Skandali/ Autostrada në rikonstruksion, Ahmetaj kërkoi 120 milionë euro
Ministri i Zhvillimit Ekonomik dhe Sipërmarrjes, Arben Ahmetaj
Thellohet skandali i ministrit Ahmetaj me ftesën “false” për investitorët e huaj. “Panorama” shkruan sot se Ministri i Ekonomisë ka qenë në dijeni, të paktën kështu e përcakton vendimi për funksionimin e ministrisë së tij, për gjelbërimin e autostradës.
Por, edhe pse ka qenë në dijeni, sërish ka publikuar në thirrjen e tij për investime zgjerimin e rrugës me tri korsi nga çdo anë. Kjo është një tallje shtetërore me investitorët, ose një tallje e madhe me paratë e shqiptarëve.
Në të dyja rastet, ministri është përgjegjës, si për mashtrimin, ashtu edhe për investimin që mund të shkojë dëm.
ÇFARË KA NDODHUR
Në buletinin për investitorët e huaj, të publikuar në anglisht dhe të firmosur nga Ahmetaj, ministri kërkon nga firmat e huaja të investojnë për zgjerimin me tri korsi të autostradës Tiranë-Durrës.
“Një zgjerim i autostradës Tiranë- Durrës, që përfshin tri kalime në secilën anë. Kjo kontratë ka një vlerë mes 100-120 milionë euro”, thuhet në kapitullin e buletinit të Agjencisë së Investimeve të Huaja për vitin 2014.
Por, ndërkohë që Ahmetaj firmos thirrjen dhe jep si mundësi investimi zgjerimin e autostradës, në të njëjtën kohë qeveria planifikon dhe vendos të gjelbërojë, mbjellë pemë dhe të pamundësojë zgjerimin e rrugës. Të gjithë i shikojnë palmat që janë mbjellë anash rrugës Tiranë-Durrës dhe pamundësinë e zgjerimit të saj.
Duket si përplasje institucionesh, por realisht nuk është kështu. Kuptohet që qeveria ka disa ministra dhe ndoshta mund të mendohet se secili po vepron në interes të tij. Pra, Ahmetaj të ftojë investitorët për zgjerimin e rrugës, ndërsa (në rastin konkret Kryeministri) të kërkojë mbjelljen e palmave apo pemëve të tjera që nuk e mundësojnë një gjë të tillë.
Por, qeveria e ka parashikuar një gjë të tillë. Dhe ja si e ka zgjidhur, ose më saktë si e ka bërë “lëmsh” Ahmetaj këtë situatë.
VENDIMI
Në vendimin nr. 835, datë 18 shtator 2014, “Për përcaktimin e fushës së përgjegjësisë shtetërore të Ministrisë së Zhvillimit Ekonomik, Tregtisë dhe Sipërmarrjes”, është caktuar përgjegjësia e Ahmetajt për investimet.
Ai është përgjegjës për “Promovimin e vendit dhe identifikimin e mundësive për investime të huaja direkte në Shqipëri, në funksion të zhvillimit ekonomik”.
Megjithatë, për të mos pasur përplasje, në pikën e tretë të vendimit përcaktohet se ministri i Ekonomisë ushtron veprimtarinë “Hartim dhe zbatim i strategjive dhe i politikave për zhvillimin e qëndrueshëm ekonomik të vendit nëpërmjet bashkëpunimit ekonomik, programimit strategjik dhe monitorimit të investimeve publike për të gjitha institucionet qendrore në vend”.
Pra Ahmetaj është monitorues i të gjitha investimeve publike të institucioneve shtetërore. Në këtë rast, ideja, tenderi dhe puna për gjelbërimin e autostradës është bërë nga Ministria e Mjedisit, që qartësisht është një institucion qendror i vendit.
Por duket se Ahmetaj nuk e ka parë këtë investim dhe ndërkohë fton investitorët të shpenzojnë 120 milionë euro për zgjerimin e autostradës. Sikundër, është po ministri i Ekonomisë, i cili “monitoron investimet publike për të gjitha institucionet qendrore në vend”, që duhet të sqarojë se përse monitorimi i tij nuk ka sjellë realizimin e investimeve publike.
Deri në nëntor të vitit të kaluar, ishin me një deficit prej rreth 40%, ndërsa në fund të dhjetorit habitshëm u realizuan mbi 150 milionë euro investime. Ahmetaj sot është dyfish përgjegjës. Në rast se investitorët e huaj vijnë dhe marrin përsipër zgjerimin, ai ka djegur jo pak, por rreth 600 mijë USD para të taksave të shqiptarëve për gjelbërimin.
Në rast se tërhiqet, thjesht ka mashtruar me publikimin e tij, që në këtë rast mban logon e Republikës së Shqipërisë.
Heritage, “shuplakë” Ministrisë së Ahmetajt
Heritage, organizata që prej 20 vitesh mat indeksin e lirisë ekonomike në botë, e ka renditur në vendin e 63- të Shqipërinë për vitin 2015. Indeksi i publikuar dje i jep një shuplakë Ministrisë së Zhvillimit Ekonomik dhe Tregtisë, e cila është edhe ministria përgjegjëse për marrëdhëniet me biznesin dhe investimet.
Ky rezultat është me 1,2 pikë rënie se 2014-ta dhe mbetet më i ulët se në 2013-n, 2012-n apo 2011-n. Konkretisht ajo që çalon për vendin tonë, sipas raportit dhe që ka ardhur në përkeqësim është liria fiskale, liria e biznesit dhe liria e investimeve. Të tri këto pika kanë pësuar përkeqësim.
INDEKSI
Autorë të studimit të publikuar nga Heritage janë ekspertë të njohur, të cilët marrin në vlerësim tregues të ndryshëm. Konkretisht, katër janë linjat kryesore që ndiqen. E para zbatimi i ligjit, e dyta qeverisja e kufizuar, e treta eficienca e rregullatorëve dhe e katërta hapja e tregjeve. Këta komponentë ndahen në disa të tjerë.
Lidhur me zbatimin e ligjit, vlerësohet e drejta e pronës dhe liria nga korrupsioni. Raporti i 2015-s vlerëson se për lirinë ndaj korrupsionit është bërë hap pozitiv, kurse për të drejtën e pronës asgjë. Lidhur me qeverisjen e kufizuar ka pasur një ecuri pozitive të shpenzimeve të qeverisë, por liria fiskale është përkeqësuar dukshëm.
Problem mbetet edhe liria e biznesit, i cili është treguesi i përkeqësuar në grupin e eficiencës rregullatore, ndërsa liria e punës dhe ajo monetare kanë shënuar një ecuri pozitive. Për tregjet e hapura ka një ecuri të mirë të lirisë financiare dhe lirisë së tregtisë, por liria e investimeve është përkeqësuar.
Në fakt raporti tregon qartë tri dështime të pretenduara si sukses nga qeveria. E para lidhur me investimet që duket se janë kufizuar, e dyta lidhur me lirinë fiskale ku taksat kanë ardhur në rritje, duke sjellë për pasojë edhe lirinë e biznesit. “Qeveria ka rritur taksat kyçe të individëve dhe korporatave që lidhen me të ardhurat.
Niveli i sipërm i taksimit për individët ka shkuar në 23 për qind, kurse për korporatat taksa është 15 për qind. Arkë- timet nga taksat qëndrojnë në nivelin 23 për qind të prodhimit të brendshëm bruto”, thuhet në raport.
Panorama
Përgjigju Duke Cituar
Krijoni Kontakt