Halid Rroji

[Sokoli]

Halid Rroji lindi në Shkodër më 3 janar 1860 në një familje me tradita tregtare dhe patriotike.Gjyshi i tij tregtar i madh në Shkodër,pati marrëdhënie tregtare me Venedikun, gjë për të cilën flasin dhe dokumentet e botuar nga Akademia e Shkencave, të Republikës së Shqipërisë. Qe djali i Mustafa aga Rrojit, që bënte pjesë në parinë e Shkodrës. Në kohën e Tanzimatit bashkë me disa të tjerë të parisë së Shkodrës luftoi për mos realizimin e këtyre reformave nga Sulltani. Për këtë bashkë me disa nga paria e Shkodrës qe internuar nga Turkia dhe pas një viti duke u kthyer vdiq në Kodër Koll pranë kufirit që ndante Shqipërinë me Malin e Zi. Për këtë flitet edhe në veprën e botuar nga Zija Shkodra "Shqipëria në kohën e Tanzimatit".

Dihet se Halidi mbeti shpejt jetim dhe u rrit nën kujdesin e dajës së tij që ishte kadi, burrë i mendshëm dhe i nderuar. Ai u interesua për ta arsimuar Halidin sipas konditave të vendit dhe të kohës. Kështu Halidi mbaroi shkollën e mesme turke dhe si gjuhë të huaja ka zotruar turqishten dhe italishten.

Kur u rrit, siç shihet, ai nuk ndoqi rrugën e aktivitetit tregtar si të parët e tij. Ai preferoi atë të nëpunësit e të politikanit. Kështu Halidi e filloi karrierën e tij si nëpunës në Shkodër. Më vonë është emëruar si drejtor i doganës së Shkodrës. Një tipar dallues i karakterit të tij ishte bujaria për të ndihmuar shkodranët si dhe për të mbrojtur interesat e qytetit të Shkodrës që ai i përfaqësoi në parlament.

Megjithëse Halidi nuk është marrë vetë direkt me tregti në vitin 1914 së bashku me Jonuz Rrojin nga firma tregtare "Jakup Vëllazen Rroji" me Nush Topallin dhe Dan Matin, themeluan njërën nga shoqëritë e para tregtare të quajtur "Shoqëria tregtare Shqiptare "Shkodra". Në librin "Lufta për mbrojtjen e Shkodrës në vitet 1918-1920 te dr.Xhevat Repishtit në kapitullin "Organizimi i prapavijës së forcave vullnetare " faqet 221 thuhet:"Më 1 gusht, me porosi të Ahmet Zogut, pranë bashkisë së Shkodrës u krijua Komisioni Përkujdestar i Ushtrive Vullnetare, i cili luajti një rol të rëndësishëm për furnizimin e frontit. Kryetar ka qenë Musa Juka. Në këtë komision bëri pjesë edhe Halid Rroji.

Halid Rroji ka hapur dhe Medresenë e parë në Shkodër, sipas dokumenteve që ekzistojnë tek Nasuf Dizdari në Tiranë e të zbuluara në Komunitetin Mysliman - Tiranë. Po kështu ka luajtur një rol të rëndësishëm për hapjen e gjimnazit të parë të Shkodrës në vitin 1922. Në 70 vjetorin e gjimnazit "28 Nëntori" të Shkodrës emri i Halid Rrojit u përmend edhe në Raportin që mbajti ministri i Arsimit me këtë rast ku vuri në dukje dhe kontributin e Halid Rrojit.

Në broshurën e botuar me rastin e 70-vjetorit të rrethit të parë ciklistik të Shqipërisë në faqen 14 "Kronikë 1925, shkruhet:"Pritjen në dhomën e dhuratave në Tiranë e bëri prefeti Ceno Beg Kryeziu. Në pritje ishte i pranishëm dhe senatori Halid Rroji. Në gazetën "Drita Islame" me titull: "Njohuri me karakter historik" të përgatitur nga Nasuf Dizdari në listën emërore të atyre që morën pjesë në Kongresin e 24 Shkurtit 1923 të Këshillit të Sheriatit si përfaqësues i Shkodrës ishte dhe Halid Rroji.

Halid Rroji si largpamës u bind shpejt se për krijimin e një shteti shqiptar të fortë dhe modern, Shqipërisë i duhej një politikan dinamik, largpamës, organizator, trim dhe i vendosur. Këto cilësi ai i gjente te Ahmet Zogu me të cilin u lidh ngushtë politikisht në rrugën për themelimin e një shteti modern shqiptar.

Halid Rroji aktivitetin e tij politik e ka treguar me funksionin e deputetit që ka përfaqësuar Shkodrën në këto legjislatura që nga votimi i 19 prillit 1921 nga doli parlamenti i parë shqiptar dhe pastaj me radhë në zgjedhjet e dhjetorit 1923 në atë të 17 gushtit 1928, në atë të 17 nëntorit 1932, në ata të 17 nëntorit 1936 dhe të 31 janarit 1937.

Fill pas pushtimit të Shqipërisë nga Italia fashiste si shumë patriotë që e kundërshtuan pushtimin, italianët e internuan në Itali bashkë me të birin Xhevdetin. Por duke parë sëmundjen e rëndë që po vuante e liruan dhe 15 ditë pas kthimit në Atdhe dha frymën e fundit me 15 janar 1940.

Marre nga Gazeta 55

[Agim Doçi]

Sa turp për historiografinë shqiptare që PERSONALITETE TË SHQUARA KOMBETARE SI senator Halid Rroji kanëmbetur kaq "në hije"! Turp pasha besën!
Megjithatë FAMILJA RROJI në Shkodër ka gjurmët e veta të pashlyeshme atdhetare! Ajo brez mbas brezi ka trashëguar dhunti dhe vlera të mrekullueshme patriotike.
Sa mirë që janë shqyptarë këta PERSONALITETE! Sa mirë që Sokoli shkroj për të! Të falem nderës SOKOL! Mua më ke futur në borxh, por do ta laj nderin me nder! Jam shumë i nderuar që nga familja RROJI ka patur nipat e Halid Rrojit shokë dhe miq të fëminisë e rinisë time në Shkodër!
Agim