Kryengritja e Postribës, simbol i anti-komunizmit Shqiptar

[Begby]

Tuesday, 16 September 2008
Nga Besim NDREGJONI-Kanë kaluar jo pak por 62 vite, kur një krahine në qarkun e Shkodrës,bëri emër duke ju kundërvënë diktaturës komuniste me një kryengritje që do të ngelet në historinë e kombit me një emër të madh e shumë dimensional për të drejtat dhe liritë e njeriut e do të quhet e do të përmendet kryengritja e Postribës. Krahina e Postribës nuk është shumë larg Shkodrës ajo është 6 km, larg Rozafës kalasë shekullore me gojëdhëna qëndrese e besë. Këto virtyte të Shkodrës por në veçanti dhe të Postribasve me doke besë, si ndaj Shkodrës si qendër e veriut, por dhe ndaj kombit shqiptarë. Është nder, dhe privilegj i jashtëzakonshëm për çdo shqiptarë që të respektojë qëndrestarët e diktaturës komuniste e në veçanti krahinën e lavdishme dhe heroike të Postribës së Shkodrës, të kësaj treve që i dha këtij kombi nder dhe lavdi me kryengritjen e parë antikomuniste jo vetëm në Shqipëri por dhe në shkallë Evropiane. Kryengritja e Postribës është simboli i qëndresës, i luftës, ndaj një diktature që kishte jo shumë që kishte ardhur ne pushtet. Ajo diktaturë që erdhi në pushtet, me anën e dhunës, dhe të ndihmës internacionaliste të armiqve shekullor të kombit shqiptar. Diktatura e komunistëve terroriste shqiptare ishte një bandë që nuk njihte asnjë lloj doku zakoni apo mirënjohje për atë që Postribasit trima e të urtë u kishin dhënë gjatë luftës së dytë botërore duke i mbajtur me bukë dhe duke i përkrahur në luftë kundra armiqve pushtues. Postribasit nuk kishin pritur që të vinin komunistët që të luftonin fashizmin Italian, atë që në vitin 1939 e kishin pritur këtë pushtues me armë në dorë tek ura e Baçallëkut. Këtu në këtë luftë, shkëlqeu heroizmi i trimit Cen ADEMIT nga Boksi, i njohur dhe i respektuar nga i gjithë populli i Shkodrës. Lirinë, Postribasit si gjithë populli shqiptarë e kanë gjenë më të shtrenjtë ndaj ata që kishin luftuar dhe sakrifikuar kundra serbëve-malazezëve në mbrojtje të trojeve tona amtare nuk mund të pajtoheshin me diktaturën e komunistëve shqiptarë që nuk kishin fe e atdhe vetëm ego për të vrare e shfarosur popullin e vetë me ideologjinë e krimit si ishte ideologjia e asaj diktature. Luftetarë e qëndrestarë e Postribës nuk do të pajtoheshin me një ideologji që moto e saj kishte vrasjen, përbuzjen dhe denigrimin. Përballë ata kishin dhe Malësinë e Madhe në Kelmend ku nuk e kishin pushuar pushkën kundra bandave terroriste të terrorizmit të KUQ, në vitet 1944-1946. Postribasit kishin pritur që mbas luftës së dytë botërore Shqipëria të ishte vendi, me të drejta dhe liri siç ishin popujt e vendeve të kontinentit tonë evropiane. Por në vend të lirive, diktatura përdorte reprezaljet dhe pushkatimet burgimet e internimet. Dhe Postribasit nuk ju nënshtruan këtyre metodave serbe që përdoreshin nga komunistët shqiptarë ndaj popullsisë. Historinë e kësaj kryengritje e kanë bërë historianët se atyre u takon. Por në këtë përvjetor nuk mund të mos përmendim trimërinë qëndresën dhe veprën e tyre madhore të të gjithë familjeve të krahinës së Postribës. Te Kullajt, te Boksit, te Dragocit të Vorfës të Milan të Sume të Drishtit gjithashtu dhe të qytetit të Shkodrës. Nderim për të pushkatuarit e parë 1. Qazim RROJI 2. Rexhep IDRIZIN 3. Metush ALIJA 4. Reshit BEQIRI, 5. Halit DAUTI 6. Sylo GJETJA 7. Ymer ZENELI 8. Brahim SELIMI. Nderim për 17 të pushkatuarit e Postribës. Dhe për të vdekurit në hetuesi në burg. Nderim për ata familje që ju dogjën shtëpitë dhe pronat si në Kullaj, Boks, Dragoc, Vorfe, ,Rrafsh Vorfe, Milan, Sume. Nderim për 24 të pushkatuarit me gjyq e pa gjyq si nga Shkodra, Guri i Zi, Krebaj të Bregut të Bunës. Nderim për Osman HAXHINË dhe të gjithë postribasit që u dënuan përjetë me burgje dhe internime si nga Shkodra dhe Rragami, Ura e Shtrejtë, Domen, Mes Myselin, Kullaj, Boks, Dragoc. Drisht, Rrafsh Vorfe, Oblike Hot i ri, etj. Postriba për Shkodrën ka qenë një krahinë që me këtë kryengritje i dha emër që historia njerëzore do ta kujtojë me breza të tanë, luftetarë të lirisë Postribas, nderuan kombin tonë por dhe provuan tragjedinë e humbjeve të jetëve njerëzore. Ata u detyruan të përdorin armën si mjet i fundit që lë në dispozicion e drejta njerzëore për të patur liri, nder, e dinjitet këto që nuk i kishin përkrahësit dhe terroristët e diktaturës komuniste. Krahinat e Shqipërisq qq nga Vlora, Berati, Elbasani, Dibra, Tirana,kanq qenq e janq me këtë kryengritje se këta të gjithë kanë qenë në vuajtje me Postribasit e kanë provuar vrasjet, burgimet, internimet etj. Por sot ne që qëndruam dhe përballuam këto masakra çnjerëzore jemi krenare për JU që filluat kryengritjen e parë antikomuniste në Shqipëri. Nëqoftëse se Hungaria nderohet me Budapestin, dhe Çekia me Pragën, Shqipëria nderohet me Postribën, e cila dëshmoi se diktaturat nuk duhen toleruar, apo neglizhuar, heshtur, por duhen luftuar, që të shpëtojnë jetët njerëzore. Bilanci i kësaj kryengritje është sa heroike por dhe tragjike, për një krahinë me popullsi të vogël. 21 burra të vrare, 19 burra e gra të pushkatuar pa gjyq, 13 burra e gra të dënuar me burgim të përjetshëm, 123 burra të dënuar me burgime të ndryshme, 18 shtëpi të djegura. President i Republikës e nderoi këtë kryengritje me medaljen e lartë “Nderi i Kombit” e meriton, dhe e meritojnë të gjithë të përndjekurit politikë të Shqipërisë të cilët mbajtëën gjallë për 45-vite kundërshtinë dhe qëndresën ndaj diktaturës. Postriba e meriton të jetë në plejadën e nderit te kombit. Mesazhi i kësaj kryengritje është dhe sot aktual asnjë lëshim ndaj të drejtave dhe lirive të njeriu, asnjë lëshim pushteteve që abuzojnë me pushtetin në kurriz të shoqërisë. Kemi kaluar mbi 18 vite që vendi ynë është në pluralizëm, ne dhe Ju Postribasit falëm që Shqipëria mos të njihte më hakmarrje që në mes shqiptarëve të mos kishte më ndarje e përbuzje. Por fatkeqësisht dua të pohoj se ka akoma politikanë dhe segmente të caktuar që faljen tonë nuk e kuptuan, por përkundrazi pa i vrarë ndërgjegjia kërkojnë që shoqëria të jetë e ndarë. Asambleja e KE, ka kërkuar dhe kërkon që të dënohen krimet komuniste por tek ne po heshtet. A do ta lejojmë ne që e pësuam nga ky krim që mos të dënohen? Postriba na mëson: Jo kurrë. 62 vite më parë krahina e Postribës , bëri kryengritjen e parë antikomuniste, duke i treguar kontinentit të Evropës se diktatura komuniste është njëlloj si diktaturat naziste me të njëtat përmasa. Në këtë përvjetor të 62-të kësaj kryengritje, simbole e anti-komunizmit shqiptarë, Shoqata Mbarëkombëtare e Integrimit të Burgosurve dhe të Përndjekurve Politikë të Shqipërisë shpalli lëvizjen mbarëkombëtare me moton:“DËNIMI I KRIMEVE KOMUNISTE, MBROjTJE E DEMOKRACISË SHQIPËTARE”. Me këtë lëvizje mbarëkombëtare ne do t’i shërbejmë shoqërisë për të mos patur më urrejtje por dashuri për njeri-tjetrin. Me dokumentimin e krimit ne i tregojmë të vërtetën shoqërisë, pavarësisht se ajo është tragjike. Me dënimin e krimit komunistë ne i themi ndal urrejtjes. Me dënimin e krimit komunistë ne qetësojmë shpirtat e mijëra shqiptareve që sot nuk u gjenden eshtrat dhe nuk kanë një varr që të prehen të qetë. Me dënimin e krimit komunistë ne i themi ndal promovimit të diktaturave dhe pinjollëve të saj. Me këtë lëvizje ne do të shkojmë drejt një pajtimi kombëtar i domosdoshëm për shoqërinë. Kështu fillojmë ndërtimin e një shoqërie pa urrejtje, pa mllefe dhe shkojmë drejt një të ardhme të sigurtë si u ka hije popujve të qytetëruara. Me respekt për të gjithë kryengritjen e Postribës, për të pushkatuarit, për të dënuarit, për të internuarit, për familjet që u masakruan. Me respekt për të gjithë të persekutuarit politikë shqiptarë që janë pjesa më e lartë morale e çmuar e shoqërisë. Postriba na leshon piskamën malsore: KURR MA, KURR MA, KURR MA

[landi45]

dakort po asnje nga femijet e ketyre qe u vrane sot skane marre as pronat e baballarve dhe jetojne e punojne neper bote se shteti u vodhi pronen parate e internimeve dhe madje dhe emrin e luften e baballarteve te tyre pas 19 vitesh dhe akoma te persekutuar nga nje shtet me emer demokrat tashme.