Intervistë me Prof. Fadil Sulejmanin

[StterollA]

Intervistë me profesorin dhe kryetarin e Bordit të Universitetit të Tetovës, prof. dr. Fadil Sulejmanin, përkitazi me çmimet që ka marrë prej dy organizatash të njohura akademike botërore për punën e tij të çmueshme intelektuale.

· Zotëri profesor, kemi kuptuar se ju jeni nominuar “Personalitet i Shekullit 21” nga Qendra Internacionale e Biografive të personaliteteve më të shquara të botës me seli në Kembrixh dhe emri Juaj tashmë gjendet në analet ndërkombëtare në mesin e një milion njerëzve të tjerë që për merita të veçanta janë shpërblyer me këtë çmim të madh human nga kjo qendër. Ç’thoni Ju për këtë?

Po. Është e vërtetë se muajin e kaluar kjo Qendër Internacionale për vlerësimin e personaliteteve dhe të punës së tyre në shërbim të njerëzimit më ka njoftuar se jam nominuar “Personalitet i Shekullit 21” për të arriturat e mia në arsim, shkencë dhe kulturë.

Kjo nuk ka qenë ndonjë befasi e madhe për mua, kur e di se gjithë jetën time ia kam kushtuar arsimit, shkencës dhe kulturës, pavarësisht nga sakrificat dhe sfidat që kam pasur në këtë rrugë të shenjtë dhe në interes të mbarë njerëzimit. Megjithatë, kjo është një gjë e mirë kur dikush di t’i vlerësojë më drejt njerëzit tonë për punët e tyre të mira, pa qoftë edhe nga jashtë, nga të huajt.

· Po ashtu dëgjuam se për punën Tuaj të dalluar intelektuale me një çmim të ngjashëm jeni shpërblyer edhe nga Qendra e Institucioneve Kërkimore dhe e Akademive të Botës me seli në Oksford, duke ju radhitur në mesin e 2000 intelektualëve më të çmuar të botës në shekullin 21?

Po. Edhe kjo qendër akademike ndërkombëtare për vlerësimin e intelektualëve të botës dhe të veprimtarisë së tyre intelektuale ka zgjedhur një numër prej 2000 intelektualëve më të çmuar të botës, në mesin e të cilëve jam edhe unë, dhe kjo është gjithashtu një mirënjohje, nder e krenari jo vetëm për mua, por edhe për shqiptarët e tjerë.

· Z. Profesor, çfarë domethëniesh kanë këto çmime aq të larta dhe me përmasa ndërkombëtare për ju personalisht dhe për popullin shqiptar në përgjithësi?

Këto çmime të karakterit shkencor dhe human me përmasa ndërkombëtare unë i kuptoj si një mirënjohje që më jepen në emër të edukimit arsimor, të shkencës dhe të kulturës, përkatësisht si një satisfaksion për punën time si pedagog, si krijues dhe si humanist.

Mua më vjen mirë që këto qendra aq të njohura me punën e vet në hulumtimin dhe vlerësimin e personaliteteve të botës për të arriturat e tyre me interes mbarënjerëzor e kanë parë të arsyeshme të interesohen për biografinë time dhe në bazë të saj të bëjnë vlerësimin e angazhimit tim vetëmohues në avancimin e arsimit, të shkencës dhe të kulturës gjatë tërë karrierës sime intelektuale dhe të më shpallin një ndër personalitetet dhe intelektualët më të çmuar të shekullit 21, dhe për këtë unë u jam mirënjohës, sepse me këtë akt të lartë fisnik ato më kanë çmuar e nderuar jo vetëm mua si personalitet, por edhe popullin shqiptar që i takoj.

· Z. Profesor, si e ndieni veten si një personalitet që keni hyrë në historinë ndërkombëtare?

Ndihem mjaft i gëzuar, krenar dhe kryelart për veprën time humane, qoftë me interes kombëtar apo ndërkombëtar.

Unë jam i lumtur dhe e kam për lavdi që i takoj një populli sa punëtor dhe i ndershëm aq edhe i vuajtur shekuj me radhë, shpeshherë edhe për një kafshatë buke, por, megjithatë, ai në saj të qëndresës së vet heroike dhe të punës mbinjerëzore arriti të mbijetojë dhe ta ruajë identitetin e tij kulturor dhe kombëtar.

Në këtë luftë për jetë a vdekje me armiq të shumtë dhe interesash të ndryshme, nuk kanë munguar kurrë përpjekjet titanike të intelektualëve të tij të mirëfilltë, të cilët nuk kursyen asgjë nga vetja vetëm e vetëm t’i ndihmojnë zhvillimit të gjithanshëm kombëtar të popullit të vet.

Si më parë, ashtu edhe tash, ka pasur dhe ka institucione të këtilla me peshë relevante botërore, që i kanë njohur dhe vlerësuar më drejt këto sakrifica të popullit shqiptar dhe kanë arritur t’i veçojnë intelektualët e tij që në kushte të jashtëzakonshme e kanë bërë të pamundshmen të mundshme në interes të përparimit të popullit të vet, që është njëkohësisht edhe pjesë e interesit gjithënjerëzor, dhe t’i futin ata në një libër të përbashkët të personaliteteve historike botërore.

Unë pa dyshim këtë kënaqësi dhe mirënjohje e ndaj me të gjithë shqiptarët, edhe pse në mënyrë të veçantë i jam përkushtuar me tërë qenien time avancimit të gjithanshëm të shqiptarëve në Maqedoni, sidomos në lëmin e arsimit dhe të arsimimit të tyre.

Kjo mirënjohje dhe lavdi i përket edhe Universitetit të Tetovës, ku unë punoj si profesor dhe udhëheqës i këtij institucioni të lartë kulturor.

· Zotëri profesor, kur dihet se ju jeni ideatori, themeluesi dhe Rektori i parë i Universitetit të Tetovës, a mendoni se ka ndikuar edhe kjo pjesë e biografisë Suaj në ndarjen e këtyre dy çmimeve?

Gjithësesi. Universiteti i Tetovës është histori më vete e popullit shqiptar në Maqedoni. Ai është i vetmi universitet në botë që u problematizua aq shumë në suaza ndërkombëtare dhe afirmoi kërkesat e shqiptarëve për barazi dhe demokraci nacionale në ketë vend.

Këto institucione botërore dhe drejtuesit e tyre vërejtën pa paragjykime dhe vlerësuan drejt mundin dhe kontributin tonë që dhamë për avancimin e dijes, të artit dhe të kulturës me formimin e Universitetit të Tetovës, dhe kjo trajtohet si vepër humane me interes të zhvillimit gjithënjerëzor.

Për fat të keq, ka pasur dhe ka ende në mesin tonë njerëz injorantë që nuk e kuptojnë rëndësinë e këtyre projekteve arsimore, siç është Universiteti i Tetovës, dhe janë rropatur vazhdimisht që ta pengojnë punën e tyre për interesa të veta private.

Megjithatë, bota është e madhe, sheh, dëgjon dhe ka kritere, sipas të cilave e mat drejt punën e mirë dhe në bazë të saj sjell vendime të rëndësishme, duke i shpërblyer të merituarit.

· Z. Profesor, dihet se ju keni qenë edhe themelues dhe kryetar i parë i Bashkësisë Kulturore Shqiptare në Maqedoni me seli në Tetovë; formuat Këshillin për Pajtimin e gjaqeve dhe u vutë në krye të tij, si dhe i vetmi shqiptar në Maqedoni që keni fituar bursën akademike ndërkombëtare të “Fondacionit të Aleksandër Humboltit” në Gjermani.

Si i keni arritur të gjitha këto, aq më tepër kur kemi parasysh edhe punën tuaj të frytshme pedagogjike me studentë dhe botimin e shumë veprave dhe artikujve profesional-shkencorë?

Njeriu me punë të vazhdueshme dhe me qëllime humane fitoren e ka të sigurt në çfarëdoqoftë angazhim të tij.

Unë edhe pse kam qenë afër 30 vjet profesor i rregullt në Universitetin e Prishtinës dhe i angazhuar aty me shumë punë profesionale-shkencore, megjithatë, gjithnjë kam qenë i intersuar për vendlindjen time dhe çështjen shqiptare në Maqedoni, duke i kushtuar edhe një numër artikujsh të karakterit publik.

Gjendja e rëndë e shqiptarëve në Maqedoni dhe dëshira e madhe për t’i ndihmuar sadopak popullit tonë në ruajtjen e identitetit të tij kulturor dhe kombëtar, më shtyu që në bashkëpunim me disa intelektualë të mirëfilltë ta formojmë Bashkësinë Kulturore Shqiptare, dhe me këtë ne bëmë hapat e parë që në mënyrë të organizuar dhe institucionale ta inicojmë mbledhjen dhe kultivimin e kulturës sonë shpirtërore dhe materiale në këtë vend. Kjo punë e mbarë dha rezultatet e saj të duhura, duke trasuar kështu rrugën që duhet pasuar gjeneratat tona të ardhshme.

Kur është fjala për pajtimin e gjaqeve, duhet theksuar se kjo ishte një platformë gjithëshqiptare në Kosovë, Maqedoni, Mal të Zi etj. dhe si një plagë e rëndë kombëtare, e cila dëmtonte çështjen shqiptare, duke shkaktuar armiqësi dhe përçarje mes nesh, duhej sa më parë shëruar.

Angazhimi ynë për pajtimin e gjaqeve në Maqedoni pati rezultate të suksesshme, kur kemi parasysh se vetëm në Tetovë me rrethinë u zgjidhën mbi 100 ngaterrësa dhe u pajtuan afër 50 gjaqe.

Përsa i përket bursës akademike të A. Humboltit, ajo është një çmim i lartë ndërkombëtar, që unë e kam fituar në bazë të veprimtarisë sime të suksesshme në lëmin e linguistikës, kryesisht të filologjisë krahasimtare shqipe dhe gjermane.

Unë jam i bindur se sot ka edhe shqiptarë të tjerë në Maqedoni që i plotësojnë të gjitha kushtet profesionale-shkencore për ta fituar këtë bursë akademike, sidomos në radhët e kuadrove të Universitetit të Tetovës.

· Zotëri profesor, cilat janë planet Tuaja të mëtejshme?

Unë ndihem shumë mirë me shëndet, kam besim të plotë në veten time dhe vullnet të çeliktë për punë, ndaj dhe do të vazhdojë si deri më tash të punojë me tërë qenien time në realizimin e të drejtave të plota të shqiptarëve në Maqedoni dhe për t’ia arritur këtij qëllimi human nuk do të kursej mund, kohë dhe veprim konkret.

Në këtë plan do të ketë prioritet Universiteti i Tetovës dhe zhvillimi i tij me të gjitha tiparet e universiteteve bashkëkohore, duke përfshirë këtu edhe institucionet, klinikat, konviktet, mensën etj. dhe vetëm kështu mund të arrihet përparimi i nevojshëm i një kombi,

Urime, profesor Fadil, dhe suksese të reja!

Ju falemnderit! Sukseset e mia janë edhe sukseset e shqiptarëve në përgjithësi.


Intervistoi: Bardhyl Ajeti
Marre nga Shërbimi për Informim i UT-së

[StterollA]

Informatë


Kemi kënaqësinë dhe nderin që ta njoftojmë opinionin e gjerë se kryetari i Bordit dhe Rektori i parë i Universitetit të Tetovës, prof.dr. Fadil Sulejmani, për merita të veçanta në arsim, shkencë dhe kulturë është nominuar “Personalitet i Shekullit 21” nga Qendra Internacionale e Biografive të personaliteteve më të shquara me seli në Kembrixh.

Ndërsa Qendra e Institucioneve Kërkimore dhe e Akademive të Botës me seli në Oksford, prof. dr. Fadil Sulejmanin, e ka zgjedhur njërin ndër 2000 intelektualët më të çmuar nga mbarë bota të shekullit 21.

Ndër të tjera, kjo Qendër akademike botërore e njofton prof.dr. F. Sulejmanin se emri i tij do të shënohet në një libër të veçantë të këtyre 2000 intelektualëve më të çmuar të Shekullit 21 dhe se promovimi i tyre si intelektualë më të mirë të këtij shekulli do të bëhet më vitin 2004, kur ai do të ftohet të marrë pjesë dhe t’i pranojë çmimet e merituara; medaliet dhe diplomat e nderit.

Këto çmime të larta akademike që këto dy institucione të njohura të shkencës dhe kulturës botërore i ndanë prof.dr. F. Sulejmanit për punën e tij vetëmohuese intelektuale dhe në interes jo vetëm të popullit të vet, por edhe për mbarë njerëzimin, janë një mirënjohje dhe akt i denjë respekti jo vetëm për të, por edhe për mbarë popullin shqiptar, si dhe një afirmim për Universitetin e Tetovës, ku ai punon si pedagog dhe udhëheqës aty.

Duke u ndier krenarë dhe të gëzuar, ne me këtë rast ia urojmë këto çmime profesorit tonë të nderuar dhe i dëshirojmë suksese të reja në veprimtarinë e tij të mëtejshme intelektuale.

Tetovë, më 13.VI.2003
Shërbimi për Informim i UT-së