Postuar më parë nga
keshtjella100
Krasniqi: 21 qershori duhet të jetë dita e çlirimit
Nga Express më 20.06.2010 në ora 14:16
Edhe pse kanë kaluar 11 vjet që prej përfundimit të luftës, Kosova vazhdon të mos ketë një datë të caktuar për ditën e çlirimit. Zyrtarë të lartë institucional vlerësojnë se kjo ditë do të duhej të ishte 21 qershori, pasi që kjo ka qenë data kur edhe është larguar ushtari i fundit serb nga Kosova. Por ish-anëtarë të Shtabit të Përgjithshëm të UÇK-së dhe drejtues të shoqatave të dala nga lufta e UÇK-së theksojnë se Kosova nuk ka datë të çlirimit, pasi ende nuk është e gjitha e lirë.
Aktualisht në Kosovë, si datë zyrtare për çlirimin e vendit shënohet 12 qershori, festë kjo të cilën Kuvendi e ka futur në festat memoriale, ku bën pjesë edhe festa e 28 nëntorit, Dita e Flamurit.
Ish-anëtarë të Shtabit të Përgjithshëm të UÇK-së dhe drejtues të shoqatave të dala nga lufta e UÇK-së theksojnë se Kosova nuk ka datë të çlirimit, pasi sipas tyre nuk mund të thuhet ende që Kosova është e gjitha e lirë, duke rikujtuar edhe komunën e Mitrovicës, e cila nuk ka ditë të çlirimit.
Rexhep Selimi, ish-anëtar i SHP të UÇK-së, ka thënë për Kosovapress, se nuk ka një ditë të caktuar të çlirimit, pasi sipas tij, Kosova nuk është ende e tëra e lirë. Për më tepër, ai thekson se Kosova është çliruar nga ish-regjimi serb, por autoritetet e vendit nuk kanë shtrirje në gjithë territorin e shtetit të Kosovës.
“Para se të ketë një ditë formale të çlirimit mendoj se e gjithë Kosova duhet të jetë e lirë. Ky moment do ta përcaktojë edhe ditën përfundimtare të çlirimit. Është 12 qershori, dita e futjes së forcave të NATO-s në Kosovë, dita e çlirimit të Kosovës. Është një ditë, të cilës mund t’i referohemi edhe në të ardhmen, sepse kjo më tepër është formalitet dhe qytetarëve të Kosovës më tepër u intereson konkretja se sa formalja. Në këtë rast dhe ajo për çka shtetasit e Kosovës duhet të bëjnë më shumë dhe për të cilën jemi të shqetësuar është fakti se sa jemi të lirë dhe jo se cila ditë është dita e çlirimit”, ka thënë Selimi.
Ai vlerëson se, duke qenë në përputhje me zhvillimet jo gjithmonë të qarta rreth të tashmes dhe të ardhmes, nënkuptohet edhe paqartësia për ditën definitive të çlirimit të Kosovës.
Muharrem Xhemajli, kryetar i Organizatës së Veteranëve të Luftës së UÇK-së, ka thënë për Kosovapress se si data më e mirë që mund të merret si ditë çlirimi do të ishte data kur ushtria dhe policia serbe janë larguar prej qytetit të fundit të Kosovës, ndërkaq sipas tij pa caktimin e kësaj date nuk mund të thuhet që Kosova është e çliruar.
“E mira e të gjitha të mirave do të ishte që Kosova të ketë një ditë të vetme, e cila do të shënohej si dita e çlirimit, dhe ajo ditë të jetë festë zyrtare për të gjithë qytetarët e Republikës së Kosovës. Nga kjo del edhe një fakt që ndoshta shumë pak deri më tani është diskutuar edhe nëpër opinione dhe media, që faktikisht komuna e Mitrovicës ende nuk ka ditë të çlirimit, dhe Kosova nuk ka ditë të çlirimit ende. Nuk e di si mund të themi që Kosova është e çliruar kur nuk kemi një festë zyrtare, një ditë zyrtare të ditës së çlirimit”, ka thënë ai.
Jakup Krasniqi, kryetar i Kuvendit të Kosovës, ka thënë përmes telefonit për Kosovapress, se kjo çështje do të duhej të vendosej mbi bazën e një vendimi të Qeverisë, ose me Ligjin mbi festat zyrtare të Kosovës. Sipas tij dita më e përshtatshme ashtu siç është e vendosur edhe në shumicën e vendeve do duhej të ishte dita kur edhe është larguar ushtari i fundit, dhe për Kosovën kjo datë është 21 qershori.
“Zakonisht vendet që kanë pasur një ditë të çlirimit, si datë të saj kanë pasur ditën kur ushtari i fundit i armikut ka dalë nga vendi. Edhe kryeqytetet mund të kenë një datë të veçantë siç e ka pasur Tirana 17 nëntorin, kurse në Kosovë dita e çlirimit duhet të merrej dita e 20 apo 21 qershorit, pasi që në mbrëmjen e 21 qershorit 1999 është larguar edhe ushtari i fundit serb nga Kosova, kështu që kjo datë e ka gjetur Kosovën të çliruar, dhe po në këtë datë është nënshkruar edhe marrëveshja për transformimin e UÇK-së, ndërmjet kryeministrit Thaçi dhe gjeneralit Xhekson”, ka thënë Krasniqi.
Pavarësisht përpjekjeve për të kontaktuar në lidhje me këtë çështje zyrtarët e Qeverisë së Kosovës një gjë e tillë ka qenë e pamundur. /kosovapress/
Përgjigju Duke Cituar
Krijoni Kontakt