Shqipëria veriore:Gjakmarrje dhe Hakmarrje!!

[Shpirt Njeriu]

Sipas të dhënave të sapopublikuara nga drejtoria e policisë së Qarkut të Shkodrës, në tre rrethet problematike në Veri të Shqipërisë: në Shkodër, Pukë dhe Malësi të Madhe, jane 109 familje të ngujuara brenda shtëpive të tyre për shkak të frikës nga gjakmarrja apo hakmarrja. Po sipas këtij burimi, në këto rrethe vazhdojnë të ngujohen 248 persona, mes të cilëve edhe 17 fëmijë të vegjël, të cilët janë mbyllur brenda shtëpive të tyre dhe nuk shkojnë në shkolla pasi u kërcënohet jeta.

Fenomeni i ngujimit nga frika e gjakmarrjes apo hakmarrjes, sipas të dhënave të publikuara nga policia, është më i theksuar në rrethin e Shkodrës ku janë ngujuar 83 familje me 178 persona.

Është hera e parë që policia publikon të dhëna zyrtare rreth përmasave që ka marrë në disa rrethe, në veri të Shqipërisë, fenomeni i gjakmarrjes dhe pasojat sociale që e shoqërojnë atë. Këto të dhëna u bënë të njohura pas ngritjes së një strukture të posaçme policore antigjakmarrje si dhe në përfundim të një regjistrimit të kryer nga stukturat dhe punonjësit e policisë vendore, të cilët për disa javë kontaktuan me të gjitha familjet e përfshira në konflikte.

Ndërkohë, të dhënat zyrtare të sapopublikuara nga policia bien ndesh me shifrat që vazhdojnë të japin një numër shoqatash joqeveritare që veprojnë në Shqipëri. Për shoqatat joqeveritare, përmasat e ngujimit janë disa herë më të mëdha se sa jepen nga policia, ndërsa numri i fëmijëve të ngujuar në Veri të Shqipërisë, sipas tyre, arrin në rreth 600.

Por, herë pas here, edhe vetë shoqatat joqeveritare si dhe disa grupe të misionarëve të pajtimit të gjaqeve kanë kundërshtuar shifrat e publikuara nga njeri-tjetri, duke i cilësuar ato si të fryra, veçanërisht përsa i përket numrit të fëmijëve të ngujuar që nuk shkojnë në shkolla

Në mesin e muajit korrik, këshilltari i posaçëm i Këshillit të Europës në Shqipëri, Guy-Michel Brandtner theksoi gjatë një takimi të zhvilluar në qytetin e Shkodrës se gjakmarrja përbën një barrë të rëndë për jetën shqiptare dhe që nuk mund të tolerohet më tej.

Këshilli i Europës, tha ai, është i gatshëm të këshillojë autoritetet shqiptare mbi masat që parashikojnë kufizimin dhe eliminimin e vrasjeve dhe të shqyrtojë mundësinë e përpjekjeve të tjera shoqëruese për të reduktuar efektet e situatës aktuale të shkaktuar nga gjakmarrja.

[Ermal 22]

Sa keq per shqiptaret e per femijet e mjere qe u bien hallet kaq te vegjel.

Sa keq per shoqerine shqiptare qe vazhdon te vuaje nga kjo plage barbare.

Sa keq per ata qe nuk dijne cfare bejne kur shkrehin armet nga gjaknxehtesia

Sa keq per ato familje qe humbasin te dashurit e tyre

Edhe disa fjale e veprime te duhura qe ju mund te thoni e beni mund te ndihmojne ne dhenien fund te ketyre tragjedive shqiptare.



“Mësues në shtëpi 61 fëmijëve të ngujuar nga gjakmarrja”
28 Mars 2007
Flet Aleksandër Kola, kreu i "Fondacionit për zgjidhjen e konflikteve dhe pajtimin e mosmarrëveshjeve"

Gjakmarrja, ky fenomen i rëndë, sidomos në veri të vendit, megjithëse ka rënie këto vitet e fundit, përsëri mbetet një gangrenë, që jo vetëm merr jetë njerëzish, por po gërryen dhe zemrat e njoma edhe të fëmijëve të pafajshëm.

Ngujimi në shtëpi, për shkak të fenomenit absurd të gjakmarrjes, është një ndër shkaqet që po i pengon fëmijët në Qarkun e Shkodrës që të arsimohen ashtu si dhe bashkëmoshatarët e tyre.

Në bazë të statistikave të nxjerra nga Drejtoria Arsimore e Shkodrës, në shkallë rrethi, numri i nxënësve që kanë braktisur shkollën për shkak të frikës së gjakmarrjes arrin në 61 fëmijë jo vetëm të zonave të thella malore, apo të fshatrave, por edhe të qytetit.

Në mungesë të forcës vepruese, parandaluese e pajtuese të shtetit, ekzistenca e këtij fenomeni ka nxitur mjaft fondacione e shoqata që të hartojnë programe e projekte, që kanë synim jo vetëm pajtimin e familjeve të ngujuara për vite të tëra, nga frika e gjakmarrjes, por edhe të ndikojnë te banorët e veriut të vendit, deri në minimizimin e fenomenit të gabuar e vjetruar të vetëgjyqësisë, në kushtet e moszhdukjes së plotë të tij.

Një nga fondacionet më aktive, sidomos për pajtimin e familjeve, që për shkak të gjakmarrjes kanë mbyllur edhe fëmijët në shtëpi, duke i privuar nga shkolla dhe argëtimi, është dhe "Fondacioni për zgjidhjen e konflikteve dhe pajtimin e mosmarrëveshjeve".

Koordinatori i këtij fondacioni, Aleksandër Kola, ka bërë të ditur në një intervistë për gazetën "Metropol", projektet e realizuara dhe që vazhdojnë të zbatohen, kryesisht për përkujdesjen dhe nxjerrjen e fëmijëve nga ngujimi për shkak të gjakmarrjes.

Keni disa vite që jeni mjaft aktiv në luftën kundër fenomenit absurd të gjakmarrjes. Çfarë ju shtyu që të jepni një kontribut kaq të çmuar?

Çdokush që është pjesë e një komuniteti, duhet të japë kontributin maksimal për qytetërimin e këtij komuniteti, veçanërisht kur bëhet fjalë për të luftuar kundër një plage të tillë, siç është gjakmarrja. Kur flasim për qytetërimin e një populli, kur duam të afirmojmë emancipimin e tij në marrëdhëniet demokratike mes njerëzve, këtë e masim me mungesën e egoizmit dhe zgjidhjen e konflikteve pa dhunë. Paqja e falja janë ato që shprehin vlerat shpirtërore, kulturën dhe virtytet e popullit shqiptar. Të zgjidhësh një konflikt dhe të falësh, ke bërë vërtet shumë për të gjithë komunitetin dhe veçanërisht për brezat e rinj. T'i thuash “jo vrasjes”, “jo gjakmarrjes” dhe të edukosh vetëm faljen, pajtimin e paqen mes njerëzve, është vërtet një sipërmarrje e mrekullueshme. Nga ana tjetër, vetë fondacioni trajton problemet e edukimit të brezit të ri me frymën e tolerancës dhe zhdukjen e fenomenit të hakmarrjes e gjakmarrjes.

Nga të dhënat tuaja, sa është prezent fenomeni i gjakmarrjes në zonën e Shkodrës dhe ku janë përqendruar projektet e fondacionit që ju drejtoni?

Fenomeni i gjakmarrjes është prezent me të vërtetë në këtë rajon dhe ne si fondacion kemi marrë përsipër që t'u vijmë në ndihmë familjeve të ngujuara nga ky fenomen. Konkretisht puna jonë është përqendruar kryesisht te problemet e fëmijëve të shkollave, apo fëmijëve në përgjithësi që i vuajnë më shumë se të tjerët pasojat e gjakmarrjes dhe që do ta ndiejnë edhe në të ardhmen me mungesat që do t'i shkaktojë ky ngujim kaq primitiv i kësaj dukurie, siç është gjakmarrja, por gjithmonë pa lënë mënjanë dhe moshat e rritura që e përjetojnë këtë fenomen kaq të dhimbshëm në jetën e tyre.

Konkretisht, si vepron fondacioni me fëmijët e ngujuar?

Gjatë kësaj kohe kemi marrë një rivlerësim të gjendjes së familjeve dhe fëmijëve të ngujuar. Kemi kontaktuar me prindërit e fëmijëve të këtyre familjeve të ngujuara. Kemi vizituar direkt shtëpitë e këtyre familjeve dhe fëmijëve të ngujuar, duke marrë përditë kontakt direkt me ta, në mënyrë që të mësonim se si është gjendja psiko-sociale e shpirtërore e këtyre fëmijëve. Njëkohësisht jemi përpjekur të kuptojmë se çfarë ndiejnë fëmijët, që për arsye të fenomenit në fjalë kanë braktisur shkollat dhe ç'ndiejnë ata kur jetojnë të mbyllur në familjet e tyre, larg shkollës, larg argëtimeve fëminore që u kërkon mosha. Duke parë boshllëqet që ndienin fëmijët, fillimisht na është dashur dhe e kemi parë të arsyeshme që të krijojmë një grup mësuesish të shkollave përkatëse, ku ka kontigjent të këtyre nxënësve. Këto mësues u angazhuan për të shkuar direkt dhe të jepnin mësime te këta fëmijë, që ata të merrnin programin mësimor, sigurisht aq sa kanë mundësi për periudha periodike, duke bërë që këto fëmijë të mos humbasin vitin shkollor.

Përveç marrjes së mësimeve, çfarë ndikimesh kanë pasur te familjet dhe fëmijët e ngujuar vizitat tuaja dhe të mësuesve?

Duke shkuar nëpër shtëpi të fëmijëve të ngujuar, këto mësues të lëndëve të ndryshme sikur i japin një ngrohtësi atyre, duke i bërë të ndihen më afër njerëzve. Me të vërtetë jo vetëm fëmijët, por edhe të rriturit ndiejnë kënaqësi kur mësuesit dhe pjesëtarë të fondacionit shkojnë së bashku në këto familje. Ndihen të lumtur, sepse e ndiejnë se hyn një mësues, hyn një banor, hyn një përfaqësues i një shoqate dhe sikur e ndiejnë më afër atë ngrohtësinë e shkollës dhe, madje, edhe të komunitetit. Kjo punë që po bëjmë ne me këto fëmijët e shkollave, konsiston formalisht që të mos humbin vitet e shkollës, por më e rëndësishme është që këto fëmijë të ndiejnë se dikush kujdeset për ta, dikush nuk i paska harruar, dikush nuk i paska braktisur për faj të problemeve të shkaktuara nga të rriturit. Nuk i paska harrur as shkolla, as mësuesi, as komuniteti dhe madje as media, e cila i është gjendur vazhdimisht për të parandaluar, nëpërmjet sensibilizimit të opinionit shoqëror, të vuajtjes që kanë këto fëmijë të ngujuar dhe larg jetës shoqërore të bashkëmoshatarëve të tyre. Duke parë rezultatet pozitive të arritura, ku bëjnë pjesë jo vetëm arsimimi dhe ngrohtësia që u ofrohet në familjet me probleme të gjakmarrjes, por edhe dhjetëra fëmijë të dalë nga ngujimi në sajë të një pune mjaft këmbëngulëse të fondacionit për pajtimin e familjeve të përfshira në konflikt, po vazhdojmë dhe do të organizojmë edhe në të ardhmen programe takimesh e pajtimesh me komunitetet, ku është e përhapur gjakmarrja dhe veçanërisht pranë shkollave të fshatrave ku ka ende fëmijë të ngujuar. Për sa i përket punës me nxënësit e ngujuar, një ndihmesë për fondacionin po japin dhe drejtuesit e shkollave si dhe drejtuesit e Drejtorisë Arsimore të Shkodrës.

Statistika

Të rritur dhe fëmijë, viktima të gjakmarrjes

Pas vitit 1990, në Qarkun e Shkodrës llogariten rreth 450 persona të vrarë për shkak të gjakmarrjes. Ndërkohë, 490 nxënës kanë lënë përfundimisht shkollën për shkak të gjakmarrjes.

Aktualisht në Qarkun e Shkodrës numërohen 200 familje të ngujuara si rezultat i kësaj plage.

Në rrethin e Shkodrës numërohen 61 fëmijë të ngujuar nga mosha 0-14 vjeç, 7 prej të cilëve në qytetin e Shkodrës, si dhe 27 nxënës e studentë të ngujuar nga mosha 14-22 vjeç.

Në qytetin e Pukës numërohen 18 fëmijë të ngujuar nga mosha 0-14 vjeç, ndërsa nuk ka të ngujuar nga mosha 14-22 vjeç.

Në qytetin e Koplikut të rrethit të Malësisë së Madhe llogariten 12 fëmijë të ngujuar nga 0-14 vjeç dhe 4 persona të ngujuar nga mosha 14-22 vjeç.

Gjatë pesë viteve të fundit, në Qarkun e Shkodrës numërohen 334 vrasje për shkak të gjakmarrjes, në dy prej të cilave janë vrarë fëmijë.

Të dhëna

450 persona të vrarë për gjakmarrje pas ‘90

334 vrasje të ndodhura në pesë vitet e fundit

490 nxënës braktisën shkollat për gjakmarrje

200 familje të ngujuara për gjakmarrje pas ‘90

Shkodër

61 fëmijë të ngujuar nga mosha 0-14 vjeç

7 të rinj të ngujuar nga mosha 14-22 vjeç

Pukë

18 fëmijë të ngujuar nga mosha 0-14 vjeç

0 të rinj të ngujuar nga mosha 14-22 vjeç

Malësi e Madhe

12 fëmijë të ngujuar nga mosha 0-14 vjeç

4 persona të ngujuar nga mosha 14-22 vjeç

http://www.gazetametropol.com/tekst.php?idt=40252

[Darius]

Shume barbari eshte. Mentalitet me skandaloz se ky i gjakmarrjes nuk ka ku te shkoje. Mjere per ata femije qe jane ngujuar e qe nuk ju shohin syte asgje nga ca duhe ti shikonin per moshen e tyre.
Keshtu eshte kur ska shtet dhe bejne njerezit sipas qejfit. Se te varje ne mes te pazarit 2-3 nga keta trimat e gjakmarrjes dhe i shikoje si binin squke te gjithe sic rane ne kohe te Dulles. Shekulli i 21-te dhe disa nga keta njerez akoma kane ne tru per te marre gjaqet qe i perkasin para luftes se 2. Hajde paradoks hajde...