Gjyqi i Berlusconit....

[Enri]

Imuniteti i Berluskonit

Një ligj imuniteti lehtëson kryeministrin e Italisë, hapet rruga për një shef të mundshëm të Bankës Evropiane, ndërsa askush nuk fajësohet për skandalin e gjakut me HIV, njoftojnë gazetat evropiane.

Imuniteti i Berluskonit

Ndërsa Italia po përgatitet të marrë presidencën e Bashkimit Evropian në korrik, gazeta me seli në Paris International Herald Tribune, si të gjitha ditoret e tjera, njofton mbi miratimin nga ana e dhomës së ulët të parlamentit italian për një projektligj, i cili, thotë gazeta, "do të pezullojë gjyqin e kryeministrit Berluskoni për ryshfet në kohën kur po i afrohej marrjes së verdiktit".

Projektligji i miratuar të mërkurën, thotë gazeta, ka të bëjë me pesë zyrtarët më të lartë publik të Italisë. Asnjëri nga katër të tjerët nuk ndiqet nga ligji, vëren gazeta.

Le Monde e Francës shënon momentin e miratimit të një ligji, i cili, thotë gazeta, "kursen Silvio Berluskonin nga turpërimi i daljes në gjyq si i pandehur gjatë presidencës së Bashkimit Evropian".

Por imuniteti të cilin e parashikon ligji është i kufizuar me mandatin, vëren gazeta. "Mandati i zotit Berluskoni përfundon më 2006," vëren ajo, "dhe nëse ai nuk rizgjidhet ai do t'i nënshtrohet ndjekjes si të gjithë të tjerët".

Gjaku i njollosur

Gjykata më e lartë e apelit në Francë i dha fund të mërkurën një beteje ligjore në lidhje me një skandal që ka të bëjë me gjak të kontaminuar me HIV duke hedhur poshtë akuzat kundër 30 zyrtarëve dhe punonjësve shëndetësorë.

Ky ishte "rezultati më i keq i mundur", thotë Liberation e Parisit. "Do të ishte iluzion të mendosh se vendimi i djeeshëm... shënon fundin e skandalit," thotë ajo.

Përkundrazi, gazeta beson se vendimi i gjyqit "do të ngelet gjithmonë pengesë për t'i dhn fund kësaj çështje".

Duke u ndalur "në gjysmë të rrugës," shton ajo, gjykata "krijoi përshtypjen se bëri përpjekje t'i lë të lira disa palë të caktuara".

Rasti i gjakut të kontaminuar, thotë gazeta, "qëndron në ballë" të asaj që e quan "listë e gjatë e shkaqeve të krizës së thellë të besimit që po godet demokracinë tonë (franceze)".

Pasi një gjykatë e Parisit të mërkurën shpalli guvernatorin aktual të Bankës së Francës, Jean-Claude Trichet, të pafajshëm në lidhje me akuzën se ka ndihmuar bankën ish-shtetërore Credit Lyonnaise të falsifikojë llogaritë e saj para 10 vjetësh, Le Figaro e Parisit thotë se zoti Trichet "ka gjasa të mira të emërohet president i Bankës Qëndrore Evropiane (ECB) javët e ardhshme".

Humbjet e bankës Credit Lyonnaise e cila tashmë është privatizuar i kushtuan taksapaguesit francez 8-15 miliardë euro, kujton Le Figaro.

Në Gjermani, Die Welt e Berlinit thotë se shpallja e tij të pafajshëm është lajm i mirë për tregjet financiare dhe ekonominë në zonën e euros.

"Nuk është vetëm se shumica e investitorëve kanë pritur që zoti Trichet të shpallet i pafajshëm", thotë gazeta, "por ata gjithashtu e shohin atë si person ideal për postin më të lartë në Bankën Qëndrore Evropiane".

Gazeta thotë se pret që periduha e tij në këtë post të shënohet me kontinuitet, çfarë ajo beson se është pikërisht diçka që i nevojitet kësaj banke gjatë disa viteve të ardhshme.

Por më e rëndësishmja sipas gazetës është se ky epilog do të thotë se Europa do të kursehet nga edhe nga një "debat tjetër rreth emërimeve në poste të rëndësishme".

"Është shumë lehtë të imagjinohet se çfarë do të kishte pasuar në rast të ndonjë epilogu tjetër", thotë gazeta.

[Enri]

Me çështjen "Berluskoni" merren kryesisht gazetat gjermane dhe austriake


Disa gazeta evropiane të të mërkurës shqyrtojnë daljen para trupit gjykues të kryeministrit italian, Silvio Berluskoni pak kohë para se vendi të marrë presidencën e rradhës së BE-së. Ndërkohë në shtyp vazhdojnë diskutimet rreth Kushtetutës së Bashkimit Evropian.

Kryeministri në hall
Gazeta gjermane DER TAGESSPIEGEL imagjinon se çfarë do të ndodhte nëse kryeministri italian, Silvio Berluskoni, do të dënohej me burg për dhënie rryshfetesh, në një kohë kur vendi i tij do të marrë presidencën e Bashkimit Evropian.

"Poshtërimi i Berluskonit nuk do të ketë të krahasuar," shkruan gazeta, por e pranon se ka shumë pak gjasa që ky skenar të bëhet realitete meqë parlamenti italian pritet të votojë një ligj që do të ofronte imunitet nga ndjekja ligjore për personat që ndodhen në pesë postet shtetërore kyçe në Itali.

Gazeta tjetër gjermane DIE TAGESZEITUNG shkruan se ligji për imunitet në Itali nuk ka për ta zbukuruar imazhin e vendit.

Ajo thotë se tani duket sheshit që Italia është vendi ku një miliarder i përfshirë në procese gjyqësore, shndërrohet në politikan dhe shtyn parlamentin të miratojë ligje që i vijnë atij për shtat.

Po rreth zhvillimeve të fundit në Itali, gazeta austriake DIE PRESSE shkruan se Bashkimit evropian do t'i duhet shumë fat nëse do që ta miratojë kushtetutën e vet të re gjatë kohën kur vendi ka presidencën e rradhës.

"Tani që anëtarët e BE-së kanë vendosur të mos ia vënë veshin punëve të brendshme të Italisë...ata duhet të pranojnë një shkallë përgjegjësie nëse i braktis fati," shkruan gazeta.

"Z. Berluskoni," shkruan gazeta britanike INDEPENDENT "kishte marrë një mësim nga 'Ferma e kafshëve' e Xhorxh Oruellit, ku derrat që drejtojnë punët deklarojnë: "të gjitha kafshët janë të barabarta, por ca prej tyre janë më të barabarta se të tjerat".

Kjo, shpjegon gazeta, ndodhi kur kryeministri italian u tha gjykatësve: "Është e vërtetë që të gjithë janë të barabartë para ligjit. Por unë jam edhe më i barabartë ,sepse për mua ka votuar shumica e italianëve...".

Kushtetuta e BE-së
Gazeta franceze NOUVEL OBSERVATEUR beson se përvoja e Britanisë në mënyrat e diplomacisë ndërkombëtare, e ka ndihmuar atë në punën 16 muajshme për hartimin e projektkushtetutës evropiane të Konventës që drejtohet nga ish-presidenti francez, Valery Giscard d'Estaing.

Projekti përfundimtar, beson gazeta "pasqyron më shumë pragmatizmin e tipit britanik sesa konstitucionalizmin e tipit francez". Kjo, sipas gazetës, reflekton aftësitë e përfaqësuesve britanikë në Konventë dhe traditat diplomatike me vlerë të Britanisë së Madhe.

Gazeta pariziene LE MONDE shkruan se drejtuesi i konventës, do të donte që francezët ta thonin vetë fjalën e tyre për Kushtetutën Evropiane dhe citon në mbështetje të kësaj ideje, fjalët e z. Giscard d'Estaing pas një takimi që ai pati me kryeministrin francez, Rafarin.

Por gazeta shton se sipas z. Rafarin, i takon presidentit Shirak të vendosë nëse projekti i kushtetutës do të kalojë për miratim në parlament, apo në referendum popullor.

Dhe tabloidi danez që botohet në kopenhagen, BT i nën thirrje ministrit të Jashtëm danez, Per Stig Moeller që të tregohet i durueshëm në raston e kushtetutës së re të BE-së.

Moeller ka shprehur dyshim se mos kushtetuta e re e BE bëhet rasti i katërt që Danimarka vendos të mos bëhet pjesë e marrëveshjeve të rëndësishme evropiane.

Por gazeta përpiqet t'i mbushë mendjen kryeministrit se edhe nëse kjo ndodh, nuk është dhe aq alarmante, pasi sipas saj, nuk ka asgjë që ta pengojë parlamentin danez të miratojë ato ligje që do t'i miratojë.

Sipas tabloidit danez, disavantazhi i katër mosmiratimeve daneze është se ato e mbajnë vendin rob të ndikimit që do të kishte në rastin e kundërt jo vetëm për formëzimin e legjislacionit në fjalë të BE-së, por rob të influencës që do të kishte në përgjithësi.