Deklarata e fundit e "AKSH-se"

[Arb]

Ja deklarata e fundit e te ashtuquajtures AKSH, qe te kuptoni me lehte se kush mund te fshihet prapa saj:

FRONTI PËR BASHKIM KOMBËTAR SHQIPTAR

KRYESIA QENDRORE

NR.04/12/02 Akti

Tiranë,Prishtinë,Shkup, Ulqin, Prevezë, më 04.12.2002





DEKLARATË POLITIKE NR.10



KËRKESA E RUGOVËS PËR NDRYSHIMIN E SIMBOLE-VE KOMBËTARE SHQIPTARE SHPIE NË NDARJEN E KOMBIT NË DY POPUJ DHE NË DY SHTETE TË NDRYSHME NË BALLKAN





Rugova që nga ardhja e tij në krye të LDK-së, dhe më vonë si kryetar i vetëshpallur i Republikës së Kosovës, në vazhdimësi në programin e tij politik dhe partiak e ka mbrojtur tezën antishqiptare që Kosova, në të gjitha traktativat e kombinatorikës politike, të mbetet nën jurisdiksionin dhe sovranitetin serbomalazez: qoftë në kuadrin e një federate, konfederate apo unioni shtetëror me karakter federal serbo-kosovaro-malazez.



Për synimet e këtij koncepti politik antikombëtar të Rugovës dëshmoj-

në edhe paralizimi dhe mosjetësimi dhjetëvjecar i Deklaratës kushtetuese për shpalljen e pavarësisë së Kosovës, më 2 korrik 1990, i Kushtetutës së Kacanikut, shtator 1990, i Referendumit gjithëpopullor për deklarimin e pavarësisë së Kosovës, më 26-31 shtator 1991.

Këto dokumente dhe akte juridiko-kushtetuese dhe politike për Rugovën dhe partinë e tij-LDK-në në esencë ishin platforma më oportune demagogjike dhe hipokrite, që pasqyronte politikën pasive pacifiste dhe koekzistencën primitive paqësore për ta mashtruar dhe manipuluar opinionin e brendshëm shqiptar dhe opinionin ndërkombëtar.



Kjo dëshmon se, e gjithë veprimtaria e Rugovës dhe e LDK-së për arritjen e pavarësisë së Kosovës mbështetej vetëm në mbajtjen e konferencave javore (çdo të premte) për shtyp, në të cilat përsëritej i njëjti refren premtues pa mbulesë, se Kosova do ta fitojë pavarësinë me rrugë paqësore përmes dialogut me Beogradin, me ndërmjetësimin e faktorit ndërkombëtar. Si rrjedhim i ideve të tij utopike për pavarësinë e Kosovës, Rugova asnjëherë nuk e respektoi, as nuk e zbatoi Kushtetutën e Kaçanikut, asnjëherë nuk u angazhua për funksionimin e Parlamentit dhe të Qeverisë së Republikës së Kosovës,



Politika pacifiste, proserbe dhe antikombëtare e Rugovës erdhi në shprehje në momentin e daljes në skenë të Ushtrisë Çlirimtare të Kosovës(UÇK-së), të cilën ai e quajti krijesë të huaj të shërbimeve sekrete jugosllave. Edhe pse Rugova ishte i vetëdijshëm dhe në dijeni se UÇK-ja përbëhej nga bijat dhe bijtë më të mirë dhe më të devotshëm të Kosovës, ai përmes etiketimeve denigruese, u orvat që UÇK-në ta denoncojë para bashkësisë ndërkombëtare si organizatë të dyshimtë dhe terroriste, ashtu siç e akuzonte pa kurrfarë faktesh të qëndrueshme regjimi ushtarako-policor serbomadh i Sllobodan Millosheviqit. Qëllimi kryesor i këtyre akuzave të pabaza rugoviste ishte që UÇK-në përfundimisht ta izolonte nga gjiri i popullit shqiptar dhe, njëkohësisht, ashtu sic vepronte propaganda shoviniste serboçetnike, ta komprimitonte në sy të botës.



Të gjitha këto veprime destruktive politike të Rugovës kundër luftës së UÇK-së për liri dhe pavarësi të Kosovës ishin në kundërshtim flagrant me të gjitha nenet e Kushtetutës së Kaçanikut, të cilën ai nuk e zbatoi asnjëherë gjatë mandatit të tij si kryetar i vetëshpallur i Republikës së Kosovës.



Edhe pse Rugova e ka ditur fare mirë se në bazë të Kushtetutës së Kaçanikut, duhej të ishte komandant i përgjithshëm i forcave të armatosura të UÇK-së dhe të Rezistencës gjithëpopullore shqiptare. Mirëpo, Rugova jo vetëm që nuk e mori përsipër këtë detyrim kushtetues, por përkundrazi ai në rolin e prokurorit të UÇK-së, jo vetëm që shkeli Kushtetutën e Republikës së Kosovës, por, gjithashtu iu kundërvu edhe kërkesës dhe vullnetit të ligjshëm të popullit shqiptar, që luftoi për lirinë dhe pavarësinë e Kosovës.



Si rezultat i gjithë kësaj veprimtarie 13-vjecare antikombëtare të Rugovës dhe të LDK-së, është edhe prononcimi i tij më i ri dhe më i turpshëm, i shprehur më 28 Nëntor-Ditën e Flamurit dhe të Pavarësisë së Shqipërisë, bërë në Prishtinë, për ndryshimin e simboleve kombëtare-Flamurit dhe të Hymnit Kombëtar Shqiptar.



Kjo kërkesë absurde dhe antikombëtare e Rugovës është në kolizion me gjithë historinë tonë të deritashme, sipas së cilës shqiptarët gjithmonë kanë qenë si NJË KOMB I VETËM ME NJË EMËR, ME NJË GJUHË, ME NJË FLAMUR DHE ME NJË TERRITOR KOMPAKT ETNIK ILIRO-SHQIPTAR.



Gjithashtu, kjo kërkesë antishqiptare e Rugovës në asnjë mënyrë nuk është diç e re, por në thelb është një ringjallje e tezave-fantazmë të politikës dhe të historiografisë falsifikatore serbomadhe, që datojnë qysh nga Mesjeta bizantine e Car Stefan Dushanit-Mizorit deri në ditën e sotme.



Po qe se (kurrën e kurrës mos dhashtë Zoti) realizohet kjo kërkesë e shëmtuar antikombëtare e Rugovës për ndryshimin e Flamurit dhe e Hymnit Kombëtar Shqiptar, atëherë pa dyshim do të vijë në shprehje edhe ndryshimi i EMRIT KOMBETAR të shqiptarëve të Kosovës nga SHQIPTARË-NË KOSOVARË.



Po ashtu, kjo do të sillte edhe revidimin e gjuhës së sotme letrare shqipe në një të ashtuquajtur gegërishte letrare.



Nëse këto ndryshime do të vijnë në shprehje, kjo do të ishte tragjedia më e madhe për të gjithë shqiptarët dhe për Shqipërinë Etnike, sepse këto do të shkaktonin ndarjen e përjetshme fizike dhe shpirtërore të KOMBIT dhe të SHTETIT SHQIPTAR.



Duke marrë parasysh rrezikun e madh që paralajmërojnë këto ndryshime, Fronti për Bashkimin Kombëtar Shqiptar (FBKSH), duke u bazuar në Platformën e tij politike gjithëkombëtare, deklaron me vendosmëri se në asnjë mënyrë nuk pajtohet dhe nuk pranon kurrfarë ndryshimesh të simboleve tona kombëtare shqiptare: EMRI,GJUHA, FLAMURI DHE HYMNI KOMBËTAR SHQIPTAR, sepse plotësisht jemi të ndërgjegjshëm, që kjo rrugë do të çonte në ndarjen e përhershme të KOMBIT SHQIPTAR në dy popuj dhe në dy shtete të ndryshme në Ballkan.



Duke parë një rrezik serioz të këtyre ndryshimeve për qenien e përgjithshme shqiptare, Fronti për Bashkimin Kombëtar Shqiptar i paralajmëron si Rugovën, ashtu edhe të gjitha ato forca të errëta politike antikombëtare shqiptare, se ai me asnjë çmim nuk do të qëndrojë indiferent përpara kësaj tragjedie, që po u përgatitet shqiptarëve dhe Shqipërisë Etnike, por do të luftojë me të gjitha mjetet dhe forcat e tij, që i ka në dispozicion për ta parandaluar këtë Projektide serbosllave të Rugovës, që ka për qëllim të fundit copëtimin e mëtejmë të Shqipërisë Etnike.



Sekretari Politik Kryetari

Av. Alban VJOSA Mr. Valdet VARDARI


www.tifozat.com