Faqja 11 - AKTUALITET Shkurt 18, 2004
73-VJEÇARJA: FOSHNJEN E VRAU KUSHERIRI 3 VJEÇ
"Gjyshja vrau mbesën 5-ditëshe"
Londër, nis gjyqi ndaj shkodranes Gjyle Hoti
--------------------------------------------------------------------------------
Nga Londra, Muhamed Veliu
Salla 14 e Gjykatës së Krimeve të Rënda në Londër dje ka pasur një të pandehur të pazakontë. Mbase është personi me moshën më të madhe në historinë e kësaj gjykate legjendare, që nga hapja e saj 70 vjet më parë. Bëhet fjalë për plakën emigrante me origjinë nga Shkodra, Gjyle Hoti (Çangaj), 73 vjeçe. Me një trup të madh...
e veshur me një shami të bardhë mbi kokë dhe mbi shpatulla mbante një xhaketë blu me zinxhir në mes, ka dëgjuar pa asnjë shenjë nervozizmi akuzën e ngritur nga Prokuroria, të cilën ia përkthente një vajzë shqiptare.
Kur mendonte se pleqërinë e saj do ta kalonte gëzueshëm pas bashkimit me djemtë dhe vajzën e saj emigrantë në Londër, para dy vjetëve, papritmas jeta e saj ka marrë një kthesë të papritur 360 gradë. Gjyle Hoti (Çangaj) është përballur dje mbasdite me trupin gjykues prej 12 vetash, në gjykatën "Old Baily", e akuzuar për vrasjen e së miturës pesëditëshe Jetmira Shala, më 25 korrik 2003 në lagjen "Totenham", në veri të Londrës.
Akuzat
Pas betimit të një jurije të përbërë nga pesë meshkuj dhe shtatë femra, prokurori Mark Elison ka filluar të lexojë akuzën e ngritur ndaj Hotit, e lindur më 14 janar të vitit 1931, për "vrazjen e një fëmije 5-ditëshe". Elison e ka akuzuar të pandehurën se ka vrarë të miturën Jetmira Shala. Sipas akuzës, mesditën e 22 korrikut 2003 e mitura është lënë nën kujdesin e plakës nga nëna e të porsalindurës, Lumturie Shala. Ajo, së bashku me një miken e saj, Bukurien, kanë dalë në pazar për të blerë ushqime për Jetmirën, pasi e ëma nuk kishte qumësht të mjaftushëm për ta ushqyer. Në shtëpi ka qëndruar Gjylja së bashku me djalin e Bukuries, i quajtur Sabah. Kur doli, Lumturia kishte lënë gjellën në zjarr dhe i ka kërkuar Gjyles që krahas kujdesit për vajzën t'i hedhë dhe qepën, gjë për të cilën Hoti është shprehur e gatshme. Në momentin e largimit të s'ëmës vajza ishte duke fjetur në karrocën që e përdornin dhe si krevat. "Hoti është larguar për në kuzhinë. Pas disa minutash është rikthyer në dhomë ku kishte lënë Sabahun dhe Jetmirën", ka vijuar së shpjeguari kronologjinë e vrasjes prokurori Elison. Duke iu referuar fjalëve të 73-vjeçares në polici, Jetmira 5-ditëshe kishte rënë nga karroca ku po flinte, kishte marrë disa të gërvishtura në fytyrë, ndërsa ajo për momentin nuk ka vërenjtur ndonjë dëmtim në kokë. "Pse e vrave fëmijën e të tjerëve". Këto kanë qenë fjalët e plakës drejtuar 3-vjeçarit Sabah në ato momente. Ai, sipas dëshmisë së Hotit në polici, nuk ka folur dhe është fshehur poshtë tavolinës. Tejet e shqetësuar, duke mos ditur asnjë fjalë anglisht, Gjyle Hoti ka dalë në rrugë dhe në ndërtesën përballë shtëpisë ku ishte vajza e plagosur ka kapur dy punëtorë ndërtimi anglezë, i ka futur në shtëpi duke bërtitur dhe treguar vajzën, së cilës i ishin mbyllur sytë dhe i ishte nxirë fytyra.
Enigma
Shqiptarja nuk ka pranuar akuzat për vrasje, duke thënë se nuk e ka vrarë Jetmirën. "Vrasja ka ndodhur në kushtet e një misteri të plotë, në një shtëpi ku ishin vetëm e pandehura dhe Sabahu", është shprehur prokurori. Por, për të zbardhur këtë vrasje dhe në ngritjen e akuzës për vrasje ndaj 73-vjeçares, për Prokurorinë ka qenë e lehtë. E vetmja armë në duart e Akuzës që fajëson shqiptaren janë disa raporte patologësh, të cilët janë marrë me hetimin e plagëve të gjetura në kokën e Jetmirës. Në seancën e djeshme prokurori i ka treguar gjykatësit të çështjes, Barker, një katalog grafik të përgatitur me kompjuter, ku janë ilustruar plagët e viktimës.
Sipas mjekëve, plagët janë marrë nga një goditje të qëllimshme nga një i rritur dhe se këto plagë nuk mund të shkatohen nga goditja apo përplasja e mundshme e një fëmije tre vjeç, sa Sabahu. Patologët, në dëshmin e tyre me prova shkencore, kanë mbrojtur tezën e tyre se foshnja ishte goditur nga një i rritur. Sipas tyre, nuk mund të jenë kryer nga Sabahu, i cili i është nënshtruar testeve të ndryshme për matjen e forcës së tij.
Prokuroria: Lumë mashtrimesh nga e akuzuara e të afërmit
Prokurori Elison nuk ka ngurruar ta quajë të pandehurën dhe të afërmit e viktimës si mashtrues. "Gjatë gjithë procesit hetimor ata kanë gënjyer se cilët janë identitet e vërteta të njerëzve të afërm që kanë lidhje me prindërit e viktimës dhe të akuzuarën", ka deklaruar Elison. Hoti ka pohuar në polici se është gjendur rastësisht në famijen Shala dhe se ata ishin thjesht miq. Por, sipas prokurorit, e vërteta është ndryshe. Gjatë hetimeve 7-mujore, hetuesit britanikë kanë zbuluar se Hoti është nëna e Lumturies, kjo e fundit nëna e viktimës. Bukuria, që shoqëroi Lumturien për në pazar është nëna e Sabahut dhe bashkëshorte e djalit të madh të Hotit, Rifatit. Po ashtu, Hoti mësohet të ketë përdorur në Angli dy karta mjekësore me datëlindje të ndryshme. Por, mbrojtja thotë se ka prova që vërteton se ajo është 73-vjeçe. Iliri, babai i viktimës mësohet të jetë nga Vlora dhe të jetë deportuar njëherë në Shqipëri, ndërsa bashkëshortja e tij, Lumturia nga Shkodra, ka qenë në pritje të përgjigjes për azil.
Përgjigju Duke Cituar
Duhet 180 grade.
Krijoni Kontakt