Shqetësimi i Tiranës dhe Prishtinës për dosjet
Për lustrimin problematik brengosje kanë shprehur edhe analistë nga Shqipëria e Kosova të cilët thanë se ky acarim i fjalorit, “po dëmton pozitën shqiptare në Maqedoni”. Analisti nga Shqipëria Nebil Cika, thotë se procesi i pastrimit është i domosdoshëm për Maqedoninë, por nëse ai arrin të manipulohet, sipas tij, “më mirë të mos të niste”, shkruan sot Koha e re.
Procesi i lustrimit në Maqedoni ka humbur qëllimin primar të zbulimit të kodoshëve dhe sikur po kthehet në një luftë urrejtjeje dhe “vëllavrasëse” mes shqiptarëve të Maqedonisë. Kohëve të fundit dy partitë më të mëdha shqiptare BDI dhe PDSH nuk ndalojnë së akuzuari njëra-tjetrën për ekzistimin e “spiunëve”, gjë që tensionon situatën dhe shqetëson popullatën shqiptare për rikthimin eventual të konfliktit ndërshqiptar. Për lustrimin problematik brengosje kanë shprehur edhe analistë nga Shqipëria e Kosova të cilët thanë se ky acarim i fjalorit po dëmton pozitën shqiptare në Maqedoni. Analisti nga Shqipëria Nebil Cika, thotë se procesi i pastrimit është i domosdoshëm për Maqedoninë, por nëse ai arrin të manipulohet, sipas tij, “më mirë të mos të niste”.
”Procesi i pastrimit është një domosdoshmëri sidomos për politikën dhe elitën shqiptare në Maqedoni. Lustracioni në konceptin tim është i domosdoshëm, madje i vonuar si për Shqipërinë ashtu edhe për Maqedoninë. Mendoj se për shkaqe specifike lustracioni në hapësirat shqiptare jashtë shteti amë si në Maqedoni merr një rëndësi të veçantë me ndikim në zhvillimet aktuale dhe ato të pritshme politike shoqërore e ekonomike. Klasa politike shqiptare ne Maqedoni por edhe elitat në fushat e tjera duhet ta shfrytëzojnë ligjin e lustracionit në favor të tyre dhe momenti aktual për katarsis është me i përshtatshmi. Personalisht kam qenë mbështetës i fortë i procesit të lustracionit ende të pa realizuar në Shqipëri pasi e kam parë ketë proces si një çlirim të një pjese të mirë të shoqërisë sidomos të politikës që vazhdon të mbahet nën presion e kontroll të ish- strukturave të policisë sekrete të diktaturës ‘sigurimit të shtetit”, gjë që reflektohet dukshëm në vendimmarrjen politike këtu”, ka thënë Cika.
“Mendoj se situata në Maqedoni është më e agravuar për shkak se shqiptarët atje kanë kanë përjetuar gjatë diktaturës komuniste dy lloj shtypje, atë politike dhe etnike. Duke qenë se shërbimet sekrete vareshin e kontrolloheshin kryesisht nga Beogradi, besoj se shumica e dosjeve të të rekrutuarve nga radhët e shqiptarëve, ndodhen ende atje. Kjo bën që informacioni i mbledhur ndryshe (materiali shtrëngues) të përdoret të paktën nga dy shërbime sekrete që besohet se i kane ende këto dosje, ai maqedon dhe ai serb. Në këto kushte kuptohet fare mirë rreziku i përdorimit nga shërbimet aktuale sekrete te vendeve ne fajlë i spiuneve apo informatorëve në radhët e shqiptarëve ne Maqedoni në veçanti të atyre që merren me politikë apo janë pjese e administratës shtetërore qendrore e lokale”, ka thënë me tej Cika.
Ndërkohë, analisti kosovar Mentor Tahiri thotë se është evidente që subjektet politike të cilat përfaqësojnë shqiptarët e Maqedonisë, kanë dështuar në përpjekjet për të dokumentuar dhe për të nxjerrë nga pluhuri i historisë, një të kaluar të tërë e cila jo rrallë herë po duket që ka lënë pasoja edhe në qasjen e sotme të Shkupit zyrtar karshi shqiptarëve. “Fatkeqësisht rivaliteti ndërshqiptar në Maqedoni, i cili që moti ka kaluar kufijtë e respektit dhe qasjes parimore, e sidomos raporti mes BDI-së dhe PDSH-së, sot rrezikon të etiketojë edhe personalitete për të cilët faktet edhe mund të mos jenë kredibile apo edhe krejtësisht të dyshimta. Përveç shkaktimin e pakënaqësive brenda shqiptarëve, propaganda që mund të krijohet në shërbim të procesit të lustrimit, mund të dobësojë edhe pozitën e shqiptarëve në përgjithësi, ngase rrezikohet që disa nga emrat e përmendur, të eliminohen politikisht, si rrjedhojë e kësaj vjen edhe deri te diskreditimi i subjektit politik të cilit aktualisht i takojnë. Gjithsesi këtu nuk duhet përjashtuar edhe faktin, që ata të cilët mund të lancojnë diçka kundër ndonjë individi, llogarisin në fuqinë e shtypit, e në këto raste më pas është shpeshherë e kotë të merresh me demante, si thotë populli “mjafton të bëhesh temë e çarshisë”. Në rastin që faktet vërtetë arrijnë të dokumentohen, sërish opinioni shqiptar do të ndodhet para një sfide, e kjo është trajtimi i barabartë i të gjithë ish bashkëpunëtorëve të shërbimeve sekrete, dhe jo vetëm sakrifikimi i ‘peshqve të vegjël’”, ka thënë Tahiri.
”Ajo ku të gjithë duhet përqendruar sot, si BDI, PDSH, DR, PPD dhe forca të tjera politike, është shpërfaqja e një të kaluare të egër, viktimë më e madhe e së cilës ishin shqiptarët si komb. Komunizmi në përgjithësi, kudo në Evropën Lindore ka shkelur të drejtat njerëzore, por në rastin e shqiptarëve, ai i ka luftuar ata si kolektivitet”, ka thënë analisti kosovar Tahiri. Ndryshe, analisti politik Albert Musliu thotë se politika nuk mund të anashkalohet në procesin e lustrimit në vend por partitë politike janë ata të cilat duhet të mbajnë përgjegjësi për atë se çfarë thonë.
”Partitë politike shqiptare duhet të mbajnë përgjegjësi për çdo veprim dhe acarim të fjalorit që bëjnë apo përdorin nëse ndodh tensionim i situatës ata duhet të jenë përgjegjëse për këtë. Lustrimi në Maqedoni është më se i nevojshëm, sepse duhet të dalin në pah të gjithë personat që kanë bërë dëm, për më tepër edhe për të parandaluar persona të tjerë që mendojnë të bëjnë dëm nëse shohin se për to nuk përgjigjen”, ka thënë Musliu.
Shqipmedia
Përgjigju Duke Cituar
Postuar më parë nga RaPSouL
Krijoni Kontakt