ndersa ketu ne te djathte:
http://www.loc.gov/bookfest/2005/bio...ssmantenet.jpg

[Darius]

Para me pak se nje jave George Tenet ishte i ftuar tek CNN ne emisionin e Larry King. Foli e foli shume per rrolin e CIA-s para dhe mbas 9/11 . U tha se do lejoheshin telefonatat dhe i kam rene numrin per 55 minuta rrjesht cdo 5 sekonda po nuk e kapa qe nuk e kapa dot

Doja ta pyesja per origjinen e tij si dhe per mendimin qe ka ndaj Shqiperise dhe sidomos pretendimeve Greke dhe mbi te gjitha doja ta pyesja per perfshirjen e CIA-s ne ngjarjet e 97-es ne Shqiperi. Pa fat

Kam degjuar edhe une qe eshte shprehur qe eshte shqiptar sic kam degjuar qe eshte shprehur se eshte dhe grek. Do jete ndonje hibrid ose me gjak oficeri qe e kthen nga i vjen per mbare.

[Hyllien]

Origjina e tij eshte 100% shqiptare, kete ta kesh te qarte, qofte nga Kacelanot qofte nga Koka-t. Gjerat e tjera jane pasojat e fenomenit Bollano, e fenomenit komunizem 50 vjecar, e fenomenit qe ti nuk kishe nje diaspore fare, as nje ze konkret jashte shtetit, e fenomenit qe anglezi futi hundet ne ceshtjet e himares etj etj.

[Davius]

Intervista/Flet Koço Koka, djali i xhaxhait të George Tenet

"Letërkëmbimet tona me xhaxhanë, Qirjako Tenet"

Quhet Koço Koka ose ndryshe Koço Teneti, dhe është djali i xhax hait të George Tenet, ish-shefit të CIA-s. Ia përkëdhel sedrën ajo çfarë i kanë thënë shpesh, se ngjan me shqiptaro-amerikanin e famshëm, të cilin ai e thërret Jorgo. "Nuk e kam takuar asnjëherë, por me të vëllanë, Uilliamin, kam folur në telefon", rrëfen 77-vjeçari për "Tirana Observer". Në një intervistë ai tregon letërkëmbimet e babait të tij me të vëllanë Qirjakon, i cili është i ati i George Tenet. Përse familja ka dy mbiemra, Koka dhe Tenet. Cila është origjina e familjes së tyre, si u njohën prindërit e ish-shefit të CIA-s, kontaktet me familjen dhe letrat që qeparioti ia dërgonte vëllait të tij. "Kam hapur zinë në shtëpinë time. Kam tri ditë që pres patriotët që më vijnë për ngushëllim", i shkruante nga Amerika babai i George Tenet të vëllait, për vdekjen e atit të tyre.

Përse familja juaj ka mbajtur dy mbiemra, Koka dhe Tenet?

Në mëhallën tonë, në Qeparonë e vjetër, janë 80 shtëpi që kanë ardhur nga Korfuzi. Bëhet fjalë për vitet 1680. Fisi ynë Koka ose Tenet e kemi origjinën nga Korfuzi, nga Kërshadhëza. I pari ynë erdhi në Qeparo, pasi vrau një njeri në Korfuz dhe për hasmëri erdhi këtu dhe bëri shtëpinë lart në Qeparo Fshat. Stërgjyshi, Xhorxhi, la vetëm një djalë, e la të vogël në djep se e vranë. Djali, Mino Koka, që ishte gjyshi ynë, u rrit dhe ai u bë me tre djem, babanë tim, Sofo Tenet dhe babanë e Georges, Qirjako Tenet, ndërsa djali i tretë vdiq shpejt.
Kur u rrit gjyshi dhe nuk i vinte mirë të dëgjonte mbiemrin Tenet, se kishin vrarë, e ndërroi atë në Koka. Janë rritur me të keq. Në vitet 1924, gjyshi Minua dhe të dy djemtë, Sofua, babai im dhe Qirjakoja, babai i Georges, shkuan në Francë dhe punuan në minierë. Por Qirjakoja nuk desh të punonte shumë në minierë dhe iku shpejt.

Si shkoi në Amerikë xhaxhai juaj?

E rregulloi me një kapiten vapori që të shkonte në Amerikë. Ishte viti 1928, mori hua dhe iku në Amerikë. Ai që i dha lekët i tha: "Ik, o djalë, po vajte mirë kujtohu për këto që të kam dhënë, në se nuk shkove mirë, hallall t'i kam bërë. Por xhaxhai brenda dy muajve pasi shkoi në Amerikë ktheu borxhin. Në vitin 1929, babai u kthye në Qeparo dhe në 1931 linda unë. Qirjako, xhaxhai që kur iku nga Franca, nuk erdhi më në Shqipëri. U martua fillimisht me një amerikane, bëri dhe një vajzë dhe ia vuri emrin Geraldina, në emër të mbretëreshës së Shqipërisë. Geraldina rron në Amerikë dhe ka katër djem. Evangjelia është gruaja e dytë e xhaxhait. Me gruan e dytë, Evangjelinë, xhaxhai ka dy djem binjakë. Ai kur u martua shkonte në kondismë dhe thoshte: O perëndi më bëj të lind një fëmijë me këtë grua dhe zoti ia dha që të bënte dy djem të mirë.

Si u njoh me Evangjelinë xhaxhai juaj?

Evangjelia ishte në Shqipëri. Në kohën e luftës iu vra vëllai nga ballistët se qe doktor i famshëm ai dhe kuronte partizanët. Vranë partizanët Aziz Sharrën, kreu i ballistëve në Vlorë, dhe në hakmarrje të tij ballistët vranë doktorin, pra e kanë vrarë fare kot. Doktori e kishte gruan italiane dhe e shoqëroi Evangjelia për në Itali. Ndodhi që u mbyllën kufijtë dhe nuk u kthye dot më. Xhaxhai pasi e ndau amerikanen u martua me patrioten e tij.

A ka ardhur ndonjëherë xhaxhai juaj apo edhe të bijtë këtu tek ju?

Jo, asnjëherë nuk kanë ardhur. Ndërsa nëna e Georges, Evangjelia, ka ardhur tek ne.

Çfarë lidhjesh keni pasur me xhaxhanë dhe familjen e tij, je njohur me ta?
Jo. Sa ishte xhaxhai gjallë ai dërgonte gjithmonë dhe e ndihmonte babanë, edhe djemtë e tij sa ishin në shkollë kishin lidhje me ne, na dërgonin letra dhe fotografi shpeshherë. Kur mbaruan shkollat dhe shkuan në detyrat e tyre, nuk na dërguan më. I vogli, Uilliami, është doktor. Ndoshta ruan të vëllanë dhe nuk kanë lidhje fare me ne. Më vjen keq shumë që nuk kemi lidhje, se edhe ne nuk jemi njerëz të këqij. Me ata të Himarës kanë lidhje, ndoshta se kanë nënën e tyre gjallë. Ata të Himarës kanë shkuar në Amerikë dhe janë takuar me Gerogen (Jorgon) dhe Uilliamin (Vasilin si i themi ne), ne asnjëherë. Mirë do të na vinte të ishim të lidhur me ta.

Çfarë pasurie kishte në Amerikë Qirjako, babai i Georges?

Një restorant ku punonte bashkë me gruan e vet Evangjelinë dhe kishte 14 punëtorë që punonin tek ai. Në një letër xhaxhai nga Amerika i shkruante babait: Turp të të vijë që një djalë të vetëm e bëre shofer. Ti pse nuk më kërkove mua të të ndihmoja për të vazhduar djali shkollë". Por unë jetën si shofer e kalova më mirë nga të gjithë. Rrita fëmijë të mirë dhe me shkollë të lartë.

Në çfarë gjuhe i shkruante xhaxhai juaj letrat?

Xhaxhai shkruante edhe shqip, edhe greqisht në letra. Një miku i xhaxhait, Vasil Voda, i thoshte shpesh atij kur ishin në Amerikë: Dua të shkoj e të vdes në Piqeras të më qajnë gratë piqerasiote. Dhe vërtet, erdhi e vdiq në Piqeras. Kjo e bënte që xhaxhai shpesh në letra na shkruante: Ishte i lumtur Vasil Voda që shkoi e vdiq në Piqeras. Unë i shkreti do vdes pa njeri pranë. Xhaxhai im kishte mall të madh për vendin e tij dhe ishte shumë bujar. Në krizën e pas luftës gjithë farefisit të vet në Qeparo u dërgoi nga dy thasë miell dhe ndihma të tjera. Dhe kush ishte i sëmurë po t'i dërgoje recetë për ilaçe ua dërgonte.

Ju kujtohet ndonjë letër e tij?

Kur vdiq gjyshi xhaxhai na dërgoi një letër shumë mallëngjyese, ku shkruante: Kam hapur zinë në shtëpinë time. Kam tri ditë që pres patriotët që më vijnë për ngushëllim.
Edhe kur vdiq gjyshja shkroi. Edhe kur më vdiq gruaja e parë më shkruan dhe më ngushëlluan edhe djemtë e xhaxhait. Pas asaj nuk kemi pasur më letërkëmbim. Në telefon kam folur vetëm një herë me Uilliamin, me të voglin, ndërsa me Georgen jo. Kemi folur greqisht. I thashë që gjyshi dhe babai e kanë pasur merak që nuk u panë njëherë juve. Edhe unë po plakem, mos vallë edhe unë atë fat do kem. - Jo, - mu përgjigj nga matanë telit. - Do takohemi. - Kanë kaluar kaq shumë vjet dhe ende nuk shihemi me njëri-tjetrin. Megjithatë, shpresojmë.

TIRANA OBSERVER

[Davius]

Në shtëpitë e prindërve të George Tenet

Mira Zenati

Historia e jetës së ish-shefit të CIA-s fillon në faqet 10-11 të librit të tij me kujtime "Në qendër të stuhisë". Ndërsa jashtë tij, ajo nis buzë detit të kthjellët të Himarës, në shtëpitë e prindërve të tij, nënës Evangjeli Kacelano e të atit, Qirjako. Në Himarë pushon edhe kërkëllitja e makinës që na ka shoqëruar që nga Tirana. I pari himariot që takojmë është Irakliu, që menjëherë "punësohet" si udhërrëfyesi ynë. Sapo e pyesim nëse njeh ndonjë nga fisi i George Tenet, ai na drejton për nga djali i hallës së tij, i cili ka një restorant në qendër të Himarës. Edhe halla e tij, Evangjelia, e ëma e ish-shefit të CIA-s, kishte hapur me të shoqin një restorant në Amerikë. Sakaq mbërrijmë në restorant "Piazza" që është vetëm 40 metra larg nga deti dhe përshëndetemi me kushëririn e parë të George Tenet. Ai quhet Zaharia Kacelano. Është 65-vjeç dhe kapelja që mban në kokë nuk ia mbulon krejtësisht thinjat e shumta. "Do të më pëlqente që djali i hallës sime të vinte këtu e të hanim një peshk bashkë", thotë ai për kushëririn e tij të parë, duke na hequr përfundimisht dyshimet se George Tenet ka qenë në Shqipëri. Po sipas tij, atij do t'i pëlqente të vinte tek shtëpia ku i kishte lindur e ëma, atje ku jeton aktualisht edhe Zaharia. "Shtëpia është vetëm 500 metra larg nga këtu", thotë 65-vjeçari i cili na shoqëron me shumë respekt.

Në shtëpinë e nënës së George Tenet

Përpara na shfaqet një shtëpi e vjetër guri 107-vjeçare. Ajo është ndërtuar në vitin 1900, ka tre kate që ndahen me mur guri të trashë 80 cm. Në krah të shtëpisë ndodhet kisha. "Këtë e ka ndërtuar Vasili, gjyshi i George Tenetit, me kursimet e tij në kurbet", tregon Zaharia. Me dhimbje nxjerr nga xhepi një fotografi të vjetër, baraka ku e shpunë familjen e tij, pasi e nxorën nga shtëpia, sepse i ati qe dënuar në burgun e Burrelit për arsye politike. Në foto dallohet gjyshja e tij dhe e George, Amalia, e cila ka vdekur në vitin 1963. Po në këtë shtëpi Amalia ka lindur edhe Evangjelinë, nënën e ish-shefit të CIA-s. Sipas Zaharisë, halla e tij njihej si një grua shumë e zonja dhe bujare. Ajo ishte nisur për në Itali, duke shoqëruar për tek të prindërit nusen italiane të vëllait të saj që ishte vrarë një vit më parë nga ballistët. "Vëllai i Evangjelisë, që është xhaxhai im, ishte doktor i njohur dhe kishte ardhur nga Italia bashkë me të shoqen për të ndihmuar partizanët", shpjegon Zaharia, ndërsa na tregon dhomat e shtëpisë. "Ishte viti 1944. Halla ishte 35 vjeçe në atë kohë dhe ngaqë u mbyllën rrugët për të ardhur në Himarë, ato mbetën atje". Pikërisht në Itali, nëna e George Tenet është takuar edhe me Qirjakon, që më vonë do të bëhej bashkëshorti i saj. Me një shkesi alla shqiptarçe, që ish-shefi i CIA-s e shpjegon mjaft mirë në librin e tij, duke thënë se “babai i erdhi rrotull mamasë për dy javë”, ata martohen dhe nisen për në Amerikë. Për ta vazhduar historinë, neve na duhet të nisemi për në Qeparo, në fshatin ku lindi babai i George Tenet, Qirjako. Zaharia na vjen në ndihmë edhe në këtë "nismë-marrje". E njeh mirë fisin e burrit të hallës dhe na drejton për në Qeparo. Fshati ku Ali Pasha ndërtoi tri shtëpi për veten e tij, vetëm nga bukuria e natyrës, duket si një ballkon me pamje nga deti. Shtëpitë trekatëshe në mes agrumeve duken si kështjella të vogla prej guri. Vetëm 3 kilometra nga Qeparoi i Ri, në atë që quhet Qeparo Fshat ndodhet edhe shtëpia e babait të George Tenet. Ose ndryshe Koka. Edhe Zaharia na shpjegon se përse ky fis mban dy mbiemra, por ai na thotë se më mirë mund të na e sqarojë vetë pinjolli i familjes, Koço Tenet-Koka.

Në shtëpinë e Qirjako Tenet-Kokës

Ajo është një shtëpi e vjetër, e ndërtuar në vitin 1870. Ka dy kate dhe një haur, katër dhoma të shtruara me dhoga dhe një ballkon. Për në shtëpinë e vjetër të Kokajve na shoqëroi vetë Koço Koka, i cili edhe pse 77-vjeç nuk nguron të vijë me ne që nga shtëpia e tij dhe të na shpjegojë ato çfarë di për xhaxhanë e tij dhe djemtë binjakë, George dhe Uilliam Tenet. "Këtu tashmë nuk jeton njeri", thotë ai me lot në sy, duke kujtuar të atin që vdiq me peng në zemër për të vëllanë, Qirjakon, me të cilin u nda që në vitin 1928 dhe nuk e pa më me sy. "Xhaxhai bashkë me babanë dhe gjyshin, në vitin 1924 shkuan në Francë dhe punuan në minierë. Por Qirjako katër vjet më vonë, me një hua shkoi në Amerikë", rrëfen nipi i Qirjako Tenet. Ndërsa i ati u kthye në Qeparo edhe pse vëllai i tij ia kishte bërë dokumentet për në Amerikë. "Gjyshi nuk donte që babai të ikte në Amerikë", shpjegon Koço. Kështu pas kësaj ndarjeje, ajo çfarë i bashkonte ishin vetëm letrat që vinin që nga larg dhe fotografitë që xhaxhai i tij i dërgonte vazhdimisht. Vet Qirjako Tenet nuk arriti të kthehej në shtëpinë e tij. Ndërsa e shoqja, Evangjelia, po. Ajo e ka vizituar shtëpinë ku "ka vajtur nuse", gjatë vizitës së saj në vitin 1987, një kënaqësi shumë e madhe për familjen qepariote me dy mbiemra. Historia e mbiemrit Tenet-Koka nis e përfundon në një histori hasmërie. 77-vjeçari na tregon se të parët e tij ishin zhvendosur nga Korfuzi për në Qeparo në vitet 1680, pas një vrasjeje. Pas disa kohësh, gjyshi i George Tenet e ndryshon mbiemrin nga Tenet në Koka, pasi i vinte turp të etiketohej si familje vrasësish. Pikërisht për këtë arsye, kjo familje mban dy mbiemra. "Kur vdiq gjyshi, xhaxhai na dërgoi një letër shumë mallëngjyese", kujton nipi i Qirjako Tenet, duke shtuar se letrat vinin edhe në shqip edhe në greqisht. "Bashkëbisedimet rridhnin lirshëm në greqisht dhe në anglisht. Kur mamaja dhe babai nuk donin që unë dhe vëllai të dëgjonim atë që ata flisnin, ato e kthenin muhabetin në gjuhën shqipe", thotë në librin e tij, George Tenet. Më pas pak flet për Shqipërinë. Por duke u larguar nga Qeparoi e Himara, kuptojmë se shtëpitë e gurta memece ku lindën prindërit e tij, thonë më shumë.

TIRANA OBSERVER

[nostradamus99]

Teneti eshte shqiptar,por kur babai i tij ka shkuar ne shba
per me depertu me leht ai eshte deklaruar grek.
nuk jane kesi shqiptare te pakt.