Përfaqësuesit e veteranëve të UÇK-së vënë në shenjë Halil Matoshin
Prishtinë, 7 janar – Nëse provoni të flisni a të shkruani për bëmat e ndonjë ish-luftëtari të UÇK-së “të veshur” paslufte me pushtet, është dikush që do t’ju etiketojë menjëherë si proserb.
Përfaqësues të veteranëve të UÇK-së javën e shkuar proserb e bënë Albin Kurtin e të enjten edhe Halil Matoshin. Kjo për shkak që lëvizja “Vetëvendosje”, që e drejton Kurti, kishte ngritur dilemën se disa krerë të UÇK-së paslufte janë bërë krerë të krimit, dhe që në një shkrim autorial në “Koha Ditore” Matoshi ka mbrojtur Kurtin në një pjesë të tekstit ku shkruan për atë që e ka quajtur “anarki patriotike”.
Në një reagim të kryesisë së Organizatës së Veteranëve të Luftës të UÇK-së, Matoshi, kolumnist në “Koha Ditore”, është pandehur si “mbeturinë”, e lënë nga okupatori shekullor, si një “matrapaz” dhe si njeri “i përmendur çdoherë në kontekst negativ sa i përket çështjes kombëtare”.
Në reagimin e kësaj organizate theksohet se Matoshi është munduar ta pengojë iniciativën për pajtimin e gjaqeve në vitet ’90-a, dhe se ishte shkarkuar nga pozita e kryetarit të Partisë Parlamentare, pasi kishte deklaruar se çështja e Kosovës mund të rregullohet vetëm përmes Beogradit.
Matoshi, vetë njeri i persekutuar nga regjimi i Beogradit dhe një nga pengjet e luftës, u është kundërpërgjigjur akuzave dhe ka thënë të mos dëshirojë ta shohë këtë reagim si kërcënim që i bëhet debatit shoqëror.
“E shoh më shumë si një mosdije të njerëzve që shkruajnë kumtesa të tilla”, ka thënë Matoshi. “Ky është një reagim, më së buti që do të thosha, i njerëzve me koka të nxehta, të cilët ndihen të cenuar kolektivisht, ndërkaq dihet se faj kolektiv nuk ka”, ka shtuar ai.
Sa i takon tezës për pengimin e pajtimit të gjaqeve, Matoshi ka thënë se kjo demantohet në një libër të Institutit Albanologjik dhe nga dëshmitarë të gjallë, siç mund të demantohet edhe mënyra e prezantimit të dorëheqjes në 1996-n nga pozita e kryetarit të Partisë Parlamentare.
Ndërkaq, tek ka folur për Albin Kurtin, me të cilin shpesh bën polemika, ka thënë të jetë vetë dëshmitar për trimërinë që ai ka treguar.
“Unë jam dëshmitar i gjallë nga kampi i përqendrimit ‘Zabela’ në Pozharevc, ku, sipas rregullit të burgut, të gjithë kanë qenë të detyruar që t’i lidhin duart pas shpinës dhe ta ulin kokën, ndërkaq Albin Kurti dhe Nait Hasani, pa marrë parasysh që njeriu nuk mund të pajtohet me ta gjithherë për çështje ideologjike ose konceptuale, ata kanë qenë ndër shqiptarët pengje që kanë dëshmuar më së shumti guxim dhe trimëri në Pozharevc”, ka thënë Matoshi. “Edhe për këtë ka dëshmi dhe dëshmitarë të gjallë”.
Në reagimin e Organizatës së Veteranëve të Luftës të UÇK-së, shtrohen edhe një varg pyetjesh për Matoshin.
“Çfarë ka qenë roli i tij dhe ku ka shërbyer ai gjatë luftës çlirimtare? Ku është patriotizmi i tij? Ku e merr guximin ai që të sulmojë aq ashpër UÇK-në dhe bartësit e saj, vazhdimisht që pas përfundimit të luftës? Çka e pengojnë shtatoret dhe përmendoret e dëshmorëve të kombit? Me çfarë të drejte është hedhur si mbështetës i idesë së krijimit të kombit kosovar?”, janë pyetjet që ka ngritur në reagim organizata e veteranëve.
Matoshi i është përgjigjur secilës.
Së pari ka treguar sesi ishte gjendur gjatë kohës së luftës. Deri më 24 mars të 1999-s ka thënë se ka punuar si gazetar në “Zëri”, gjë që mund të dokumentohet edhe ajo se çfarë është prezantuar me atë gazetë. Pasi ishte pamundësuar ushtrimi i profesionit të gazetarit në Kosovë, ai ka qëndruar në shtëpi. Ndërkaq, më 21 maj të 1999-s nga forca të shumta policore serbe është marrë peng lufte.
“Më kanë mbajtur po ashtu në ‘Zabela’ të Pozharevcit, në kamp të përqendrimit, sepse ka qenë i organizuar tamam si kamp, deri në maj të vitit 2000 dhe këtë me një akuzë policore – neni 125 terrorizëm, gjë që edhe nuk isha. Për qëndrimin tim në ‘Zabela’ si peng lufte po ashtu është lehtë e dokumentueshme”, ka thënë Matoshi. “Roli im ka qenë sikurse roli i shumicës së shqiptarëve të Kosovës që e kanë mbështetur luftën çlirimtare dhe vazhdoj ta mbështes edhe sot”.
Sa u takon shtatoreve dhe përmendoreve, Matoshi ka thënë të mos jetë marrë vesh nga njerëzit që kanë shkruar reagimin. Ka thënë se kjo është totalisht gënjeshtër, për arsye se ka kritikuar modelin artistik sesi janë bërë. Modelin aktual e ka socrealist dhe vazhdon të mendojë se ato përmendore dhe shtatore do të duhej të ishin shumë më moderne dhe shumë më të bukura.
Ndërkaq, reagimi i Organizatës së Veteranëve të Luftës të UÇK-së ka pasur edhe një kërcënim në fund.
“Shpresojmë të jetë hera e fundit që dikush drejton gishtin nga OVL të UÇK-së”, thuhet në reagim. “Përndryshe do t’i demaskojmë me fakte të gjithë individët dhe grupet që marrin një guxim të tillë”, shtohet në reagim, në të cilin theksohet se kreu i kësaj organizate Muharrem Xhemajli përfaqëson të gjithë veteranët e UÇK-së dhe se deklaratat e tij mbështeten nga të gjithë veteranët.
Kjo është demantuar nga Avdyl Mushkolaj, kryetar i Shoqatës së Veteranëve të Luftës të UÇK-së për rajonin e Dukagjinit. Ai ka thënë se Xhemajli deri tash me asnjë fakt nuk e ka mbrojtur deklaratën e tij, me të cilën e prezanton si prosllav Albin Kurtin, ndërsa për reagimin ndaj Matoshit ka thënë të mos jetë në dijeni.
“Këtu në Kosovë po flitet për secilin, e argumentet kurrkund. Jemi mësuar ta shajmë njëri-tjetrin dhe t’u veshim epitete të ndryshme. S’po mbetet njeri pa u përfolur. Kur të ofrohen argumentet dhe faktet atëherë u besoj. Përderisa janë vetëm fjalë, nuk i besoj deklaratës së asnjërit dhe as zotit Xhemajli”, ka thënë Mushkolaj. “Pak politika po përzihet e edhe ne jemi përzier pak në politikë, kështu që edhe kjo po ndikon në këto reagimet që po i bëjmë”.
Ndërkaq, Halil Matoshi ka shprehur qëndrimin se do të vazhdojë të shkruajë siç ka shkruar deri tash. Ka thënë se kurrë nuk e ka sulmuar UÇK-në.
“Unë nuk e sulmoj ashpër UÇK-në, por nuk mund të lejoj që të identifikohet një individ me një organizatë çlirimtare. Këtë nuk e pranoj dhe unë nuk jam kurrfarë matrapazi, siç thonë këta zotërinjtë e shoqatave të luftës, por jam thjesht gazetar me profesion dhe vazhdoj ta bëj punën time”, ka thënë ai. “Si atëherë, si pas lufte, si edhe sot ngre zërin dhe kritikoj sjelljet jo të dinjitetshme të individëve dhe tendencën për ta monopolizuar dhe uzurpuar historinë më të re të Kosovës”.
Përgjigju Duke Cituar
Postuar më parë nga Drenica 97
Krijoni Kontakt