"Klandestin" apo ikanak?

[Skerdi Sika]

Çfarë mendoni ju për termin "klandestin"?

Mendimi im: Klandestinët janë ikanakë (refugjatë). Ata e ushtrojnë të drejtën e garantuar me ligje ndërkombëtare për të kërkuar strehim në një vend tjetër. Ata detyrohen të hyjnë në BE pa leje, meqe BE u nxjerr atyre pengesa të qëllimshme konsullare, policore etj, pikërisht për t'i penguar ata nga ushtrimi i të drejtës së tyre të garantuar me ligje e konventa ndërkombëtare.

Ta zëmë që unë jetoj në shtetin X, me të drejtë të trafikoj lirisht BE-në. Nëse shpërthen luftë civile në X, pra nëse në X krijohen shkaqe legjitime që arsyetojnë arratisjen dhe azilin, ahere BE e vë shtetin X në karantinë: këndej u kërkon shtetasve të X viza, e andej i këshillon nëpunësit e vet konsullarë që të mos lëshojnë viza në asnjë mënyrë.

Mua më duket që termi klandestin, "i fshehtë", rrjedh nga një dëshirë e autoriteteve sidomos në Itali, Greqi, Spanjë, dhe në ca vendeve tjera më prolematike të BE-së, që t'i kriminalizojnë apriori njerëzit që e ushtrojnë një të drejtë legjitime, për ta kriminalizuar që andej - a e pakta për ta kufizuar - të drejtën legjitime të azilit.

Nëse vret një ikanak, gjykohesh nga tërë bota. Por nëse fundos një anije me klandestinë, ahere fajtorë janë ata, "të fshehtit"; emërtimi i tyre, që t'i ngjall asociacione me mafiozot, të tregon qysh në fillim se këtu u dashka fajësuar viktimat.

Me sa di unë, termi "klandestin", i fshehtë, nuk ka asnjë bazë, as në ligjet ndërkombëtare, as në ato nacionale, në asnjë vend evropian.

Habitem, athua pse e kanë pranuar edhe autoritetet e mediat shqiptare këtë term njollosës!?

Me sa kuptoj unë, në SHBA, në Skandinavi, në Mbretërinë e Bashkuar, në Gjermani etj etj ky term nuk ekziston fare, ose nuk përdoret në këtë kontekst fajësues.