Jeta Faqolli

[Davius]

Jeta Faqolli, dëftesë false te “Lul Profesori”

Dashamir Biçaku

Ndjekje penale për këngëtaren Jeta Faqolli. Policia e Tiranës ka zbuluar së fundi se vajza e njohur e ekraneve muzikore shqiptare është pajisur me një dëftesë false të shkollës së mesme.

Akuza e ngritur nga policia në adresë të artistes është falsifikimi i dëftesës së shkollës së mesme, tek ish-pedagogu Lulzim Sinani, i njohur si “Lul profesori”, i arrestuar disa ditë më parë me akuzën e falsifikimit të qindra dokumenteve. Këngëtarja Jeta Faqolli dyshohet se është pajisur me diplomë false të shkollës së mesme, me qëllim për të filluar studimet në Universitetin e Tetovës në Maqedoni, dega Juridik. Antikrimi Ekonomik i policisë së kryeqytetit ka dërguar për ndjekje penale vajzën 28-vjeçare nga Librazhdi, që aktualisht vazhdon studimet në fakultetin Juridik të Universitetit të Tetovës. Lajmi është pohuar dje zyrtarisht nga policia e Tiranës, nëpërmjet njoftimit të zakonshëm zyrtar. Biondja që prej më tepër se tre vitesh është e njohur në tregun muzikor shqiptar për klipet e saj provokues, tashmë duhet të përballet me organet e drejtësisë me një akuzë aspak të lehtë, “falsifikim i dokumenteve zyrtare dhe vënia e tyre në përdorim”. Sipas policisë, falsifikuesi i dëftesës mësohet se është personi i njohuri “Lul Profesori”, ish-pedagog i Universitetit Bujqësor në Tiranë. Ky i fundit është arrestuar dhe lënë i lirë tashmë, por hetohet në gjendje të lirë nga gjykata e Tiranës, për shkak të moshës së tij të madhe.

Faksi

Gjithçka për sa i përket hetimit të çështjes mësohet të ketë nisur pas një faksi të mbërritur në Ministrinë e Jashtme të Shqipërisë. Bëhet fjalë për një kërkesë nga universiteti ku studion këngëtarja e njohur. Në faksin e mbërritur në Ministrinë e Jashtme kërkohej të verifikohej, nëse Jeta Faqolli kishte përfunduar studimet e nivelit parauniversitar në një nga shkollat e mesme të Tiranës. Burimet e policisë kanë pohuar se bëhet fjalë për shkollën e mesme “Qemal Stafa”, dëftesën e të cilës kishte paraqitur në Maqedoni këngëtarja shqiptare. Pas mbërritjes së faksit në zyrat e Ministrisë së Jashtme, ai i është përcjellë për kompetencë drejtorisë së policisë së Tiranës dhe zyrës së Antikrimit Ekonomik të kryeqytetit. Kjo e fundit duhej të verifikonte, nëse dëftesa e lëshuar nga shkolla e mesme në emër të këngëtares së njohur ishte e vërtetë apo jo.

Hetimi

Menjëherë pas mbërritjes së faksit të Ministrisë së Jashtme në sektorin përkatës të Drejtorisë së Tiranës, një inspektor i Antikrimit Ekonomik ka trokitur në zyrën e drejtorit të “Qemal Stafës”. Pasi hetuesi ka kontaktuar me drejtuesin e shkollës, janë kontrolluar regjistrat e periudhës, kur mbante datën e lëshimit dëftesa e Faqollit. Në asnjë prej regjistrave të kontrolluar me amzën që mbante dëftesa e këngëtares nuk ka rezultuar saktë. Kjo ka bërë që policia të nisë hetimet për të zbardhur origjinën e mundshme se ku mund të ishte marrë dëftesa e shkollës së mesme nga Faqolli. Hetimet e kryera dhe të dhënat e siguruar në rrugë të ndryshme, kanë zbuluar për policinë se dëftesa ishte marrë tek Lulzim profesori, i arrestuar nga policia e Tiranës më tepër se tri javë më parë me akuzën e falsifikimit të dokumenteve. Ende nuk dihet saktësisht koha e dhënies së dëftesës, që mban të dhënat personale të biondes së klipeve provokuese.

100 vula - të ndryshme janë gjetur në “zyrat” ku kryente falsifikimin e dokumenteve “Lul Profesori”. Ai është arrestuar pas të dhënave paraprake të policisë, teksa po falsifikonte disa dokumente

[Davius]

Jeta Faqolli: Vazhdoj studimet në Maqedoni
Reagon këngëtarja: Eshtë sajesë për të dëmtuar karrierën time

TIRANE - “Duan të më shkatërrojnë karrierën time të ndërtuar me mund”. Ky ka qenë reagimi i parë i këngëtares 28-vjeçare, Jeta Faqolli, që shfaqet në faqen zyrtare të saj me fotot mjaft ekstravagante, ku janë të publikuara edhe një pjesë e albumeve dhe klipeve muzikore. Këngëtarja bionde që ka nxjerrë në tregun muzikor shqiptar disa albume dhe klipe, një pjesë e tyre mjaft të kërkuara, ka reaguar menjëherë sapo ka mësuar se ishte dërguar për ndjekje penale nga policia e Tiranës, me akuzën e falsifikimit të dokumenteve zyrtare dhe shkollore. “Dua t’ju falënderoj që më njoftuat, sepse unë nuk jam aspak në dijeni të një fakti të tillë. Policia as nuk më ka thirrur dhe as nuk më ka njoftuar një fakt të tillë”, ka pohuar përmes telefonit këngëtarja. Më tej ajo ka sqaruar se “nuk është aspak e vërtetë që unë kam falsifikuar dëftesën e shkollës së mesme”. E akuzuara ka vijuar më tej duke thënë se “aktualisht vazhdoj në Maqedoni fakultetin Juridik dhe nëse do të kishte pasur ndonjë dyshim të tillë, kjo do të ishte bërë që në fillim, kur unë jam regjistruar në shkollë”. Sipas artistes, me dëshirë për të njohur ligjet, veprimet e tilla janë kryer nga një person me tendencën për t’i shkatërruar karrierën profesionale artistike. Ajo ka pranuar se vërtetë ka përfunduar shkollën e mesme në kryeqytet, por pa saktësuar se cilën prej tyre. Edhe pse ka pohuar se ishin sulme të qëllimshme, ajo nuk ka saktësuar se nga kush ishin. Ajo vetëm se ka pohuar se sulmet kishin nisur një javë më parë në një gazetë të përditshme, pa saktësuar se në cilën.