Informacione te nevojshme rreth shendetit

[RaPSouL]

Raporti Na/K për zemër të shëndoshë

Shkencëtarët kanë analizuar raportin ndërmjet natriumit dhe kaliumit në ushqimin e 3.000 vullnetarëve, të cilët vuanin nga shtypja e lartë e gjakut.

Është treguar se marrja e sasisë më të madhe të natriumit dhe sasisë më të vogël të kaliumit me anë të ushqimit, shton rrezikun e shfaqjes së sëmundjeve të zemrës dhe të enëve të gjakut, dhe e kundërta, rritja e sasisë së kaliumit që futet në organizëm duke zvogëluar konsumimin e kripës (që është e pasur me natrium), zvogëlon rrezikun për shfaqjen e sëmundjeve kardiovaskulare.

Rezultatet tregojnë po ashtu se, secila njësi në rritjen e raportit natrium/kalium te personat me shtypje normale të gjakut, rrit për 24% rrezikun për t’u sëmurë nga sëmundjet e zemrës dhe të enëve të gjakut.

[RaPSouL]

Mishi i kuq armik i shikimit

Një studim i ri ka zbuluar se konsumimi i sasive të mëdha të mishit të kuq shton rrezikun e zhvillimit të degjenerimit makular- gjendje paraprijëse e verbimit, sidomos te moshat e shtyra.

Në studim kanë marrë pjesë 6.734 vullnetarë të moshave, ndërmjet 58 dhe 69 vjeç, të cilët e kanë mbushur një formular në lidhje me llojin dhe shpeshtësinë e ushqimit të cilin e konsumojnë.

Gjatë periudhës trevjeçare, shkencëtarët kanë përcjellë dhe kanë analizuar gjendjen e syve dhe shikimin e pjesëmarrësve në studim.

Rezultatet kanë treguar se personat të cilët konsumojnë mish të kuq dhjetë herë në javë, janë për 50% më të rrezikuar për t’u sëmurë nga degjenerimi makular, në krahasim me personat të cilët konsumojnë më pak se pesë herë në javë mish të kuq.

[RaPSouL]

Migrena e rrezikshme për shtatzënat

Femrat të cilat kanë rregullisht kokëdhimbje migrenoze janë të rrezikuara që të pësojnë goditje në tru gjatë shtatzënisë, paralajmëron një studim i ri.

Llogaritet se 26% e femrave në moshë reproduktive kanë migrenë, prandaj hulumtuesit pranë universitete amerikane, Wake Fores, North Carolina dhe Duke, kanë analizuar ndikimin e migrenës te shtatzënat.

Në këtë studim janë analizuar të dhënat e grumbulluara nga afër 34.000 femra, të cilat gjatë periudhës 2000-2003 ishin diagnostikuar me migrenë.

Rezultatet kanë treguar se femrat të cilat gjatë shtatzënisë kanë migrenë, janë 15 herë më të rrezikuara për të pësuar goditje në tru, pavarësisht se a kanë ose jo pre-eklampsi (rritja e shtypjes së gjakut gjatë shtatzënisë), e cila është një tjetër sëmundje që rrezikon goditjen në tru.

[RaPSouL]

Enzima kyçe për mbipeshën

Hulumtuesit pranë Universitetit të Kalifornisë kanë identifikuar një enzimë, e cila ka rol vendimtar në procesin e metabolizimit të yndyrave.

Testimet e realizuara te minjtë laboratorikë, kanë treguar se çaktivizimi i kësaj enzime mund ta ndërpresë zhvillimin e mbipeshës, përkundër konsumimit të ushqimit me sasi të madhe yndyrash.

Është vërtetuar se me anë të çaktivizimit të kësaj enzime thelbësore, pengohet edhe rritja e nivelit të kolesterolit në gjak.

Autorët e studimit shpresojnë se këto rezultate do të sjellin deri te zhvillimi i trajtimeve të reja për mbipeshën.

[RaPSouL]

Diabeti, sëmundjet e zemrës dhe demenca

Një studim i ri ka bërë lidhshmërinë ndërmjet diabetit dhe rritjes së nivelit të kolesterolit (sidomos LDL-kolesterolit), me rënien e shpejtë të funksioneve psikike te personat e sëmurë nga sëmundja Alzheimer.

Rezultatet e këtij studimi ofrojnë të dhëna shtesë për rolin e shëndetit të zemrës dhe enëve të gjakut në paraqitjen dhe progresionin e sëmundjes Alzheimer.

Autorët e studimit pohojnë se parandalimi i sëmundjeve të zemrës dhe diabetit, ose mbajtja e simptomave nën kontroll, mund ta ngadalësojë fuqishëm progresin e sëmundjes Alzheimer.

Sëmundja Alzheimer ose demenca senile karakterizohet me rënien e funksioneve psikike, në radhë të parë atyre të kujtesës, mendimit dhe inteligjencës, sidomos te moshat e shtyra.

[RaPSouL]

Proteinat e bizeles ndihmojnë tek tensioni i lartë

Studimet më të reja tek minjtë kanë zbuluar se proteinat përbërëse të bizeles mund të shërbejnë si një bar natyral kundër tensionit të lartë dhe sëmundjeve kronike të veshkave.

Disa studime amerikane kanë treguar se proteinat e bizeles mund të nxisin urinimin dhe me këtë të ndihmojnë në uljen e tensionit të gjakut si dhe eliminimin e tonksineve nga organizmi.

Shkencëtarët thonë se konsumimi i bizeles në mënyrë natyrale nuk tregon rezultate aq të mira siç tregon ekstrakti i proteinave.

Nëse këta rezultate të nxjerra në minj vërtetohen edhe tek njerëzit, mund të pritet që në të ardhmen proteinat nga bizelja të përdoren si shtesa të shëndetshme të ushqimit.

[RaPSouL]

Acidet omega-3-yndyrore dhe karcinoma e prostatës

Në bazë të një studimi të ri, acidet omega-3-yndyrore mbrojnë nga forma agresive e karcinomës së prostatës.

Shkencëtarët kanë analizuar shprehitë ushqyese të 466 meshkujve, të cilët kanë qenë të diagnostikuar me karcinomë agresive të prostatës, ndërsa 478 meshkuj të shëndoshë kanë qenë pjesë e grupit të kontrollit.

Në bazë të konsumimit të acideve omega-3-yndyrore, participantët janë ndarë në katër grupe. Rezultatet kanë treguar se meshkujt të cilët konsumojnë më shumë acide omega-3-yndyrore janë për 63% më pak të rrezikuar për të zhvilluar formën agresive të karcinomës, në krahasim meshkujt të cilët nuk konsumojnë acide omega-3-yndyrore.

Duke pasur parasysh rezultatet e këtij studimi ekspertët rekomandojnë që të konsumohet peshk (sidomos salmon) së paku njëherë në javë.

[RaPSouL]

Çaji i nxehtë mund të shkaktojë tumor të fytit

Në bazë të një studimi të publikuar në revistën "British Medical Journal", njerëzit të cilët pinë çaj të nxehtë janë të rrezikuar për t’u sëmurë nga kanceri i fytit.

Kanceri i ezofagut, deri më tani ka qenë i lidhur me pirjen e duhanit dhe konsumimin e alkoolit, ndërsa sipas studimeve të reja, edhe pijet e nxehta mund të konsiderohen si faktorë të rrezikut, për faktin se e dëmtojnë mukozën edhe indet e fytit dhe ezofagut.

Shkencëtarët iranianë kanë analizuar rajonin Golestan, ku është shkalla më e lartë e kancerit të ezofagut në botë, ndërsa banorët pinë mesatarisht një litër çaj të nxehtë në ditë, derisa duhani dhe alkooli konsumohen shumë pak.

Rezultatet kanë treguar se konsumimi i çajit të nxehtë deri në 65 °C dyfishonte rrezikun e shfaqjes së kancerit të fytit dhe ezofagut, ndërsa konsumimi i çajit më të nxehtë se 70 °C, e tetëfishonte këtë rrezik.

[RaPSouL]

Karotenoidet i mbrojnë eshtrat

Konsumimi i shtuar i pigmenteve antioksiduese nga bimët, më konkretisht karotenoideve, zvogëlon rrezikun për frakturat e eshtrave të ijëve.

Nga karotenoidet individuale veprim më të madh mbrojtës ka treguar likopeni.

Autorët e studimit mendojnë se stresi oksidues ndikon në dëmtimin e eshtrave dhe për këtë arsye antioksiduesit e fuqishëm, siç janë karotenoidet, kanë efekt mbrojtës ndaj eshtrave.

Burime të karotenoideve janë pemët me ngjyrë portokalli, karotat, kajsitë, mangot, patatet, spinaqi, lakra jeshile etj. Ndërsa likopeni në sasi më të madhe është i pranishëm në domate, gujava dhe grejpfrut. Salmoni, butaku, qumështi dhe vezët, janë po ashtu burime të karotenoideve.

[RaPSouL]

Gjeni përgjegjës për skizofreni

Dy studime të reja kanë treguar se në kuadër të shkaktarëve të skizofrenisë, supozohet rol vendimtar luan një gjen.

Edhe pse afër 1% e popullatës botërore vuan nga kjo sëmundje e rëndë psikike, shumë pak dihet për skizofreninë, ndërsa shumë raste nuk diagnostikohen me kohë.

Shkencëtarët nga instituti mjekësor amerikan “Howard Hughes”, kanë zbuluar një gjen, për të cilin mendojnë se dëmton rritjen dhe zhvillimin e qelizave nervore, duke shkaktuar kështu simptoma, si halucinacionet, depresioni, idetë e marra dhe paranoja.

Gjeni është quajtur DISC1, ndërsa se është fajtor për skizofreninë, për herë të parë kanë treguar shkencëtarët pranë Universitetit të Edinburghut. Ky gjen ka veprim të ngjashëm me litiumin (i cili shfrytëzohet për mjekimin e euforisë) duke penguar lirimin e disa substancave kimike në tru.

“Ky hulumtim na ndihmon të kuptojmë saktë se si zhvillohet procesi në tru, dhe njëkohësisht na është ofruar mundësia për zgjidhjen e këtij problemi kur procesi ndodh në mënyrë të gabuar”, ka thënë udhëheqësi i studimit, Dr. William Hennad.