Kesh

[SUPERSTAR_N1]

KESH-i deklaron falimentimin e shoqërisë “Sesa”

Pas ultimatumit të dhënë nga Banka Botërore për nivelin e arkëtimeve, KESH blen “Sesa” sh.a.


Arkëtimet e ulëta, menaxhimit i dobët dhe humbjet e larta të energjisë elektrike në rrethin e Shkodrës falimentojnë shoqërinë “Sesa” sh.a. Drejtori i përgjithshëm i Korporatës Elektroenergjitike Shqiptare, Andis Harasani, sqaron për gazetën “Shekulli” se shoqëria nuk përmbushte detyrat e dhëna nga Banka Botërore për rritjen e arkëtimeve dhe për furnizimin me energji të konsumatorëve. Kjo shoqëri, si dhe dy të tjera, njëra në Vlorë dhe tjetra në Elbasan janë krijuar si shoqëri eksperimentale në vitin 1996 nga një projekt pilot i Bankës Botërore. Ato janë krijuar nga blerja e letrave me vlerë, ku 30 për qind të aksioneve i zotëronin punonjësit dhe 70 për qind të aksioneve i zotëronte shteti. “Sesa” që prej disa vjetësh ndodhej në një gjendje tepër të vështirë financiare, e cila u rëndua edhe më shumë prej mosvjeljes së arkëtimeve të energjisë elektrike dhe prej menaxhimit të dobët. Pas disa tentativash të bëra nga Ministria e Industrisë dhe Energjitikës dhe nga Korporata Elektroenergjitike Shqiptare për menaxhimin sa më të mirë të saj, ajo nuk arriti të vilte të ardhurat dhe të realizonte detyrat e dhëna. Para disa muajsh nga Korporata Elektroenergjitike për të mos lënë pas dore Shkodrën, u dërgua në krye të shoqërisë “Sesa” sh.a si drejtor i komanduar, Nexhat Maliqi, i cili arriti të përmirësojë disi arkëtimet por ato ishin të papërfillshme, ky ishte edhe shkaku që dy javë më parë ai u shkarkua nga detyra.
Banka Botërore
“Me blerjen e biznesit të shoqërisë “Sesa” ne përmbushim detyrat e Bankës Botërore, me qëllim rritjen e arkëtimeve dhe menaxhimin sa më të mirë të kompanisë, si dhe rritjen e furnizimit me energji”, -shprehet Harasani. Sipas tij, blerja e aksioneve të shoqërisë “Sesa” ka qenë një nga detyrat kryesore të Planit të Masave të hartuar nga Banka Botërore. Kështu vendimi për blerjen e aksioneve të kësaj kompanie përmbush detyrat e lëna nga Banka Botërore, sipas së cilës Korporata Elektroenergjitike duhet të rrisë të ardhurat nga shitja e energjisë elektrike. Aktualisht, niveli i arkëtimeve në qytetin e Shkodrës, i cili është më problematiku në vend dhe ku kufizimet janë mbi 8 orë në ditë, arrin në 10-12 për qind e totalit të energjisë që konsumohet. Shmangia e kësaj situate është edhe blerja e biznesit të kësaj shoqërie nga ana e Korporatës Elektroenergjitike.
Vendimi
Aksionet e “Sesa” sh.a. do të blihen nga Korporata Elektroenergjitike Shqiptare me një çmim prej 90 milionë lekë. Vendimi për blerjen e këtyre aksioneve është marrë nga Asambleja e kësaj shoqërie gjatë një mbledhjeje të jashtëzakonshme që ka zhvilluar drejtori i përgjithshëm i KESH-it, Andis Harasani, në të cilën ishin të pranishëm edhe aksionerët që zotërojnë 30 për qind të aksioneve të saj. Por, këta të fundit gjatë kësaj mbledhje kanë deklaruar se janë të pakënaqur nga vlerësimi që i është bërë shoqërisë, nga kompania franceze “Fikatex” si dhe nga KESH-i, i cili vlerëson 30 për qind të aksioneve me rreth 90 milionë lekë.
Përgjegjësia
Përfshirja e sh.a. “Sesa”-s në Korporatën Elektroenergjitike u bë një domosdoshmëri e madhe në kushtet kur rezultatet e saj ekonomiko-financiare po binin gjithnjë e më shumë, sipas vlerësimit të bërë nga shoqëria franceze “Fikatex”, -pohon zëdhënësja e korporatës, Armanda Shtëmbari. Sipas saj, ndryshimi i pozicionit të “Sesa”-s do të thotë se kjo ndërmarrje do të përfshihet në zonën e shpërndarjes së Shkodrës dhe aktiviteti i saj tani e tutje do të kontrollohet nga KESH-i.

[SUPERSTAR_N1]

KESH-i në 1 janar copëtohet në 3 pjesë

Divizionet e shpërndarjes, transmetimit dhe gjenerimit, vitin e ardhshëm do të ndahen edhe financiarisht

Në 1 janar 2004 Korporata Elektroenergjitike Shqiptare do të copëzohet në 3 pjesë. Transmetimi, shpërndarja dhe gjenerimi do të jenë 3 divizionet, të cilat do të jenë të ndara financiarisht edhe pse të varura nga Korporata Elektroenergjitike Shqiptare. “Ndarja e Korporatës Elektroenergjitike Shqiptare parashikohet që të bëhet me 1 janar 2004, dhe KESH-i do të jetë një holding prej nga do të varen 3 divizionet”, -shprehet drejtori i përgjithshëm i KESH-it, Andis Harasani. Sipas tij, gjenerimi do të ndahet sipas kaskadave Drini, Mati, Bistrica, Fieri, ndërsa shpërndarja sipas 4 zonave, shpërndarja Tiranë, Shkodër, Fier dhe Elbasan dhe transmetimi divizioni qendror. “Një nga problemet kryesore për ndarjen e KESH-it në 3 divizione është ana administrative, sepse kompania të gjitha kreditë i ka marrë së bashku, shpërndarje, transmetim dhe gjenerim”, -shprehet Harasani. Sipas tij, të gjitha kreditë që ka marrë Korporata Elektroenergjitike Shqiptare do të duhet të ndahen sipas divizioneve, por kjo do të kërkojë edhe njëherë miratimin e këtyre kredive nga Parlamenti shqiptar. Prandaj brenda 6 muajve të ardhshëm do të përcaktohet qartë skema e ndarjes së divizioneve dhe në 1 janar 2004 kompani energjitike do të ndahet në 3 divizione, kjo në kuadër të privatizimit të KESH-it.