Gjermanoi i Konstandinopojës - 12 maj

[Albo]

Gjermanoi i Konstandinopojës

- 12 maj -

Ishte bir i Justinianit, i cili në fillim ishte patric shumë i fuqishëm. Lindi në Konstandinopojë në vitin 634 (ose 640). Në moshë të re u fal në Jerusalem.

Më 668 Konstandini IV (668-685) e vrau patricin për shkak të hakmarrjes politike, ndërsa Gjermanoin, i cili protestonte, e shterpëzoi. Për më tepër e bëri klerik në Kishën e Madhe, pra të Shën Sofisë, që të mos kishte mundësi të merrej me politikë. Shenjtori i pranoi të gjitha këto që kishte pësuar pa dëshirën e tij dhe tashmë i arsimuar shkëlqyeshëm, u ushtrua në theologji dhe në virtyt. Kështu u evidentua si i pari i kishës.

Më 706 u hirotonis mitropolit i Kizikut, në Dardanele. Ka shumë mundësi të kishte marrë pjesë në sinod në kryeqytet (712), ku për shkak të dhunës mbretërore firmos dhe ai kundër vendimeve të Sinodit VI Ekumenik në Konstandinopojë (681), i cili kishte dënuar herezinë e Monofizitizmit, kështu populli i Kizikut nuk e pranon për një farë kohe. Por një kryengritje e shpall Anastasin II (713 -715) perandor. Më 715 një tjetër sinod e shpërngul Gjermanoin në fronin patriarkal megjithë kundërshtimin e tij.

Atëherë ai mbledh një sinod të madh dhe konfirmon Sinodin VI Ekumenik, pra do të lavdërohet nga Sinodi VII Ekumenik në Nikea (787). I shkruan një letër të famshme armenëve dhe mban lidhje të ngushta me ta saqë e kremtojnë së bashku me ne.

I profetizon lindjen e shën Stefanit të ri (28 nëntor) nënës së tij shtatzënë dhe më vonë profetizon luftën kundër Perëndisë e mbretit të mëvonshëm Konstandini V (741-775). Dhe vërtet shpërtheu ikonoklazma (lufta kundër ikonave). Çarmatos në debat episkopët e saj, të cilët, pavarësisht nga kjo gjë, nuk pendohen. Gjithashtu ai qëllohet me shuplakë nga mbreti kokëfortë ikonoklast Leon III (717 -741). Omologjeti ynë, i dekurajuar, lë omoforin e tij (pjesë kryesore e stolisë kryepriftërore) mbi Tryezën e Shenjtë (730) dhe tërhiqet në shtëpinë e tij atërore. Më parë i dërgon papës së Romës, Grigorit, një ikonë me një letër, e cila mbërrin atje duke ecur mbi det! Fjeti në moshë shekullore (11.5.740) dhe u varros në Manastirin e famshëm, për hir të mozaikëve të tij, “Moni tis koras”, tani muzeu “Kahrie Xhami”, ku bënte çudira shëruese.

Ka qenë predikues tërheqës, shkrimtar i thellë dhe himnshkrues prodhimtar i tropareve dhe kanoneve shumë lirike.

At Justini