Beteja per Tiranen: Lulzim Basha perballe Edi Rama

[RAPTILOID]

Të fitojë Basha në Tiranë është si të fitojë Jocker te Batman
2011-04-27Andi Kananaj

Ndoshta çështja e gjelbërimit të Tiranës është e vetmja çështje që prek realisht qytetarët. Ndoshta Tirana është kthyer vërtet në një qytet ku duket se lozet me porta të vogla sa herë që dilet nga parkimi. Ndoshta (dhe askush s’e mohon dot që betoni po na zë frymën), duke na bërë ta harrojmë entuziazmin që patëm kur pallati i parë 20- katësh kaloi 15-katëshin, heroin idilik të komunizmit. Askush s’e mohon dot se fillimisht shqiptari i mesëm u gëzua, në besimin se kapitalisti që ndërtoi mbi kokat tona po sillte pak progres, duke sjellë pak Manhatan në Tiranë.

Askush nga ata që njoh s’e mohon dot se në këto zgjedhjet e fundit ka hyrë në modë një farë “histerie” ekologjike. Kjo, jo sepse po kthehemi në higjienistë apo në përkrahës të ushqimeve bio, por sepse Rama është bërë i padurueshëm në TV dhe i papërgjegjshëm në Bashki. Edhe për vetë farmacistët që shesin ilaçe të skaduara.

Tirana nuk ka rrugica të përshtatshme për biçikletat. Tirana nuk ka metrò. Tirana nuk ka vende ku fëmijët të luajnë, si fëmijë që janë.

Basha i di të gjitha dhe po i rendit me qetësi, sipas radhës. Ndoshta vërtetë këto fjalë e bëjnë që të jetë në avantazh në sondazhet në ‘Facebook’, ku duket se në fakt konkurrohet vetëm nga fenomeni Lek Plepi. Lek Plepi, nga ana tjetër, promovoi një këngë te “Zonë e Lirë” kundër shitjes së kombësisë. Deri këtu e ka fituar edhe like-un tim. Por, Leka nuk para flet dhe për më tepër, nuk kërkon as vota të vërteta.

Paradokset në fjalët e Lulit, në fakt më duken më të rrezikshme, ndaj dhe dua t’i vë në dukje me radhë.

Basha thotë se nuk do të lejojë të ndërtohen pallate. Që në parim nuk arrij ta besoj dot Bashën, se Basha është i djathtë dhe e djathta ka në plan të ndërtojë pallate të larta pa hesap (problem që në të vërtetë e kam edhe me Ramën). Pavarësisht se Basha është shprehur publikisht se do të ishte e vështirë të bindeshin ndërtuesit, por se “ai do ta bënte”, me “intuitë” besoj, se pallate sidoqoftë do të vazhdojnë të ndërtohen. Përndryshe, ku do të futen njerëzit që do të lindin në të ardhmen? Ajo që mungon dhe do të mungojë është plani rregullues i Tiranës, që do të përcaktonte me përpikëri deri edhe saksitë që do të lejohen në zyrat e administratës. Pallate do të ndërtohen gjithmonë, sidoqoftë.

Nuk i besoj fjalët e Bashës, sepse përtej logjikës se si mund të rritet një qytet që numëron lindjet më të shpeshta në Europë, eksponentët e djathtë kanë gjithashtu konceptet e tyre të zhvillimit, që sigurisht nuk do të cenohen për një palë zgjedhje; siç dhe nuk janë prekur gjithë këto vite nga e ashtuquajtura estetikë për natyrën. Në emër të liberalizmit ekonomik, Traktati i Kiotos ka dështuar me sukses. E megjithatë, Basha thotë se do të flasë me ndërtuesit që ata të mos ndërtojnë. E vështirë do të* jetë, - pohon ai vetë. Një Bashë i majtë të trondit, por asnjëherë sa ndërtuesit që do të pranojnë të mos ndërtojnë.

Nuk e besoj Bashën kur thotë se nuk do ta shembë piramidën, sepse i njëjti Bashë shembi mbikalimin e ‘Zogut të Zi’ pa arsye të arsyeshme. Dhe, sepse Basha thotë çdo gjë me lehtësinë e papërballueshme të buzëqeshjes.

Basha ndoshta fiton, sepse këtë herë e mbështesin edhe të pavarurit kitsch. Kategoria në fjalë, e mërzitur më shumë me Ramën se me Gjebrean për daljet në TV, i kundërvihen Ramës me dashurinë për vendin. Ndërkohë që megjithëse ambienti qenkësh problemi i madh i kësaj shtrese, në Vlorë numëroheshin vetëm 5 vlonjatë që protestonin kundër Petroliferës, të ndërtuar në një gji të virgjër deti. Në të njëjtën linjë, nuk gjej shpjegim që Porto-Romano është kthyer në Porto Fazlliç, duke ndërtuar stabilimente nafte që largojnë çdo fantazi mbi natyrën. E ç’mund të thuhet për rrugën Durrës - Krujë, të mbipopulluar me fabrika çimentoje, për të cilën askush nuk ankohet, qoftë dhe sa për të larë gojën? Po gomat që digjen, të cilat duken qartazi nga Blloku?

Në rastin më të mirë, të pavarurit kitsch kanë gjetur argumentin cool për të fituar zemrat e anëtarëve të tjerë të organizatës së paregjistruar të Bllokut; në rastin më të keq kanë gjetur rehatinë me punësimin në administratë. Ndoshta, koha e kaluar në Bllok të bën njeri më të mirë, partizan të së vërtetës, edhe pse kjo e vërtetë nuk të thotë asgjë.

Që fjalët e Bashës të kenë kuptim, atij i duhet të flasë në emër të ideologjisë së partisë që përfaqëson. Që Basha të jetë i besueshëm, i duhet të flasë, në rastin konkret, në emër të krijimit të kushteve për investime. Po nuk foli në emër të zhvillimit ekonomik të përcaktuar nga tregu, Basha del jashtë asaj që partia e tij është përpjekur të na mësojë përgjatë jo pak, por plot 20 vjetëve. Këtë duan edhe ndërtuesit që paguajnë nën dorë që posterat e tij të shkëlqejnë me sukses, deri në 8 maj. Nuk është ende e qartë nëse kjo propagandë do të mbyllet me një buzëqeshje pa mundim. Megjithatë, nëse Basha ka një plan të vërtetë për të rregulluar balancat e ekosistemit me qytetin, do të ishte e udhës të na e ilustronte me ndonjë vizatim, meqë fjalët e fushatës nuk duket se pinë më ujë.

Nuk janë të besueshme fjalët e Bashës, edhe pse të mirërenditura, sa herë përpiqet të duket si një figurë e dallueshme nga Berisha. Kjo pikë së pari, sepse asnjëherë, në asnjë situatë, asnjë anëtar i Partisë Demokratike nuk ka qenë dot i pavarur. Pikë së dyti, sepse nëse Lulzimi është i pavarur, kjo do të thotë që nuk do të ketë mbështetjen e Kryeministrit për të vazhduar një plan serioz që forca “serioze” e djathtë do të çojë përpara. Luli pa parti është më i vështirë për t’u besuar se sa Luli i Partisë Demokratike. Pastaj, të gjithë e shohim se kjo është një teknikë publicitare e gjetur nga firma amerikane që punon për Bashën, që duket se e ka këshilluar të distancohet si figurë nga Berisha dhe të shmangë daljet në TV me Ilir Metën. Në këtë mënyrë, të paktën ai do të mund t’i shmanget efektit të videos korruptive publikuar nga “Fiks Fare”, me protagonistë Metën dhe Priftin. Në të vërtetë, amerikanët harrojnë që ne jetojmë në një fshat të madh, që në vetvete jeton me thashethemet. Aq më tepër kur tregohen me qejf, që të duket pa kallauz, që Luli ka lekë dhe paguan profesionistë të vërtetë. Fat i madh që dimë të lexojmë.

Ajo që me tremb më shumë

Nëse fiton, Basha do të ketë të drejtën (jo dhe aq) morale të flasë në emër të qytetarëve të Tiranës. Nuk do të jetë shumë e vështirë që ky personazh të sillet si Berluskoni, që flet në emër të italianëve sa herë i duhet të përballet me proceset dhe të gjykohet për akuzat që rëndojnë mbi të. Basha do të flasë në emër të votuesve. Do të ndodhë ajo që ndodh zakonisht, pra që Basha nuk do të gjykohet asnjëherë nga gjykatat e brishta shqiptare. Do të vetëfajësohemi si ata që e votuan. Do të humbasim të drejtën të ankohemi, dhe me të drejtë. Nëse Kavaja nuk do ta kishte votuar Fatmir Mediun, ndoshta do të arrinim të dinim më në fund nga një ish-ministër se çfarë ndodhi në Gërdec. Do të na ndihmonte një sistem i tërë drejtësie për ta bërë. Kavaja ka arsye të mira që të reflektojë, por afërmendsh, për arsye pseudo-praktike, nuk do ta bëjë.

Nuk do të ishte çudi të kishim përsëri si kryetar bashkie një të paaftë e të korruptuar në respekt të traditës së deritanishme. Por do të ishte tejet e vështirë të vazhdonim të kishim një shtet demokratik, nga dita që do të votohej një kandidat, vetëm për të shpëtuar nga përballja me drejtësinë. Përsëritja e rasteve alla Mediu do të vinte në dyshim ekzistencën e sistemit të drejtësisë, në mos funksionimin e tij sa për sy e faqe. Ekzistenca e këtij sistemi nuk është vetëm një tjetër kërkesë e BE-së, por përbën gjithashtu të vetmin shans për të dalë nga mesjeta politike ku jemi zhytur. Përndryshe, i njëjti sistem mund të destinohej për punësimin e atyre që do të mbarojnë juridikun nëpër universitetet private.

Ndërkohë që CV-ja e Bashës, në pritjen pa shpresë të fillimit të proceseve të tij, është më se e plotësuar. Përveç shembjes së mbikalimit të ‘Zogut të Zi’ në Tiranë, kjo CV mund të krenohet me eksperiencën e pazbardhur të rrugës Durrës-Kukës si dhe vrasjet e 21 janarit.

Për qytetin pa Batman, fitorja e Jocker-it mbi sistemin e drejtësisë do të ishte fatale. Por ndoshta është më mirë t’i kthehemi asaj që qytetarët kanë për zemër, gjelbërimin, argument që Basha duket se e njeh mjaft mirë.

Për mbyllje

Si pjesëtar i parëndësishëm i një takimi të organizuar në prill të 2009, nga intelektualë të pavarur (85% me gazetën ‘Integrimi’ nën sqetull, plus Andrea Stefani), me qëllimin për të mbrojtur qytetin nga betonizimi, pata rastin të dëgjoja ndërhyrjen e papritur të një zonje, e cila u prezantua si ekspertja e skuadrës së fundit që kishte përgatitur planin rregullues të Tiranës në vitin ‘89. Ekspertja në fjalë arriti me vështirësi t’i merrte fjalën Andreas, “nonës” së fjalimit dhe luftës kundër betonizimit. Ekspertja u shpreh se pallate do të vazhdonin të ndërtoheshin sidoqoftë, por se ajo që mungonte ishte një plan i qartë që do përcaktonte në detaje sipërfaqet e gjelbra, duke përfshirë në to deri dhe saksitë që do të lejoheshin në zyrat e administratës. Pasoi heshtja. Ndoshta askush nuk e dëgjoi, pasi askush me sa dukej, nuk interesohej realisht se si do të rritej Tirana e nesërme. E rëndësishme ishte që të denoncohej një bllok i ri pallatesh ndërtuar nga ndërtues të PS-së dhe ndërtues të PD-së. Ndërkohë që tani që janë edhe të LSI-së, nuk ka më arsye për denoncime.

Ekspertja u largua dhe unë nuk i kujtoj më as emrin. Mbaj mend që Reshat Arbana recitoi një vjershë për atdheun; Ed Shalsin që me SMS më pyeste se si doli në debatin e shkurtër me intelektualët; por nuk mbaj mend se si quhej specialistja, e vetmja që dinte se çfarë po thoshte.

Takimi i intelektualëve u mbyll me sukses. Unë i thashë Shalsit se ai doli mirë, gjë që ia thashë edhe Andrea Stefanit, që kundërshtoi Shalsin.

Ndoshta është vërtet kjo puna e gjelbërimit.

Gazeta shqip

[juanito02]

Ne pune beni ju o shqipo qe jeni atje.
Ruani voten.
Po bete kete keni shpetuar nga kandidatet e Salise qe jena turrur me kuc e me mac te vjedhin se e dine mire qe populli i urren.
I urren per 1000 aresye aq sa dhe te huajt qe tutelojne fushaten e PD i thone Salise ik nga Tirana se Lulit i prish pune.
Se keni vene re Saline qe bredh anekend ne skuta qe mendon se e presin mire dhe ku dhe ne to lexon urrejtjen e njerezve?

Lexoni Meron sa qarte e pershkruan situaten e Salise.


Të vetëposhtëruarit e mëdhenj
Nga Mero Baze
Askush nuk mund të parashihte që dy njerëzit, të cilët e kanë kuptuar dhe pranuar se i prishin punë pushtetit të tyre me imazhin e tyre, do të ishin Sali Berisha dhe Ilir Meta. Diçka e rëndë do të ketë ndodhur në koshiencën e tyre politike derisa kanë arritur tu nënshtrohen këshillave të kompanive që u kurojnë fushatën për të mos u shfaqur askund bashkë, bile Metës askund në foto dhe ekrane. Është rasti klasik kur një politikan ka frikë përfundimisht nga portreti i tij. I trembet pasqyrës, ekranit, posterave, gjithçkaje që e identifikon në publik. Sali Berisha ka shkuar dhe më tej. U trembet dhe atyre që ka folur, që ka publikuar dhe që ka përdorur deri para dy muajsh për jetën private të kundërshtarit të tij. Si një dem i tredhur që përpiqet të imitojë një dem të gjallë, por të parrezikshëm, ai po sillet rrotull Tiranës, nëpër qytete të tjera të Shqipërisë, duke turfulluar që askush nuk ia beson rrugën e tij paqësore. Është e pazakontë për një fushatë elektorale që partia kryesore në vend të pranojë publikisht se kryetari i saj i prish punë në kryeqytet dhe në opinion publik. Edhe më e pazakontë është që këtë tezë ta pranojë kreu i shumicës dhe të sillet si një nxënës i bindur. Kjo do të thotë minimumi se ky njeri ka një frikë të madhe dhe një makth nga humbja e mundshme e pushtetit. Ndryshe nga sa bën si i fortë dhe luftëtar deri para dy muajsh, ndryshe nga sa bën si rrugaç lagjeje duke sharë me libër shtëpie deri para dy muajsh kundërshtarin e tij, ndryshe nga sa ka bërë si njeri që i del zot punëve të veta dhe partisë së vet, ai është sot një i vetëposhtëruar i madh i kësaj fushate, një “malok” që “qytetari” Lulëzim Basha i ka thënë ‘më rri larg po qe se më do të mirën pasi nuk të do Tirana’. Me këtë gjest, i cili mes të tjerash e bën qesharak, ai kam frikë se ka fokusuar më shumë atë për çfarë Tirana dhe realisht shumica e shqiptarëve nuk e pranojnë dot, ka ekspozuar para tyre hipokrizinë, mungesën e sinqeritetit dhe personalitetin e dyfishtë. Ai ka pranuar para qytetarëve trukun si metodë politike të tij dhe është duke na thënë se po na gënjen me çunakë të ri, të keqpërdorur prej tij familjarisht herë në sallone e herë në bodrume, herë në ekrane e herë në prapaskena, herë në tendera një miliard dollarësh e herë në pagesa nën dorë, herë në vrasje në mes të bulevardit e herë në mbrojtje të të drejtave të njeriut. Sali Berisha është i vetëposhtëruari i madh i kësaj fushate, pasi është bindur ndoshta dhe gabimisht se mes humbjes së pushtetit dhe fshehjes së tij nga sytë e njerëzve si faktor që çon demokratët në humbje, ka zgjedhur fshehjen. Pra, ai ka pranuar se nuk është njeriu që çon PD në fitore, por është njeriu që mban në mënyrë të paligjshme kreun e saj dhe përdor figurina për të gënjyer njerëzit. Ky është një vetëposhtërim i pashembullt, për të cilin besoj se ka pak raste të ngjashme në politikën botërore.
Në të vërtetë aq vota sa ka PD dhe e djathta janë vota të tij. Me shpirt apo me gjysëm zemre, me ndershmëri apo me pak tinzari, ato vota prodhohen në emër të tij. Në emër të poshtërimit të tij siç po shkon kjo fushatë prodhohen vetëm barcaleta dhe forcohet fryma se ai ka vendosur të ikë vetë nga skena. Shqetësimi i tij i madh për të mos i dalë zot fushatës se i prish punë Lulëzim Bashës është në të vërtetë fillimi i fundit të protagonizmit të tij në politikën shqiptare. Fushata e vitit 2011 do të shënohet si fushata që detyroi Sali Berishën t’i fshihej popullit nga sytë, pasi e kuptoi që e urrente.
Në një situatë me ekstreme ka shkuar Ilir Meta. Atë e ka përjashtuar nga fushata jo vetëm Partia Demokratike, por dhe vetë LSI. Ai nuk ka guxuar të nxjerrë portretin as në posterat e partisë së tij. PD ia ka ndaluar jo vetëm shfaqjen në Tiranë, por dhe në rrethe. Berisha shkoi në zemër të bastionit të tij në Çorovodë pa të, ndërsa ai duket se bën kujdes mos ta kapin as kamerat në këtë fushatë. Imazhi i tij i ulur në kolltuk me një bllok në dorë dhe një gisht që ngjyhej me pështymë për të kërkuar faqen tjetër, duket se kanë tronditur përfundimisht edhe qytetarin Ilir Meta, i cili duket se është bindur se zëvendëskryeministri Ilir Meta për popullin shqiptar është thjesht një hajdut.
Pra, nga mënyra si po degradon fushata elektorale dhe mesazhet politike që po përcjell ajo, ne jemi duke shënuar një rekord botëror kur dy bashkëkryetarët e koalicionit kanë kaluar në ilegalitet për të mos i parë populli me shpresë se kështu mund të shtyjnë dhe pak në pushtet. Sali Berisha dhe Ilir Meta janë bindur përfundimisht se kryeministri i vendit dhe ish- zëvendëskryeministri janë njerëz që urrehen nga populli shqiptar. Në këtë pikë ja vlen t’i quash përfaqësues të shumicës në vend. Shumica e shqiptarëve beson vërtetë këtë gjë.

[bamatat]

Po te mos ishte Sali Berisha dhe Ismail Kadare,shumica e njerezve do mendonin se ndoshta ka vdekur Regjep Qosja.Pse?
Sepse Regjep Qosjes nuk i ndihet zeri dhe as behet i gjalle asnjehere.Perveq ne dy raste, dhe në të dyja rastet kur duhet te kritikohet Ismail Kadare dhe Sali Berisha. Sa herë që i nevojitet dikujt që të kritikojë sa më ashpër këto dy personalitete – njëri, shkrimtari më i njohur dhe i shpërblyer shqiptar në botë, e tjetri, një ndër burrështetasit më të popullarizuar të Shqipërisë në dy dhjetëvjeçarët e fundit – Qosja vihet ne aksion,ne stilin e gjarperit,gjithmone duke u fshehur nen petkun e letrarit.
Por eshte e cuditshme se kurre se kemi degjuar te flet asgje kunder Edi Rames ose ne pergjithesi kunder socialisteve.Ndoshta e ndien ende nostalgjine e kohes se"lavdishme"te xhaxhit Enver,poashtu edhe per problemet e shumta ne Kosove te te gjitha sferave ende nuk kemi degjuar te prononcohet ose te flas diqka.
Ja recepti per ti mbyllur gojen Qosjes.Per Kosove Qosjes i eshte mbyllur goja pasiqe ka marre honorarin prej rreth 200 mijë eurosh për botimin në 27 vëllime të veprës së plotë nga Instituti Albanologjik i Kosovës, nga e cila shumë rreth 130 mijë si honorar për vetveten e tij.
A mund te me tregoj dikush se sa e ka honorarin Qosja nga socialistet e Shqiperise,per te mos i kundershtuar,apo kete pune ai e bene me nder,pa kompenzim,vetem per qejfin e shpirtit te ti komunist,vetem per vellezerit ideologjik te tij,Edi Ramen & Co?

Ti mendon se personaliteti dhe dinjiteti i nje njeriu jane patjeter mallra per treg ? Keshtu i mat njerezit ti , me metrin tend ? Na jep ndonji euro ose dinar , se meqenese je kunder shqiptareve duhet te paguhesh mire ! Po them me na i fal , sepse nuk merret borxh tek nji i shitur , sepse pastaj nuk dihet kush te del pronar !

[shigjeta]

Ti të përjashton nga punët, jo nga Partia

Nga Andis Harasani

I dashur kryetar
Po të shkruaj këtë letër me dhembje dhe jo me dilemën nëse duhet të ta nis apo jo. Ndoshta duhet të ta kisha nisur më parë, por edhe tani nuk prish punë. Për punë të mira është gjithmonë kohë e përshtatshme. Të uroj me gjithë shpirt që ta fitosh këtë garë si të vetmen rrugë për të mos ndodhur ndonjë gjë më e rëndë nesër. Uroj që të fitosh jo për atë çfarë ke bërë në këto kagtër vite, por sepse pasojat për një humbje, që larg qoftë, do të ishin shumë të rënda për moralin dhe besimin e PS-së se nëse do të arrinte të fitonte ndonjëherë. Kaq. Ndryshime në PS, si ato që mund të ndodhnin dhe duhej të kishin ndodhur mbas vitit 2009, nuk ka mundësi më që të ndodhin, cilido që të jetë rezultati.
Shumë kolegë dhe miq tanët të përbashkët që duan që të fitosh përsëri në Tiranë thonë se fajin për mosrealizimet e bashkisë e ka qeveria. Dhe kështu është. Qeveria ka pjesën e vet të fajit. Por ti dhe unë, i dashur mik, e dimë që është kështu është kjo bota jonë arkaike politike. Njëherë e një kohë, kryeministri dhe zëvendëskryeministri i këtij vendi ishin në garë se kush do të të jepte më shumë fonde. Mirë kanë bërë dhe ata atëherë.
Sot janë kohë të tjera. Ti vazhdon të jesh në pushtet, kurse në të gjithë jemi në opozitë. Ne i bllokojmë në parlament sa mundim, e kemi nisur me bilbila, e vazhduam me bojkot dhe jemi prapë në gjysëm bojkot. Ata na bllokojnë në bashki. Kënaqemi ne kur nuk u shkojnë atyre punët mirë, kënaqen ata kur na shkojnë neve punët keq. Keq i shkojnë punët të gjithëve në Shqipëri, pastaj. Si ekonomist që jam nga profesioni, kam mësuar në këto vite në politikë, se politika është si kontabiliteti. Shkon dhe vjen me llogari. Çfarë do të mbjellësh, do të korrësh. Dhe kur ndodh që viti të jetë i mbarë dhe të ketë të korra të shumta, eksperienca ka treguar që duhet ruajtur një sasi e prodhimit kur vitet që vijnë të jenë vite ters. Ndodh që nuk ka shi sa duhet, fara të jetë e keqe dhe plehu i përdorur i papërshtatshëm.
U bë shumë kohë që në mbledhjen e kryesisë së PS, bashkë me një koleg që atëherë e besoja shumë, kur na kërkoje që të mos shkonin në Parlament, u ngritëm dhe të thamë që ta lesh edhe ti bashkinë. Ta linin të gjithë socialistët dhe pastaj shkonim në zgjedhje të parakohshme. Na pe me dashuri se atëherë na dukej se na doje, na the se do ta mendoje…ndoshta po e mendon akoma, por nuk e bërë. Me siguri na ke dhënë të drejtë sa për të mbyllur mbledhjen.
Jam shumë i shqetësuar për këto zgjedhje, miku im. Me shqetësojnë për PS.në se jam akoma pjesë e atij grupi. Megjithatë nuk kuptoj shumë gjera që ndodhin në këto kohë. Nuk kuptoj se çfarë po ndodh kur shoh një drejtues të rendësishëm të Ballit Kombëtar që mbron socializmin si ne.
Për këto shqetësime flas shpesh me miqtë e mi, megjithëse nuk e di sa miq i kam kur ende nuk më kanë uruar për djalin që më ka lindur. As ti, si mik i vjetër nuk më ke uruar. Miqtë tanë më thonë se kësaj rradhe ja kanë mbledhur Pd.së. Kanë marrë njerëzit më të egër që ka kjo parti dhe i kanë vënë të kandidojnë për Ps.në zonat e egra të Pd.së. Dhe këtë gjë e quajmë fitore dhe na bind se fitojmë. Nuk di pse një gjë e tillë më ngjan shumë me amnistinë fiskale që u shamë aq shumë në Parlament dhe që po e zbatojmë në këto zgjedhje. Po falim njerëz që nuk janë socialistë, që kanë punuar kundër socialistëve sepse kështu thonë ca miq tanët deputetë socialistë. Ca nga kandidatët tanë i njohin mirë këta miq sepse në 2009 ju kanë vjedhur votat. Sot kandidojnë për Ps.në që e pakta të mos vjedhin më vota nga ne.
Nuk e di sesi duhet të ndjehen deputetët dhe militantët tanë sot kur dje, me ca nga kandidatët tanë janë përplasur edhe fizikisht. Do të votojnë për ta? Do ta mbrojnë votën e tyre? Çfarë mësimi merr në një rast të tillë socialisti i thjeshtë, ai militanti i bazës, që ndryshe nga ne të dy dhe shumë të tjerë, vetëm i kanë dhënë Ps.së dhe nuk i kanë marrë asgjë. Që i kemi trajtuar si tifozë futbolli, që ju kërkojnë të brohorasin për ne, të zihen për ne, të gëzohen dhe të hidhërohen për ne dhe në fund, ju sjellim në ekip lojtarë kundërshtarë?
Hajde se i bindëm ata dhe këta kandidatë të rinj fitojnë në zgjedhje. Këtu kemi përsëri problem. A kemi ndonjë detyrim nesër ndaj tyre? A kemi siguri sesi ata do ta menaxhojnë komunën dhe bashkinë? A ke besim se ata do të vijnë në Tiranë për të protestuar po t´ja kërkosh ti, miku im?
Kësaj rradhe nuk po bëj fushatë. Lexoj gjithë gazetat dhe shoh të gjitha emisionet televizive që bëjnë debat pa kandidatët rivalë. Askush nuk më ka kërkuar që të bëj fushatë. Një miku yt nga Ballkani, të tha njëherë se kur të kesh probleme me njerëzit, mos bëj përjashtime nga partia, por përjashtoi nga punët e partisë. Këtë këshillë që të kanë dhënë, po e zbaton me sukses. Jam në parti, por më keni përjashtuar nga punët e partisë. Ne të gjithë të kemi lënë që ta ndjekësh këtë këshillë dhe ta realizosh në praktikë. Por kjo nuk më pengon që të jem shumë i çuditur që ti, miku im, je pajtuar me këtë mentalitet kaq ballkanik. Shumë vjet më parë, kryeministri i asaj kohe të thirri që të vije në Tiranë pikërisht për të luftuar këtë mentalitet. Sot më vjen keq, por ta shoh në çdo hap që hedh në politikë.
Ndoshta kjo është arsyeja që më parë, i pëlqeje të gjithëve kur dilje në televizor. Pëlqenin tek ty mënyrën si flisje, si lëvizje duart, si flisje për të ardhmen dhe për gjërat moderne që i mungonin politikës në Shqipëri. Sot, vështirë se të kupton kush.
Dje ishe plot me ide. Edhe në katin e dytë të Ps.së, vizatove në dysheme me shigjeta drejtimin e fabrikës së ideve. Tani aty kanë humbur ngjyrat. Shpesh idetë e tua atëherë më dukeshin fasadë, por ne këtë punë kemi në politikë dhe ato ide gjeneronin vota. Sot nuk e di.
Po i kthehem dhe njëherë fushatës. Në 2005 fitova mandatin e deputetit në Tiranë në një zonë të vështirë, por bëra shumë miq e shokë që besuan dhe luftuan bashkë me mua për fitore. Në 2009 më çove në Kavajë dhe Rogozhinë sepse ishin zona të vështira. Luftova prapë. Bashkë me një kolegun time, u zura edhe me karrige që të mbroja çdo votë. Sot ti nuk e kujton atë kohë. Nga të gjithë deputetët që ke në grup, jam i vetmi që nuk më ke thënë një gjysëm fjale e të më pyeshësh se çfarë mendoj për këtë fushatë. Kjo nuk ka shumë rëndësi se është një çështje mes nesh. Por të vesh kandidat në Gosë të Kovajës një individ që na ka vjedhur votat në 2009, është shumë. Kjo është shumë e rëndë. Nuk e di cili është morali i kësaj historie. Megjithatë, kush pyet për moral nëse fiton. Ky është problemi. Ka shumë njerëz që mendojnë se zgjidhja që dikush merr për veten, në të gjitha rastet është zgjidhja më e mirë për interesin e tyre. Ose të paktën,, zgjidhja më e mirë se ajo që ndonjë tjetër do të kishte marrë në vend të tyre. Unë nuk mendoj kështu. Mendoj ndryshe. Po të reflektohet me kujdes, kështu do të mendonte kushdo. Eshtë si në një lojë shahu kur një fillestar luan me një mjeshtër të kësaj loje. Fillestari është gjithmonë ai që do të humbasë, për shkak të zgjedhjeve që bën për të përdorur figurat e tij. Ato zgjedhje do të ishin më të mira nëse fillestari do të pranonte të dëgjonte dhe të merrte ndihmë dhe nga lojtarë të tjerë që e njohin lojën si ai ose më mirë se ai.

Gazeta “Shqip”

[PLAKU]

Diktatori i fundit komunist: “Edi Rama dhe shokët e tij duhet ta udhëheqin Shqipërinë”
27-04-2011 / Nga Kostaq Xoxa
Kujtesë nga rreshtimi i Ramiz Alisë në shkrimin e tij të 18 prillit 2007

Në shkrimin e botuar në një të përditshme në datën që jepet në okielo, tregohet një aferë politike në të cilën “antikomunisti” ekstremist dhe anarkist, Edi Rama, del i zbuluar lakuriq, më keq se lakuriqësitë e tij që kanë marrë dhenë.
Pavarësisht se Ramizi ishte bërë leckë nga Edvini (1991) në librin e tij hipokrit - me mësymje të papërmbajtura kundër komunizmit, kundër nostalgjisë enveriste, kundër Ramiz Alisë, - paska ardhur një çast i jashtëzakonshëm kur Ramizi duhej t’i shpërblente Edvinit lejen që i dha për ndërtimin e një pallati në tokën e Xhuvanëve, ku pjesëtar është edhe Ardian Klosi: “Leja e ndërtimit i ishte dhënë një personazhi mediatik të fuqishëm. Ky, nëpër medies së tij, do të kontribuonte në humbjen e socialistëve dhe të Fatos Nanos, në zgjedhjet e tre korrikut. Kjo marrëveshje u krye me pronarin e kësaj medieje, e cila i hapte rrugën Edvinit drejt marrjes së kreut të socialistëve”, - po citojmë një fragment nga ky shkrim që paska kaluar pa u vënë ré.
Duket si një aferë mafioze nga më fantazmagoriket ndërmjet një komunisti të deklaruar enverist, si Ramiz Alia, dhe një antikomunisti ekstremist të vetëshpallur si absolutisht i papajtueshëm me PPSH-në, pra edhe me PS-në, që s’është veçse PPSH-ja e pudrosur dhe me makijazhin fals të “rinovimit” demokratik!
Po citojmë një skenar si të shtrigave shekspiriane: “ Po të thellohen kërkimet më shumë në historinë e këtij pallati, do të shikojmë se leja e ndërtimit i është dhënë një personazhi të fuqishëm mediatik (aluzion thuajse i hapur që tregon se për cilin është fjala,- shënim) i cili ndërmjet medies së tij do të kontribuonte në humbjen e socialistëve dhe të Fatosn Nanos, në zgjedhjen e tre korrikut, marrëveshje kjo e Ramës me pronarin e kësaj medieje e cila do t’i hapte rrugën Edvinit drejt marrjes së kreut të socialistëve”.
Thuajse e pabesueshme! Por ç’nuk ndodh me personazhe aventurierësh si Ramizi, i cili nga numri tre i hierarkisë pranë tiranit të kuq Enver Hoxha ia mbërriti që, me ndihmë krushqish dhe me kolaboracionin e Nexhmijes, të kapërcente mbi Hysniun dhe mbi Mehmetin, për të vënë në dorë skeptrin e një Enveri të katandisur që të bënte karagjozllëqe me rojat e tij! Ç’nuk ndodh me “antikomunistë të tërbuar” si e.r.-ja i librit të pushkatuar, një parvëny i rikthyer nga stallat e kuajve të Parisit, si një proselit që duhej të bënte lutje për të qenë anëtar i thjeshtë i PSSH-së! Autori i këtij shkrimi, I.D. (në të vërtetë emri është i plotë) ka këtë koment të tij, me një periudhë të stërgjatë, të denjë për romanet e verdha të Sherlok Holmsit: “Në të gjithë këtë histori pazaresh e kulisash, në këtë histori vlerash makbethiane, ku përplasen ish-diktatorët me kandidatët për diktatorë, mes vrasjesh të një kohe të shkuar dhe pabesive të një kohe të tashme, ia vlen t’i hedhësh një sy marrëveshjes së Edvin Ramës me diktatorin e fundit të shqiptarëve, Ramiz Alinë, njeriun që i ka duart të ngjyera me gjakun e mijëra shqiptarëve, me vrasje poetësh apo intelektualësh dhe në vrasje kalimesh kufiri të bijve të nënave që tentonin lirinë larg diktaturës që po i terrorizonte”.
Pasi bën një portret të frikshëm të Ramiz Alisë, autori bën edhe portretin pervers të Edi Ramës. Për të parin, Ramizin, përmendet fizionomia e tij kriminale, si “i pranishëm në çdo vrasje të dirigjuar nga E. Hoxha”, si bashkëfajtor për “burgosjet e T. Lubonjës, F. Paçramit e duke përfunduar te vrasjet e M. Shehut, K. Hazbiut, Ll. Ziçishtit, etj”: “A nuk ishte R. Alia personi që bllokoi hapjen e kufirit me Perëndimin, njeriu që ktheu kohën e tallonit dhe të urisë, njeriu që shkatërroi ekonominë shqiptare me formulën e tetëdhjetë përqindëshit?”. Pastaj i vjen radha Edit: “Duke nxjerrë R. Alinë në mbrojtje të tij, Edi Rama vërtetoi para shqiptarëve se është pjesë e monstrës komuniste (...) që po ripërtërin gjymtyrët e prera të zvarranikut komunist (...) dhe sot shikojmë një lidership i cili, për të arritur qëllimin e vet në drejtim të pushtetit, është gati të bëjë aleancë edhe me nomenklaturën e vjetër komuniste, duke shpresuar në sundimin e plotë (...) e duke kthyer mbrapsht rrotën e historisë. Me atë, metastazat e komuniste jo vetëm që nuk janë zhdukur, por ato kanë marrë frymë në mënyrë të fshehtë për t’u gjallëruar kur të dilte një i çmendur si Edi Rama për t’i përfaqësuar”.
Mjaft me kaq. Edhe sikur diçka, shumë pak, të jetë e vërtetë në këtë shkrim, do të duhej të bëhej një investigim i hollësishëm, qoftë për R. Alinë, që “nuk di gjë për Tivarin, le të pyeten kosovarët”, qoftë për E. Ramën që “ka deklaruar si të ardhura 3000 euro!”. Sa fukara paska qenë, i shkreti! Vetëm trushkulurit mund t’i besojnë allçakut Edi Rama!
Në këtë histori që përmendëm, shumë gjëra mund të duken si të fantazisë së një fantashience të shthurur. Por disa gjëra, megjithatë, janë të hetueshme. Mund të qëmtohet nëse është dhënë një leje ndërtimi prej Edvinit për një pallat në tokën e cilësuar me emër konkret, ku është pjesëtar edhe “antikomunisti”, vëlla siamez i Edvinit. A është ndërtuar pallat në atë zonë dhe a është e vërtetë se ndërtues na qenka një personazh mediatik ultramilioner? A është me leje apo pa leje ndërtimi i këtij pallati? Në atë terren, pavarësisht nga një plan urbanistik ekzistent apo inekzistent, këshilli bashkiak a kishte qenë i mendimit apo jo për një lulishte, në sipërfaqe vërtet të bollshme si ajo?
Kjo tollovi, si edhe shumë të tjera të ngjashme me ngjarjen e çuditshme, do të ishin krejtësisht të pamundshme pa atë gangrenë të kuqe, të përshkruar në litanitë si në një tempull nga e.r.-ja, që e ka emrin mendësia komuniste, për të cilën e.r.-ja ka shkruar me dorën e tij:
“PPSH (ose PSSH, - shën.) nuk mund të ekzistojë më veçse duke kundërshtuar hapur dhe totalisht mendësinë e vet. Por tingëllon paradoksale që Partia e Punës (apo socialiste, s’ka ndonjë ndryshim, - shënim) po u bën thirrje për solidarizim pikërisht këtyre psikologjive të mendësive të vjetra. Paradoksi mund të rrëzohet vetëm po të bjerë poshtë thelbi i mendësisë që sundon kokat e drejtuesve të Partisë së Punës. Krerët e burokracisë shqiptare besojnë mendjelehtësisht se zhdukja e Stalinit nga piedestali në mes të natës (...) është i mjaftueshëm për t’u mbyllur gojën mëkatarëve dhe për të mbledhur rreth vetes besimtarët e përhershëm. Përderisa në Pallatin e madh të kulturës shqiptare nuk do të hiqet parulla e kuqe gjigante që glorifikon Partinë e Punës; përderisa nga majat e maleve do të vazhdojë të na vrojtojë emri Enver, demokracia në Shqipëri do të jetë një utopi, kurse vëllavrasja do të endet pezull mbi kokat tona”. Në këtë gjendje sureale që po na katandisin, na duket sikur Enveri ka nxjerrë kokën, aty ku është ylli i kuq, te përmendorja e Nënës-Shqipëri, në varrezat e dëshmorëve: “Bravo, bijtë e mi, Edi dhe Ardian! Rrumpallë e bëni këtë vend të pabesë, që ma përmbysi statujën, në qendër të Tiranës!”
***
Një gjë është e qartë: Që Shqipërisë po i bëhet një dëm i pallogaritshëm nga personazhe të tillë të politikës shqiptare. Po na ringjallet figura e hajdutit të kuajve, Grigor Rasputinit që, në vitet 1915-1916, mori përfytyrimin e një shenjtori, paçka se e çoi Rusinë perandorake në zgrip të greminës.
Populli ynë e ka rastin, këto dy javë që mbeten, të shkundet e të dallojë mashtrimin nga e vërteta, njeriun serioz nga aventurieri, njeriun që i rri pranë qytetarit, nga kryebashkiaku pro forma, titullarit të cilit i intereson bashkia vetëm për aferat 20 përqindëshe, nga kryebashkiaku i ardhshëm i premtimeve të njëmendësuara. Emblema e “Qytetarit në vend të parë, Tiranës mbi gjithçka” është me bindëse se zhurmimi se “Ç’do të bëjmë”, për të fshehur gjithçka që s’është bërë! “Ç’do të bëjmë” është i huazuar nga një libër i Leninit me titull në edicionin frëngjisht “Che faire” .

[RAPTILOID]

Ktu gabohesh ti plak
Diktatori I fundit komunist eshte Sali Ram Sheqere Berisha

[Zekthi_]

Po lexoja me kenaqsi temen e 4 vjeteve perpar kur Rama ndeshej me Olldashin e nuk u habita te gjeja shume prej mbrojtesve te Olldashit te dikurshem te simaptizojne me te njejtat fjale sot per Bashen...
cfare ka ndryshuar nga atehere? Rama eshte konsumuar, ndersa Basha qe hiqet si administrator i mire harron shkaterrimin qe i beri Zogut te Zi kur ishte minister trasportesh, dhe qe hodhi ne kosh plot 2 milion euro te taksapaguesve te atyre qe neser shpreson ti drejtoje.
Ne nje vend normal, nuk ka kandidat qe te fitoje 4 here, sic nuk mund te ndodhe qe dikush qe ka vrare 4 njerez ne qender te qytetit te kete edhe pretendimin te drejtoje me pas ate qytet, sado te bukur apo fallco mund ta kete buzeqeshjen.

[Ziti]

basha duhet te kapet te projektet e ardheshme
se po u kap tek komunizmi, tek demokracia ,ai nuk mund te fitoje, sepse shumica e shqiptareve nuk jane ne gjendje te kuptojne kush eshte diferenca ndermjet dy sistemeve.

[Lexuesja]

e ke gabim
gazeta shekulli dhe gazeta tema kan hapur sondazhe
dhe te dyja keto sondazhe japin fitoren e rames

te dyja keto gazeta lexohen vetem nga socialistet , dhe te gjithe gazetaret e analistet bashke me Kokedhimimen qe shkruajn ne keto gazeta jane te shitur tek Edvini ...

[Lexuesja]

Po lexoja me kenaqsi temen e 4 vjeteve perpar kur Rama ndeshej me Olldashin e nuk u habita te gjeja shume prej mbrojtesve te Olldashit te dikurshem te simaptizojne me te njejtat fjale sot per Bashen...
cfare ka ndryshuar nga atehere? Rama eshte konsumuar, ndersa Basha qe hiqet si administrator i mire harron shkaterrimin qe i beri Zogut te Zi kur ishte minister trasportesh, dhe qe hodhi ne kosh plot 2 milion euro te taksapaguesve te atyre qe neser shpreson ti drejtoje.
Ne nje vend normal, nuk ka kandidat qe te fitoje 4 here, sic nuk mund te ndodhe qe dikush qe ka vrare 4 njerez ne qender te qytetit te kete edhe pretendimin te drejtoje me pas ate qytet, sado te bukur apo fallco mund ta kete buzeqeshjen.

Me qenese te dy kandidatet per Tiranen qenkan , njeri i konsumuar (Ketu ke te drejte e tjetri "na paska vrare 4 vete" , simbas teje kush mund te ishte kandidat i mundshem nga te dy krahet ???