Policia italiane i prangosi pas rrëmbimit dhe përdhunimit të një vajze shqiptare
Arrestohen 7 shqiptarë, përdhunuan 16-vjeçaren
Shtatë shqiptarë të moshave 20 deri në 40 vjeç janë arrestuar dy ditë më parë nga karabinierët italianë të akuzuar se kanë rrëmbyer dhe përdhunuar një të mitur shqiptare, vetëm 16 vjeçe. Të arrestuarit kishin ditë që mbanin nën vëzhgim vajzën ndërkohë që kishin planifikuar rrëmbimin dhe përdhunimin e saj.
Disa ditë më parë ata, duke e kërcënuar e kanë detyruar t'i ndjekë deri në një shtëpi në fshatrat e provincës Rende. Sapo kanë mbërritur atje e kanë lidhur vajzën në një krevat dhe menjëherë kanë nisur ta përdhunojnë të gjithë njëri pas tjetrit. Në momentet kur ajo kundërshtonte ata e kanë qëlluar, madje rrahur edhe me shkop gjatë gjithë natës. Gjatë dhunës seksuale vajza ka pësuar hematoma të dukshme në pjesë të ndryshme të trupit. Sipas mjekëve ligjorë që kanë bërë ekspertimin e vajzës, ajo ka hematoma në pjesën e poshtëme të barkut dhe në organet gjenitale. Pasi kanë marrë të gjithë atë që dëshironin shtatë të arrestuarit janë larguar duke kërcënuar dhe sharë vajzën, e cila vazhdonte të qëndronte e lidhur në krevat. Të nesërmen në mëngjes një fshatar i zonës ndërkohë që po kalonte përpara shtëpisë ka dëgjuar të bërtiturat e vajzës dhe menjëherë ka trokitur në shtëpi. Kur ka parë që askush nuk po ia hapte derën ndërkohë që e mitura i ka shtuar të bërtiturat, ai ka hyrë vetë brenda. Në krevat ka gjetur ende të lidhur, të gjakosur dhe tepër të tmerruar 16-vjeçaren. Fshatari italian e ka marrë në krah, e ka dërguar me vështirësi deri te makina dhe nga atje e ka çuar menjëherë në spitalin e Kozencës. Megjithëse ka qenë shumë e trembur dhe konfuze, vajza sapo ka marrë pak veten nga mjekimet ka bërë denoncimin. Ajo u ka treguar karabinierëve për dhunën që ka pësuar, momentin dhe vendin ku e kanë rrëmbyer dhe ka arritur t’u bëjë atyre një përshkrim të detajuar të 7 personave që e kishin përdhunuar gjithë natën, duke treguar se ishin të gjithë shqiptarë. Policia ka nisur kontrollet në të gjitha fshatrat e Rendes, duke u përqendruar në ato që janë pranë vendit ku ndodhi përdhunimi. Në fakt pikërisht në këto fshatra janë gjetur dhe janë arrestuar 7 shqiptarë. Dhuna që ka pësuar adoleshentja është konfirmuar edhe nga mjekët që e kanë vizituar dhe shqiptarët do ta kenë të vështirë ta mohojnë këtë akuzë. E.Janina
Gazeta "Shekulli"
Krijoni Kontakt