Denohet Grupi i Dukagjinit

[ILovePejaa]

“Grupi i Dukagjinit” dënohet me gjithsej 31 vjet burg; Daut Haradinaj dënohet me 5 vjet

PRISHTINE, 17 dhjetor - Trupi gjykues ndërkombëtar në Prishtinë dha sot dënimin prej 31 vjetësh për 5 të akuzuarit e të ashtuquajturit “Grupi i Dukagjinit”. Kryetari i Trupit gjykues Moris Tevenad tha se të akuzurait dënohen për heqje të paligjshme të lirisë që si pasojë ka sjellë vdekjen.
Idriz Balaj u dënua me 15 vjet burg, Daut Haradinaj dhe Bekim Zekaj u dënuan me nga 5 vjet burg, Ahmet Elshani dhe Ramush Ahmetaj me nga 3 vjet burg. Sipas trupit gjykues ndërkombëtar, të gjithë të akuzuarit kanë kryer në bashkëpunim heqjen e paligjshme të lirisë në kundërshtim me nenin 63 të Ligjit Penal të Serbisë dhe me nenin 22 të Ligjit Penal të Jugosllavisë. “Po ashtu kanë bërë burgim të paligjshëm që ka si pasojë vdekjen në kundërshtim me nenin 63 të LPS-së dhe nenin 22 të LPJ”, tha kryetari i trupit gjykues Moris Tevenad.
Avokatët e pesë ish-pjesëtarëve të ish-Ushtrisë Çlirimtare të Kosovës e quajtën vendimin e gjykatës një absurditet shumë të madh. “Vendimin e sotëm e konsiderojmë një absurditet shumë të madh, kjo është padrejtësia më e madhe që mund të bëhet në emër të drejtësisë”, tha Nikë Shala, mbrojtës i njërit nga pesë të dënuarit, Idriz Balajt.
“Duke u bazuar në deklaratat e të akuzuarve, të cilët në mënyrën kategorike kanë mohuar veprat penale të cilat iu vijnë në barrë, një pjesë të tillë e kanë mohuar edhe vetë dëshmitarët okularë, ndërkohë që kjo është një vërtetim shumë i mirë se të gjithë të akuzuarit kanë qenë të pafajshëm dhe konsideroj se ky vendim është i padrejtë”, ka thënë avokati Teki Bokshi.
Edhe avokati Mustafa Radoniqi tha se vendimi ishte jashtëzakonisht i rëndë. “Ne do ta shikojmë aktgjykimin në hollësi dhe do të shohim se çka ka gjetur gjykata që e ka shqiptuar një dënim kaq të rëndë”, tha ai.
Kreu i Aleancës për Ardhmërinë e Kosovës, Ramush Haradinaj, vëllai i të cilit Dauti u dënua me 5 vjet burg, vendimin e gjykatës e ka quajtur mjaft tendencioz. “Mund të them se ky vendim ishte më tepër tendencioz dhe politik se sa i bazuar në fakte. Mirëpo, sidoqë të jetë ky është vendim i ndërkombëtarëve, të cilët një ditë do të shkojnë, kurse ne do të mbesim këtu”, tha Haradinaj.
Të pesë të dënuarit janë arrestuar në qershor të këtij viti pasi një prokuror ndërkombëtar në Pejë ngriti aktakuzë kundër tyre.
----------------------------
no commente