Biznesi: Të krijohet sa më parë tregu ekonomik i përbashkët 7-milionësh
TEUTA SHAMKU
Kërkohet angazhimi i politikës shqiptare dhe asaj kosovare
Duhet të nisë hartimi i politikave zhvilluese në të dy vendet
* * * *
Herët është hedhur ideja si nga politika shqiptare ashtu dhe ajo kosovare për krijimin e një tregu të përbashkët mes dy vendeve tona. Por deri më tash ideja ka mbetur vetëm e tillë, ende asgjë nuk është bërë për konkretizimin e politikave konkrete për zhvillimin e këtij tregu. Tashmë rruga “u kry” e krijimi tregut ekonomik të përbashkët është më i mundur. Biznesi shqiptar ka kërkuar angazhimin e politikës shqiptare dhe asaj kosovare për krijimin e këtij tregu. Konfindustria ka shprehur shqetësimin e saj se vonesat në ndërtimin e politikave të përbashkëta ndërmjet Shqipërisë dhe Kosovës për krijimin e Tregut Mbarëkombëtar Shqiptar 7-milionësh do të ulin ndjeshëm në terma efektivitetin ekonomik të investimeve strategjike me vlerë të lartë, sikurse është rruga Durrës-Kukës dhe investimet në rrjetet energjitike të të dy vendeve. Në këtë kuptim Konfindustria i kërkon vendimmarrjes politike në Shqipëri dhe Kosovë, që sa më shpejt të merret nisma për krijimin e një Këshilli të Përbashkët të Nivelit të Lartë, për të bërë të mundur hartimin e politikave të nevojshme për ndërtimin e Tregut Ekonomik Shqiptar të hapur edhe për vendet e tjera të rajonit, sipas përvojës së BE-së. Konfindustria i quan kohë të humbur me pasoja të rënda për zhvillimin ekonomik të qëndrueshëm të Shqipërisë dhe Kosovës dhe mirëqenies së shqiptarëve, vonesat e krijimit të legjislacionit të nevojshëm për ndërtimin e Tregut Ekonomik të Hapur Mbarëshqiptar, si mundësia më e madhe për të bërë të mundur tërheqjen e investimeve të mëdha strategjike të huaja, fuqizimin ekonomik/industrial të domosdoshëm dhe rritjen e mirëqenies së shqiptarëve. Konfindustria, duke përfituar edhe nga afrimi i zgjedhjeve të përgjithshme të qershorit në Shqipëri, kërkon nga vendimmarrja politike e të gjitha ngjyrave të kenë si qëllim parësor në programet e tyre zgjedhore dhe më pas në zbatim, pikërisht përgatitjen e politikave të përbashkëta financiare, fiskale, ekonomike, të tregut të punës etj. ndërmjet Shqipërisë dhe Kosovës, me qëllim që të ndërtohet dhe të funksionojë në një kohë sa më të shpejtë tregu i hapur ekonomik mbarëshqiptar. Me keqardhje vihet re se ndërkohë që investimet në infrastrukturë rrugore, portuale dhe energjitike po ecin me hapa të shpejtë, ndërtimi i politikave për krijimin e legjislacionit të duhur për krijimin e tregut të përbashkët shqiptar është mjaft i ngadaltë. Përjashtim bën sektori i energjitikës, në të cilin është përparuar në mënyrë të kënaqshme në harmonizimin e sistemit energjitik të Kosovës dhe Shqipërisë me përfitim të ndjeshëm të dyanshëm.
07/06/2009
standard
Përgjigju Duke Cituar
Postuar më parë nga Homza
Krijoni Kontakt