Informacione te nevojshme rreth shendetit

[RaPSouL]

Mposhtni sëmundjen Alzheimer me ushtrime

Ushtrimet trupore të cilat përfshijnë nxehjen dhe zgjatjen, dhe të cilat kryhen së paku tri herë në javë me nga 75 minuta mund të përmirësojë gjendjen e pacientëve me demencë.

Ushtrimet e organizuara të cilat janë të dizajnuara për përmirësimin e forcës, fleksibilitetit, lëvizshmërisë dhe koordinimit, mund ta përmirësojnë gjendjen e përgjithshme të pacientët me sëmundjen Alzheimer (demencën senile).

Personat me këtë sëmundje të cilët i kanë të kufizuara mundësitë fizike, janë shumë pak të aftë për kryerjen e aktiviteteve të përditshme, gjë që ndikon në kualitetin e tyre jetësor.
Shkencëtarët nga Universiteti i Madridit (“Universidad Europa de Madrid”) kanë analizuar ndikimin e ushtrimeve fizike te pacientët me sëmundjen Alzheimer, femra dhe meshkuj me moshë mbi 70 vjeç, brenda 12 javësh. Ushtrimet kanë qenë të thjeshta: nxehje, zgjatje, ecje, lëvizje të nyjave, trajnime me gomë elastike, si edhe trajnime të koordinimit me anë të topit.

Rezultatet kanë treguar përmirësim të dukshim të fuqisë dhe fleksibilitetit, edhe të pjesës së sipërme edhe të pjesës së poshtme të trupit; aftësi të mbajtjes së baraspeshës, aftësi të ecjes më të lehtë dhe qëndrimit në një pozitë. Në këtë mënyrë këta pacientë ka krijuar aftësi për të kryer aktivitetet e përditshme, shkuarjen në tualet, çuarjen nga krevati, mbajtjen e higjienës personale etj.

[RaPSouL]

Ushtrimet trupore mbrojnë nga osteoporoza

Ushtrimet trupore në moshën e adoleshencës ndihmojnë në ruajtjen e shëndetit të eshtrave pas menopauzës, njoftojnë shkencëtarët japonezë.

Revista “British Journal of Sports Medicine” ka publikuar rezultatet e një studimi ku kanë marrë pjese 46 femra të moshës mbi 52-vjeçare, të cilat iu janë përgjigjur pyetjeve të ekspertëve nga Universiteti i Suzukit në lidhje me aktivitetin trupor në moshën e adoleshencës

Në bazë të këtyre rezultateve është treguar se aktiviteti trupor në moshë të re, siç është p.sh. notimi, në moshën e mëvonshme iu ndihmon femrave në ruajtjen e shëndetit të eshtrave dhe në këtë mënyrë pengon zhvillimin e osteoporozës.

[RaPSouL]

Infeksionet e rrugëve të frymëmarrjes

Dimri dhe ditët me lagështi, rritin numrin e të infektuarve me infeksione të rrugëve të frymëmarrjes, ndërsa kjo ndodh si pasojë e rënies së imunitetit dhe ndikimit të kushteve sezonale për favorizimin e zhvillimit të infeksioneve virale.

Infeksionet virale rrugëve të frymëmarrjes janë shkaku më i shpeshtë i sëmundjeve te njeriu (si te fëmijët po ashtu edhe tek të rriturit). Këto infeksione janë infeksione ngjitëse. Bartja e tyre bëhet nga personi i sëmurë te i shëndoshi, me anë të spërklave të ajrit ku gjendet virusi.

Nga infeksionet e traktit respirator rrezikohen të gjitha grupmoshat. Megjithatë rreziku kryesor ekziston te të sëmurët me sëmundje kronike, në radhë të parë të mushkërive, pastaj me sëmundje të rënda të zemrës, sëmundje të gjakut dhe të sëmurët me sëmundje të tjera kronike si dhe me imunodeficiencë.

Këto infeksione mund të jen të lehta, të mesme ose të rënda. Mund të shfaqen pneumonitë e ndryshme virale te fëmijët të cilët mund të jenë si komplikime të gripit ose parainfluencës, bronkiti, bronkioliti, format e rënda të pneumonisë të cilat mund të shkaktojë pamjaftueshmëri respiratore.

Pasqyra klinike tek infeksionet virale karakterizohet me shkuarje të hundëve, dhimbje ne fyt, kollitje, plogështi, kokëdhimbje, dhimbje të muskujve, ethe, temperaturë etj., ndërsa në rastet më të rënda edhe vështirësi në frymëmarrje.

[RaPSouL]

Ndotësit e ndryshëm zvogëlojnë numrin e spermatozoideve

Vitet e fundit, studimet e ndryshme tregojnë një shkallë të uljes së aftësive riprodhuese të meshkujve në moshë të mesme, si dhe ekzistojnë të dhëna për rritje të numri të sëmurëve me kancer të testiseve.

Ekspertët pohojnë se kjo ndodh si rezultat i substancave kimike të pranishme gati në të gjitha produktet e përdorimit të përditshëm, si dhe ato të cilat përdoren për zbutjen e plastikës, të cilat veprojnë direkt në organizëm, duke shkaktuar ndryshime në sistemin hormonal.

Në dy dekadat e fundit, shkencëtarët francezë kanë llogaritur se vetëm kryeqytetasit e Francës kanë të zvogëluar për 40% numrin e spermatozoideve, ndërsa spermatozoidet ekzistuese kanë formë të çrregullt si edhe lëvizshmëri më të vogël.

Produktet e ndryshme kozmetike, sapunët, parfumet, kremrat, substancat e pranishme në plastikë etj., kanë ndikim negativ në numrin e qelizave seksuale mashkullore, dhe në këtë mënyrë zvogëlojnë aftësinë riprodhuese të tyre. Kështu, shumë spitale në Francë, duke pasur parasysh se produktet e lartpërmendura mund të kenë ndikim te foshnja e palindur ende (fetusi), kanë vendosur disa rregulla të cilat e ndalojnë përdorimin e këtyre substancave edhe gjatë shtatzënisë.

[RaPSouL]

Adhuruesit e pornografisë janë depresivë

Personat të cilët rregullisht vizitojnë sajtet pornografike, janë tipa më depresivë dhe më anksiozë se të tjerët. Megjithatë nuk është vërtetuar nëse, pikërisht gjendja depresive dhe e ankthit, i shtyn ata ta ‘konsumojnë’ pornografinë, ose ndodh e kundërta.

Personat të cilët kalojnë shumë kohë në faqet e internetit, të cilat kanë përmbajtje pornografike janë të prirë më tepër që të kalojnë në depresion, njoftojnë shkencëtarët australianë.

Ata kanë studiuar mbi 1.300 vullnetarë në Melbourne, të cilët kanë qëndruar më shumë se 12 orë në faqet pornografike të internetit. Ndërsa rezultatet kanë treguar se më shumë se një e katërta e tyre (më shumë se 25%) vuanin nga shenjat klinike të depresionit.

Tridhjetë për qind e tyre kishin nivel të lartë të ankthit, ndërsa 35% kishin të zhvilluar një shkallë të caktuar stresi, nga vlera mesatare deri në një shkallë të larë. Prania e ankthit dhe stresit ka qenë në proporcion me kohën e kaluar nëpër faqet pornografike: sa më gjatë që kanë përcjellë këto sajte aq më të shprehura kanë qenë simptomat dhe shenjat e anksiozitetit dhe stresit.

Mirëpo ky studim nuk ka arritur ta zbulojë nëse personat anksiozë dhe depresivë janë të prirë ndaj pornografisë, ose nëse ndodh e kundërta, se pornografia nxit paraqitjen e stresit, ankthit dhe depresionit.

[RaPSouL]

Më mirë gjumë se makiato

Ekspertët pohojnë se për të pasur një ditë më të mirë dhe për të qenë më të kthjellët duhet që në vend të kafesë në mesditë të bëni një sy gjumë.

Pas disa eksperimenteve, shkencëtarët kanë ardhur në përfundim se gjumi ka ndikim shumë më të mirë në nxitjen e efektivitetit trupor dhe mendor sesa kafeina.

Një grup prej 60 vullnetarësh janë përfshirë në një eksperiment, ku disa prej tyre kanë fjetur afër dy orë, disa kanë marrë tableta me 200 mg kafeinë (sa dy filxhanë kafe), ndërsa të tretët kanë marrë placebo.

Më vonë të gjithë këta participantë u janë nënshtruar disa testeve ku kanë qenë të obliguar në zgjidhjen e detyrave. Grupi i participantëve të cilët kanë fjetur kanë qenë shumë më të suksesshëm se dy grupet tjera.

[RaPSouL]

Konsumimi i një veze çdo mëngjes është i dëmshëm

Ekspertët pohojnë se konsumimi madje i vetëm një veze në ditë mund të shkaktojë diabet.

Edhe pse ekziston mendimi se vezët janë të shëndetshme për shkak se janë përplot me vitamina, një studim më i ri i realizuar nga shkencëtarët në Boston, ka treguar se nuk është tamam ashtu.

Studimi ka përfshirë analizën e 57.000 participantëve, femra dhe meshkuj, ndërsa rezultatet kanë treguar se konsumimi i vetëm një veze në ditë shton rrezikun për zhvillimin e diabetit për 60% te meshkujt dhe për 77% te femrat.

Diabeti është njëra nga sëmundjet më të përhapura në botën bashkëkohore, ndërsa shkaktohet si rezultat i një çrregullimi, i cili shkakton rritjen e nivelit të sheqerit në gjak.

[RaPSouL]

Mungesa kronike e gjumit sëmundje e kohës moderne

Në kohën moderne njerëzit flenë më pak se kurrë, ndërsa fajtori kryesor është mënyra dhe stili jetësor i kohës së sotme. Edhe pse mungesën e gjumit mund ta kompensojmë gjatë vikendeve, megjithatë pasojat të cilat i lë pagjumësia në shëndet, do të vërejmë më vonë.

Një hulumtim i realizuar këtë vit në SHBA ka treguar se të rriturit flenë mesatarisht 6 orë e 48 minuta brenda natës, pavarësisht se rekomandimet shkencore janë që njeriu të flejë tetë orë në ditë.

Një tjetër element negativ sa i takon fjetjes, është koha e gjumit. Shuam njerëz si pasojë e mënyrës së tyre jetësore, nuk flenë tërë natën ndërsa flenë ditën. Duke pasur parasysh faktin që gjumi më kualitativ bëhet natën, kjo mënyrë jetësore mund të shkaktojë ndryshime metabolike. Shkencëtarët këtë veti e kanë emërtuar si “sindroma e shtyrjes së gjumit”.

Në kohën kur jetojmë, në shumë vende të botës ekziston e ashtuquajtura “bulimi a gjumit”. Kjo është gjendje e tillë kur njeriu fle mesatarisht pesë apo gjashtë orë në ditë ,ndërsa gjumin e humbur e kompenson gjatë vikendeve. Një veprim i tillë aktualisht është i pranueshëm edhe për mjekët, pasi që ata nuk e dinë se çka ndodh me një person, i cili mund të jetojë me vite të tëra në mungesë kronike të gjumit.

[RaPSouL]

Kremrat hidratuese dhe kanceri i lëkurës

Kremrat hidratuese të cilat çdo ditë i përdorin miliona njerëz kanë shtuar rrezikun për zhvillimin e llojeve të ndryshme të kancerit të lëkurës.

Hulumtimet e realizuara nga një grup shkencëtarësh në Universitetit Rutgers në New Jersey kanë treguar se kremrat hidratuese kanë shtuar veprimin kancerogjen të rrezeve të diellit, gjegjësisht të rrezeve ultravjollce, ndaj të cilave janë ekspozuar minjtë eksperimentalë.

Eksperimentet janë realizuar në atë mënyrë që minjtë janë ekspozuar ndaj një sasie të madhe te rrezeve ultravjollce, aq sa njeriu mund të absorbojë gjatë jetës së tij, dhe pastaj janë lyer me kremra hidratues. Rezultatet kanë treguar se këto kremra kanë rritur rrezikun për shfaqjen e ndonjë lloji të tumorit për 69%.

Pas këtij eksperimentimi, autorët e studimit kanë pohuar se në të ardhmen veprimi negativ i këtyre kremrave duhet të vërtetohet edhe te njeriu. Ndërsa deri sa të ndodh kjo ata rekomandojnë që këta kremra duhet të përdoren sa më rrallë.

[RaPSouL]

Piperina rregullon disponimin

Piperina është alkaloidi kryesor i piperit të zi, të cilit edhe i vishen shumë efekte farmakologjike, si antiinflamator, alangjetik ndërsa parandalon edhe të thatin në stomak.

Hulumtimet e reja laboratorike në minj ia përshkruajnë kësaj substanceje edhe një efekt të rëndësishëm, atë antidepresiv. Gjatë eksperimenteve është vërejtur përmirësim i funksioneve konjitive (njohëse).

Por, para se në treg të paraqitet ushqimi funksional me piperin për disponim të mirë, duket të bëhet edhe disa hulumtime shtesë, pasi disa studime të tjera, të zhvilluara po ashtu në kafshë eksperimentale, kanë treguar se piperina mund të jetë edhe toksike për sistemin reproduktiv mashkullor.