Organizata mafijoze Italo-Shqiptare

[ALBA]

Gjatë operacionit “Parajsa”, u arrestuan 57 anëtarë të organizatës mafioze shqiptaro-italiane, së cilës i janë kapur në total 2000 kg drogë
Policia fqinje pretendon se i ka shpëtuar vetëm ish-diplomati Drini Bello dhe krahu i djathtë i bosit të Sacra Corona Unita, Paquale Orlando
Itali, 114 akuza, 59 anëtarëve të organizatës italo-shqiptare

Ened Janina
Banda italo-shqiptare e trafikut të drogës në Brindizi është shkatërruar krejtësisht. Nga 59 anëtarë të bandës 57 tashmë ndodhen në prangat e policisë ndërsa dy të tjerë kanë mundur që të largohen. Dy të larguarit janë ish-funksionari i ambasadës shqiptare në Romë, Drini Bello, ose një person me pasaportën e tij, dhe Pasquale Orlando, krahu i djathtë i bosit të Sacra Corona Unita në zonën e Brindizit, Vito Di Emidio. Shqiptari Bello nuk është arrestuar nga policia italiane sepse gëzon ende imunitet diplomatik dhe prej më shumë se një viti ai është rikthyer në Shqipëri. Sipas burimeve të policisë vendase, Bello mbrohet nga konventa e Vienës e 24 prillit të vitit 1963 që parashikon marrëdhëniet konsullore dhe diplomatike ndërmjet shteteve. “Në rast se nuk do të ekzistonte kjo koventë ne do t’i kërkonim autoriteteve shqiptare arrestimin e tij. Dyshohet se ai ka qenë njeriu i shërbimit sekret shqiptar në ambasadën në Romë”,- deklarojnë zyrtarët e policisë italiane. Ndërkohë, përsoni tjetër që i ka shpëtuar arrestimit, italiani Pasquale Orlando, është një nga vrasësit më gjakësorë të organizatës. Tashmë policia dhe prokuroria italiane ka ngritur akuzat për të gjithë anëtarët e organizatës italo- shqiptare. Në total 59 të akuzuarit duhet të përgjigjen për 114 akuza duke filluar nga krijimi dhe organizimi i organizatës mafioze e deri tek ato më të thjeshtat. Hetimi për këtë organizatë gjigante ka filluar që më 19 gusht të vitit 2000, në zonën e Casalabates. Në atë kohë u kapën një ton drogë dhe u arrestuan katër trafikantët shqiptarë. Pas tyre në prangat e policisë ranë edhe Marcello Gionfalo, 26 vjeç, Luigi D'Errico, 46 vjeç; Vincenzo Molfetta, 27 vjeç; Franco Di Mastrodonato, 29 vjeç; Maria Carmela Convertini, 42 vjeç; Michele De Leonardis, 49 vjeç dhe shqiptari nga Vlora, Eduard Gaçe. Nuk kaloi shumë kohë dhe në prangat e policisë ranë edhe gjashtë shqiptarë të tjerë. Deri në 24 prill të këtij viti policia italiane kishte arrestuar dalëngadalë pjesën më të madhe të anëtarëve të organizatës kriminale. Në këtë datë ishte shënuar edhe mbyllja e hetimeve për dosjen e trafikut të drogës në zonën e Brindizit. Që nga kjo datë anëtarët e tjerë të organizatës kishin rënë në qetësi. Ata kishin kujtuar se policia nuk kishte arritur që t’i zbulonte dot. “Qetësia” e tyre zgjati deri para dy ditësh kur uniformat blu italiane organizuan operacionin “Paradise” ku kryen edhe arrestimet e tjera. Gjatë gjithë kësaj kohe policia ka përgjuar telefonat celularë të të gjithë anëtarëve të organizatës. Nga përgjimet e policisë ka dalë në skenë edhe emri i Drini Bellos. Ajo ka dokumentuar edhe të gjitha rastet kur kjo organizatë ka trafikuar drogë nga Shqipëria në Itali. Sipas materialeve që ndodhen në dosjen hetimore të Prokurorisë së Leçes, droga ka zbarkuar në Itali për herë të parë më 19 gusht të vitit 2000, në zonën e Casalabates. Rastet e tjera janë 18 nëntor të vitit 2001në zonën e Andranos; më 20 shkurt të vitit 2002 në Cerano; më 22 dhe 25 shkurt të vitit 2002 në Otranto dhe në Frigole; më 10 prill 2002 në Cerano; 17 prill 2002 në Apani; 19 dhe 24 prill 2002 përsëri në Cerano. Në të gjithë këto zbarkime janë bllokuar në total rreth dy mijë kilogram drogë, 20 klandestinë, dy gomone si dhe janë arrestuar shtatë trafikantë droge dhe katër korrierë me makinë. Sipas policisë, dyshohet që të ketë pasur edhe zbarkime të tjera por vetëm këto janë zbuluar. Madje në një rast skafistët janë detyruar nga kreu i organizatës, bosi i Sacra Corona Unitas në zonën e Brindizit, që të transportonin në drejtim të Shqipërisë një italian të shpallur në kërkim nga policia.
Sipas materialeve të policisë italiane, fillimisht gjithçka kontrollohej nga bosi i Sacra Corona Unitas në zonën e Brindizit, Vito Di Emidio, i cili pas arrestimit u kthye në një informator të policisë. Gjatë kohës së mbretërimit të tij, banda italo- shqiptare, kishte kryer një numër tepër të madh veprash penale. Ata kishin vjedhur me forcë një numër të madh tregtarësh vendas. Vjedhjet kryheshin zakonisht natën, duke thyer dyqanet me leva hekuri ose me armë dhe flakë oksigjeni, kur ato ishin të blinduara. Pas arrestimeve të dy ditëve më parë, policia ka sekuestruar edhe makinën me të cilën kryheshin vjedhjet, një Alfa Romeo 164 me ngjyrë të zezë. Ndërkohë, policia italiane ka konfirmuar faktin se është ndaluar dhe 24- vjeçari Erion Bello nga Vlora, student në Romë për jurisprudencë, i cili mësohet se është vëllai i ish-diplomatit Drini Bello.

ZBARKIMI I DROGËS
19 gusht 2000, në Casalabate
18 nëntor të vitit 2001 në Andrano
20 shkurt të vitit 2002 në Cerano
22 dhe 25 shkurt të vitit 2002 në Otranto dhe në Frigole
10 prill 2002 në Cerano
17 prill 2002 në Apani
19 dhe 24 prill 2002 përsëri në Cerano

REZULTATI
Policia ka bllokuar rreth 2 mijë kilogram drogë,
Janë kapur 20 klandestinë,
Janë sekuestruar 2 gomone
Janë arrestuar 7 trafikantë droge
Si dhe janë kapur katër korrierë me makinë