Projekt i konsorciumit anglo-zviceran Zumax 1.2 miliardë eurosh në Vlorë

[DYDRINAS]

Kryeministri Berisha merr pjesë në prezantimin e kompanisë Zumax


Kryeministri Berisha mori pjesë sot në prezantimin e planeve për zhvillimin dhe ndërtimin e një terminali të madh konteinerësh dhe një zone të lirë industriale në Vlorë, projekt i konsorciumit anglo-zviceran Zumax.
Kryeministri pasi përgëzoi drejtuesit e kompanisë për kurorëzimin me sukses të propozimit të mëparshëm, u shpreh se zbatimi i këtij projekti do ta shndërrojë Vlorën në një nga qendrat më të fuqishme detare të Mesdheut, por dhe zonën e lirë në një nga gjeneratorët më të mëdhenj të zhvillimit të Shqipërisë.
Mund të them,- vijoi Kryeministri,- se Vlora për pozicionin e saj gjeografik, ujërat e saj të thella njerëzit e saj punëtorë, e meriton këtë projekt me bindjen më të thellë se kjo do të jetë një histori e madhe suksesi.
Duke garantuar drejtuesit e kompanisë për lehtësimin e punës së tyre, Kryeministri tha se ata kanë zgjedhur drejt jo vetëm vendin, por edhe kohën për realizimin e këtij projekti. Në këtë kontekst Kryeministri tha se kompania ka vendosur të bëjë këtë investim të madh në një kohë kur vendet e këtij rajoni janë angazhuar thellësisht në një bashkëpunim të ngushtë dhe të gjithanshëm, kanë krijuar një hapësirë të tregtisë së lirë që shtrihet nga Kroacia në Moldavi, punojnë së bashku për projektin e integrimit europian.
Kryeministri theksoi se vendet e këtij rajoni, pak vite më parë konfliktual, janë sot vende që eksportojnë siguri. Më tej Kryeministri vlerësoi se përzgjedhja e Shqipërisë për realizimin e këtij projekti është një zgjedhje e mençur nga ana e kompanisë, pasi Shqipëria pavarësisht se një vend i vogël në hartë paraqet potenciale të mëdha për investime në rezervat hidrike ato minerare dhe në turizëm.

Kryeministri e cilësoi investimin me vlerë 1.2 miliardë eurosh që parashikon projekti, si një besim të jashtëzakonshëm që kompania dëshmon tek Shqipëria.
Projekti parashikon ndërtimin e një terminali me kapacitet prej më shumë se 3 milionë konteinerë në vit. Ai do të shërbejë si një port tranzit dhe import-eksport për rajonin, duke ofruar gjithashtu hyrje efikase për në det për komunitetin lokal. Zona e lirë do të ofrojë lehtësira dhe shërbime për të mbështetur zhvillimin e industrisë së lehtë në Vlorë.

Fjala e plotë e Kryeministrit Berisha gjatë prezantimit të projektit të kompanisë Zumax:
Dëshiroj që me kënaqësi të veçantë t`ju përshëndes, t`ju falënderoj dhe t`ju përgëzoj për kurorëzimin me sukses të propozimit të mëparshëm për ndërtimin e një porti të ri konteinerësh dhe një zone të lirë industriale për konteinerë në Vlorë dhe të paraqisni sot projektin më të madh që vendi im ka njohur ndonjëherë. Ju ekspozuat këtu projektin e ndërtimit të një porti të madh terminal konteneirësh që do të mundësojë tranzitimin nga anija në anije, do të zhvillojë një zonë të lirë, do të shndërrojë Vlorën në këtë mënyrë në një nga qendrat më të fuqishme detare të Mesdheut, por dhe zonën e lirë në një nga gjeneratorët më të mëdhenj të zhvillimit të Shqipërisë. Mund të them se Vlora për pozicionin e saj gjeografik, ujërat e saj të thella dhe njerëzit e saj punëtorë e meriton këtë projekt me bindjen më të thellë se kjo do të jetë një histori e madhe suksesi.


Ju zoti Lloyd jeni një mik i hershëm i Shqipërisë, keni ardhur shumë herë këtu dhe me këtë projekt i bëni Shqipërisë dhe shqiptarëve, nderimin më të madh, dhuratën më të madhe dhe unë garantoj ekipin tuaj se qeveria do të marrë çdo vendim dhe do të bëjë çdo përpjekje për të lehtësuar dhe për të mundësuar suksesin tuaj të plotë, sikundër mendoj se nuk keni zgjedhur drejt vetëm vendin, por keni zgjedhur dhe kohën. Ju keni vendosur të bëni këtë investim të madh në një kohë kur vendet e këtij rajoni janë angazhuar thellësisht në një bashkëpunim të ngushtë dhe të gjithanshëm, kanë krijuar një hapësirë të tregtisë së lirë që shtrihet nga Kroacia në Moldavi, punojnë së bashku për projektin e integrimit europian. Vendet e këtij rajoni, pak vite më parë rajon konfliktual, janë sot vende që eksportojnë siguri. Shqipëria dhe Kroacia kanë marrë ftesën për në NATO dhe janë me shumë shpresa për anëtarësim në kohën më të shpejtë të mundshme, gjë që i bën jo vetëm ato, por edhe rajonin më të sigurtë, paqen dhe stabilitetin në këtë rajon më të sigurtë.

Dua t`ju informoj ju dhe të pranishmit se përzgjedhja e Shqipërisë në këtë kohë është një vendim shumë i mençur nga ana juaj dhe e ekipit tuaj. Ky vend është i vogël në hartë, por është vend me potenciale shumë të mëdha. Është njëri nga vendet me pasuri ujore për t`u shfrytëzuar ndër më të mëdhatë. Është njëri nga vendet me rezerva minerale të përmasave të një rëndësie më të madhe se sa rajonale, të përmasave botërore. Është njëri nga vendet me potencial shumë të madh turistik.
Sërish dua të theksoj këtu se të tre këto potenciale të mëdha që unë përmenda nuk janë ende në nivelin ku ato do të jenë. Industria minerare shqiptare akoma nuk ka peshën e saj që meriton në ekonominë e vendit. Rezervat e mëdha ujore, energjetike janë në një fillim të madh shfrytëzimi. Kemi patur një bum turistik të paprecedent, por kjo nuk do të thotë se kemi akoma një industri turistike që është e domosdoshme. Megjithatë ky vend ia ka dalë në tre vjet në politikën e drejtë të uljes së taksave, luftës kundër informalitetit, evazionit, kontrabandës të ketë si të ardhura më shumë se ç`janë mbledhur në 6 vite para këtyre tre viteve. Kjo është një histori e vërtetë suksesi. Histori suksesi në sensin që dëshmon potencialin e madh të lirisë. Zgjerimi i hapësirave të saj, liberalizimi i ekonomisë kanë qenë faktorët kryesorë që kanë bërë të mundur këto arritje.

Unë nuk mund të them se në tre vite ekonomia shqiptare u dyfishua, por mund të them me saktësi se në tre vjet të ardhurat kombëtare u dyfishuan, pavarësisht reduktimit më shumë se përgjysmim i taksave. Mund t`ju them se në këto tre vjet po bëhet përpjekja më e madhe për një infrastrukturë moderne në Shqipëri. Ju keni vendosur të ndërtoni portin, por ne brenda një afati të shkurtër sjellim në Vlorë autostradën me katër korsi, e domosdoshme dhe unë ju garantoj ju se qeveria ime do të marrë të gjitha masat në funksion të portit dhe zonës suaj të lirë, të përshtasë të gjithë infrastrukturën hekurudhore, rrugore për të lehtësuar sa më shumë transportin.

Ju theksuat me shumë të drejtë Korridorin VIII, i cili në një mënyrë ose në një tjetër po ndërtohet dhe do të ndërtohet. Por porti që ju ndërtoni është i një rëndësie edhe jashtë hapësirave të këtij korridori. Autostrada Durrës-Prishtinë-Merdare-Nish dhe më tutje do të lidhë Vlorën me Korridorin X dhe me vende të tjera të rajonit dhe Europës. Në këtë kontekst edhe njëherë dua t`ju falënderoj për këtë besim të jashtëzakonshëm që keni dëshmuar tek Shqipëria dhe ky besim është i vlefshëm sa vetë shuma e madhe, 1.2 miliardë euro që ju keni vendosur të investoni në projektin tuaj të madh dhe t`u siguroj se qeveria ime do t`ju mbështesë ju fuqimisht.

Pak vite më parë një gazetar britanik më pyeti a do të bëhet Shqipëria “Tajvani” i Europës. Përgjigja ishte jo. Shqipëria do të bëhet shqiponja e Europës, së bashku do t`ia arrijmë.




04/09/2008

Faqja zyrtare e Kryeministrise

[Duaje Siveten]

Shekulli Premte, 05 Shtator 2008

Porti, 1.2 miliardë, bllofi i radhës i Berishes

Gjergj Erebara

Kryeministri Sali Berisha përuroi një investim prej 1.2 miliardë eurosh, nga një kompani me kapital prej 200 mijë frangash gjermane

Kjo nuk është hera e parë që jepet një lajm i tillë. Dje, kryeministri Sali Berisha shkoi në Vlorë, ku shpalli një megaprojekt për ndërtim porti me vlerë miliardash.

“Kryeministri e cilësoi investimin me vlerë 1.2 miliardë eurosh që parashikon projekti, si një besim të jashtëzakonshëm që kompania dëshmon tek Shqipëria. Projekti parashikon ndërtimin e një terminali me kapacitet prej më shumë se 3 milionë kontejnerë në vit. Ai do të shërbejë si një port tranzit dhe import-eksport për rajonin, duke ofruar gjithashtu hyrje efikase për në det për komunitetin lokal. Zona e lirë do të ofrojë lehtësira dhe shërbime për të mbështetur zhvillimin e industrisë së lehtë në Vlorë”, thuhet në njoftimin për shtyp të kabinetit të Kryeministrit.

Kompania që ka premtuar të hedhë paratë, u prezantua si një konsorcium anglo-zviceran me emrin “Zumax Ag.”. Kompania në fjalë ka një faqe web që u hap dje, zumaxag.com, ku nuk ka deklaruar asgjëkund sa e ka kapitalin e sa e ka xhiron e vitit fiskal paraardhës. Por ka deklaruar se ka disa projekte të rëndësishme në duar, mes të cilave, Vlora, Korridori Tetë, ideja për marrjen me koncesion të një porti në Afrikë dhe asgjë tjetër. Nga regjistri i kompanive zvicerane, rezulton se kompania “Zumax Ag.”, ka një kapital prej 200 mijë frangash zvicerane, (rreth 130 mijë euro).

Projekti

Projekti i prezantuar dje nga vetë Kryeministri, parashikon ndërtimin e një porti kontejnerësh super të madh në Vlorë, si dhe ndërtimin e një hekurudhe që të lidhë Vlorën me Shkupin dhe Sofjen, në mënyrë që të qarkullojnë kontejnerët. Për projektin thuhet se është e interesuar edhe kompania hekurudhore e Estonisë. Por të gjitha prezantimet, nuk tregojnë ndonjë fuqi investuese të vlerës së miliardave. Projekti për portin e kontejnerëve në Vlorë është miratuar nga qeveria shqiptare në prill të këtij viti. Vetëm porti i kontejnerëve duhet të kushtojë rreth 500 milionë euro, dhe do të ketë, sipas prezantimit, një kapacitet përpunues prej 1.1 milionë kontejnerësh në vit.

Miliardat

Projektet multimiliardere janë mëse të zakonshme për qeverinë e sotme, sido që shqiptarët në realitet nuk i kanë parë kurrë këto miliarda. Nëse kërkon te faqja zyrtare e Këshillit të Ministrave, dalin lajme me bollëk nga kjo fushë, lajme që fillimisht kanë qenë po kaq pompoze sa ai i djeshmi, por që janë harruar totalisht, tashmë.

Në mars të vitit 2007, qeveria deklaroi se “kompania internacionale "Oppenheimer", kërkon të investojë miliarda dollarë në fushën e turizmit për zhvillimin e infrastrukturës turistike dhe ndërtimin e fshatrave turistikë, në fushën e energjisë dhe të industrisë, në ndërtimin e një porti të ri dhe një rafinerie”. Pas kësaj, kompania nuk është bërë e gjallë më. Emri i drejtorit të kompanisë “Samuel Grossmann” me të cilin Kryeministri u takua atëherë, nuk gjendet gjëkundi në internet.

Më 30 maj 2006, kryeministri Berisha deklaroi se është takuar me përfaqësues të kompanisë “Foreign Capital Development Group”, të cilët i kanë prezantuar projektet e para në fushën e energjetikës, minierës dhe turizmit. Emri i kësaj kompanie të prezantuar si “kineze” nuk gjendet gjëkundi në internet.

Më 7 shtator 2007, Kryeministri takohet me “Fratelli rone” dhe “SEA”, të cilët premtojnë investime në energjetikë. As emrat e këtyre kompanive nuk gjenden gjëkundi.

Më 28 gusht 2007, Kryeministri takohet me kompaninë sllovene “Energo Gora”. (Nuk gjendet në internet). U premtuan pesë hidrocentrale me vlerë 60 milionë euro dhe një termocentral në Porto Romano me vlerë 30 milionë euro, me kapacitet 95 mega.

Më 11 shtator 2007, kryhet takimi me kompaninë amerikane “Hydro Electric Power” Inc., e cila premton investime në kaskadën e Osumit.

Më 26 korrik 2007, kryhet takimi me kompaninë “wARTSILA”, për një projekt termocentrali të lëvizshëm me vlerë 17 milionë euro. Për projektin nuk ka folur më askush që nga ajo kohë.

Më 24 korrik 2007, TGK Skavica, të përbërë nga kompanitë “Kinglor”, “Geotecna” dhe “Tassera”, për ndërtimin e Hidrocentralit të Skavicës, me kosto 600 milionë euro. Kontrata koncesionare është nënshkruar nga qeveria “Nano” në 2004.

Më 23 korrik 2007, kryeministri Berisha takohet me një kompani maqedonase, një kompani greke, dhe një kompani kineze, të gjitha me projekte për termocentrale 600 megavatëshe dhe me vlerë investimi prej 700 milionë euro secila. Emrat e kompanive "Deboj- Tron", "Linkchart Albania" Sh.a., dhe "Boading Tianwei Group", nuk u dëgjuan më pas kësaj date.

Më 27 tetor 2007, kompania italiane “Enel” premtoi dy termocentrale qymyri me vlerë 700 milionë euro secila. Më 7 nëntor, dy kompani të tjera italiane premtuan termocentrale me cikël të kombinuar me vlerë miliarda euro.

[DYDRINAS]

Këshilltarja e kryeministrit shpjegon përfitimet që ka ekonomia nga ndërtimi i portit të konteinerëve

Guxholli: Projekti në Portin e Vlorës do të hapë mbi 93 mijë vende pune

Këshilltarja e kryeministrit për Ekonominë, Suzana Guxholli, e cilësoi projektin e kompanisë Zumax për ndërtimin e një porti konteinerësh në Vlorë si një nga projektet më madhore të kësaj qeverie. Guxholli i sheh zhvillimet e vrullshme ekonomike të këtyre tre viteve të fundit, si të natyrshme që konsoliduan dhe lulëzuan investimet e mëdha në vendin tonë në sektorët më strategjik. Prej momentit të parë të marrjes së mandatit, kjo qeveri përgatiti të gjitha strategjitë, politikat, të cilat synonte të zbatonte. Këshilltarja e kryeministrit tha se, faza e realizimeve të këtyre reformave të ndërmarra, janë rritja ekonomike, rritja e investimeve dhe përmirësimi i klimës së biznesit. "Kjo ka bërë që të rritet imazhi i Shqipërisë, dhe me marrjen e ftesës në NATO", tha Guxholli, duke shtuar se këto suksese kanë ardhur natyrshëm nga investimet paraprake të kësaj qeverie. Ajo theksoi se, fondet publike qeveria Berisha i destinoi në përmirësimin e infrastrukturës rrugore, për vetë faktin se kjo ishte një vështirësi kryesore për biznesin. Këshilltarja e kreut të ekzekutivit e cilësoi ndërtimin e rrugëve kryesore sidomos atë të rrugës Durrës Kukës, si dhe rrugët e jugut, si një investim që i hapin mundësinë një bumi ekonomik. Infrastruktura, tha Guxholli, solli në vëmendje bregdetin shqiptar, ky bregdet për nga pozicioni gjeografik është i favorshëm për zhvillimin e porteve. "E gjithë vëmendja e qeverisë Berisha është në tërheqjen e investitorëve privat në sektorët strategjik të ekonomisë", nënvizoi ajo. Guxholli përmendi si sektorë prioritarë energjinë, përpunimin e mineraleve, industrinë e çimentos, e cila po ngrihet në bazë të investimeve private. Pra, ekspozimi i burimeve natyrore të Shqipërisë, krijimi i infrastrukturës, krijimi i terrenit për investimet e reja. Këshilltarja për ekonominë pranë kryeministrit e cilësoi përfitimin ekonomik të Shqipërisë nga ky projekt, shumë të madh. "Duke futur taksat që do të vjelë qeveria, ky projekt ka ndikim social se priten të punësohen një numër i konsiderueshëm njerëzish. Kështu pas disa viteve që përfundon projekti do të hapen rreth 93 mijë vende pune. Ky projekt do të sjellë teknologji të re moderne do të sjellë aftësimin e fuqisë së re punëtore", theksoi këshilltarja e kryeministrit. Guxholli pohoi se, falë këtij projekti në tregun botëror do të jenë prezente një sërë produktesh që do të jenë me mbishkrimin "Made in Albania". Gjithashtu, një avantazh tjetër i këtij projekti është bërja e Shqipërisë pikë strategjike për lidhjen e saj me vendet e lidhjes së largët. Projekti që është një nyje e madhe në Mesdhe, falë pozicionit strategjik, Porti i Vlorës do të jetë tepër konkurues në nevojën për rrugë detare që kanë vendet e Mesdheut. "Vendet mesdhetare po vuajnë tashmë transportin e ngarkesave detare, që me globalizimin e ekonomisë janë të shumta dhe nuk përballohen dhe pritet që këto të marrin zgjidhje me ndërtimin e këtij porti". Guxholli zbuloi se, investim që pritet të fillojë është projektuar, që prej vitit të kaluar. Këshilltarja e kryeministrit garantoi se, brenda një periudhe katër vjeçare shqiptarët do të fillojnë të ndjejnë këtë projekt shumë të madh. Sipas Guxhollit, duke filluar nga punësimet dhe deri tek ngritja e investimeve për vendin tonë projekti është tepër i dobishëm. Ajo njoftoi se nuk do të jetë vetëm bregdeti i Vlorës ai që do të përfitojë, por tani pranë qeverisë janë disa projekte për të gjitha portet e vendit.

RD

[beni67]

Fjale te bukura po a do te realizohet? Le te shpresojme. Shqiptaret e meritojne nje jete me te mire.

[drague]

Gjergj Erebara

Kryeministri Sali Berisha përuroi një investim prej 1.2 miliardë eurosh, nga një kompani me kapital prej 200 mijë frangash gjermane

KUR KA PAS NAIHER FRANGA GJERMANE?

[Antimafia]

Marre tek faqja e internetit te firmes ZUMAX AG

http://zumaxag.com/v_translation.html

TERMINALI DHE PORTI I LIRË I VLORËS, SHQIPËRI
Zumax AG ka hartuar planet për ndërtimin e një terminali konteineresh në Portin e Vlorës, me kapacitet përpunimi mbi 3 milion TEU në vit, bashkë e një park zone të lirë industriale ngjitur me portin. Terminali i konteinereve do jetë në gjendje të përpunojë anije konteineresh ndër më të mëdhatë e ndërtuara deri më sot. Ai do të shërbejë si qendër transshipi dhe si port tranzit për rajonin. Parku i Zonës së Lirë Industriale do ofrojë lehtësi dhe shërbime për të mbështetur zhvillimin e industrisë së lehtë dhe të montimit në Vlorë.
Vlora ka një port natyror të thellësive të mëdha, që ndodhet në gjirin me të njëjtin emër, në brigjet jugore të Republikës së Shqipërisë.
Vlora ndodhet relativisht afër linjës kryesore të lundrimit lindje–perëndim, që kalon nga nga Kanali i Suezit drejt ngushticës së Gjilbratarit. Shmangia nga kjo linjë deri në Vlorë është rreth 340 milje detare, ose rreth 16 orë lundrim për anijet konteinere më të shpejta të kohës.


-------

Meqenese une i kam qejf llogaritjet, bera nje llogaritje te tjeshte:

3 000 000 Container / vit : 365 ditë / vit = 8219 Container / ditë

8219 Container / ditë : 24 orë / ditë = 342 Container / orë

342 Container / orë : 60 minuta / orë = 5, 7 (pothuajse) 6 Container / minutë





6 Container / minutë

Do te thote qe nga porti i Vlores çdo 10 sekonda duhet te dale ose te hyj nje kamion i ngarkuar me një Container.

Do te thote qe nga porti i Vlores ose per ne portin e Vlores çdo 50 metra, ne te dyja krahet e rruges, ka nje kamion te ngarkuar me një Container.

(Gjithmone duke llogaritur, qe punohet 365 dite ne vit, 24 ore ne dite dhe logjistika funksionon si ne Gjermani)


Do te thote qe pa nje "Autostrade" Vlore- Durres- Morine ose/dhe Vlore- Tirane- Shkup, me 3 korsi per sejcilin drejtim, ky projekt eshte vetem fantazi.

[DYDRINAS]

A na duhet një port tjetër?
Projekti për ndërtimin e Portit të Vlorës për përpunimin e kontejnerëve, deklaruar në 4 shtator nga Kryeministri, është më së paku një projekt pa llogari.

Sadedin Çeliku*
Marte, 09 Shtator 2008 08:16:00

DEKLARIMI I KRYEMINISTRIT

Projekti për ndërtimin e Portit të Vlorës për përpunimin e kontejnerëve, deklaruar në 4 shtator nga Kryeministri, është më së paku një projekt pa llogari.

Është e vërtetë që faktorët ekonomikë,kohëzgjatja e përpunimit të mallrave, ulja e kostos në përpunim për njësi malli, modernizimi i teknikave të transportit gjatë përpunimit, shkurtimi i kohës së punës, pavarësia e përpunimit nga kushtet klimaterike, zvogëlimi i bonifikimeve dhe trajtimi i mallrave, etj., të gjitha këto kanë diktuar nevojën e përdorimit të teknologjisë moderne të transportit, asaj që quhet transporti i kontejnerëve. Madje ky lloj transporti ka vite që ka filluar në vendin tonë. Në Durrës është ndërtuar sheshi i kontejnerëve. Me investimet që janë bërë në këtë port, si rikonstruksione kalatash, dallgëthyesish, zgjerim kapacitetesh infrastrukture dhe superstrukture etj., ky port përballon jo vetëm volumet e punës të eksport-importit shqiptar por edhe atë të vendeve fqinje Kosovë, Maqedoni, Mali i Zi.

A na duhet porti tjetër? Përgjigjen po e nis me një kthim pas në kohë 25 vjet, më parë. Qeveria e atëhershme punoi për vite me radhë për ndërtimin e një porti të ri në Vlorë, me kapacitet përpunues aq sa dhe ai i Portit të Durrësit. Atje, në ato vite, janë hedhur (në det) miliona M3 gurë. (Projekti u ndërpre pas viteve 1990 dhe parashikonte që Porti aktual i Vlorës të kthehesh në port jahtesh turistikë dhe porti i ri që do të ndërtohej, do të shërbente për përpunimin e mallrave).

Pozicioni gjeografik që kishte ky port ishte shumë i përshtatshëm. Për më tepër, nëse do të vendosej për një port në Vlorë, ky i lënë përgjysmë, është më i përshtatshmi, sepse nuk kërkon fonde të mëdha. Thjesht, do të përfundohet projekti i lënë në gjysmë. Pra, pyetja e parë: Pse nuk shfrytëzohen punimet ekzistuese atje që janë shpenzuar miliona dollarë?

E dyta, si mund të deklarohet një shifër nga Kryeministri, pa patur Master-Plan, projekt, studim fizibiliteti, pa përcaktuar me preventiv shumën se sa do të investohet? Nga doli shuma 1,2 miliardë dollarë që citoi Kryeministri? Çfarë fshihet brenda këtij projekti? E treta: Përse ky port vetëm për përpunimin e kontejnerëve dhe jo e specializuar dhe për mallra të tjera?

Kurse nga pikëpamja gjeografike, po flasim në kushtet kur rreth nesh ekzistojnë Pireu, Selaniku, Triestja, Bari e Brindisi. Nga Lindja e Largët, të gjithë mallrat tranzitohen në Pire-Selanik-Trieste. Edhe sikur ta merrnim të mirëqenë projektin dhe deklaratën e z.Kryeministër, prapëseprapë ai po flet për një port më të vogël se këta ekzistuesit. Atëherë, ku do ta gjejmë atë trafik mallrash që duhet për të qenë eficient ky projekt? Si ka mundësi të hedhim shashka të tilla në publik pa u menduar fare?

Kuptohet, rezultantja e kësaj shashke të re pas centraleve atomike, është mungesa e përgjegjësisë, transparencës dhe deformimi i reformave në ekonomi. Në emër të koncesioneve e reformave ekonomike, qeveria e sotme po vijon traditën e qeverive të mëparshme: transferim i pasurisë kombëtare të krijuar me djersë, nga shqiptarët, te anonimatët.

*Autori është ish zv.ministër i Transporteve

Gazeta Shekulli


Mire e ka ky ish-zevendesministri! C'na duhen portet, aeroportet, autostradat? Ne e kemi afer Selanikun, Pireun, Brindizin dhe po ashtu kemi autostradat greke e ne s'duhet te "harxhojme" para.

[DYDRINAS]

Vlora shpëton prapë Shqipërinë!

3 Shtator 2008
Shpëtim Nazarko

Në 4 shtator në “Sheraton” një grup investitorësh anglezë paraqisnin projektin më të madh në historinë e Shqipërisë. Në vlera monetare (1,2 miliardë euro) ai mund të paraqitet prapë në një të ardhme të afërt apo të largët, por rëndësia e këtij projekti në pikëpamje ekonomike, politike apo gjeopolitike është i papërsëritshëm. Duke perifrazuar diktatorin Hoxha, mund të themi …se me ndërtimin e portit 60 milionë tonësh në Vlorë arrijmë çlirimin e dytë të Shqipërisë. Dhe për një konçidiencë të habitshme historike, ky çlirim vjen përsëri prej qytetit që njoftoi pavarësinë e Atdheut. A mundet vërtet të perifrazojmë diktatorin, apo jemi në prag të ndërtimit të një kombinati tjetër metalurgjik si ai që Hoxha e quante çlirim të dytë të Shqipërisë e që dihet si përfundoi?

Rëndësia ekonomike e një projekti

Në një pamje direkte të problemit, do të mjaftonte shifra prej 1,2 miliardë eurosh për të kuptuar rëndësinë e projektit. Akoma edhe shifra e fitimit të drejtpërdrejtë prej taksave 200 milionë euro në vit. Po investimi mund të quhet fillestar dhe shuma e mësipërme duket menjëherë që do të shumëfishohet në vitet e ardhshme. Një port i tillë gjigand bashkë me zonën e lirë lejon përpunimin e një sasie kolosale mallrash, që të ardhur edhe prej Azisë së largët shpërndahen në tërë Ballkanin dhe Europën kësaj radhe në skemën “Made in Albania”. Ndërkaq është lehtësisht e përfytyrueshme që një port i tillë gjigant është e pamundur të funksionojë pa rrugët lidhëse që hyjnë e dalin nga Shqipëria. Në këtë sens, “Korridori i Tetë” dhe sikur të mos ishte në llogaritë fillestare të Qeverisë apo shtetit shqiptar, bëhet një domosdoshmëri që realizohet vetëm prej ekzistencës së Portit të Vlorës. E njëjta gjë mund të thuhet dhe për rrjetin hekurudhor, për të cilin që tani po interesohen kompani europiane për ta marrë me koncesion.
Ky zhvillim natyrisht është e vështirë të përfytyrohej nga e kundërta. Pra, duket i pamundur ndërtimi i rrugëve të mëdha pa llogaritur më parë Portin e Madh të Shqipërisë. Po në këtë pikëpamje ndërtimi i tij fut realisht në eficensë rrugën Durrës –Kukës, e cila natyrisht do të kishte efektivitet shumë më të vogël nëse do të mjaftohej vetëm me Portin e Durrësit, që është larg kërkesave për të quajtur realitet idenë e Korridorit të Tetë.
Rëndësia gjeopolitike
Straboni e quante Vlorën një nga portet më të mëdha të antikitetit. Prej saj si dhe prej Durrësit vinin dy degëzimet e mëdha që lidhnin me rrugën “Egnatia” dy perandoritë më të mëdha të botës së vjetër. Me ndërtimin e Portit të Vlorës vëmë prapë në skemën natyrale të zhvillimit të Shqipërisë si një vend tranzit. Duke vendosur njëherë e përgjithmonë njërën prej shtyllave themelore të zhvillimit të saj që lidhet me pozicionin gjeografik. Një pozicion që e humbi vlerën nga rënia e dy perandorive të mësipërme, e që humbi prej pushtimit turk gati përfundimisht rëndësinë.
Pushteti i Hoxhës e nxori përfundimisht Shqipërinë nga pozicioni i një vendi tranzit, duke i thyer vendit njërën prej shtyllave më të rëndësishme të ekzistencës së tij. Hoxha në të vërtetë e quante Vlorën një pikë të rëndësishme për të kontrolluar Otranton dhe natyrisht edhe Mesdheun. Në të vërtetë pozicioni i Vlorës është shumë herë më i rëndësishëm se sa ai që shihet në kohë lufte apo paqe. Natyrisht konsiderata të tilla agresive nuk kanë vlerë normale në kohën e sotme. Megjithëse një pjesë e Portit të Vlorës mund t’i shërbejë sigurisë kombëtare, duke pasur edhe NATO një pjesë të tij, (siç dhe parashikohet në projekt) ai shihet vetëm për qëllime paqësore. Profecia e Hoxhës ka vlerë e parë vetëm në këndin paqësor. Dhe kjo duket thjesht. Vlora nuk kontrollon vetëm Otranton. Po të heqësh një vijë të drejtë, rruga e filluar prej saj shkon deri në Ederne (Bullgari) duke shërbyer kështu realisht si porta e Ballkanit. Atje ku mund të duket vërtet si një portë e tillë, pasi vijnë e kryqëzohen korridoret e rëndësishme që lidhin Lindjen me Perëndimin. Me vendosjen e Vlorës në hartën reale të ngjarjeve dhe kalimin prej saj në Shkup, shqiptarët janë jo vetëm porta hyrëse e Ballkanit, por shërbejnë edhe në rolin e një pozicioni central të kryqëzimit të korridoreve të mëdha bashkë me Maqedoninë. Kjo në kohë paqeje e lufte.
Por pa ekzistencën e kësaj dhurate natyrore siç është Vlora, Shqipëria nuk do ta kishte kurrë këtë funksion të një vendi tranzit. Dhe në këtë sens, Korridori i Tetë do të kishte vetëm funksionin e një korridori lokal.
Me ndërtimin e Portit të Vlorës, Shqipëria zë një pozicion kyç në Ballkan dhe i afrohet Greqisë në pikëpamjen e fuqisë portuale me një lëvizje të vetme. Vendi fqinj i njohur për fuqinë detare dhe portuale nuk mund ta ketë pozicionin e Vlorës. Pra, për të pasur porte të tilla kontenierësh, e kjo për shkak të ishujve të shumtë që pengojnë manovrueshmërinë e anijeve të mëdha që bëjnë transporte të kësaj natyre. Po me një lëvizje të vetme Shqipëria kalon vendin më të begatë që ka pozicion tranzit po si ajo, Sllovenisë, e cila nuk ka mundësinë e ndërtimit të porteve të kësaj natyre dhe për shkak të brigjeve të vogla detare.
Është fare e thjeshtë të kuptohet se Porti i Vlorës fut brenda tij një pjesë të transporteve të vendeve të Ballkanit, duke e shumëfishuar me këtë rast edhe rëndësinë e tij.
Po pse papritur Vlora e fiton këtë rëndësi të jashtëzakonshme? Kjo pyetje fare normale në një vend të varfër si yni që nuk bën dot as lobingje të karakterit të rëndësishëm, e që me këtë mundësi cenon favoret e vendeve fqinjë në pikëpamje ekonomike?
Projektet e ngjashme mund të zhvillohen dhe gjetkë dhe nuk është ndonjë gjë e madhe të të nxjerrin të tjerët nga loja. Greqia e zëvendësoi artificialisht Korridorin e Tetë me rrugën “Egnatia të Re” dhe Vlorën me Portin e Igumenicës. Po natyrisht histori të tilla nuk mund të vazhdojnë gjatë. Lojën e fitojnë në fund interesat reale që lidhen me përfitime reale. Transporti i mallrave nëpërmjet Europës ka shumë mundësi zhvillimi dhe në projektet e disa viteve më parë u pa dhe ndërtimi në Alpet edhe të disa veprave të tjera. Po përsëri kjo duket e pamjaftueshme. Vlora ashtu si Giro Tauro në Itali plotëson nevoja të mëdha dhe në këto nevoja shihen jo vetëm ato ekonomike, por dhe më gjerë. Ndërkaq siç u theksua dhe më sipër, mundësitë duken të vështira për përfitime, nëse Shqipëria do të kishte në dispozicion vetëm Durrësin.
Pse e shpëton Vlora Shqipërinë?
Përsëritur njëqind herë deri në bezdi. Ndërtimi i një vendi i përngjet ndërtimit të teorive fondamentale shkencore, të cilat vendosin në krye të tyre Principin natyror. Shoqëruar nga një Aparat matematik, i cili pasqyron domethënien e Principit besnikërisht në pikëpamje kuantitative. Në analogji; rolin e Principit natyror kur ndërtohet një vend e luajnë dy shtylla. Së pari, modernizimi i resurseve natyrore që trashëgohen prej të parëve dhe pozicioni gjeografik ndaj të tjerëve. Shqipëria e vjetër ishte vend tranzit dhe blegtoral. Shqipëria e kohës së Turqisë ishte vetëm vend blegtoral, pasi pozicioni i saj u shndërrua nga tranzit në periferik. Shqipëria deri në kohën e Hoxhës ishte e detyruar të ishte vetëm vend blegtoral. Pra rronte vetëm brenda një shtylle zhvillimi. Në vitin 1936, sipas Institutit të Statistikave të Romës ajo zinte vendin e parë për 1000 banorë me diferencë të madhe nga çdo vend i Europës për numrin e bagëtisë së imët. Dhe ndante vendin e parë bashkë me Zvicrën që është dhe sot kampion në numrin e lopëve.
Shqipëria e Hoxhës i theu dy shtyllat natyrale të zhvillimit. Ajo humbi pozicionin tranzit të saj duke u izoluar. Ajo humbi aftësinë e të qenit vend blegtoral, duke çuar fshatarin të blinte qumësht në qytet dhe shkatërrimit të marrëdhënieve me pronën.
Një vend i tillë që thyen rrugën natyrale të zhvillimit, pavarësisht përpjekjeve titanike të popullit të vet e ka të sigurt mjerimin dhe duhet të ushqehet me miell hua nga jashtë.
E njëjta gjë ndodh dhe sot. Ne nuk jemi një vend tranzit. Nuk kemi as porte, as rrugë për këtë strategji zhvillimi. Ne nuk mund të avancojmë blegtorinë dhe ato që lidhen me të pasi nuk kemi ende marrëdhënie të qarta pronësie. Andaj vendi është i mjerë dhe ashtu si në kohën e Hoxhës, pavarësisht përpjekjeve tona mbahet me miell hua nga jashtë. Po sot jo nga rusë e kinezë, por nga emigracioni.
Me Portin e Vlorës, Shqipëria vendos shtyllën e parë, atë të qenies së një vendi tranzit. Me vendosjen e marrëdhënieve të pronësisë në formë të qartë, Shqipëria lejon vendosjen e shtyllës së dytë natyrale të zhvillimit të saj, të blegtorisë dhe gjithë infrastrukturës industriale që vjen prej saj.
Pa këto dy shtylla natyrale zhvillimi nuk mund të shkojmë gjëkundi. Do të përpëlitemi si në kohën e Hoxhës apo të sotme, duke zhvilluar apo eksperimentuar histori aventurierësh. Që në fundin e tyre bien mjerimin e njohur.
Andaj Vlora e shpëton prapë Shqipërinë. Po e shpëton njëherë e përgjithmonë. Pa të nuk bëjmë dot asgjë, nuk vemë dot asgjëkund!


Gazeta Panorama

[brooklyn2007]

Shume investim i rendesishem. E kam degjuar kete lajm te bardhe disa dite para. Tashme Shqiperise i shtohet nje aset shume i rendesishem ne infrastrukturen detare dhe ekonomine e saj. Pergezime qeverise nese arrin ta veje ne jete kete projekt. Megaprojekte te tilla behen perhere shtysa per te thithur megaprojekte te reja ne fusha te ndryshme te vendit sic jane infrastruktura rrugore (Korridori 8), projekte energjitike dhe investime ne sektoret e tjere te ndertimit.

[Duaje Siveten]

shum po shndrit aj diell, e pak po nxeh ...

shum shirita u prene, e uje nuk ka ...