Dëshmia X
Agim Zogaj u varros të shtunën pasdite në Prizren, në një ceremoni mortore me pak njerëz. Por, rrëfimi për “Dëshmitarin X” nuk përfundon këtu. Vëllai i tij, Afrimi, thotë se para vdekjes Agimi ka lënë një letër, e cila është në duar të autoriteteve gjermane. Aty sqarohet gjithçka.
Nga Lirita Halili më 02 tetor 2011 në ora 08:00
I njohur si “Dëshmitari X” në procesin gjyqësor ndaj Fatmir Limajt dhe të tjerëve, Agim Zogaj është varrosur të shtunën në varrezat e qytetit të Prizrenit.
Saktësisht rreth orës 17 e 30 minuta, atij i është dhënë lamtumira e fundit nga një masë shumë e vogël njerëzish që merrnin pjesë në varrimin e tij, kryesisht familjarë.
Përveç dhembjes dhe zisë për të, askush gjatë ceremonisë së varrimit nuk ka thënë asnjë fjalë të vetme.
E, ajo që nuk mundi të mbahej nga dhimbja ka qenë nëna e tij, e cila tërë kohën ka puthur fotografinë tashmë të djalit të ndjerë.
“E humba djalin më të mirë”, ka thënë ajo gjatë ceremonisë së varrimit.
Trupi i pajetë i Agim Zogajt është sjellë nga Gjermania rreth orës 10:00 të mëngjesit të së shtunës, ndërkohë që vëllai i tij, Afrim Zogaj ka thënë gjëra që deri më sot nuk ishin të njohura për opinionin.
Ai në asnjë mënyrë nuk mund të bindet së vëllai i tij ka bërë vetëvarje. Edhe përkundër se i kishte në duar dokumentet e lëshuara nga mjekësia ligjore.
“Nuk jam duke i besu autopsisë. Vëllai im nuk ka asnjë shenjë që dëshmon në ndonjë krim. Veç e di se ai ka vdekë”, thotë Afrimi, derisa nuk po i mbante lotët e pikëllimit.
Por, sipas Afrimit, edhe nëse vëllai i tij e ka vrarë veten, siç thuhet në raportin e policisë, mendon se ka qenë i shtyrë për ta bërë këtë.
“Nuk i besoj autopsisë që i është bërë vëllait tim. Ai ka pasur arsye të forta për të bërë një gjë të tillë, jam i bindur se ka qenë nën presionin e ndokujt për të marrë këtë hap”, thotë Afrim Zogaj.
Sipas tij, që nga muaji maj i këtij viti, Agim Zogaj i njohur si “Dëshmitari X” ka qenë duke banuar në Duisburg të Gjermanisë, në banesën e tij.
“Ai ka qenë i pambrojtur, ai në banesën time ka ardhur në muajin maj, nuk kam ditur asgjë për Agimin deri një moment kur ai ka filluar të rrëfehet”, tregon Afrim Zogaj.
Afrimi ka sqaruar për Express së vëllai i tij e kishte në plan që para se të ftohej si dëshmitar në rastin “Kleçka”, të dalë para medieve dhe të sqarojë gjithçka. Por një gjë të tillë, sipas Afrimit, nuk e kishte lejuar EULEX’i.
“Ai më ka thënë se para se të fillojë procesi, kishte planifikuar të dalë në media publikisht dhe të thotë çdo gjë rreth kësaj çështjeje, por Agimin nuk e lejoi EULEX’i ta bëjë këtë”, ka thënë Afrim Zogaj për Express.
Sipas tij, Agimi apo “Dëshmitari X” ka lënë si testament një letër shumë të gjatë ku ka treguar fije për pe se çfarë ka ndodhur në tërë këtë proces, por nuk ka dashur ta bëjë publike për media.
“Letrën e ka policia dhe gjykata në Gjermani si dhe ne si familje. Ajo do të bëhet publike dhe do të sqarohet gjithçka”, thotë Afrimi.
“Veç diçka dua të sqaroj, që askush nuk e ka ditë për vëllanë tim. Përveç “Dëshmitarit X”, Agimi ka qenë edhe komandant “Murrizi” që shpesh është përmendur”, rrëfen vëllai i dëshmitarit të ndjerë.
Pavarësisht të gjitha fjalëve që fliten rreth çështjes tashmë të mbyllur për familjen Zogaj, Afrimi thotë se e di mirë se çfarë fshihet pas vdekjes së mistershme të vëllait.
“Janë tre faktorë që unë nuk dua t’i përmend. Por kurdoherë e vërteta do të dalë”, pohon ai.
Përgjigju Duke Cituar
Postuar më parë nga Pa_doreza2
Krijoni Kontakt