Shpirt Shqiptari

Nuk qëllon shpesh në forumin shqiptar, që një temë e sapohapur të vizitohet 10,000 herë në vetëm pak ditë. Kjo ndodhi vetëm me temën: "Të mësojmë t'i psalim Zotit"



Theodhor Peci, drejtuesi i korrit kishtar bizantin pranë Kishës Orthodhokse në Tiranë, ka bërë një punë të madhe dhe me shumë vlera. Një dhuratë e çmuar për brezat e sotëm e brezat që do të vinë pas nesh. Ai jo vetëm që ka përkthyer në shqip të gjitha himnet kishtare të vitit, por në rregjistrime të shkurtra 20 minutashe, na mëson të gjithëve si ti psalim ato në shqip, sipas traditës së lashtë bizantine të himnologjisë.

Kur e hasa në YouTube në faqen e Radio Ngjallja, që është radioja e Kishës Orthodhokse në Shqipëri, u mahnita nga thesari që gjeta. Shpesh si besimtar orthodhoks, dhe si emigrant në Amerikë, unë i dëgjoj himnet e Kishës në gjuhën anglishte. U mbrekullova kur i gjeta edhe në shqip. Nëse nuk keni dëgjuar ndonjëherë himnet bizantine, ato konsiderohen mbase forma më e lartë e adhurimit të Zotit në Kishë. Këndohen në korr me zë burrash, pa instrumenta, vetëm me zërin e shpirtit të njeriut. Në të njëjtën kohë edhe u dëshpërova. Shumë pak njerëz i kishin dëgjuar këto himne në YouTube, edhe pse Theodhori kish bërë një punë të përkushtuar që mund të ketë zgjatur me vite të tëra.

I solla të gjitha videot e serisë së mësimeve se si t'i psaltim Zotit edhe tek forumi orthodhoks në forumin shqiptar. Kur gjen një thesar të tillë shpirtëror, nuk mund ta mbash dot vetëm për vete. Duhet ta ndash edhe me të tjerët. Dhe Zoti duke parë dëshpërimin tim nga që shumë pak veta i kishin dëgjuar këto mësime vitin e fundit, bëri diçka që unë nuk e prisja. Ajo temë brenda 3 ditësh pas hapjes në forum pati plot 10,000 shikime. Ishte tema më e vizituar në forum. Njerëzit sot nuk janë të dhënë pas thesareve shpirtërore, janë të dhënë pas të mirave materiale. Nuk e harxhojnë kohën e tyre duke mësuar diçka të re, por e harxhojnë kot duke parë Big Brother në televizor, ose duke u marrë me rrjetet sociale. Zoti më dha një mësim të mirë: mos u dëshpëro, pasi ti nuk shikon atë që Unë shikoj! Ti shikon shthurrje e një antipati ndaj të mirës e të bukurës, kurse Unë shikoj një uri të jashtëzakonshme shpirtërore tek njerëzia e mbarë botës që Kisha Ime nuk po e shuan dot!

Populli ynë shqiptar ka qenë një nga shtyllat kryesore të Perandorisë Romake Bizantine, qytetërimit më jetëgjatë në historinë e njerëzimit, dhe vetë Kishës Orthodhokse. Shqiptarët kanë dhënë një kontribut të madh në traditat e Kishës Orthodhokse, sidomos në himnografi dhe në ikonografi. Nga ky popull kanë dalë njerëz si Shën Joan Kukuzeli që ka dhënë një kontribut të madh në krijimin e pasurimin e himnografisë kishtare. Dhe ikonografë me famë botërore si Onufri, që na kanë lënë vepra arti kishtare të papërsëritshme dot nga të tjerë. Shqiptarët kanë atë fjalën, "Aty ku më parë ka rrjedhur, do të pikojë!" Që do të thotë, edhe pse brezat e vjetër të popullit tonë kanë krijuar këto vlera universale për njerëzimin, edhe brezat tanë të sotëm do të ecin në hapat e tyre e do të prodhojnë vlerat e tyre. Dhe puna e përkushtuar e Theodhor Pecit na bën të gjithë të ndihemi mirë.

Lutjet e të parëve tanë në qiell le të ndriçojnë mendjet e zemrat e shqiptarëve sot!

Ndriçoje o Zot popullin tim shqiptar me Dritën tënde të Pakrijuar!