Për Pushtet E Falin Kosovën

[ARIANI_TB]

Kryetari i Lëvizjes për Bashkim, Avni Klinaku, thotë se partitë politike që e kanë sjellë Kosovën në gjendjen aktuale e kanë “karton të kuq” për koalicion

Jeton Llapashtica

Prishtinë, 21.11.2010. Kryetari i Lëvizjes për Bashkim, Avni Klinaku, në një intervistë për “Zëri” thotë se subjekti politik që ai drejton nuk do të bëjë koalicion me asnjërën nga partitë e mëdha në vend. Klinaku, lëvizja e të cilit në zgjedhjet parlamentare do të garojë në koalicion me Lëvizjen Vetëvendosje, thotë se agjendën e bisedimeve me Serbinë, pala kosovare duhet ta hartojë vetë dhe se në të duhet të futet edhe Kosova Lindore dhe jo vetëm veriu i vendit.

Zëri: Në zgjedhjet e dhjetorit Lëvizja për Bashkim do të garojë në koalicion me Lëvizjen Vetëvendosje. Pse e keni marrë këtë vendim?

Klinaku: Zgjedhjet në Kosovë edhe vetë KQZ-në e ka zënë bukur të papërgatitur për shkak të mbajtjes së jashtëzakonshme të tyre. Edhe Lëvizjes për Bashkim këto zgjedhje i kanë ardhur në një moment tepër kritik, kur ne po e bënim tejkalimin nga veprimtaria teorike, pra nga hartimi i programeve, platformave, vijës politike në pjesën e punës praktike që është shtrirja e organizatës nëpër komuna tjera. Ky moment kritik ka ndikuar që ne të provojmë t’i grumbullojmë forcat me të cilat përafërsisht përputhemi në pikëpamje, në mënyrë që të formojmë një bllok të së mirës në Kosovë, një bllok kundër bllokut të së keqes e që faktikisht është i përbërë nga pesë partitë kryesore, të cilat e kanë sjellë Kosovën në këtë gjendje.

Zëri: Çka synoni të arrini në koalicion me Lëvizjen Vetëvendosje?

Klinaku: Koalicioni është vetëm zgjedhor dhe në radhë të parë është çështja e votës. Jemi të interesuar që ta maksimalizojmë votën për bllokun e mirë, apo bllokun i cili përpiqet për bashkim kombëtar dhe nëse dëshirojmë ta përmbledhim këtë me dy fjalë, për bashkim kombëtar dhe luftë anti-korrupsion. Dëshirojmë që me këtë votë zëri i këtij blloku të dëgjohet në Parlamentin e Kosovës. Ky është synimi kryesor.

“Karton të kuq” për partitë e mëdha

Zëri: Nëse hyni në Kuvendin e Kosovës, me cilën parti pretendoni të bëni koalicion qeverisës?

Klinaku: Tani parapëlqimi ynë është realizuar në terren dhe duket qartë. Në koalicion me tjerët në një farë forme ne e kemi, jo në prag të zgjedhjeve, por qysh më herët kemi bërë, i kemi vendosur ato që tani po quhen vija të kuqe, do të thotë, me pesë partitë politike që janë fajtorët kryesorë për gjendjen aktuale dhe të cilat asnjë shenjë përmirësimi nuk kanë në këtë drejtim, ne nuk bëjmë koalicion. Ato janë Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës, Aleanca Kosova e Re dhe Lidhja Demokratike e Dardanisë.

Zëri: A do të pranoni të hyni në koalicion me një parti, e cila në bisedimet direkte me Serbinë do të mund ta trajtonte edhe zgjidhjen e çështjes së veriut të vendit?

Klinaku: Tani nëse ne flasim vetëm për veriun, për mendimin tonë bëhet gabimi i parë dhe edhe zgjidhja predikohet. Nëse flasim vetëm për veriun, zgjidhje do t’i jepet vetëm veriut. Ne mendojmë se në raportet shqiptaro-serbe nuk ekziston vetëm një çështje dhe ajo e veriut, por ekziston edhe çështja e Kosovës Lindore. Nëse ne lejojmë që të na imponohet agjenda e bisedimeve, e vërtet është se do të jetë vetëm veriu në agjendë, por ne duhet të insistojmë që të mos jetë kështu. Agjendën në një farë forme ta imponojmë edhe ne dhe nëse lejojmë që të bisedohet vetëm për veriun zgjidhje do të gjendet vetëm për veriun dhe aty ne jemi menjëherë në disavantazh.

Thaçi shkatërroi identitetin e shqiptarëve

Zëri: Kryeministri Hashim Thaçi po pretendon se në partinë e tij i ka të gjitha grupet e shoqërisë, të cilët kanë kontribuar më së shumti për lirinë dhe pavarësinë e vendit. Cili është vlerësimi i juaj për këto pretendime të “uzurpimit” të meritave?

Klinaku: Nëse i shohim vetëm nga deklarimet nuk ka parti politike që nuk deklaron se i ka në gjirin e vet të gjitha sferat e shoqërisë, që nga ato të luftës e deri te këto të ndërtimit të shtetit. Këto janë vetëm deklarata, por duhet të bazohemi në veprime konkret të tyre. Po pajtohem me juve, kur thoni se vetë PDK-ja, normalisht duke qenë udhëheqëse në institucione krejt këto veprime i ka kryer në kundërshtim me deklaratat e veta politike. Duke filluar nga imponimi i flamurit, që është aktualisht shtetëror i Kosovës, festa e 28 Nëntorit, të cilën e ka shndërruar në një festë të shqiptarëve, pra një ditë në 365 ditë për 95 për qind të popullsisë, Kushtetuta, e cila Kosovën e desovranizon, pra shqiptarët i margjinalizon dhe Pakoja e Ahtisarit e shumë çështje të tjera, të cilat në veprim kanë ndryshuar plotësisht në deklarata publike.

Zëri: Vazhdimisht po thoni se me pesë partitë më të mëdha nuk do të bëni koalicion. Nuk do të bëni koalicion vetëm për shkak të keqqeverisjes. Apo për shkak të pushtetit ato mund të bënin edhe kompromise në dëm të vendit?

Klinaku: Tani nëse i shohim veprimet e qeverive të deritashme dhe nëse guxojmë të predikojmë se në qeverinë e ardhshme paska me qenë PDK-ja, LDK-ja apo AAK-ja, ose një koalicion i mundshëm i tyre, ky është vetëm një predikim dhe nuk mendojë se do të duhej të ndodhte kështu, dhe pyetja juaj të shtrohet a do të jenë të gatshme që për shkak të pushtetit ta japin një pjesë të Kosovës, apo të bëjnë koncesione siç kanë bërë në të kaluarën, unë mendoj se ai rrezik është permanent për shkak se na tregon historiku i tyre i mëhershëm.

Zëri: Edhe nëse qeverinë e drejton Hashim Thaçi?
Klinaku: Këto janë bërë gjithmonë, madje sidomos duke i drejtuar Hashim Thaçi. Nën qeverinë e Hashim Thaçit janë bërë të gjitha këto ndryshime që i thash pak më parë që kanë qenë tërësisht antikombëtare, që kanë qenë në kundërshtim me intereson qytetarëve të Kosovës dhe qytetarëve shqiptarë në përgjithësi. Ato derisa kanë ndodhur në të kaluarën, nuk kemi asnjë arsye të mendojmë se do të ndryshojnë tash.

[ARIANI_TB]

http://levizjaperbashkim.com/new/informacion.php?id=189

[PLAKU]

http://levizjaperbashkim.com/new/informacion.php?id=189

Fadil Lushi: Linkolni, Hasan Prishtina dhe Albin Kurti
E Hene, 22-11-2010, 09:58pm (GMT)


LINKOLNI, HASAN PRISHTINA DHE ALBIN KURTI


Nga Fadil LUSHI


Këtë shkrim të radhës po e filloj me disa paragrafë nga retrospektiva e Abraham Linkolnit (1809-1865), presidentit të 16-të të Shteteve të Bashkuara të Amerikës dhe nga ajo e Hasan Prishtinës (1873-1933). Që mos të keqkuptohem nga lexuesit e mi të nderuar dhe të paanshëm, do të bëj përpjekje që në këtë opinion timin gazetar të mos marr taraf (anë). Nuk do të lë hapësirë për paralelizma ose edhe krahasime politike dhe historike mes dy personaliteteve të sipërpërmendura me lidershipin e Vetëvendosjes, Albin Kurtin, ndonëse prej jush mund të hetohet ndonjë analogji e pjesshme.
Njohësit e mirë të historisë së Abraham Linkolnit thonë se ai kishte një qëndrim e një pikëpamje krejtësisht tjetërfare ndaj historisë së popullit e atdheut si dhe ndaj skllavërisë, lirisë dhe demokracisë. Dhe jo rastësisht ky burrështetas amerikan në një rast do të thotë: “AQ SA NUK DUA TË JEM SKLLAV, PO AQ NUK DUA TË JEM ZOTËRI. GJITHÇKA QË NUK PËRPUTHET ME KËTË KONCEPT, BIE NË KUNDËRSHTIM ME DEMOKRACINË”! Atentatin e tij e kishte përshkruar denjësisht një historian amerikan me fjalët: “Kur Abraham Linkolnin e kishin qëlluar për vdekje, në xhepat e tij kishin gjetur një palë syze të gërvishtura, një brisk xhepi, një copë letër të prerë nga një gazetë e zhubrosur, por të palosur me kujdes, gazeta ishte e vitit të fundit të luftës civile, dhe kurrgjë tjetër”!
Thonë se Abraham Linkolni vepronte për të gjetur rrugët si t’u shpëtonte jetën njerëzve në të dy anët e luftës. Qëllimi i tij ishte që vendi të shpëtonte dhe t’i jepej fund luftës. Për të gjitha që bëri për vatanin Linkolni, amerikanët, pavarësisht se a ishin të bardhë a të zinj, i ngritën përmendore për çështje kombëtare, një përmendore për një figurë më shumë se historike. Dhe Abraham Linkolni derisa ushtroi detyrën e presidentit te Shteteve të Bashkuara të Amerikës, lëre që nuk keqpërdoroi fondet e atdheut, por nuk shpenzoi kot as një të vetmin cent a dollar, as edhe një pëllëmbë tokë të shtetit të tij! Shi për këtë shkak, nënshtetasit amerikanë, qofshin me ngjyrë të bardhë a të zezë, pos fjalëve të mira, nuk thanë asnjë llaf të keq për Abraham Linkolnin, gjegjësisht për presidentin e tyre të sajdisur.
Edhe Hasan Bej Prishtina, si një figurë historike shqiptare, do të shkrijë të gjithë pasurinë e tij për çështjen kombëtare, respektivisht për Shqipërinë natyrale apo për mirëqenien e vatanit të tij, të cilin vatan, lordët pederast të Konferencës së Londrës, ia bënë pikë e pesë. Hasan Bej Prishtina do ta shkrijë të tërë pasurinë e tij për çlirimin e Kosovës nga zgjedha serbomadhe dhe bashkimin e saj me shtetin shqiptar. Dikur Hasan Bej Prishtina pat thënë: “Në vend të një kolltuku me turp në Stamboll, preferova kryengritjen me nder në malet e Kosovës”!
Ky veprim patriotik i Hasan Bej Prishtinës ndoshta është një shembull i paparë për politikanët e sotëm shqiptarë krejtësisht të moderuar. Kjo përçapje e tij, sa fisnike po aq edhe patriotike, për politikanët e korruptuar është thjesht qesharake. Ku ta dijë njeriu. Unë duke e lexuar biografinë e tij sa nacionaliste po aq edhe largpamëse, vura re edhe një të vërtetë tjetër. Ai u arsimua në orient gjegjësisht në institucionet e Perandorisë osmane, atje ku dikur fare pak përfillej fjala shqipe dhe ideja për një shtet shqiptar këtej Gadishullit Ilirik.
Mendimtari i vjetër grek Herodoti në veprën e tij të njohur “Historia” rrëfen se dikur persianët çdo çështje të rëndësishme e diskutonin dy herë: “në gjendje esëll dhe në gjendje të dehur”! Ata që mendojnë esëll, do ta përcjellin me (pa) dyshim lajmin se “Lideri i Lëvizjes Vetëvendosja, Albin Kurti, kohë më parë e kishte shitur shtëpinë e tij për të financuar subjektin e tij politik në zgjedhjet e ardhshme në Kosovë, që pritet të mbahen më 12 dhjetor. Një anëtar i Vetëvendosjes në një komunikim për mediet në Kosovë tha se Albin Kurti ka shitur shtëpinë e tij në lagjen Dardania në Prishtinë, në një vlerë prej 70 mijë eurosh, të cilat do të shkojnë të gjitha në buxhetin e Vetëvendosjes. Sipas Vetëvendosjes Albin Kurti pasi ka shitur shtëpinë e tij është kthyer për të jetuar me prindërit”! Në këtë rast do të ishte jokorrekte ta lëmë mënjanë një pjesë të deklaratës së Albinit, ku ai me ngulm preferon që të mos trumbetohet veprimi i tij që ka të bëjë me shpronësimin e shtëpisë. Me siguri se këtë Albin Kurti e bën nga modestia e tij paksa e tepruar për rrethanat e sotme. Kjo “kërkesë” e tij është e ligjshme, sepse ai këtë e bën si njeri, si filozof ose edhe si politikan.
Lajmin e shitjes së shtëpisë (dhashtë Zoti që pronar i shtëpisë së Albin Kurtit të mos jetë ndonjë politikan i pasur dhe i korruptuar) gojëkëqijtë e dehur, madje edhe ata që janë bërë tapë, do ta komentojnë si një muhabet i kot dhe i vjetër, si një veprim i tij qesharak, adoleshent, pseudopatriotik, folk-patriotik, romantik, idilik, utopik, blof politik dhe në instancë të fundit si një veprim me prova të rreme. Disa do të thonë se Albin Kurti shiti shtëpinë për arsye se vuan nga një provincializëm politik tejet thellë, disa do të thonë se Albini e bëri këtë shitje për hir të një përfitimi material që do të bëhet në “KAZINONË E ZGJEDHJEVE PARLAMENTARE QË DUHET TË ORGANIZOHEN ME 12 DHJETOR TË VITIT 2010 ???” Disa të tjerë këtë veprim të Albin Kurtit, gjegjësisht kampionit të opozitës politike shqiptare, do ta nëpërkëmbin deri në atë shkallë sa që do thonë se ai këtë e bëri për ngritjen e dinjitetit politik dhe kombëtar të tij, e jo të VETËVENDOSJES?
Dashamirësit politikë që frymojnë gjithandej në Kosovë po edhe përtej saj, thonë se Albini me veprimet e tij të deritanishme politike ka sensibilizuar ndërtimin e një filozofie krejt tjetër këtu në hapësirat e Shqipërisë Londineze, dhe njëkohësisht do të bëjë përpjekje ta rrënojë kështjellën ku sundon ajo monotonia e të bërit politikë recidiviste, klandestine, të bezdisshme dhe provinciale. Kështu siç perceptohet albinizmi, të lë përshtypjen se në hapësirën kosovare sot e gjithë ditën e Perëndisë, hetojmë dy koncepte diametralisht të kundërta: konceptin e korrupsionit deri në fyt (kriminalitet të organizuar) dhe konceptin filozofik, gjegjësisht politikëbërjen racionale të tij. Ndoshta Albin Kurti nuk mund të jetë i barabartë me historinë e Abrahamit e as me atë të Hasan Prishtinës, por ama historia e deritashme e tij mund të jetë një guralec në murin e historisë së patriotizmit, si dhe një depërtim a paraqitje dinjitoze e tij në arenën politike kosovare dhe pse jo edhe gjithëkombëtare, një depërtim që përfundimisht edhe do t’i sfidonte seriozisht disa parti politike shqiptare që karakterizohen (disa) me oligarki unike e disa të tjerë me oligarki të çorientuar dhe të fraksionuar, parti politike tok me politikanë, tani veç të korruptuar dhe botërisht të komprometuar! Ai do t’i sfidojë edhe diplomatët ndërkombëtarë që “veprojnë e frymojnë” në Kosovë, diplomatë të cilët jo rastësisht nuk do t’i vizitojnë hapësirat e Vetëvendosjes, edhe pos faktit se kjo Vetëvendosje do të shndërrohet në subjekt politik (kohë më parë e regjistruar në Gjykatën e Prishtinës).
Të nderuar lexues, a e dini pse ky subjekt politik tok me lidershipin e tij anashkalohet nga diplomatët ndërkombëtarë të sistemuar në Prishtinë? Ja, po jua them unë: sepse aty (te Vetëvendosja) nuk ka asnjë të vetmin cep ku ndërkombëtarët e Martti Ahtisarit, së paku për një kohë të caktuar, do të mund t’i “lanin, shpërlanin dhe t’i tundnin paratë e tyre të pista!!?? Me gjithë vëmendjen e duhur që në këtë shkrim të mos krijoj analogji ndërmjet dy figurave, njëra amerikane e tjetra shqiptare, me figurën e Albin Kurtit, prapëseprapë nuk mund të anashkalohet një e tillë, pavarësisht se ajo analogji ose ajo provë është e pjesshme. Albin Kurti përfundimisht është një personalitet me koeficient kundërshtie dhe kokëfortësie politike goxha të lartë. Për këtë dhe arsye të tjera, vokacioni i Albin Kurtit nuk mund të perceptohet si vokacion folk-patriotik e as nihilist, përkundrazi duhet të pasqyrohet si një kundërshtim përballë njerëzve që bëjnë politikë të mbrapshtë, joparimore, cinike, djallëzore, trillane, politikë antikombëtare, grabitqare, politikë të kulaçit dhe të kërbaçit! Tekefundit, Albin Kurti, tok me partinë e tij politike nuk e ka për “kulturë” grabitjen e pasurisë së Kosovës. Provat e deritanishme janë bindëse dhe si të tilla shkojnë në favor të tij. Një gjë është e vërtetë: Hasan Bej Prishtina nuk e shiti pasurinë e tij për t’u ulur në një kolltuk të Perandorisë otomane. Edhe Albini nuk e bëri këtë për t’u ulur në kolltukun e Vetëvendosjes, ndonëse gojëkëqijtë do të thonë se ai këtë e bën po për këtë qëllim?
Të nderuar lexues, nëse s’është kështu dhe nëse nuk u besoni këtyre provave që janë në favor të (jo të këtij shkrimi-qoftë këmbë e krye i gabuar) Abraham Linkolnit, Hasan Bej Prishtinës dhe Albin Kurtit, atëherë jepni një të vetmin shembull dhe thoni se cili politikan i vaktit të tranzicionit të stërzgjatur shqiptar i “shiti opingat e vjetërsuara të babagjyshit” për të shlyer së paku një borxh të vockël, të partisë së tij politike, të asaj partie që e kostumoi politikanin, atë politikan që edhe ia ktheu prapanicën “partisë së tij të dashur”!??

[fadil lushi]

pershendetje Arian, te faleminderohem qe shkrimin ma kishe percjell ne faqen e Forumit..,
me respekt Fadili

[skampin]

Albin Kurti per mua eshte hero i gjalle per Kosoven dhe kete e kam then shume kohe me pare.
me atdhedashurine dhe pastertine morale qe ka Albini eshte mekat qe nuk eshte kryeminister i Kosoves.
Fadil urime per shkrimin.