Suma: Të pezullohet shitja e Sharr Cemit
Nga Albulena Maloku më 15 dhjetor 2010 në ora 16:31
Komuna e Hanit të Elezit ka reaguar pas shitjes pa tender dhe duke eliminuar konkurrencën, të fabrikës së çimentos Sharr Cem.
Kryetari Rufki Suma kërkon pezullimin e shitjes së fabrikës, deri kur të krijohen institucionet e reja të vendit, nga zgjedhjet e 12 dhjetorit.
“Shitja e fabrikës ‘Sharr Cem’ është bërë në kohë jo të duhur, në momentin kur në Kosovë mbahen zgjedhjet parlamentare për formimin e institucioneve të Kosovës; është bërë pa tender, me ç’rast është eliminuar konkurrenca, që nuk ka qenë dukuri normale në Kosovë... Kjo çështje duhet të ngrihet në institucionin më të lartë të vendit, në Parlamentin e Kosovës, sepse nuk kemi te bëjmë me një ndërmarrje të vogël, por kemi te bëjmë me një gjigant ekonomik te vendit”, ka thënë Suma, nëpërmes një komunikate për shtyp.
Përveç çmimit shumë të ulët me të cilin i është dhënë fabrika një kompanie greke, Suma thekson se gjithashtu nuk janë marrë për bazë as kërkesat e punëtorëve, e as ato të institucioneve komunale që punojnë në interesin e qytetarëve të komunës.
Punëtorëve iu është premtuar se do të mbeten në punë edhe për tre vjet të tjera. Por Suma pyet ku do të shkojnë, pas tre vjetësh, këta punëtorë. “Ata, pas tre vitesh nuk do ta kërkojnë as AKP-në, e as Haxhi Arifin, por do të vijnë para komunës ku do të kërkojnë punë”.
Sipas Sumës, fabrikës i ishte ndërruar pronësia para 6 muajve, “për të vazhduar me dallaveret” për blerje nga kompania greke “Titan” për 30 milionë euro. Ndërkohë, vetëm fitimi vjetor i kësaj fabrike, deri më tani, është 20 milionë euro.
Edhe përfaqësues të komunitetit të biznesit vlerësojnë se ka munguar transparenca në këtë proces të privatizimit.
Përgjigju Duke Cituar
Krijoni Kontakt