Informacione te nevojshme rreth shendetit

[RaPSouL]

Ushtrime të thjeshta për mendje të shëndoshë

Një studim i zhvilluar në Kanada tregon se ushtrimet e rregullta aerobike te personat e moshuar përmirësojnë dukshëm aftësitë njohëse.

“Neurobiology of Aging “ njofton se të dhënat e grumbulluara nga participantët e moshuar mbi 65-vjeç, sugjerojnë se femrat fizikisht aktive kanë rezultate për 10% më të mira në testet për kujtesën, mendimin dhe inteligjencën.

Femrat të cilat kishin ushtruar me rregull, kanë pasur edhe shtypje më të ulët të gjakut dhe qarkullim shumë më të mirë të gjakut në tru, pohojnë shkencëtarët nga Universiteti i Calgaryt.

[RaPSouL]

Enzima që ndalon kancerin

Shkencëtarët kanë arritur të ndërtojnë modelin e plotë të enzimës, e cila ka për qëllim kontrollimin e rrjetit sinjalizues, bllokimi i të cilës mund të pengojë zhvillimin e kancerit.

Në një hulumtim nën mbikëqyrje të shoqatës britanike “Cancer Research UK”, me anë të kombinimit të disa metodave dhe modelimit, është krijuar modeli tredimensional interaktiv i enzimës ‘protein kinaza B’ (PKB).

PKB është rregulluesi kryesor i rrugëve sinjalizuese të cilat përcaktojnë sjelljen e qelizave. Gabimet në këtë rrugë krijojnë mundësitë për zhvillimin kancerit, kështu që vjen deri te aktivizimi i tepruar i kësaj enzime.

Ekspertët pohojnë se zbulimi, i cili shpjegon se si kjo enzimë vepron, do të krijojë ide në kuptimin e mekanizmit të protein kinazës B dhe në zhvillimin e terapive të reja të cilat do ta kenë shënjestër bllokimin e kësaj enzime.

[RaPSouL]

Vitamina D dhe aftësitë njohëse

Për herë të parë shkencëtarët kanë arritur të vërtetojnë lidhjen ndërmjet vitaminës D dhe aftësive njohëse.

Në një studim ku kanë marrë pjesë 2.000 participantë mbi 65-vjeçarë është treguar se sa më i ulët të jetë niveli i vitaminës D, aq më shumë humben funksionet njohëse.

Në raport me personat të cilët kishin nivelin optimal të vitaminës D, personat me nivel më të ulët të kësaj vitamine kishin qenë të prirë që t’i kenë dyfish më të dobëta funksionet e kujtesës, mendimit dhe inteligjencës.

[RaPSouL]

Mos vozitni nën ndikimin e barnave!

Një numër i madh i aksidenteve ndodhin si pasojë e përdorimit të barnave të ndryshëm, ndërsa llogaritet se një numër i madh i shoferëve të cilët janë të përfshirë në aksidentet frontale kanë qenë nën ndikimin e barnave të cilët zvogëlojnë aftësitë vozitëse.

Madje edhe barnat, të cilat duket se nuk janë aspak të rrezikshme (p.sh. barnat të cilat zvogëlojnë simptomat e gripit) shtojnë rrezikun nëse jeni duke vozitur.

Ne aftësitë vozitëse më shumë ndikojnë anksiolitikët (barnat për qetësim). Ka raste të shumta kur këto barna gjenden në gjakun e shoferëve që pësojnë aksidente. Këto barna ngadalësojnë reagimin e shoferit dhe pengojnë në vlerësimin e largësisë ndërmjet dy automjeteve të cilat janë në lëvizje.

Në grupin e barnave të cilët duhet t’i shmangin shoferët, janë edhe antidepresivët (kundër depresionit), pastaj analgjetikët e fortë (kundër dhimbjes), antihistaminikët (kundër alergjisë) etj.

Supozohet se nga 3% deri në 7% e aksidenteve ndodhin si pasojë e përdorimit të këtyre barnave para dhe gjatë vozitjes.

Duhet që të kalojnë së paku 12 orë nga marrja e këtyre barnave deri te momenti i vozitjes. Nëse vendosni të vozitni më herët rrezikoni veten dhe të tjerët. Llogaritet se afër 10% e shoferëve përdorin ndonjë lloj të barnave për qetësim.

[RaPSouL]

Lëngu i mollës dhe sëmundja Alzheimer

Gjithnjë e më shumë po zbulohen fakte që me anë të ushqimit mund të shmanget zvogëlimi i funksioneve njohëse, të cilat shkaktohen si pasojë e plakjes, ndërsa në disa raste parandalojnë edhe shfaqjen e sëmundjes Alzheimer.

Shkencëtarët nga Universiteti i Massachusettsit me anë të analizave laboratorike te minjtë kanë zbuluar se lëngu i mollës pengon humbjen e funksioneve njohëse, të cilat shfaqen te minjtë e moshuar.

Gjatë periudhës një mujore minjtë kanë marrë ekuivalent të dy gotave të lëngut të mollës, ndërsa në këtë periudhë kanë prodhuar shumë më pak proteinë e cila konsiderohet përgjegjëse për formimin e të ashtuquajturave ‘pllaka senile’, të cilat janë të pranishme te personat me sëmundjen Alzheimer.

Autorët e studimit pohojnë se e njëjta gjë pritet të ndodhë edhe te eksperimentet në njerëz.

Sëmundja Alzheimer apo demenca senile është sëmundje degjenerative ku humben funksionet njohëse, në radhë të parë kujtesa, mendimi dhe inteligjenca.

[RaPSouL]

A e zgjat jetën ngrënia e pakët?

Ekspertët rekomandojnë që nëse keni peshë të tepruar hani më pak ushqim për të jetuar më gjatë, ndërsa nëse keni trup të hollë, atëherë shmangia e kalorive do të ishte e pakuptimtë, madje shumë e rrezikshme shëndetin tuaj.

Kohëve të fundit zvogëlimi i konsumimit të kalorive është bërë shumë i popullarizuar si metodë për zgjatjen e jetesës, prandaj edhe personat e shëndetshëm dhe me peshë normale e përcjellin këtë strategji, e cila për ata është e gabuar.

Për këtë arsye, shkencëtarët, në bazë të disa eksperimenteve të fundit, rekomandojnë që dieta dhe restrikcioni i kalorive janë të dobishme te personat, të cilët kanë tepricë kilogramësh, ndërsa të dobëtit dhe ata me peshë normale nuk duhet të qëndrojnë pa ngrënë.

[RaPSouL]

Çaji i gjelbër dhe kanceri i gjirit

Konsumimi i rregullt i çajit të gjelbër mund ta zvogëlojë rrezikun e paraqitjes së kancerit të gjirit për 12%.

Shkencëtarët kanë ardhur në këtë përfundim, pasi kanë analizuar shprehitë ushqyese dhe të konsumimit të çajit te 3.454 femra të sëmura me kancer të gjirit dhe 3.474 femra të shëndosha, të moshave ndërmjet 20 dhe 74 vjeçare.

Supozohet se meritor për këtë efekt pozitiv të çajit të gjelbër janë polifenolet e pranishme në të.

[RaPSouL]

Ekstrakti i farave të rrushit mjekon leukeminë

Shkencëtarët nga Universiteti i Kentuckyt kanë zbuluar se ekstrakti i fituar nga farat e rrushit lufton qelizat e leukemisë, ndërkaq ky ekstrakt nuk i dëmton qelizat e shëndosha.

Supozohet se ky ekstrakt vepron duke aktivizuar proteinën JNK, e cila rregullon ciklin jetësor të qelizës.

Deri më tani është ditur se ekstrakti i farave të rrushit, në studimet ‘in vitro’ jep rezultate të mira te karcinoma e lëkurës, gjirit, mushkërive, lukthit, zorrës së trashë dhe prostatës, ndërsa ky është studimi i parë i cili tregon veprimin pozitiv edhe në mjekimin e leukemisë.

[RaPSouL]

Acidet omega-3-yndyrore në menopauzë

Acidet omega-3-yndyrore lehtësojnë tendosjen psikologjike dhe simptomat e depresionit, nga të cilat shpesh vuajnë femrat para menopauze dhe ato të cilat janë në menopauzë.

Në studim kanë marrë pjesë 120 femra të moshave ndërmjet 40 dhe 55 vjeçare. Ato janë ndarë në dy grupe: grupi i parë çdo ditë kanë marrë kapsula të cilat përmbanin 1 g acid eikozapentaenoik (EPA), acid i rëndësishëm omega-3-yndyror. Ndërsa grupi tjetër kanë marrë placebo

Pas tetë javësh shkencëtarët kanë vërejtur përmirësim të dukshëm në grupin i cili ka marrë acide omega-3-yndyrore. Te këta femra janë lehtësuar dukshëm simptomat e depresionit dhe tensionit psikik.

[arbereshi_niko]

Di gje njeri, se per ç'fare perdoren ( ne mjeksi ) farat e molles?