Drejtesia pa Triumf !!!

[Bl3ri]

Një vit pas vrasjes së policit të Njësitit Elitë të ShPK-së, Triumf Riza, policia ende nuk ka arrestuar të dyshuarin kryesor, Enver Sekiraqën. Më 14 tetor të këtij viti pritet të mbahet gjykimi për tre të arrestuarit tjerë të dyshuar për këtë vrasje. Për vendndodhjen Sekiraqes, burime të ShPK-së, supozojnë se shpeshherë shihet në veri të Mitrovicës.

Dafina Myrtaj
dafina.myrtaj@gazetaexpress.com

Prishtinë,29 gusht—Një vit pas vrasjes që tronditi të gjithë kosovarët, përkundër faktit që disa nga personat e dyshuar janë arrestuar dhe tani presin gjykimin për krimin e bërë, ende tre prej të dyshuarve kryesorë gjenden në arrati, duke i ikur drejtësisë. Enver Sekiraqa, Ilir dhe Rrahim Abdullahu janë tre të arratisurit
që akuzohen për bashkëveprim në kryerjen e vrasjes së policit Triumf Riza. Pas kërkimit të dështuar nga policia e Kosovës për arrestimin e tyre, tashmë që prej rreth dy muaj e gjysmë në kërkim të tyre është vënë edhe policia ndërkombëtare.
Që prej datës 17 qershor, pas kërkesës së lëshuar në fillim të këtij vitit nga gjyqtari i Procedurës Paraprake në Prishtinë, fotografia dhe të dhënat e Enver Sekiraqës, i njohur me pseudonimin ‘Qopa’ gjenden në listën e të kërkuarve
botërorë. Kërkimi i tij tashmë është shpallur për shkak të kryerjes së veprës
penale të cilësuar si vrasje e rëndë. Për të njëjtën vepër, në kërkim janë shpallur edhe Rrahim Adullahu i njohur me pseudonimin ‘Rrumqi’ dhe Ilir Avdullahu i njohur si ‘Liza’. Për vendndodhjen e të kërkuarit Enver Sekiraqa, burime të ShPK-së supozojnë se ky person shpeshherë shihet në veri të Mitrovicës. Në 30 gusht të vitit të kaluar, rreth orës 15 e 40, polici Triumf Riza është qëlluar me armë zjarri nga i dyshuari Arben Berisha, pjesëtar i grupit ‘Sekiraqa’. Zyrtarët policorë dyshojnë se ky akt ishte kryer me urdhrin dhe organizimin si dhe financimin e të dyshuarit kryesor Enver Sekiraqa. Burime të ShPK-së pohojnë se përveç shumë fakteve dhe dëshmive të tjera, është e rëndësishme fakti i dorëzimit të dyshuarit
Arben Berishës në polici, që ishte bërë pas marrëveshjes së eprorëve të lartë të ShPK-së dhe anëtarëve të grupit Sekiraqa. “Kjo marrëveshje e bërë në mes
të eprorëve të ShPK-së dhe grupit Sekiraqa të len të kuptohet se pas çdo veprimi në këtë vrasje dhe pas saj qëndron i dyshuari Enver Sekiraqa”, thotë ky zyrtar policor. Zyrtarët policorë besojnë se Triumf Riza është vrarë nga grupi Sekiraqa për shkak të hakmarrjes, pasi ka pasur probleme të vazhdueshme që nga koha kur ishte inkuadruar në polici. “Në mes të policit Riza dhe të dyshuarit Enver Sekiraqa konfliktet janë thelluar dhe më shumë në kohën kur ai kishte filluar të ketë lidhje me këngëtaren Adelina Ismaili”, thotë ky zyrtar i ShPKsë në kushte anonimiteti. Megjithatë, problemet në mes të policit Riza dhe Sekiraqës ishin bërë edhe më serioze pas incidentit në ‘Swiss Cassino’, ku Triumf Riza së bashku me shokun e tij, Arben Selmanaj ishin sulmuar me armë zjarri nga grupi ‘Sekiraqa’. Ky burim i ShPK-së pohon se pas këtij rasti, sulmet fizike dhe
kërcënimet ishin intensifikuar nga ky grup kriminal, ku të gjitha rastet e kërcënimeve i ndjeri Riza kishe raportuar në polici. Pas vrasjes së policit Riza, për
të shmangur të njëjtin fat tragjik, mësohet se polici Arben Selmanaj ka ikur nga Kosova për të vazhduar jetën e tij në Amerikë. Pa u bërë as një muaj nga vrasja e policit Riza, më 24 shtator të vitit të kaluar, nga një shpërthim i fuqishëm në lagjen ‘Dardania’ në Prishtinë, i shkaktuar nga 10 kilogramë eksploziv, kishin humbur jetën Naim Murati nga fshati Bresalc i Gjilanit dhe Pleurat Sllamniku nga Prishtina, si dhe janë plagosur nëntë të tjerë. Menjëherë pas këtij incidenti të ndodhur, duke u bazuar në faktin se pak para shpërthimit në vendin e ngjarjes ishin parë vetura të SHPK-së, policia e UNMIKut kishte bastisur zyrat e Njësitit
Special të ShPK-së në Ferizaj. Sipas burimeve të ShPK-së, është Enver Sekiraqa ai që kishte urdhëruar njerëz të caktuar të kryejnë këtë shpërthim. Përkundër faktit që për hetimin e këtij incidenti është krijuar një grup hetuesish vendorë dhe ndërkombëtare, ende asgjë konkrete nuk është zbuluar.
Pas konfirmimit të aktakuzës, ndaj të dyshuarve Arben Berishës, Fitim Avdiut dhe Agron Eminit, pritet që së shpejti të mbahet gjykimi. Gjykatësi në Gjykatën e Qarkut, Mejdi Dehari konfirmon se gjykimi për këta tre persona pritet të
mbahet më datën 14 tetor, në orën 10 e 30.

[Bl3ri]

Policia bastis shtëpitë e tre të kërkuarve, Sërish dështon operacioni për kapjen e Sekiraqës, Tri shtëpi, ajo e Enver Sekiraqës, Ilir Avdullahut dhe Rrahim Avdullahut, janë bastisur nga njësitë speciale të Policisë së Kosovës, në orët e hershme të së shtunës, mirëpo aty nuk janë gjetur tre të kërkuarit...

Prishtinë, 25 tetor
Njësitë speciale të Policisë së Kosovës sërish kanë trokitur në dyert e shtëpisë së Enver Sekiraqës, por edhe këtë radhë dështimi ishte në anën e policisë. I dyshuari, Enver Sekiraqa, dhe dy shokët e tij nuk ndodheshin në shtëpi në momentin kur policia është futur për t’i arrestuar. Tri shtëpi, ajo e Enver Sekiraqës, Ilir Avdullahut dhe Rrahim Avdullahut, janë bastisur nga njësitë speciale të Policisë së Kosovës, në orët e hershme të datës 25 tetor, mirëpo aty nuk janë gjetur tre të kërkuarit. Sabrie Kamberi, zëdhënëse e Policisë, ka konfirmuar për “Kosova Sot” se lidhur me rastin e vrasjes së policit Triumf Riza, për të cilin gjykata ka lëshuar tri fletarrestime, policia ka bastisur tri lokacione të ndryshme.

Operacioni
“Në orët e hershme të mëngjesi, të datës 25 tetor, njësitë speciale të Kosovës janë futur në shtëpitë e të dyshuarve, por të kërkuarit nga policia nuk kanë qenë në shtëpi”, është shprehur Kamberi. Ajo nuk ka dhënë detaje të tjera se a ka pasur informatë policia se të dyshuarit janë duke qëndruar në shtëpi apo jo. Kamberi e ka ripërsëritur apelin e policisë për të gjithë qytetarët, të cilët kanë informata për vendndodhjen e këtyre të dyshuarve, që ta njoftojnë policinë. Të kërkuar edhe nga Interpoli, tre të akuzuarit kanë filluar ta krijojnë mitin se janë të pakapshëm, të paktën ky është rasti i tretë ku policia e Kosovës ndërmerr operacion për kapjen e tyre dhe operacioni rezulton me dështim. Ditët e para kur ishte shpallur fletarrestim ndërkombëtar për këta tre persona, policia kishte dalë me një informatë, në të cilën e ngrehte dyshimin se këta të akuzuar po qëndronin në pjesën veriore të Mitrovicës, ku dhe janë të pakapshëm për policët shqiptarë të PK-së. Mirëpo, akulli i kësaj thënie thyhet në mes shtatorin e këtij viti, kur policia bastis një lokal në lagjen ‘Kodra e Diellit’, në të cilin kishte marrë informata se ndodhej Sekiraqa. Policia pranon se është parë Sekiraqa në Prishtinë, por nuk ka arritur ta arrestojë. Për të mos i thënë kësaj mjaft, disa ditë më vonë, jozyrtarisht, policia pati pranuar se ka pasur njoftime se Sekiraqa kishte qëndruar edhe dy ditë më parë në kryeqytet.

Aktakuza
Pas kërkesës nga gjyqtari i procedurës paraprake, Enver (Hamit) Sekiraqa (1973), i njohur me pseudonimin “Qopa”, Rrahim Avdullahu, i lindur në vitin 1983, me pseudonimin “Rrumqi” dhe Ilir Avdullahu, i lindur më 1982, i njohur me pseudonimin “Liza”, vazhdojnë të mbesin në kërkim nga ana e PK-së. Kundër këtyre personave, zyra e Prokurorisë Speciale në Prishtinë ka marrë aktvendim për zhvillimin e hetimeve në drejtim të veprës penale, vrasje e rëndë në bashkëveprim, ndërsa, për të dyshimtin Enver Sekiraqa, edhe për dy vepra penale të dhunimit nga neni 193 të KPPK-së, dy vepra penale të detyrimit dhe për një vepër penale lëndim i rëndë trupor. Të njëjtit, kohë më parë, me vendim të Gjykatës Supreme, i është fuqizuar dënimi prej rreth 2 vjetësh për një vepër penale. Për tre të kërkuarit Prokuroria Speciale e Kosovës ka ngritur aktakuzën, e cila thotë se Enver Sekiraqa, Rrahim e Ilir Abdullahu janë planifikuesit e vrasjes së policit Triumf Riza, pasditen e 30 gushtit të vitit të kaluar. Aktakuza e ngarkon Sekiraqën dhe të akuzuarit e tjerë se kanë angazhuar Arben Berishën për ta qëlluar Triumf Rizën. Ndryshe, para se të shpallej në kërkim për veprat penale, të cilat kanë të bëjnë me vrasjen e policit Triumf Riza, Enver Sekiraqa ishte kërkuar disa herë nga policia në shtëpinë e tij. Atë kohë Sekiraqa ishte pjesë e një procesi gjyqësor në Gjykatën e Qarkut dhe mbrohej në liri, mirëpo mosparaqitja e tij në seanca gjyqësore kishte shtyrë gjykatën që ta autorizonte policinë për ta sjellë me forcë në gjykatë. Policë të thjeshtë të PK-së kishin shkuar disa herë në vendbanimin e Sekiraqës për ta zbatuar urdhrin e gjykatës, mirëpo asnjëherë ata nuk kishin hasur në të.

K. GASHI