Banka e Shqiperise dhe Pastrimi i Parase

[Duaje Siveten]

Tirana Observer E Diel , 31 gusht 2008

Këmbimi i parave

Shkruar nga Elton Tafaruçi

A ka gisht Banka e Shqipërisë në riciklimin e parave të pista? Sigurisht me para të pista nënkuptohen ato të ardhura nga trafiku i armëve, prostitucionit dhe çfarëdolloj aktiviteti tjetër joligjor. Sikur kjo pyetje të ishte bërë shumë kohë më parë, tani ndoshta do të kishim edhe një përgjigje të pjesshme. Dy ditë më parë televizioni “Ora News” nëpërmjet një kronike hapi shpeshherë edicionet kryesore me lajmin se sektori i krimit financiar pranë Drejtorisë së Policisë së Tiranës ka nisur hetimet për personazhe të këtij institucioni, të cilët favorizojnë tregun e jashtëligjshëm të kambistëve, duke marrë masa më shtrënguese për agjencitë e licencuara të këmbimit të parave.

Po kush janë format dhe mënyrat që segmente të caktuara të kësaj banke përdorin për të ricikluar këto shuma parash dhe përse për këtë riciklim përdoren kampistët, të cilët tashmë janë nxjerrë jashtë ligjit prej më shumë se një viti?

Është e vështirë që në këtë fazë hetimesh të japësh një mendim të saktë, dhe kjo i përket më shumë organeve kompetente. Por ajo që shqetëson më shumë është fakti se ky trafikim parash të pista vjen nga instituti më prestigjioz dhe i konsoliduar bankar në vend. Dhe jo vetëm kaq, por në një moment kur ideja e hapjes së një burse në Shqipëri, pas dështimit të disa viteve më parë, tani po merr sërish formë dhe konsideratë. Pikërisht në këtë moment organet e hetimit japin alarmin se institucioni që vendos për normat e interesit të lekut shërben si mbikëqyrës dhe rregullator mbi të gjithë tregun e bankave të nivelit të dytë tashmë ka hyrë në optikën e hetimeve të antikrimit financiar.

Dyshimet mbi personazhe të caktuara të kësaj banke të implikuar në pastrimin e parave dhe kthimi i bankës qendrore në një lavatriçe për shumë elementë të krimit të organizuar i hapin rrugën një perspektive shumë ogurzezë, cikli i së cilës nuk mbyllet vetëm me kambistët që shkëmbejnë në qendër të kryeqytetit, të patrazuar prej askujt. Ai shkon më tej dhe është më preokupues kur bëhet falë infiltrimit të elementëve të këtij krimi të ri në Shqipëri që, për nga mënyra se si vepron dhe si sillet, vazhdon të mbesë i pazbuluar tërësisht. Kjo do të jetë një nga sfidat e ardhshme të organeve hetimore, të cilat ndodhen përballë një fenomeni të ri, i cili nuk mund të luftohet më me mjete tradicionale.

Ndërkohë tashmë është i njohur fakti se në vendin tonë ka hyrje dhe dalje të një sasie të konsiderueshme parash, origjina e të cilave në shumë raste nuk dihet ose është e dyshimtë. Nevoja që këto shuma parash të rivlerësohen dhe të mos mbeten vetëm një mal me letra shtyn mjaft prej poseduesve që të kërkojnë forma të ndryshme për t’i rihedhur edhe një herë në treg duke ridhënë vlerën e vërtetë dhe jo atë të barazvlefshëmrisë që bëhet me armët apo me kokainën. Kështu që mënyra dhe autoriteti i vetëm, i cili mund të bëjë këtë rivlerësim, mbetet banka qendrore apo ato të nivelit të dytë.

Nuk është e rastësishme që antikrimi financiar i Drejtorisë së Policisë së Tiranës, pak kohë më parë dha alarmin mbi këtë fenomen të ri, i cili kaloi pa shumë vëmendje në mediat shqiptare, me përjashtime të vogla. Por ja që frika është rikthyer dy ditë parë kur në vorbullën e hetimeve kanë përfunduar vetë personazhe të kësaj banke, e cila rrezikon që në këtë mënyrë të kthehet në një parajsë fiskale për krimin brenda vendit, por në një të ardhme mund të joshë edhe atë ndërkombëtar, i cili është gjithmonë i kujdesshëm për të përfituar nga dobësitë dhe avantazhet që i ofrohen nga një sistem i dobët bankar.

[juanito02]

E clodheni kot me keto pune.
Politikanet tane jan mafia vete dhe perdorin kriminelet e grades pare per ti xhestuar parate ne Shqiperi. Bankat tona as qe pyesin fare per leket qe hyne e dalin se jane politikanet qe e zene per gryke banken te heshte.
Ja i zune ca kriminele se u doli boja ka plot te tjere ne kulm te aktivitetit e te fitimit.
Mos u habisni qe shumica e bizneseve te fuqishem kane prapa politikane te cdo ngjyre.
Me pak fjale shteti yne eshte 100% ne dore te mafies dhe mafia eshte vete politika.