.
Kuvendi miraton Deklaratën kundër referendumit në veri
64 vota për dhe 9 abstenime të “Vetëvendosjes”, nga 83 deputetët e pranishëm.
Në fokus të zhvillimeve të fundit në veri të Mitrovicës, mbajtjen e referendumit të strukturave ilegale, për raportet me institucionet e Kosovës të kësaj pjese të banuar me shumicë serbe, në seancën e Kuvendit të Kosovës, Grupi parlamentar i Partisë Demokratike të Kosovës, në harmoni me grupet e tjera parlamentare, ka iniciuar nxjerrjen e një deklarate të përbashkët për të kundërshtuar mbajtjen e referendumit në veri të Kosovës dhe shpalljen e tij si të pavlefshëm. Miratimi i deklaratës ka rezultuar me 64 vota për dhe 9 abstenime të “Vetëvendosjes”, nga 83 deputetët e pranishëm. Fillimisht foli shefi i Grupit parlamentar të PDK-së, Adem Grabovci. Ai tha se ky referendum është kundërshtuar nga të gjithë, si nga institucionet e vendit ashtu edhe nga faktori ndërkombëtar, prandaj është obligim i Kuvendit dhe i spektrit politik që me një deklaratë të përbashkët ta kundërshtojë një veprim të tillë.
DEKLARATË
1. Kuvendi i Republikës së Kosovës e kundërshton dhe e shpall të paligjshëm e të pavlefshëm Referendumin e strukturave paralele në komunat veriore të Kosovës, të financuara e të drejtuara nga Republika e Serbisë kundër Pavarësisë, Sovranitetit dhe Integritetit territorial të Republikës së Kosovës.
2. Kuvendi i Republikës së Kosovës e vlerëson këtë referendum cenim të rendit juridik dhe kushtetues të Republikës së Kosovës;
3. Kuvendi i Republikës së Kosovës konstaton që i ashtuquajturi Referendum i organizuar nga strukturat ilegale, nuk prodhon asnjë efekt juridik, politik dhe si i tillë është i pavlefshëm;
4. Organizimet e tilla jashtë institucionale dhe ilegale dëmtojnë përpjekjet e vazhdueshme të Institucioneve të Republikës së Kosovës për integrim të komunitetit serb në jetën institucionale;
5. Kuvendi i Republikës së Kosovës inkurajon komunitetin serb të pjesës veriore që sa më shpejtë të angazhohet në implementimin e Propozimit Gjithëpërfshirës për zgjidhjen e Statusit të Kosovës.
6. Institucionet e Republikës së Kosovës konfirmojnë gatishmërinë e tyre për mbrojtjen dhe respektimin e të gjitha konventave ndërkombëtare, që garantojnë liritë dhe të drejtat e qytetarëve, si dhe të drejtat e pakicave.
Prishtinë, më 15 shkurt 2012
Kryetari i Kuvendit të Republikës së Kosovës
Dr. Jakup KRASNIQI
Përgjigju Duke Cituar
Postuar më parë nga Antiproanti
Krijoni Kontakt