Informacione te nevojshme rreth shendetit

[RaPSouL]

Sekretet e një fytyre të bukur mashkullore

Është më se e vërtetë: meshkujt e sotëm e kanë hedhur tashmë tej tabunë e kujdesit për bukurinë e tyre dhe pretendojnë të kenë pamje të jashtme sa më të këndshme. Kështu duke u ndihmuar jo vetëm nga produktet e ndryshme kozmetike por edhe përmes një rruajtjeje të saktë të fytyrës, ata kanë filluar të zotërojnë lëkurë gjithnjë e më të butë, pa puçrra dhe zona të thata.

Sipas statistikave rreth 89% e meshkujve vazhdojnë të preferojnë brisqet e ndryshëm për mjekrën dhe mustaqet, ndërsa vetëm 11% e tyre përdorin makinat elektronike. Njëkohësisht rezulton se rreth 40% e meshkujve përdor në masë të gjerë produkte për fytyrën. Por cilat janë vallë sekretet për të pasur një rruajtje sa më të saktë të saj?

Lloji i lëkurës

Hapi i parë ka të bëjë me gjetjen e llojit të lëkurës dhe të qimeve që mund të ketë një mashkull. Për këtë ai duhet të shikohet me kujdes në pasqyrë dhe të ndjekë ecurinë dhe pasojat e rruajtjes për çdo ditë.

• Nëse lëkura juaj shkëlqen në pjesën e hundës dhe në ballë por në faqe është e thatë, atëherë keni lëkurë të përzier ose të yndyrshme.

• Nëse lëkura juaj duket fiziologjike, nuk shkëlqen por nuk duket as e thatë, atëherë keni lëkurë normale.

• Nëse lëkura juaj është e thatë, e prirë që të shqitet në copa të vogla, atëherë keni lëkurë të thatë.

Hapi i dytë që duhet të ndërmerrni ka të bëjë me gjetjen e llojit të qimeve që keni në fytyrë.

• Nëse ato janë tepër të dendura, në ngjyrë të errë, të egra dhe ridalin pak orë pasi jeni rruar, atëherë keni "mjekër" (qime) të fortë.

• Nëse qimet e mjekrës janë të dendura, të zeza ose kafe, disi të ashpra dhe mjafton që të rruheni çdo mëngjes për të qenë në formë të mirë për 24-orëshin e ardhshëm, atëherë padyshim që keni qime me fortësi mesatare.

• Nëse qimet e juaja janë të dendura, por kanë edhe hapësira mes tyre, nuk janë të egra dhe nuk rriten shpejt, atëherë keni qime të buta.

Zgjedhja e produkteve

Në përputhje me llojin e lëkurës dhe të qimeve mund të zgjidhni produktet e duhura për rujtje sikurse edhe metodën e përshtatshme.

• Nëse lëkura muaj është e yndyrshme ose e përzier është më mirë që të rruheni me briskun klasik të rrojës dhe rrallë të përdorni makinën elektrike.
Në këto lloj lëkure është e këshillueshme që të përdoren produkte për kujdesin e fytyrës në formë xheli dhe jo shkume. Por kështu duhet të përdoret edhe "after shave" (pas rrohjes) në formë xheli.

• Nëse lëkura juaj është normale, mund të përdorni si briskun tradicional ashtu edhe makinën elektrike të rrojës. Por, nga seria e produkteve të pas rrojës është e këshillueshme që të shmangni përdorimin e atyre me alkool, të paktën jo përditë. Në vend të tyre mund të përdorni produkte në formë kremi.

• Nëse lëkura juaj është e thatë dhe e ndjeshme mund të përdorni gjithnjë makinën elektrike dhe më pas, si “after shave”, një nga produktet në formë kremi.

• Nëse keni qime të forta, të cilat rriten shpejt, është e këshillueshme që të kombinoni briskun me makinën. D.m.th. të rruheni çdo mëngjes me brisk,
pasi të keni bërë një shkumë të mirë, ndërsa pasdite përdorni për "freskim" makinën elektrike.

• Nëse qimet tuaja nuk janë kaq të vështira dhe nuk dalin shpejt përdorni vetëm makinën elektrike dhe më pas "after shave" që i kombinon lëkurës suaj.

Veçantitë

Lëkura e meshkujve nuk është e njëjtë me atë të femrave dhe për këtë arsye firmat e ndryshme kanë krijuar dy seri produktesh kozmetike. Pra, është e detyrueshme që të zgjidhni kremra dite ose produkte rruajtjeje që i takojnë serisë mashkullore. Por çfarë e ndryshon lëkurën mashkullore nga ajo femërore?

1. Shtimi në ritme të larta i hormoneve mashkullore gjatë periudhës
së pubertetit krijon terren të përshtatshëm për rritjen në sasi të madhe të qimeve në fytyrën mashkullore. Si rrjedhim lëkura do të humbasë butësinë e dikurshme.

2. Po kështu gjatë pubertetit ka më shumë mundësi për daljen e puçrrave, gjë e cila prish njëtrajtshmërinë e lëkurës.

3. Procesi i "mbushjes" së lëkurës me yndyrë vazhdon deri në moshën 80-vjeçare.

4. Indet e shumta mbrojtëse brenda lëkurës reflektojnë trashësi më të madhe.

Dush skocez

Shumë duhet të kenë dëgjuar për këtë lloj dushi, por nga praktika rezulton se pak e përdorin atë. Ne ju ofrojmë mundësinë të gjithë meshkujve që t’i japin fytyrës së tyre një kënaqësi dhe pamje të mrekullueshme, duke ndjekur këto hapa.

Nëse rruheni gjatë kohës që bëni dush dhe më e butë, ndërsa rruajtja do të bëhet më e thellë. Përveç të tjerash avulli dhe uji i ngrohtë i ushqejnë qimet me lagështirë dhe përmirësojnë gradualisht cilësinë e tyre, sidomos kur keni qime të forta.

Menjëherë më pas shpëlajeni lëkurën me ujë të ftohtë, i cili do të ndihmojë të mbyllen poret dhe të largohet çfarëdo dëmtimi (çarje etj.) që mund të jetë shkaktuar nga brisku.

[RaPSouL]

Rrushi i mirё pёr alkoolistёt

Studimet mё tё reja kanё zuluar se pёrbёrёsi i verёs sё kuqe, reveratrol, mbron nga yndyrosja e mёlçisё, sёmundje e cila shpesh lidhet me alkoolizmin.

Studimet janё zhvilluar nё minj, andaj ende ёshtё nё pyetje nёse tё njёjtat rezultate mund tё vlejnё edhe pёr njerёzit, por autorёt janё shumё optimistё.

Pasi alkoolistёt duket tё pёrballen me uljen e konsumimit tё tepёrt tё alkoolit, shkencёtarёt mendojnё se konsumimi i ushqimit tё pasur me resveratrol, siç ёshtё rrushi i zi, ёshtё njё zgjidhje ideale pёr ta.

[RaPSouL]

Personat me Parkinson kanё mungesё tё vitaminёs D

Disa hulumtime tё reja kanё zbuluar se mungesa e vitaminёs D ёshtё e pranishme tek shumica e njerёzve tё cilёt vuajnё nga sёmundja e Parkinsonit.

Sipas kёtyre studimeve, mungesa e kёsaj vitamine pёrveç te pacientёt me Parkinson ishte edhe mё e lartё tek pacientёt qё vuanin nga sёmundja Alzheimer.

Shkencёtarёt mendojnё se shkaktar i pjesёrishёm i kёsaj mungese ёshtё lёvizja e kufizuar dhe me kёtё edhe dalja mё e rrallё nё diell e kёtyre personave.

Por, duket se sasitё e pamjaftueshme tё vitaminёs D ndikojnё edhe nё progresin e sёmundjes, edhe pse ende nuk ёshtё vёrtetuar mekanizmi i veprimit.

[RaPSouL]

Mosngopja me ushqim sjell trashjen

Një studim i ri i realizuar nga Universiteti i Teksasit, i Oregonit dhe Yale, ka treguar se shkaktari kryesor i trashjes ehtë humbja e ndjenjës për kënaqësi gjatë konsumimit të ushqimit duke bërë që të hamë edhe më tepër për ta arritur atë pragun e kënaqësisë (ngopjes) në tru.

Në studim kanë marrë pjesë femra të moshës së re, nga 14 deri 22 vjeçare, dhe është treguar se ato e kanë variantën gjenike Taq1A A1 alel dhe zvogëlimin e aktivitetit në striatumin dorzal ku gjenden rrugët për arritjen e pragut të ngopjes.

Femrat janë trashur gjithnjë e më shumë s i pasojë e mos arritjes së kënaqësisë gjatë ushqimit dhe kanë vazhduar të hanë më tepër për ta arritur këtë prag, dhe pastaj pesha nuk ka munguar.

[RaPSouL]

Acidi yndyror i lidhur me demencën

Duke kontrolluar nivelin e një lloji të acidit yndyror në tru mund të ndikohet në sëmundjen Alzheimer (demencën), sugjeron një studim i shkencëtarëve amerikanë.

Testimet në minj kanë treguar se me uljen e nivelit të acidit kyç yndyror në hipokampus me ndihmën e enzimat të quajtur PLA2, mund t’i lehtësojë vështirësitë e të mbajturit mend dhe çrregullimeve në sjellje, të cilat janë pasojë e sëmundjes Alzheimer.

Shkencëtarët nga Universiteti i Kalifornisë kanë shtuar se mbi nivelin e acideve yndyrore në tru mund të veprohet me anë të ushqimit dhe me anë të barnave.

Hapi i ardhshëm për vërtetimin e këtij zbulimi në kontrollimin e sëmundjes Alzheimer është të shikohet nëse e njëjta gjë ndodh edhe te njerëzit.

[RaPSouL]

Evito problemet me gjëndrën tiroide

Virozat nuk prekin vetëm rrugët e frymëmarrjes, por dhe gjëndrën tiroide. Shenjat janë të ngjashme me gripin, prandaj shpesh neglizhohet dhe diagnostikimi bëhet vonë, kur tashmë sëmundja ka avancuar.

Gjatë luhatjeve të temperaturave dhe sidomos ditëve të ftohta dhe me lagështi, probleme me gjëndrën tiroide, veçse këto më tepër se me funksionin e kësaj gjëndre, lidhen me infeksione të ndryshme që mund të shfaqen në të. Gjëndra tiroide si çdo organ tjetër i organizmit mund të ndodhë të “sulmohet” nga agjentë të ndryshëm virusalë ose mikrobialë, të cilët ndikojnë në shfaqjen e infeksioneve nga më të ndryshmet. Për pasojë ajo mund të preket. Duke qenë se këta agjentë janë “më të fortë” gjatë stinëve të ftohta dhe me lagështi ndodh që këto infeksione që prekin tiroiden të jenë mjaft të pranishme në këtë periudhë.

Ankesat që shfaqin të sëmurët

Zakonisht sëmundja fillon me shenja të përgjithshme, të ngjashme me ato të një gripi. Sëmundja mund të nisë me ethe, dobësi të theksuar trupore, dhimbje muskulore, mungesë oreksi. Në këtë kohë pacienti mund të ndjejë dhimbje të lokalizuara mbi vetë gjëndrën tiroide, por shpesh ato përhapen në drejtim të nofullës ose veshit. Në disa mund të shfaqet vështirësi në gëlltitje. Por mund të ndodhë që gjëndra tiroide dhe muskujt e gjëndrave limfatike të qafës të rriten në volum si pasojë e procesit inflamator.

Ndërlikimet

Nëse nuk trajtohet në kohë kjo sëmundje, mund të ndodhë një ulje e funksionit të tiroides, po ashtu ulje e normës së prodhimit të hormoneve të saj. Kapja e jodit radioaktiv paraqitet më e pakët, niveli i TSH (hormonit thyreo-stimulues) mund të jetë në nivele më të larta sesa norma. Të gjitha këto ndryshime sjellin dhe ndërlikime më serioze në organizëm që duan kohë të trajtohen. Përveç kësaj ndodh shpesh që personat të cilët bëjnë infeksione të tiroides kanë edhe probleme të infeksioneve kronike siç janë: tonsilitet kronikë, faringitet, infeksione të mishrave të dhëmbëve, sinusite, etj.

Parandalimi

Parandalim të mirëfilltë nuk ka, por gjithsesi ne rekomandojnë një sërë masash që konsistojnë në forcimin e sistemit imunitar, sepse është e vetmja mënyrë për t’u mbrojtur nga “sulmi” i mikrobeve patogjene. Po ashtu këshillohet që çdo simptomë të merret në konsideratë, pasi në këtë mënyrë mund të parandalohen ndërlikimet, të cilat duan kohë të trajtohen.

Çfarë mund të përdoret për mjekim?

Nëse infeksioni i gjëndrës tiroide (thyroiditit), kapet shpejt dhe në kohë, është i thjeshtë. Fillimisht mund të përdoren medikamente për të qetësuar dhimbjet, temperaturën dhe dobësinë e përgjithshme. Pra trajtimi është sintomatik, në varësi të shenjave dhe shqetësimeve që shfaqen. Përdoret mjekim antiinflamator dhe në disa raste kur prekja e gjëndrës tiroide është më e shprehur mund të përdoren kortizonikët, të cilët kanë efekt mjaft të mirë si për të shuar procesin inflamator, ashtu edhe për të shkurtuar ecurinë e sëmundjes.
Të sëmurët që kalojnë thyroiditë duhet të qëndrojnë për disa kohë nën kontroll mjekësor për të kapur ose parandaluar ndonjë zbulim të formave të tjera të thyroiditit ose ajo çka duhet pasur parasysh, është instalimi i një hypothyroze.

[RaPSouL]

Moshat “aktive” më të prekura nga nervi shiatik

Moshat e reja dhe personat me profesione, që kërkojnë ngritje peshash, janë më të predispozuar të preken nga sëmundja e nervit shiatik. Mjekët shtojnë, se “viktimat” e sëmundjes kohët e fundit vihet re të jenë bërë dhe ata që kanë profesione, që kërkojnë një qëndrim pa lëvizur për disa orë. Në një intervistë për “Panorama”, Sokrat Xhaxho, Doktor i Shkencave Mjekësore, neurolog në shërbimin e Neurologjisë të QSU “Nënë Tereza”, shpjegon se cilët janë faktorët që ndikojnë në shfaqjen e sëmundjes, si mund të trajtohet dhe parandalohet:
Kush preket më tepër nga nervi shiatik?
Nervi shiatik haset më tepër në moshën aktive, te të rinjtë që punojnë në profesione që kërkojnë ngritje peshash, të tilla si ndërtim, ngarkim-shkarkim, por dhe ata që bëjnë ecje të gjata në këmbë dhe qëndrojnë në këmbë për një kohë të gjatë. Kohët e fundit është vënë re një tendencë në rritje e rasteve te personat, që qëndrojnë për një kohë të gjatë në një pozicion të palëvizur, siç mund të jetë përpara kompjuterit, timonit, makinës qepëse me orë të tëra. Preken më tepër meshkujt, megjithatë është rritur dhe numri i femrave, kryesisht tek amvisat që bëjnë punë në ambientet e shtëpisë me ngritje peshash, etj.
Si shfaqet sëmundja?
Mekanizmi është i tillë që një presion i vazhdueshëm si ai i peshave të rënda mbi disqet intervertebror, në një vend të caktuar të kolonës lumbare që zakonisht janë L4-L5, ose L5, S1 më rallë në atë L3-L4, bëjnë që disqet të shfaqin edema, të inflamohen ose plasariten. Këto fenomene bëjnë që të ngacmohet rrënja e nervit (nga edema ose inflamacioni, ose nga fragmente të diskut të copëtuar(fragmentizuar). Fragmente të diskut të copëtuar bien në kontakt me rrënjën e nervit shiatik dhe në këtë rast kemi të bëjmë me hernie diskale. Por peshat e rënda nuk janë faktorët e vetëm që e favorizojnë shfaqjen e kësaj sëmundjeje, të tilla janë: infeksionet e ndryshme virale ose bakteriale, shtypjet nga tumoret e kolonës, procesi metabolike si diabeti i sheqerit, abuzimi me alkoolin, probleme të ndryshme të tiroides, etj.
Cilat janë shenjat karakteristike të kësaj sëmundjeje?
Sëmundja manifestohet me dhimbje të forta në fund të kolonës lumbare, të cilat në pjesën më të madhe janë dhimbje të menjëhershme dhe i sëmuri ankohet me shprehjen: këputa mish. Shpesh herë para kësaj dhimbjeje referohen ngritje peshe jashtë forcës së tyre. Dhimbja shfaqet në zonën mediale dhe përhapet në pjesën e tules (regjionin gluteal), në këmbë, në pjesën mbrapa ose anash këmbës. Nga mënyra e dhimbjes ndikohet në përcaktimin e topografisë së nivelit të shtypjes së nervit shiatik.
Në shumicën e rasteve dhimbja është e fortë, ka karakter mekanik Dhimbja ka karakter mekanik që do të thotë se dhimbja acarohet d.m.th., shtohet jo kur i sëmuri shtrihet në shtrat, por ajo acarohet kur i sëmuri qëndron në këmbë ose ecën dhe kjo dhimbje qetësohet kur i sëmuri qëndron shtrirë (kolona në pozicion horizontal). Shpesh dhimbja kalon brenda 24 orëve dhe qetësohet me paracetamol apo me antiinflamatore jo steroidë si: (voltaren, ibuprofen, etj). Në pjesën dërrmuese i sëmuri i drejtohet mjekut për trajtim të mëtejshëm.
Çfarë ekzaminimesh bëhen në këto raste?
Në këto raste rekomandohet bërja e një radiografie. Ka raste kur te ky kontingjent pacientësh, mund të shfaqet paraliza d.m.th., pacienti nuk arrin dot të ecë me thembra ose në majë të gishtave. Në këto raste duhet shkuar urgjent te mjeku për të bërë një skaner të kolonës, që në gati 100% të rasteve konfirmon diagnozën e hernie diskales. Në këto raste kërkohet ndërhyrja kirurgjikale në mënyrë që të çlirohet nga hernia, sepse në këtë rast mostrajtimi bën që nervi të shtypet, të ndodhin ndryshime të parikthyeshme dhe këmba të paralizohet. Këto raste janë disi më të rralla, por gjithsesi çdo episod duhet trajtuar me seriozitet në mënyrë që të shmangen pasoja të parikthyeshme.
Çfarë rekomandohet për trajtimin e këtyre sëmundjeve?
Për mjekim rekomandohen qetësues të dhimbjes që janë antiiflamatorët josteroidë dhe medikamente që ndikojnë në relaksimin e muskujve. Përveç kësaj, të sëmurëve u rekomandohet që të qëndrojnë 10 ditë deri në 2 javë në regjim shtrati. Në momentin që shfaqet dhimbja të qëndrojnë shtrirë në pozicion horizontal dhe të lëvizin këmbën lart-poshtë. Nëse mjekimi nuk jep rezultate, jepet mjekim dhe për 2 javë të tjera dhe nëse i sëmuri shfaq dhimbje shumë të forta, atëherë bëhet i domosdoshëm skaneri për të vendosur diagnozën dhe skemën e trajtimit.
Fizioterapia dhe aktiviteti sportiv sa ndihmojnë në trajtimin e sëmundjes?
Nga praktika e përditshme është parë se fizioterapia në mjaft raste është pjesë e skemës së mjekimit, ajo bashkëshoqëron medikamentet dhe ka efekte mjaft pozitive në trajtimin e sëmundjes. Përsa i përket palestrës nuk do e rekomandoja shumë, pasi në disa raste ushtrimet bëhen me ngritje peshash, që do të acaronin gjendjen e pacientit në vend që ta reduktonin dhimbjen.

[RaPSouL]

Ushqimet “aleate” për të trajtuar ulcerën në stomak

Për mjekët konsumimi i disa ushqimeve të caktuara, veprojnë në sekrecionet e stomakut në mënyrë të ndryshme, me pasojë dëmtimin e mureve të tij. Stina e verës përkon me një ndryshim të stilit të jetës dhe mënyrës së ushqyerjes. Në një intervistë për “Panorama”, mjekja gastro-hepatologe Albana Duni, jep disa këshilla se si duhet të jetë menyja dhe stili i jetës te ky kontingjent të sëmurësh:
Doktoreshë, te pacientët që vuajnë nga ulcera në stomak, shpesh rekomandohet ndryshimi i dietës dhe stilit të jetës. Si ndikojnë konkretisht këto dy faktorë?
Po. Është e vërtetë që pacientëve me ulcerë ne u rekomandojmë ndryshim në mënyrën e ushqyerjes dhe të jetesës. Dieta dhe stili i jetës ndihmojnë në pakësimin e irritimit gastrik dhe në pakësimin e sekretimit të acidit gastrik. Gjithashtu ndihmojnë në parandalimin e efekteve anësore, siç është piroza ose “djegia e stomakut”.
Ka rregulla të përcaktuara në mënyrën e ushqyerjes që duhet të respektojë një i sëmurë me ulcerë në stomak?
Rregullat kryesore për një dietë të mirë në ulcerën e stomakut janë: ushqehuni mirë, mbani të neutralizuar aciditetin gastrik si dhe ndaloni prodhimin e tepërt të acidit gastrik.
Këto arrihen nëse zbatohen disa “rregulla të arta”: nëse hahen 3 vakte të lehta dhe midis vakteve të hani përsëri lehtë. Kjo është e rëndësishme për të mënjanuar periudhat e urisë dhe mbingarkesën në ushqim, të cilat janë që të dyja të dëmshme për stomakun.
Këshilla e dytë është të hani ngadalë dhe përtypini mirë ushqimet. Duhen evituar ushqimet e skuqura dhe ato me yndyrë, si dhe zgjidhen ushqime me përmbajtje të ulët yndyrore. Shpesh neglizhohet mënyra se si ushqehemi. Duhet të relaksoheni në kohën e ngrënies. Hani darkë të paktën 3 orë përpara gjumit. Ngrëniet afër kohës së gjumit shkaktojnë sekretim të acidit gastrik gjatë natës. Po ashtu duhet të ndërpriten pijet që përmbajnë kafeinë (çaj, kafe, kola); madje dhe kafeja dekafeinato, pasi shkaktojnë rritje të prodhimit të acidit gastrik, që mund të rëndojë dhimbjen në një ulcerë ekzistuese. Në qoftë se këto pije tolerohen mirë nga i sëmuri, atëherë mund të merren me sasi të moderuara dhe afër vaktit ushqimor.
Është e vërtetë që agrumet ndikojnë në acarimin e ulcerës?
Po. Shpesh të sëmurëve me ulcerë u rekomandohet që të eliminojnë agrumet (limon, portokall, greipfrut), sepse ndikojnë në rritjen e aciditetit, duke acaruar gjendjen klinike të pacientit.
Çfarë nuk duhet të hanë tjetër këta persona?
Shpesh rekomandohet të mos konsumohet çokollata dhe produktet e domates, kikirikët, në qoftë se ju shkaktojnë shqetësime. Pra, të përdorni ato ushqime që tolerohen mirë dhe kështu ushqeni ulcerën tuaj në mënyrë korrekte.
Çfarë këshillash mund të jepen për këtë sezon të vitit?
Ushqimet duhet të përfshijnë një burim të mirë proteinash në çdo vakt (qumësht, mish, vezë, djathë). Qumështi dhe ushqimet kremoze nuk duhen përdorur si terapi antiacide. Megjithëse proteinat e qumështit kanë një efekt të mirë neutralizues në aciditetin gastrik, janë gjithashtu dhe një stimulator potent i aciditetit. Gjithsesi nuk duhet nënvlerësuar përdorimi i tij. Në përdorimin e mishit duhet patur kujdes që të konsumohet në porcione të vogla dhe pa dhjamë. Vezët jo më shume se 3-4 kokra në jave. Dieta juaj duhet të jetë e pasur me fibra: zarzavate (okër, patate, kungull, brokoli, lakër brukseli, karrota, bizele, patate); fruta si banane, avokado, bajame dhe vaji i bajameve. Gjithashtu rekomandohet orizi kaf, tërshëra, elbi që kanë përmbajtje të lartë fibrash dhe që ndihmojnë në mbulimin natyral të ulçerës dhe lehtësojnë dhimbjen. Këshillë tjetër që jepet është të përfshini vitamina në dietën e perditshme Vitaminat dhe mineralet janë gjithmonë dobiprurëse, pasi shërbejnë si një çelës i shpejtë për shërimin e ulçerës.


Këshilla

Hani 3 vakte të lehta dhe midis vakteve të hani përsëri lehtë.
Hani ngadalë dhe përtypini mirë ushqimet. Evitoni ushqimet e skuqura dhe me yndyrë.
Zgjidhni ushqime me përmbajtje të ulët yndyrore.
Hani darkë të paktën 3 orë përpara gjumit.
Ndërprisni pijet që përmbajnë kafeinë (çaj, kafe, kola).
Eliminoni alkoolin dhe duhanin.
Kujdes në përdorimin e aspirinave dhe medikamenteve antireumatizmale, të cilat mund të shkaktojnë ulcerë, ose kur ajo ekziston, vonojnë shërimin dhe rrisin shansin për hemorragji gastro-intestinale.
Duhet të eliminoni agrumet (limon, portokall, greipfrut).
Nëse ju jep shqetësime mos konsumoni çokollatën, produktet e domates, kikirikët.
Shtoni në meny ushqimet që përmbajnë proteina.
Konsumoni sa më shumë ushqime me fibra.
Konsumoni sa më shumë ushqime që përmbajnë vitamina dhe kripëra minerale.


Vitaminat “aleate” në shërimin e ulçerës

• Vitamina A, konsiderohet nismëtare e procesit të shërimit të indit të dëmtuar (ka një rol mbrojtës ndaj sëmundjes ulceroze). Kjo vitaminë ndodhet në ushqimet me origjinë shtazore, sidomos në mëlçi, në qumësht dhe në vezë. Gjithashtu ndodhet në perimet me ngjyrë të verdhë-portokalli.
• Vitamina B kompleks, e cila konsiderohet shërues i përgjithshëm. Kjo vitaminë gjendet te maja e birrës, orizi, gruri, soja, mishi i derrit, mëlçia, veza, qumështi, peshku, bizelet etj.
• Vitamina C dhe bioflavonoidet, janë shërues të ulcerave. Këto gjenden me shumicë në perimet me gjethe të gjelbërt dhe frutat.
• Vitamina E, asiston në zhdukjen e dhimbjes dhe reduktimin e aciditetit të stomakut. Kjo vitaminë gjendet me shumicë te frutat e thata; drithërat, nënproduktet e qumështit.
• Vitamina K, parandalon hemorragjinë.
• Kalciumi, magnesium, potasium dhe zinku, janë të vlefshëm në procesin shërues.

[RaPSouL]

Boronica e kuqe, “ e mirë” për infeksionet urinare

Efektet dobiprurëse i atribuohen pranisë së proantocianidineve (PAC), një element specifik për boronicën, e cila pengon bakteret patogjene të dëmtojnë mukozën e rrugëve urinare, duke evituar në këtë mënyrë zhvillimin e infeksionit.
Cistiti është një patologji shumë e përhapur dhe është mjaft e lartë frekuenca të gratë, sidomos atyre që janë seksualisht aktive. Shkaku kryesor është një infeksion i tipit bakterial, por ndonjëherë, megjithëse më rrallë, mund të shkaktohet nga trauma, alergji apo situata të uljes së sistemit imunitar.
Terapia klasike përfshin marrjen e antibiotikëve, por studimi më i fundit ka treguar se një ndihmë e vlefshme mund të na vijë dhe nga natyra.

[RaPSouL]

Çaji dhe kafeja, nuk shtojnë riskun për kancer të gjirit te gratë

Të paktën kështu shprehet studiuesi Davaasambuu Ganmaa i “Harvard School of Public Health” të Bostonit, në faqet e numrit të fundit të “International Journal of Cancer”. Studiuesit amerikanë kanë ekzaminuar lidhjen që ekziston mes kafesë, çajit dhe zhvillimit të kancerit të gjirit në më tepër se 85.000 gra të moshave nga 30 deri 55 vjeç, që kishim marrë pjesë në “Nurses Health Study”.
Gjatë studimit që ka zgjatur për 22 vjet janë verifikuar 5.272 raste me tumor, edhe pasi kanë marrë përsipër faktorë që lidhen potencialisht me këtë sëmundje si: mosha, duhani, faktori i trashëgimisë, menopauza dhe numri i fëmijëve, studiuesit nuk kanë konfirmuar asnjë lidhje mes zhvillimit të kancerit dhe konsumimit të këtyre pijeve, edhe te gratë që pinin çdo ditë më tepër se katër filxhan çaj apo kafe, me ose pa kafeinë.
“Kemi arritur në konkluzionin se nëse konsumohen me masë, çaji, kafeja dhe në përgjithësi të gjitha pijet që përmbajnë kafeinë janë të sigurta”, ka nënvizuar Ganmaa.