Moxarti vogël shqiptar

[Shijaksi-London]

Violinisti 9-vjeçar, mahnit kritikët britanikë të muzikës

ELVIN HOXHA MOXARTI I VOGËL SHQIPTAR

Dy shkolla britanike në garë për të “rrëmbyer” talentin shqiptar

NGA LONDRA
MUHAMED VELIU

Të ndodhesh në një ambasadë të huaj në mes të Londrës, ku "mbreti" i asaj nate do të ishte një talent shqiptar, të bën të ndihesh mire njëkohësisht edhe keq. Mirë, pasi bashkëkombësi yt, me talentin e tij i mahnit të gjithë dhe bën që t'i të ndihesh krenar.
Keq, pasi promovimi i të tilla talenteve në vend që të bëhet nga vetë ne
shqiptarët, fatet e tyre të karrierës i menaxhojnë apo dinë t'i promovojnë me shije të huajt. i tillë ishte edhe rasti vetëm disa ditë më parë, kur ambasada turke në Londër ka promovuar për publikun britanik talentin e një artisti shqiptar, i cili luan në violinë. Ai quhet Elvin Hoxha dhe është vetëm 9 vjeç. Kritikët turq të muzikës e kanë cilësuar si një fëmijë me një talent të rallë, madje, media turke ka shkruar se ai është një violinist virtuoz, duke e krahasuar si "Moxarti i vogël". Gjatë qëndrimit disaditor në kryeqytetin britanik, përmes interpretimeve të tij, ai ka mahnitur publikun e zgjedhur, duke ngjallur kureshtje për vetë faktin se për moshën që ai ka interpreton, pjesë të një niveli të lartë. Interpretimi i veprave të Paganit si Kaprice apo Rondo të Moxartit janë duartrokitur ngrohtësisht nga të pranishmit në koncertet e Londrës, si dhe në qytetin e Manchesterit. Interpretimet e shkëlqyera kanë mahnitur kritikët e muzikës angleze, madje ka vënë në garë dy nga shkollat prestigjioze të muzikës si ajo Chatham School në Manchester dhe një tjetër në Oksford për ta pasur në gjirin e tyre. Këto shkolla i kanë ofruar bursa studimi. Pas interpretimit në Londër, Elvin Hoxha tha se "ndihem i lumtur që m'u dha mundësia të tregoj aftësitë e mia përpara publikut londinez". Elvini ka filluar të luajë në violinë që kur ishte tre vjeç. Tani ai vazhdon studimet në kujdesin e pedagogut Rasdim Bagirov në shkollën e muzikës "Music Preparatory" në Universitetin Bikent. Ndërkohë që jashtë orëve të mësimit, ai për orë të tëra studion nën kujdesin e babait, Hajredin Hoxha, dhe gjyshit të tij, Server Ganiyev.

Pinjoll artistësh

Violinisti i talentuar shqiptar rrjedh nga një familje muzikantësh. Babai i tij, Hajredin Hoxha, tani pedagog në Universitetin turk Bikent ka qenë violonçelist i njohur, njëkohësisht pedagog në Universitetin e Tiranës dega Konservator dhe Violonçel. Ndërsa nëna e tij, me origjinë nga Azerbajxhani, Narmina Ganieva, është pianiste e njohur. Të dy ata ndihen të lumtur për suksesin e djalit, ku natyrshëm edhe ata kanë pjesën e tyre. "Talenti Elvinit na ka bërë të ndihemi të lumtur", thotë i ati, Hajredin Hoxha "Kemi një arsye më shumë për t'u gëzuar, pasi talenti shqiptar i Elvini e tregon veten jo vetëm në Turqi, por në të gjithë botën". Po ashtu, edhe gjyshi Server Ganiyev është violinist. "Moxarti" i vogël rrjedh nga një familje e njohur nga qyteti i Shkodrës, familje me tradita e cila ka nxjerrë mjaft intelektualë, artistë dhe personalitete të tjera të jetës së vendit.


Elvin Hoxha njeh vetëm sukses

Moxarti i vogël shqiptar, deri më tani numëron një mori konkursesh ndërkombëtare
të fituara, ku më i rëndësishmi, ai i "Trashëgimisë së muzikës klasike", zhvilluar në mars 2005 në Moskë, në të cilin fitoi vendin e parë për moshën 6 deri në 10 vjeç nga një juria ndërkombëtare me emra të zgjedhur të muzikës klasike. Elvini fitoi admirimin e jurisë për teknikën e interpretimit, cilësitë artistike që shpalosi në skenë. Menjëherë pas fitimit të çmimit, Elvinit iu ofrua një bursë shkollimi nga violinisti me famë ruse, Vladimir Spivakov. Në një konkurs ku gjurmohen talentet e reja në violinë në të gjithë Turqinë quajtur njohur is CAKA "Cihak Askin and His Little Friends" (Cihat Askin dhe miqtë e tij të vegjël) mbajtur në dhjetor 2005, Elvini u përzgjodh ndër më të mirët. Nën kujdesin e CAKA-së, ai ka zhvilluar një sërë koncertesh në të gjithë Turqinë. Si rezultat i këtyre koncerteve, ai fitoi zemrat e publikut, duke bërë kështu ngjalljen e interesit në mediat turke, të cilat më pas, pas një sërë shkrimesh për të e cilësuan si "Moxarti i vogël" Pas një koncerti në Stamboll, violinisti turk me famë, Ayla Erduran, pëlqeu interpretimin e Elvinit dhe duke e përqafuar i tha: "Ti ke përpara një të ardhme shumë të suksesshme. Ndërsa Evin Ilyasoglu e ftoi atë të jepte koncert në Universitetin Bogazici. Në shkurt 2006, i shoqëruar nga orkestra "Biken Chameber Orchestra" Elvin Hoxha interpretoi kompozimin e parë të Vivaldit "Koncert për Violinë" në Albert Long Hall të Universitetit Bogazici. Pjesa e dytë e koncertit u luajt nga gjyshi i tij, Server Ganiyev. Pas këtij koncerti, popullariteti i tij u rrit me shpejtësi. Nuk kanë munguar për të ftesat nga radiot dhe televizionet turke, për regjistrime në studio. Interpretimi i tij është cilësuar si dominues dhe perfekt në skenë, pavarësisht moshës së tij nga violinisti Mintcho Mintchev.

E HENE, 18 DHJETOR 2006 GAZETA SHQIP

[Shijaksi-London]

Foto ElVin Hoxha