Raporti: Shqipëria ndihmoi CIA-n me torturat kundër terroristëve!
Shqipëria rezulton të jetë një nga vendet 54 shtetet me të cilat CIA ka bashkëpunuar për aktivitete e tortura të jashtëligjshme. Në raportin e detajuar prej 6700 faqesh, lexohet se një nga vendet qe lehtësuan punën e CIA-s ishte edhe Shqipëria,. Në raport nuk tregohet se ku konsistonte saktësisht “puna” e secilit vend.
Mësohet se janë 21 shtetet evropiane, mes të cilave 17 anëtare të Bashkimit Evropian që janë angazhuar në këto aktivitete të CIA-s.
Britania e Madhe, Gjermania, Spanja, Portugalia, Belgjika, Danimarka, Finlanda, Islanda, Austria, Republika Çeke, Greqia, Qipro, Kroacia, Bosnja-Hercegovina dhe Shqipëria janë ndër shtetet evropiane që janë në raportin për përdorimin e dhunës nga ana e CIA-s.
CIA dhe autoritete të tjera të SHBA-së nuk kanë vepruar të vetme, por kanë krijuar marrëdhënie me një sërë partnerësh rreth globit për të ndihmuar në zhvendosjen, torturën dhe arrestimin sekret të atyre që SHBA dyshonte se kishin lidhje me terrorizmin. Në 2012-n dhe 2013-n, Parlamenti Europian i bëri thirrje të gjithë anëtarëve të BE-së dhe shteteve të tjera që të hetonin rolet e tyre në këto operacione.
Në SHBA ekziston frika se publikimi i raportit do ngjallë urrejtje dhe do nxisë sulme të reja antiamerikane. Ka shumë që mendojnë se detajet e tij duhen botuar “në një kohë më të përshtatshme”.
Por presidenti Obama mendon që nuk egziston “një kohë e përshtatshme dhe një tjetër e papërshtatshme për të thënë të vërtetën. Presidenti Barack Obama e përshkroi përdorimin e asaj që është thënë të jetë torturë si një dëmtim i imazhit të Amerikës në botë. “Nuk ka një kohë të përkryer për të publikuar një raport si ky, por kjo është një gjë që na dallon nga të tjerët. Kur bëjmë diçka të gabuar e pranojmë”,-tha Obama.
Përfshirja e Shqipërisë në manovrat e CIA-s
CIA sajoi pikë doganore false në Shqipëri për operacionet antiterroriste
Nga Besar Likmeta, Birn.
Pasi arrestoi dhe burgosi në vitin 2004 një qytetar gjerman, gabimisht i dyshuar për terrorizëm, agjentët e CIA-s e sollën atë në Kuçovë ku agjentët shqiptarë e akuzuan se kishte hyrë ilegalisht në Shqipëri dhe e riatdhesuan në Gjermani për të mbuluar gjurmët.
Kahlid al-Masri, një qytetar Gjerman me origjinë Libaneze u arrestua në Maqedoni në fund të vitit 2003, dhe u burgos në Afganistan nga CIA i dyshuar për lidhje me organizata terroriste, përpara se të lirohej në Shqipëri në 28 Maj të vitit 2004.
Sipas raportit të deklasifikuar të Komitetit për Studimin të Programit të Burgosjes të CIA-s, të bërë publik këtë javë nga Senati Amerikan, al-Masri pasi u arrestua nga autoritet Maqedonase u transferua në një qendër sekrete izolimi të CIA-s në [Afganistan] në Janar të vitit 2004.
Në Afganistan al-Masri u mbajt për gati katër muaj në një qeli të ‘vogël dhe të pisët,” duke u marrë shpesh në pyetje gjatë të cilave ai pretendon se është keqtrajtuar.
Kabllogramet e CIA-s të 27 dhe 28 Janarit 2004, al Masri “ngjante i hutuar pse ishte dërguar në këtë burg,” dhe “i sigurtë kur thonte që CIA kishte njeriun e gabuar.”
Edhe pse agjentët e CIA-s nuk ishin të sigurt që al-Masri kishte lidhje me organizata terroriste, ata nuk ishin të gatshëm ta lironin atë për shkak se besonin se lirimi i tij mund të vinte në rrezik interesat Amerikane.
Një nga stacionet e CIA-s me emër të koduar ALEC ishte i mendimit që al-Masri nuk duhej të lirohej, ndërkohë që një divizion tjetër kërkonte që qeveria Gjermane të mos njoftohej për lirimin e tij.
Për të zgjidhur kontradiktat, rasti i al-Masrit u morr në dorë nga Këshilli i Sigurisë Kombëtare të SHBA-së, i cili vendosi lirimin e tij dhe lajmërimin e qeverisë Gjermane.
Sipas Këshillit të Europës, CIA i kërkoi Shkupit ta rikthente në Maqedoni al-Masrin, por Maqedonia refuzoi.
“Mund ta imagjinoni që gjëja e fundit që Maqedonasit donin ishte që ta merrnin problemin mbrapsht,” i tha një burim i CIA-s këshillit të Europës në 2007.
Zgjedhja e dytë e CIA-s ishte Shqipëria, e cila për shkak të afërsisë së saj gjeografike më Maqedoninë, krijonte mundësinë që Al-Masri të dërgohej me makinë në kufirin Maqedonas, në gjendje të çorientuar, gjë “që do të reduktonte besueshmërinë e tij në qoftë se do ta bënte historinë e tij publike.”
Të dhënat e siguruara nga Këshilli i Europës tregojnë që al-Masri u transferua nga Kabuli nëpërmjet një avioni çarter të CIA-s në aeroportin e Kuçovës.
Por ndryshe ka çfarë dihej më parë, ai nuk dërgua kurrë në kufi me Maqedoninë. Sipas raportit të Komitetit për Studimin të Programit të Burgosjes, CIA përdori një ‘pikë kufitare të rreme në Shqipëri, ku oficerët [Shqiptarë] i thanë atij që kishte hyrë në Shqipëri ilegalisht dhe do të riatdhesohej në Gjermani.”
Përpara se ta hipte në një avion linjë për në Frankfurt në aeroportin Nënë Tereza, CIA i dha al-Masrit 14.500 euro dhe i ktheu sendet e tij personale.
Qeveria shqiptare ka refuzuar vazhdimisht të japë detaje mbi rolin e saj në programin e burgosjeve dhe transferimit të të dyshuarve për terrorizëm të CIA-s.
Kërkesa të bazuara në ligjin e të drejtës së informimit drejtuara autoriteteve shqiptare nga organizata si Access Info Europe, nuk kanë marrë kur përgjigje.
Detajet e lirimit të al-Masrit janë pjesë e një raporti prej 500-faqesh të Komitet të Inteligjencës të Senatit Amerikan i cili zbulon se programi sekret i CIA-s për burgosjen e të dyshuarve për terrorizëm nuk ishte efektiv, mbështetej në të dhëna të rreme, dhe në të njëjtën kohë ishte shumë brutal se CIA i kishte dhënë të besonte ligjvënësve Amerikan.
Raporti zbulon që CIA në mënyrë të vazhdueshme kishte gënjyer qeverinë Amerikane dhe publikun mbi me informacione të rreme mbi programin, i cilin ‘ka dëmtuar pozitën e Shteteve të Bashkuara të Amerikës në botë.”
Shqiptarja
Përgjigju Duke Cituar
Postuar më parë nga Darius
Krijoni Kontakt